ହାନାୟି 26

ମାହାପୂରୁତି ତୂମୁ

1 ଅ଼ଡ଼େ ନୀନୁ ଦସଗଟା ଟା଼ଟିନି ହିମ୍ବରିକା ତଲେ ତୂମୁ ଇଲୁ ତିୟାରା କିଦି; ଏ଼ ବାରେ ଟା଼ଟନି ହିମ୍ବରିକା ଦବ୍‌ଲା ପା଼ତାଡ଼ା, ନୀଲି, ହେୟାଁ ଅ଼ଡ଼େ ନେତେରି ୱା଼ଣା ଲୂଲୁ ତଲେ ତିୟାରା ଆ଼ନୁ, ଏମ୍ବାଆଁ ତିୟାରା କିହାମାନି କିରୁବ ୱା଼ଣା ଡ଼ୟିନେ। 2 ଏ଼ ବାରେ ଟା଼ଟିନି ହିମ୍ବରିକା କଡ଼େ ଆ଼ଟା ହା଼ତା ଲାମ୍ବା ଅ଼ଡ଼େ ସା଼ରି ହା଼ତା ଅ଼ସାରା, ବାରେ ଟା଼ଟିନି ହିମ୍ବରିକା ରଣ୍ତିଏ ସମାନା ଆ଼ନୁ। 3 ଇଞ୍ଜାଁ, ପା଼ସାଗଟା ଟା଼ଟିନି ହିମ୍ବରିକା ରଣ୍ଡିଏ ତା଼ଣା ଆଣ୍ତ୍‌ୱି ଆ଼ନୁ, ଅ଼ଡ଼େ ପା଼ସାଗଟା ଟା଼ଟିନି ହିମ୍ବରିକା ଅ଼ର ୱାକି ଆଣ୍ତ୍‌ୱି ଆ଼ହାଁ ଡ଼ୟିନୁ। 4 ଅ଼ଡ଼େ ଏ଼ ଆଣ୍ତ୍‌ୱି ଆ଼ନି ଟା଼ୟୁତା ମୂଲୁ ଅ଼ଡ଼େ ରା଼ନି ଟା଼ଟନି ହିମ୍ବରି ଅ଼ଟିତା ନୀଲି ୱା଼ଣାତି ଲୂଲୁତି ପା଼ନ୍ଦା ଡ଼ୟିନେ ଅ଼ଡ଼େ ଅ଼ର ଟା଼ଟିନି ହିମ୍ବରିତି ଅ଼ଟିତା ଜିକେଏ ଏଲେଏ କିଦେରି। 5 ଇଚିହିଁ ମୂଲୁ ଟା଼ଟିନି ହିମ୍ବରିକାତି ଅ଼ଟିତା ଦୁଇ କ଼ଡ଼ି ଦସଗଟା ପା଼ନ୍ଦା କିଦେରି ଅ଼ଡ଼େ ଅ଼ର ଟା଼ଟିନି ହିମ୍ବରିକା ଅ଼ଟିତା ଜିକେଏ ଦୁଇ କ଼ଡ଼ି ଦସଗଟା ପା଼ନ୍ଦା କିଦେରି; ଏ଼ ରିକୱାକିତି ପା଼ନ୍ଦାୟାଁ ହାରିମ଼ହାଣା ଡ଼ୟିନୁ। 6 ଇଞ୍ଜାଁ, ଦୁଇ କ଼ଡ଼ି ଦସଗଟା ବାଂଗାରା ଡ:ମ୍ପାୟାଁ କିହାଁ ଡ:ମ୍ପାୟାଁଣା ଟା଼ଟିନି ହିମ୍ବରିକା ରଣ୍ତି ରଣ୍ତାଣି ତା଼ଣା ଆଣ୍ତିନୁ; ଏଚେଟିଏ ଏ଼ଦି ର଼ ବାସାଟା଼ୟୁ ଆ଼ନେ।

