ହାନାୟି 36

1 ଈଦାଆଁତାକି ପ୍ରବୁତି ବାରେ ହୁକୁମି ତଲେ ସୁଦୁ ଟା଼ୟୁତି କାମା ବାରେ କିୟାଲି ପ୍ରବୁ ବସ୍‌ଚଲେଲ ଅ଼ଡ଼େ ଅହଲିୟାବ ଇଲେକିଁ ଏମିନି ଗାଟାରାକି ବୁଦି ହୀହାମାନେସି, ଏ଼ ବାରେ ବୁଦିଗାଟାରି କାମା କିନେରି।

ଲ଼କୁତି ହା଼ରେକା ଦା଼ନା

2 ଏଚେଟିଏ ମ଼ସା, ଏ଼ ବସ୍‌ଚଲେଲ, ଅହଲିୟାବଇଁ ଇଞ୍ଜାଁ ପ୍ରବୁ ତା଼ଣାଟି ମ଼ନତା ବୁଦି ବେଟାଆ଼ହାମାନି ଏଟ୍‌କାତି ବୁଦିଗାଟି ଲ଼କୁତି ମ଼ନତା ଏ଼ କାମା କିୟାଲି ଅଣ୍‌ପୁଗାଟି ଲ଼କୁଣି ହା଼ଟିତେସି। 3 ଏଚେଟିଏ ଏ଼ୱାରି ସୁଦୁ ଟା଼ୟୁତି କାମା କିୟାଲି ତାକି ଇସ୍ରାୟେଲ ଲ଼କୁ ତାଚାମାନି ଦା଼ନା ବାରେ ମ଼ସା ତା଼ଣାଟି ଅ଼ତେରି; ଆ଼ତି ଜିକେଏ ଲ଼କୁ ତାମି ମ଼ନ ତଲେ ବାରେ ଦିନା ଲା଼ଇ ତାନି ତା଼ଣା ଦା଼ନା ତାତେରି। 4 ଏଚେଟିଏ ସୁଦୁ ଟା଼ୟୁତି ବାରେ କାମା କିନି ବୁଦିଗାଟି ଲ଼କୁ ତାମି କାମାଟି ୱା଼ହାଁ, 5 ଏ଼ୱାରି ମ଼ସାଇଁ ଏଲେଇଚେରି, "ପ୍ରବୁ ଏ଼ନା ଏ଼ନାଆଁ ତିୟାରା କିହାଲି ହୁକୁମି ହୀହାମାଞ୍ଜାନେସି, ଲ଼କୁ ଏ଼ କାମା ତାକି ଲ଼ଡ଼ାଆ଼ନି ଆ଼ସ୍ତିଟି ହା଼ରେକା ଆଗାଡ଼ା ତାଚିମାନେରି।"

6 ଏଚେଟିଏ ମ଼ସା ସାହ୍‌ଡ଼ାତି ବାରେୱାକି ଈ କାତା ୱେ଼ପ୍‌କି କିତେସି, ଆ଼ବାୟାଁ କି ଆୟାସିକା ସୁଦୁ ଟା଼ୟୁ ତାକି ଅ଼ଡ଼େ ଦା଼ନା ତାଆଦୁ; ଏଚେଟିଏ ଲ଼କୁ ଦା଼ନା ତାଚାଲି ପିସ୍ତେରି। 7 ଇଚିହିଁ ବାରେ କାମା କିହାଲି ଏ଼ୱାରି ଆ଼ସ୍ତି ହା଼ରେପୂରେ ଅ଼ଡ଼େ ଏମ୍ବାତି ଆଗାଡ଼ା ମାଚେ।

