1 ପ୍ରବୁ ମ଼ସାଇଁ ଏଲେଇଚେସି, "ନା଼ନୁ ପା଼ର ଅ଼ଡ଼େ ମିସର ଦେ଼ସା ଲାକ ଅ଼ଡ଼େ ର଼ ଡଣ୍ତ ତାଇଁ; ଏଚେଟିଏ ଏ଼ୱାସି ମିଙ୍ଗେ ଈ ଟା଼ୟୁଟି ହାଜାଲି ହିୟାନେସି; ଇଞ୍ଜାଁ ହାଜାଲି ହୀନି ବେ଼ଲାତା ଏ଼ୱାସି ମିଙ୍ଗେ ସାତେଏ ପେ଼ର୍‌ହା ପାଣ୍ତାନେସି। 2 ଏ଼ଦାଆଁତାକି ନୀଏଁ ମୀ ଲ଼କୁତି କୀର୍କାଣା ୱେହ୍‌ମୁ, ବାରେ ଆ଼ବାୟାଁ ତାମି ପା଼ଡ଼ିତାରି ତା଼ଣାଟି ଅ଼ଡ଼େ ବାରେ ଇୟାସିକା ଜିକେଏ ଜାହାରା ପା଼ଡ଼ିତି ଲ଼କୁ ତା଼ଣାଟି ୱେଣ୍ତି ଅ଼ଡ଼େ ବାଂଗାରା ସାଜୁ ରୀସାଅ଼ପୁ।" 3 ଅ଼ଡ଼େ ପ୍ରବୁ ମିସର ଦେ଼ସାତି ଲ଼କୁ ନ଼କିତା କାର୍ମା ମେସ୍‌ପି କିତେସି, ଇଞ୍ଜାଁ ମିସର ଦେ଼ସାତି ଲ଼କୁ ଅ଼ଡ଼େ ପା଼ରତି ହ଼ଲିୟାଙ୍ଗା ନ଼କିତା ମ଼ସା ହା଼ରେକା ମା଼ନିଗାଟାସି ଆ଼ତେସି।

4 ଏଚେଟିଏ ମ଼ସା ଏଲେଇଚେସି, "ପ୍ରବୁ ଈ କାତା ୱେସିମାନେସି ନା଼ନୁ ନୀଞ୍ଜୁ ମାଦି ନେ଼କେରିତା ମିସର ଦେ଼ସା ମାଦିଟି ହାଇଁ। 5 ଏଚେଟିଏ ସିଂଗାସାଣିତା କୁଗିନି ପା଼ରତି ପା଼ଣ୍‌ୱା ମୀର୍‌ଏଣାଟିଏ ଜେତା ନୂୟିନି ହ଼ଲେଣି ପା଼ଣ୍‌ୱା ମୀର୍‌ଏଣା ପାତେକା ମିସର ଦେ଼ସାତି ବାରେ ପା଼ଣ୍‌ୱା ଅ଼ଡ଼େ ଜ଼ନ୍ତ ଜୀୱେଡ଼ିତି ମୂଲୁ ବେତା ହା଼ନୁ। 6 ଈଦାଆଁତାକି ବାରେ ମିସର ଦେ଼ସାତା, ଏ଼ନିକିଁ ଏଚେଲାୱା ଆ଼ହା ହିଲେଏ ଅ଼ଡ଼େ ଆ଼ଏ, ଇଲେକିଁ ହା଼ରେକା ଦୁକୁତି ଡ଼ୀକି ଆ଼ନେ। 7 ସାମା ପ୍ରବୁ ମିସରତି ଲ଼କୁ ତା଼ଣାଟି ଇସ୍ରାୟେଲ ଲ଼କୁଣି ଏଟ୍‌କା କିନେସି, ଈଦାଆଁ ଏ଼ନିକିଁ ମୀରୁ ପୁଞ୍ଜେରି, ଏ଼ଦାଆଁତାକି ଇସ୍ରାୟେଲ ମୀର୍‌କା ବିତ୍ରା ମାଣ୍‌ସି କି ଜ଼ନ୍ତଜିୱେଡ଼ି ଇଚିହିଁ ର଼ ନେଃଉଡ଼ି ଜିକେଏ ମୁସ୍‌କେଏ। 8 ଏଚେଟିଏ ନୀ ଈ ବାରେ ହ଼ଲିୟାଙ୍ଗା ତା଼ର୍ୟୁଁ ଲେ଼ସାହାଁ ନା଼ ତା଼ଣା ୱା଼ନେରି, ଅ଼ଡ଼େ ନାଙ୍ଗେ ଜହରା କିହାଁ ଏଲେଇଞ୍ଜାନେରି, ନୀନୁ ଅ଼ଡ଼େ ନୀ ତଲେ ମାନି ବାରେ ଲ଼କୁ ହ଼ଚା ହାଜୁ; ଏଚେଟିଏ ନା଼ନୁ ହ଼ଚାହାଇଁ।" ଏଚେଟିଏ ମ଼ସା ହା଼ରେକା କାର୍‌ବି ଆ଼ହାଁ ପା଼ର ତା଼ଣାଟି ହ଼ଚାହାଚେରି।

9 ପ୍ରବୁ ମ଼ସାଇଁ ୱେସାମାଚେସି, ନା଼ନୁ ଏ଼ନିକିଁ ମିସର ଦେ଼ସାତା ନା଼ କାବାଆ଼ନି କାମାୟାଁ ହା଼ରେକା କିଇଁ, ଈଦାଆଁତାକି ପା଼ର ମୀ କାତା ୱେନଅସି। 10 ଇଞ୍ଜାଁ ମ଼ସା ଅ଼ଡ଼େ ହାରଣ ପା଼ର ନ଼କିତା ଈ ବାରେ କାବାଆ଼ନି କାମାୟାଁ କିହାମାଚେରି; ସାମା ପ୍ରବୁ ପା଼ରତି ହିୟାଁ ଆ଼ଟ୍‌ୱା କିହାଲିଏ, ଏ଼ୱାସି ମିସର ଦେ଼ସାଟି ଇସ୍ରାୟେଲ ଲ଼କୁଣି ହାଜାଲି ହୀଆତେସି।