7 ଅ଼ଡ଼େ ଏ଼ ବାସାଟା଼ୟୁ ମୁହେଁ ପ୍ଡିକ୍‌ନି ତୂମୁ ତାକି ଗରି ବା଼ଣାୟାଁତି ଏଗାରଗଟା ଟା଼ଟିନି ହିମ୍ବରିକା ତିୟାରା କିଦି। 8 ଏ଼ ବାରେ ଟା଼ଟିନି ହିମ୍ବରିକାତି ଲାମ୍ବା କଡ଼େ ଦସ ହା଼ତା ଅ଼ଡ଼େ ଅ଼ସାରା ସା଼ରି ହା଼ତା; ଈ ଏଗାରଗଟା ଟା଼ଟିନି ହିମ୍ବରିକା ରଣ୍ତିଏ ସମାନା ଆ଼ନୁ। 9 ଏଚେଟିଏ ପା଼ସାଗଟା ଟା଼ଟିନି ହିମ୍ବରିକା ଦୂର୍‌ସାହାଁ ଏଟ୍‌କା ଇଟିଦି, ଅ଼ଡ଼େ ଅ଼ର ସ଼ଗଟା ଟା଼ଟିନି ହିମ୍ବରିକା ଏଟ୍‌କା ଇଟିଦି, ଇଞ୍ଜାଁ ଏ଼ୱାଆଁ ବିତ୍ରାଟି ସ଼ଲମ୍ବର ଟା଼ଟିନି ହିମ୍ବରି ଦୂଣାକିହାଁ ତୂମୁ ନ଼କିତା ଇଟିଦି। 10 ଅ଼ଡ଼େ ଜ଼ଡ଼ି କିନି ଟା଼ୟୁତି ମୂଲୁ ଅ଼ଡ଼େ ରା଼ନି ଟା଼ଟିନି ହିମ୍ବରି ଅ଼ଟିତା ଦୁଇ କ଼ଡ଼ି ଦସଗଟା ପା଼ନ୍ଦା କିଦି ଅ଼ଡ଼େ ଅ଼ର ଟା଼ଟିନି ହିମ୍ବରି ଜ଼ଡ଼ି କିନି ଟା଼ୟୁତି ଅ଼ଟିତା ଦୁଇ କ଼ଡ଼ି ଦସଗଟା ପା଼ନ୍ଦା କିଦି। 11 ଅ଼ଡ଼େ ପିତାଡ଼ାତି ଦୁଇ କ଼ଡ଼ି ଦସଗଟା ଡ:ମ୍ପାୟାଁ କିହାଁ ଏ଼ ପା଼ନ୍ଦାୟାଁଣା ପେନ୍ଦାହାଁ ତୂମୁ ଦ୍ରୁହ୍‌ଦି; ଏଚେଟିଏ ଏ଼ଦି ର଼ ତୂମୁ ଆ଼ନେ। 12 ଏ଼ ତୂମୁ ଟା଼ଟିନି ହିମ୍ବରିକାତି ହା଼ରିତି ବା଼ଗା, ଇଚିହିଁ, ଏମିନି ଆଦା ଟା଼ଟିନି ହିମ୍ବରି ହା଼ରାମାନେ, ଏ଼ଦି ଆଣ୍ତ୍‌ୱିଆ଼ନି ତୂମୁତି ଡା଼ୟୁ ୱାକି ଲେ଼ଜାହାଁ ଡ଼ୟିନେ। 13 ଅ଼ଡ଼େ ତୂମୁ ହିମ୍ବରିକାତି ଏମିନି ଲାମ୍ବା ବା଼ଗା ଈ ଦାରି ର଼ ହା଼ତା ଅ଼ଡ଼େ ଆତାଲା ଦାରି ର଼ ହା଼ତା ହା଼ରାମାନେ, ଏ଼ଦି ଆଣ୍ତ୍‌ୱିଆ଼ନି ତୂମୁତି ଈ ଦାରି ଅ଼ଡ଼େ ଏ଼ ଦାରିତି ପ୍ଡିକ୍‌ହାଲି ଲେ଼ଜାହାଁ ଡ଼ୟିନେ।

