1 ଏଚେଟିଏ ଇସ୍ରାୟେଲ ଲ଼କୁତି ବାରେ କୁଲମି ସିନ୍‌ ବାଟାଟି ହାଜାହାଁ ପ୍ରବୁତି ହୁକୁମି ତଲେ ତୀରି କିହାମାନି ବାରେ ଡ଼ୟିନି ଟା଼ୟୁଟି ରପିଦିମତା ତୂମୁୟାଁ ଗ଼ଞ୍ଜିତେରି; ସାମା ଏ଼ ଟା଼ୟୁତା ଲ଼କୁକି ଗସାଲି ଏ଼ୟୁ ହିଲାଆତୁ। 2 ଏ଼ଦାଆଁତାକି ଲ଼କୁ ମ଼ସା ତଲେ ବା଼ଦିବା଼ଦା ଆ଼ହାଁ ଏଲେଇଚେରି, "ମାଙ୍ଗେ ଗସାଲି ଏ଼ୟୁ ହିୟାମୁ।" ଏଚେଟିଏ ମ଼ସା ଏଲେଇଚେସି, "ମୀରୁ ନା଼ ତଲେ ଏ଼ନାଆଁତାକି ବା଼ଦିବା଼ଦା କିହିମାଞ୍ଜେରି ? ଏ଼ନାଆଁତାକି ପ୍ରବୁଇଁ ତାୟିପାରି କିହିମାଞ୍ଜେରି ?"

3 ଏଚିବେ଼ଲା ଲ଼କୁ ଏ଼ ଟା଼ୟୁତା ଏ଼ୟୁ ହିଲାଆତାକି ଏ଼ସ୍‌କି ଆ଼ହାଁ ମ଼ସା କ଼ପାଟି ବା଼ଚା କିହିଁ ଏଲେଇଚେରି, "ନୀନୁ ମାଙ୍ଗେ ମା଼ ମୀର୍‌କା ମା଼ସ୍‌କାଣି ଅ଼ଡ଼େ ମା଼ କ଼ଡି ଗରିତି ଏ଼ସ୍‌କି ତଲେ ପା଼ୟାଲି ତାକି ମିସର ଦେ଼ସାଟି ଏ଼ନାଆଁତାକି ହ଼ପ୍‌ହା ତାତାତି ?"

4 ଏଚେଟିଏ ମ଼ସା ପ୍ରବୁ ତା଼ଣା ପ୍ରା଼ତାନା କିହାଁ ଏଲେଇଚେସି, "ନା଼ନୁ ଈ ଲ଼କୁ ତାକି ଏ଼ନାଆଁ କିଇଁ ? ଏ଼ୱାରି ନାଙ୍ଗେ ୱାଲ୍‌କା ତଲେ ଇର୍‌ହାଲି ତିୟାରା ମାନେରି।"

5 ଏଚେଟିଏ ପ୍ରବୁ ମ଼ସାଇଁ ଏଲେଇଚେସି, "ନୀନୁ ଏ଼ନାଆଁ ତଲେ ନିଲ କାଡାତି ୱେ଼ଚାମାଚି, ଏ଼ ବାଡ଼୍‌ଗା କେୟୁତା ଅ଼ହାଁ ଇସ୍ରାୟେଲତି ଏଚେକା ପ୍ରାଚିନାଙ୍ଗା ତଲେ ଇସ୍ରାୟେଲ ଲ଼କୁ ନ଼କି ନ଼କିତା ହାଲାମୁ। 6 ମେହ୍‌ମୁ, ନା଼ନୁ ହରେବ୍‌ତା ଏ଼ ୱାଲି ଲାକ ନୀ ନ଼କିତା ନିଇଁ; ନୀନୁ ଏ଼ ୱାଲିତି ୱେ଼ତିସାରେ, ଏମ୍ବାଟି ଏ଼ୟୁ ହ଼ନୁ, ଅ଼ଡ଼େ ଲ଼କୁ ଏ଼ ଏ଼ୟୁ ଗହ୍‌ନେରି।" ଏଚେଟିଏ ମ଼ସା ଇସ୍ରାୟେଲତି କାଜାରି ନ଼କିତା ଏଲେକିତେସି।

7 ଇଞ୍ଜାଁ, ଏ଼ ଟା଼ୟୁତା ଇସ୍ରାୟେଲ ଲ଼କୁତି ବା଼ଦିବା଼ଦା ତାକି ଅ଼ଡ଼େ ପ୍ରବୁ ମା଼ ତା଼ଣା ମାନେସି କି ଆ଼ଏ, ଏଲେଇଞ୍ଜିଁ ପ୍ରବୁଇଁ ତାୟିପାରି କିତାକି ଏ଼ ଟା଼ୟୁତି ଦ଼ରୁ ମସ୍‌ସା* ଅ଼ଡ଼େ ମିରିବା* ଇଟିତେରି।