ଆଣ୍ତ୍‌ୱିଆ଼ନି ତୂମୁ ଇଲୁ କିନାୟି

8 ଏଚେଟିଏ କାମା କିନାରି ତା଼ଣାଟି ବାରେ ବୁଦିଗାଟି ଲ଼କୁ ଦବ୍‌ଲା ରୁତି ପା଼ତାଡ଼ା ଲୂଲୁ, ନୀଲି, ହେୟାଁ, ଅ଼ଡ଼େ ନେତେରି ୱା଼ଣା ଲୂଲୁ ତଲେ ବାସା ଟା଼ୟୁତି ଦସଗଟା ଟା଼ଟନି ହିମ୍ବରିକା ତିୟାରା କିତେରି; ଇଞ୍ଜାଁ, ଏ଼ ବିତ୍ରା କିରୁବ ଦୂତୁତି ବମାୟାଁ କିତେରି। 9 ବାରେ ଟା଼ଟନି ହିମ୍ବରିକା କଡ଼େ ଆ଼ଟା ହା଼ତା ଲାମ୍ବା ସା଼ରି ହା଼ତା ଅ଼ସାରା ଅ଼ଡ଼େ ବାରେ ଟା଼ଟନି ହିମ୍ବରିକା ରଣ୍ତିଏ ସମାନା ମାଚୁ। 10 ଇଞ୍ଜାଁ, ପା଼ସାଗଟା ଟା଼ଟନି ହିମ୍ବରିକା ରଣ୍ଡିଏ ତା଼ଣା ଜ଼ଡ଼ି କିତେରି ଅ଼ଡ଼େ ଅ଼ର ପା଼ସାଗଟା ଟା଼ଟନି ହିମ୍ବରିକା ଅ଼ର ତା଼ଣା ଜ଼ଡ଼ି କିତେରି। 11 ଅ଼ଡ଼େ, ଏ଼ ଆଣ୍ତ୍‌ୱି ଆ଼ନି ଟା଼ୟୁତା ମୂଲୁ ଟା଼ଟନି ହିମ୍ବରି ଅ଼ଟିତା ନୀଲି ୱା଼ଣା ଲୂଲୁ ତଲେ ପା଼ନ୍ଦା କିତେରି; ଅ଼ଡ଼େ ଅ଼ର ଜ଼ଡ଼ିକିତି ଟା଼ଟନି ହିମ୍ବରି ତ଼ରତା ଜିକେଏ ଏଲେକିତେରି। 12 ଏ଼ ମୂଲୁ ଟା଼ଟନି ହିମ୍ବରି ତ଼ରତା ଦୁଇ କ଼ଡ଼ି ଦସଗଟା ପା଼ନ୍ଦାୟାଁ ଅ଼ଡ଼େ ଅ଼ର ଜ଼ଡ଼ିକିତି ଟା଼ଟନି ହିମ୍ବରି ତ଼ରତା ଦୁଇ କ଼ଡ଼ି ଦସଗଟା ପା଼ନ୍ଦାୟାଁ କିତେରି; ଏ଼ ବାରେ ପା଼ନ୍ଦାୟାଁ ହାରିମ଼ହାଣା ଡ଼ୟିତୁ। 13 ଅ଼ଡ଼େ ଦୁଇ କ଼ଡ଼ି ଦସଗଟା ବାଂଗାରା ଡ:ଙ୍କିୟାଁ କିହାଁ ଡ:ମ୍ପାୟାଁ ତଲେ ଅ଼ର ଟା଼ଟିନି ହିମ୍ବରିକା ଜ଼ଡ଼ି କିତେରି; ଏଚେଟିଏ ଏ଼ ବାସାଟା଼ୟୁ ରଣ୍ଡିଏ ଆ଼ହିଁ ଡ଼ୟିତେ।

14 ଏଚେଟିଏ ଏ଼ ଆଣ୍ତ୍‌ୱିଆ଼ନି ତୂମୁ ପ୍ଡିକ୍‌ହାଲି ତୂମୁ ତାକି ଗରି ବା଼ଣାୟାଁ ତଲେ ଏଗାରଗଟା ଟା଼ଟିନି ହିମ୍ବରିକା ତିୟାରା କିତେରି। 15 ବାରେ ଟା଼ଟିନି ହିମ୍ବରିକା କଡ଼େ ଦସ ହା଼ତା ଲାମ୍ବା ଅ଼ଡ଼େ ସା଼ରି ହା଼ତା ଅ଼ସାରା, ଏ଼ ଏଗାରଗଟା ଟା଼ଟିନି ହିମ୍ବରିକା ରଣ୍ତିଏ ସମାନା ମାଚୁ। 16 ଇଞ୍ଜାଁ, ଏ଼ ପା଼ସାଗଟା ଟା଼ଟିନି ହିମ୍ବରିକା ଜ଼ଡ଼ି କିହାଁ ଏଟ୍‌କା ଇଟିତେରି ଅ଼ଡ଼େ ଅ଼ର ସ଼ଗଟା ଟା଼ଟିନି ହିମ୍ବରିକା ଜ଼ଡ଼ି କିହାଁ ଏଟ୍‌କା ଇଟିତେରି। 17 ଜ଼ଡ଼ି କିହାମାନି ତଲିତି ଟା଼ଟିନି ହିମ୍ବରିକା ତ଼ରତା ଦୁଇ କ଼ଡ଼ି ଦସଗଟା ପା଼ନ୍ଦାୟାଁ କିତେରି ଅ଼ଡ଼େ ଅ଼ର ଜ଼ଡ଼ି କିହାମାନି ଟା଼ଟିନି ହିମ୍ବରିକା ତ଼ରତା ଦୁଇ କ଼ଡ଼ି ଦସଗଟା ପା଼ନ୍ଦାୟାଁ କିତେରି। 18 ଅ଼ଡ଼େ ତୂମୁ ଜ଼ଡ଼ିକିହାଲି ତାକି ପିତାଡ଼ା ତଲେ ଦୁଇ କ଼ଡ଼ି ଦସଗଟା ଡ:ଙ୍କିୟାଁ କିତେରି। 19 ଇଞ୍ଜାଁ, ଏ଼ ନେତେରି ଗାଟି ମେ଼ଣ୍ତା ତ଼ଲୁ ତଲେ ତୂମୁତି ର଼ ତେପରି ଅ଼ଡ଼େ ଏ଼ଦାଣି ଲାକ ସିସୁକ*36:19 ସିସୁକ/ସାମ୍‌ଦୁରିତି ପା଼ଲୁ ଊଟ୍‌ନି ଗ଼ଜିୟା ମୂତି ମୀନୁ ତ଼ଲୁ ସମାନା । ତ଼ଲୁ ତଲେ ର଼ ତେପରି ତିୟାରା କିତେରି।