14 ଏଚେଟିଏ ମୀରୁ ନେତେରି ଗାଟି ମେ଼ଣ୍ତା ତ଼ଲୁ ତଲେ ତୂମୁତି ର଼ ତେପରି କିଦେରି, ଅ଼ଡ଼େ ଏ଼ଦାଣି ମୁହେଁ ସିସୁକ*26:14 ସିସୁକ/ସାମ୍‌ଦୁରିତି ପା଼ଲୁ ଊଟ୍‌ନି ଗ଼ଜିୟା ମୂତି ମୀନୁ ତ଼ଲୁ ସମାନା । ତ଼ଲୁ ତଲେ ର଼ ତେପରି କିଦେରି।

15 ଏଚେଟିଏ ନୀନୁ ବାସାଟା଼ୟୁ ତାକି ସିଟିମ ମା଼ର୍‌କାତି ନିପା ପା଼ଟାୟାଁ ତିୟାରା କିଦି। 16 ର଼ ପା଼ଟା ଦସ ହା଼ତା ଲାମ୍ବା ଅ଼ଡ଼େ ର଼ ହା଼ତା ଆଦା ଅ଼ସାରା ଆ଼ନୁ। 17 ଏଚେଟିଏ ରଣ୍ତିଏ ସମାନା ରୀ କଡାୟାଁ ପିଚିଦି; ଇଲେକିହିଁ ଆଣ୍ତ୍‌ୱିଆ଼ନି ତୂମୁତି ବାରେ ପା଼ଟାୟାଁ ପିଚିଦି। 18 ଅ଼ଡ଼େ ଆଣ୍ତ୍‌ୱିଆ଼ନି ତୂମୁ ତାକି ଏମିନି ବାରେ ପା଼ଟାୟାଁ କିଦି, ଏ଼ ବାରେ ଟିଃନି ୱାକି ତାକି କଡ଼େଗଟା ପା଼ଟାୟାଁ। 19 ଇଞ୍ଜାଁ, ଏ଼ କଡ଼େଗଟା ପା଼ଟାୟାଁ ଡ଼଼ଇ ଦୁଇ କ଼ଡ଼ି ୱେଣ୍ତିତି ପତ୍‌ପିଆ଼ତି କଟ୍‌ଲା କିଦି; ର଼ ପା଼ଟା ଡ଼଼ଇ ରୀ ପିଚିତି କଡାୟାଁ ପାଣ୍ତାଲି ରୀ ପତ୍‌ପିଆ଼ତି କଟ୍‌ଲା*26:19 ପତ୍‌ପିଆ଼ତି କଟ୍‌ଲା/ପା଼ଟା ଆ଼ଟ୍‌ୱା ତଲେ ନିପ୍‌ନାୟି । କିଦି, ଅ଼ଡ଼େ ଏଟ୍‌କାତି ପା଼ଟାୟାଁ ଡ଼଼ଇକା ଜିକେଏ ତାମି ରୀ ପିଚିତି କଡାୟାଁ ତାକି ରୀ ପତ୍‌ପିଆ଼ତି କଟ୍‌ଲା ଆ଼ନୁ। 20 ଇଞ୍ଜାଁ, ବାସା ଟା଼ୟୁତି ଅ଼ରୱାକି ଇଚିହିଁ, ଟେ଼ବ୍ରିୱାକି ତାକି କଡ଼େଗଟା ପା଼ଟାୟାଁ ଆ଼ନୁ। 21 ର଼ ପା଼ଟା ଡ଼଼ଇ ରୀ ପତ୍‌ପିଆ଼ତି କଟ୍‌ଲା ଅ଼ଡ଼େ ଅ଼ର ପା଼ଟା ଡ଼଼ଇ ରୀ ପତ୍‌ପିଆ଼ତି କଟ୍‌ଲା; ଇଲେକିହିଁ ୱେଣ୍ତିତି ଦୁଇ କ଼ଡ଼ି ପତ୍‌ପିଆ଼ତି କଟ୍‌ଲାୟାଁ ଆ଼ନୁ। 22 ତୂମୁତି ୱେ଼ଡ଼ା କୂଡ଼୍‌ନି ଡା଼ୟୁ ୱାକି ତାକି ସ଼ଗଟା ପା଼ଟାୟାଁ ଆ଼ନୁ। 23 ଇଞ୍ଜାଁ, ତୂମୁତି ଡା଼ୟୁ ୱାକିତି ରୀ କନତା ରୀ ପା଼ଟାୟାଁ ଆ଼ନୁ। 