8 ଏଚିବେ଼ଲା ଅମାଲେକ ଲ଼କୁ ୱା଼ହାଁ ରପିଦିମତା ଇସ୍ରାୟେଲ ତଲେ ଜୁଜୁ କିତେରି। 9 ଏଚେଟିଏ ମ଼ସା ଜିହସୁୟଇଁ ଏଲେଇଚେସି, "ନୀନୁ ମା଼ ତାକି ଲ଼କୁଣି ଆ଼ଚାହାଁ ଅମାଲେକ ଲ଼କୁ ତଲେ ଜୁଜୁ କିୟାଲି ହାଲାମୁ; ୱିଏ ନା଼ନୁ ନା଼ କେୟୁତା ପ୍ରବୁତି ବାଡ଼୍‌ଗା ଆସାହାଁ ହ଼ରୁ ସିଣ୍ତିତା ନିଇଁ।" 10 ଏଚେଟିଏ ମ଼ସାତି ହୁକୁମି ତଲେ ଜିହସୁୟ ଅମାଲେକ ଲ଼କୁ ତଲେ ଜୁଜୁ କିତେସି, ଇଞ୍ଜାଁ, ମ଼ସା ଅ଼ଡ଼େ ହାରଣ ହୁର ହ଼ରୁ ସିଣ୍ତିତା ହ଼ତେରି। 11 ଇଞ୍ଜାଁ ମ଼ସା ତାନି କେୟୁ ଲାକ ପେର୍‌ହାମାନି ବେ଼ଲାତା ଇସ୍ରାୟେଲ ଲ଼କୁ ଜୀଣା ଆ଼ତେରି, ଅ଼ଡ଼େ ମ଼ସା ତାନି କେୟୁ ଲେ଼ସାମାନି ବେ଼ଲାତା ଅମାଲେକ ଲ଼କୁ ଜୀଣା ଆ଼ତେରି। 12 ସାମା ମ଼ସାତି କେୟୁ ୱା଼ରା ହାଚେ; ଏ଼ଦାଆଁତାକି ଏ଼ୱାରି ର଼ ୱାଲି ତାଚାହାଁ ତାନି ଡ଼଼ଇ ଇଟାଲିଏ, ମ଼ସା ଏ଼ ୱାଲି ଲାକ କୁଗିତେସି, ଇଞ୍ଜାଁ, ହାରଣ ଅ଼ଡ଼େ ହୁର ତାନି ଟିଃନି ୱାକି ଅ଼ଡ଼େ ରଅସି ତାନି ଟେ଼ବ୍ରି ୱାକି ଏ଼ୱାଣି କେୟୁ ପେର୍‌ହିଁ ଆସ୍ତେରି; ଏଚେଟିଏ ୱେ଼ଡ଼ା କୂଡ଼୍‌ନି ପାତେକା ତାନି କେୟୁ ତୀରିଆ଼ହାଁ ଡ଼ୟିତେ। 13 ଏ଼ଦାଆଁତାକି ଜିହସୁୟ ଅମାଲେକଇଁ ଅ଼ଡ଼େ ତାନି ଲ଼କୁଣି କାଣ୍ତା ତଲେ ହା଼ରୱି କିତେସି।

14 ଏଚେଟିଏ ପ୍ରବୁ ମ଼ସାଇଁ ଏଲେଇଚେସି, "ଈ କାତା ଅଣ୍‌ପାଲିତାକି ପତିତା ରା଼ଚାହାଁ ଇଟାମୁ, ଇଞ୍ଜାଁ ଜିହସୁୟ ୱେଣ୍‌ମ୍ବେ ଏ଼ଦାଆଁ ପ଼ଡ଼ୱି ଆ଼ମୁ; ଇଚିହିଁ ନା଼ନୁ ହା଼ଗୁ ଡ଼଼ଇଟି ଅମାଲେକତି ଅଣ୍‌ପୁତା ମ୍ଣେକ୍‌ଇଁ।" 15 ଏଚେଟିଏ ମ଼ସା ର଼ ପିଣ୍ତା କେ଼ପାହାଁ ତାନି ଦ଼ରୁ ଜିହବା-ନିସି* ଇଟିତେସି। 16 ଇଞ୍ଜାଁ ଏ଼ୱାସି ପ୍ରବୁତି ଜାଣ୍ଡାତା କେୟୁ ଇଟାହାଁ ଏଲେଇଚେସି, "ପା଼ଟୁ ପା଼ଟୁ ତାକି ଅମାଲେକ ଲ଼କୁ ତଲେ ପ୍ରବୁତି ଜୁଜୁ ଆ଼ନେ।"