24 ଈ କନତା ମାନି ପା଼ଟାୟାଁ ଡ଼଼ଇଟିଏ ଲାକ ପାତେକା ଜ଼ଡ଼ି ଆ଼ହାଁ ତୂଡ଼ିୟା ପାତେକା କାଲ୍‌ୱି ଆ଼ନୁ, ରୀ କନତା ମାନି ରୀ ପା଼ଟାୟାଁ ଇଲେକିହିଁ ତିୟାରା ଆ଼ନୁ 25 ଏଚେଟିଏ ଏମ୍ବାତି ପା଼ଟାୟାଁ ଆ଼ଟାଗଟା ଆ଼ନୁ ଅ଼ଡ଼େ ଏମ୍ବାଆଁ ସ଼ଡ଼ଗଟା ୱେଣ୍ତିତି ପତ୍‌ପିଆ଼ତି କଟ୍‌ଲାୟାଁ ଆ଼ନୁ; ର଼ ପା଼ଟା ଡ଼଼ଇ ରୀ ପତ୍‌ପିଆ଼ତି କଟ୍‌ଲା ଅ଼ଡ଼େ ଏଟ୍‌କାତି ପା଼ଟାୟାଁ ଡ଼଼ଇ ରୀ ପତ୍‌ପିଆ଼ତି କଟ୍‌ଲା ଆ଼ନୁ।

26 ଅ଼ଡ଼େ ନୀନୁ ସିଟିମ ମା଼ର୍‌ନୁତି ଅର୍ଗଡ଼ି ତିୟାରା କିଦି; ତୂମୁତି ରକୱାକିତି ପା଼ଟାୟାଁଣା ପା଼ସାଗଟା ଅର୍ଗଡ଼ି ଅ଼ଡ଼େ ଅ଼ର ୱାକିତି ପା଼ଟାୟାଁଣା ପା଼ସାଗଟା ଅର୍ଗଡ଼ି ତିୟାରା କିଦି। 27 ତୂମୁତି ଅ଼ର ୱାକିତି ପା଼ଟାୟାଁଣା ପା଼ସାଗଟା ଅର୍ଗଡ଼ି ଅ଼ଡ଼େ ତୂମୁତି ୱେ଼ଡ଼ା କୂଡ଼୍‌ନି ଡା଼ୟୁ ୱାକିତି ପା଼ଟାୟାଁଣା ପା଼ସାଗଟା ଅର୍ଗଡ଼ି ଆ଼ନୁ। 28 ଇଞ୍ଜାଁ, ମାଦିତି ଅର୍ଗଡ଼ି ପା଼ଟାତି ମାଦିଏ, ଈ ତୂଡ଼ିୟାଟିଏ ଅ଼ର ତୂଡ଼ିୟା ପାତେକା ଏନେ। 29 ଅ଼ଡ଼େ ଏ଼ ବାରେ ପା଼ଟାୟାଁ ବାଂଗାରା ତଲେ ୱା଼ରି କିଦି ଅ଼ଡ଼େ ଅର୍ଗଡ଼ି ପେନ୍ଦାଲି ବାଂଗାରା କାଡ୍‌ୱାୟାଁ କିଦି, ଇଞ୍ଜାଁ, ଏ଼ ବାରେ ଅର୍ଗଡ଼ିକା ବାଂଗାରା ୱା଼ରି କିଦି। 30 ଇଲେକିହିଁ ତୂମୁ କିହାଲି ଏମିନି ହ଼ରୁ ଲାକ ନିଙ୍ଗେ ତ଼ସାମାଞ୍ଜାଇଁ; ଏଲେକିହିଁ ଏ଼ଦାଆଁ ତିୟାରା କିଦି।

31 ଅ଼ଡ଼େ ନୀନୁ ନୀଲି, ହେୟାଁ, ନେତେରି ୱା଼ଣା, ରୁତି ଦବ୍‌ଲା ପା଼ତାଡ଼ା ଲୂଲୁ ତଲେ ଏଟ୍‌କା କିନି ହିମ୍ବରି ତିୟାରା କିଦି; ଏ଼ଦାଣି ନେହିଁ କାମା କିନାରି କାମା ତଲେ କିରୁବତି ୱା଼ଣା ଲେହେଁ କିୱିଆ଼ନେ। 32 ନୀନୁ ଏ଼ଦାଆଁ ବାଂଗାରା ୱା଼ରିକିହାଁ ସିଟିମ ମା଼ର୍‌ନୁତି ସା଼ରିଗଟା ମୁଣ୍ତାୟାଁ ଲାକ ଲେଦି; ଇଞ୍ଜାଁ ୱେଣ୍ତିତି ସା଼ରିଗଟା ପତ୍‌ପିଆ଼ତି କଟ୍‌ଲା ଲାକ ତାନି ବାଂଗାରା ଡ:ମ୍ପାୟାଁ ଲେଦି। 33 ଇଞ୍ଜାଁ ଏ଼ ବାରେ ଡ:ମ୍ପାୟାଁ ଡ଼଼ଇ ଏଟ୍‌କା କିନି ହିମ୍ବରି ଲେଚାନା, ଏ଼ ଏଟ୍‌କା କିନି ହିମ୍ବରି ବିତ୍ରା ରା଼ଜିମା଼ନା ପେ଼ଡ଼ା ତାଦି; ଏଚେଟିଏ ଏ଼ ଏଟ୍‌କା କିନି ହିମ୍ବରି ସୁଦୁ ଟା଼ୟୁ ଅ଼ଡ଼େ ହା଼ରେକା ସୁଦୁ ଟା଼ୟୁ ବିତ୍ରା ଏଟ୍‌କା କିନେ। 34 ଅ଼ଡ଼େ ନୀନୁ ହା଼ରେକା ସୁଦୁ ଟା଼ୟୁତା ରା଼ଜିମା଼ନା ପେ଼ଡ଼ା ମୁହେଁ ପା଼ପୁ ପ୍ଡିକ୍‌ନି ଡା଼ପ୍‌ଣା ଇଟିଦି। 35 ଏଟ୍‌କା କିନି ହିମ୍ବରି ପାଙ୍ଗାତା ବାଲାପା଼ଟା*26:35 ବାଲାପା଼ଟା/ମାହାପୂରୁକି ହେର୍‌ପିତି ରୂଟି ଇଟିନି ଟା଼ୟୁ । ଇଟିଦି ଅ଼ଡ଼େ ବାଲାପା଼ଟା ନ଼କିତା ବାସା ଟା଼ୟୁତି ଟିଃନି ୱାକି ଦୀୱଁ ମୁଣ୍ତା ଇଟିଦି ଅ଼ଡ଼େ ଟେ଼ବ୍ରି ୱାକି ବାଲାପା଼ଟା ଇଟିଦି।

36 ଅ଼ଡ଼େ ବାସା ଟା଼ୟୁତି ଦୁୱେରି ତାକି ନୀଲି, ହେୟାଁ, ନେତେରି ୱା଼ଣା ରୁତି ଦବ୍‌ଲା ପା଼ତାଡ଼ା ଲୂଲୁତି ସିତ୍ରା କା଼ବ୍ରା ପ୍ଡିକ୍‌ନି ହିମ୍ବରି ତିୟାରା କିଦି। 37 ଏ଼ ପ୍ଡିକ୍‌ନି ହିମ୍ବରି ତାକି ସିଟିମ ମା଼ର୍‌ନୁତି ପା଼ସାଗଟା ମୁଣ୍ତାୟାଁ କିହାଁ ବାଂଗାରା ୱା଼ରି କିଦି, ଇଞ୍ଜାଁ, ବାଂଗାରା ତଲେ ତାନି ଡ:ମ୍ପାୟାଁ ତିୟାରା କିଦି ଅ଼ଡ଼େ ଏ଼ଦାଣି ତାକି ପା଼ସାଗଟା ପିତାଡ଼ାତି ପତ୍‌ପିଆ଼ତି କଟ୍‌ଲାୟାଁ କିଦି।