20 ଏଚେଟିଏ ଏ଼ ଆଣ୍ତ୍‌ୱିଆ଼ନି ତୂମୁ ତାକି ସିଟିମ ମା଼ର୍‌କାତି ନିପା ପା଼ଟାୟାଁ ତିୟାରା କିତେରି। 21 ର଼ ପା଼ଟା ଦସ ହା଼ତା ଲାମ୍ବା ଅ଼ଡ଼େ ର଼ ହା଼ତା ଆଦା ଅ଼ସାରା ମାଚେ। 22 ବାରେ ପା଼ଟାୟାଁଣା ରଣ୍ତିଏ ସମାନା ରୀ ରୀ କଡାୟାଁ ମାଚୁ; ଇଲେକିହିଁ ବାସା ଟା଼ୟୁତି ବାରେ ପା଼ଟାୟାଁ ତାକି ତିୟାରା କିତେରି। 23 ଅ଼ଡ଼େ ଏ଼ ବାସା ଟା଼ୟୁତି ଟିଃନି ୱାକି ତାକି କଡ଼େଗଟା ପା଼ଟାୟାଁ ତିୟାରା କିତେରି। 24 ଇଞ୍ଜାଁ, ଏ଼ୱାସି ଏ଼ କଡ଼େଗଟା ପା଼ଟାୟାଁ ଡ଼଼ଇ ଦୁଇ କ଼ଡ଼ି ୱେଣ୍ତିତି ପତ୍‌ପିଆ଼ତି କଟ୍‌ଲାୟାଁ କିତେସି; ର଼ ପା଼ଟା ଡ଼଼ଇ ଏମ୍ବାତି ରୀ କଡାୟାଁ ତାକି ରୀ ପତ୍‌ପିଆ଼ତି କଟ୍‌ଲାୟାଁ ଅ଼ଡ଼େ ଏଟ୍‌କାତି ପା଼ଟା ଡ଼଼ଇ ତାନି ରୀ କଡାୟାଁ ତାକି ରୀ ପତ୍‌ପିଆ଼ତି କଟ୍‌ଲାୟାଁ କିତେସି। 25 ଇଞ୍ଜାଁ ବାସା ଟା଼ୟୁତି ଅ଼ରୱାକି ଟେ଼ବ୍ରି ୱାକି କଡ଼େଗଟା ପା଼ଟାୟାଁ କିତେସି। 26 ର଼ ପା଼ଟା ଡ଼଼ଇ ରୀ ପତ୍‌ପିଆ଼ତି କଟ୍‌ଲାୟାଁ ଅ଼ଡ଼େ ଏଟ୍‌କାତି ପା଼ଟା ଡ଼଼ଇ ରୀ ରୀ ପତ୍‌ପିଆ଼ତି କଟ୍‌ଲାୟାଁ, ଇଲେକିହିଁ ୱେଣ୍ତିତି ଦୁଇ କ଼ଡ଼ି ପତ୍‌ପିଆ଼ତି କଟ୍‌ଲାୟାଁ କିତେସି। 27 ଏ଼ ବାସା ଟା଼ୟୁତି ୱେ଼ଡ଼ା କୂଡ଼୍‌ନି ୱାକିତି ଡା଼ୟୁୱାକି ତାକି ସ଼ଗଟା ପା଼ଟାୟାଁ କିତେସି। 28 ଇଞ୍ଜାଁ, ବାସା ଟା଼ୟୁତି ଡା଼ୟୁ ୱାକିତି ରୀ କନୟାଁ ତାକି ରୀ ପା଼ଟାୟାଁ କିତେସି। 29 ଇଞ୍ଜାଁ, ଏ଼ଦାଣି ଡ଼଼ଇ କାଲ୍‌ୱି ଆ଼ନାୟି ଡ଼ୟିତେ ଅ଼ଡ଼େ ଏଲେକିହିଁଏ ଏ଼ଦାଣି ତା଼ର୍ପୁତା ତଲିତି କାଡ୍‌ୱା ଦାରି କାଲ୍‌ୱି ଆ଼ନାୟି ଡ଼ୟିତେ; ଇଲେକିହିଁ ଏ଼ ରୀ କନତି ପା଼ଟାୟାଁ ଜ଼ଡ଼ି କିତେସି। 30 ଏମ୍ବାଆଁ ଆ଼ଟାଗଟା ପା଼ଟାୟାଁ, ଇଞ୍ଜାଁ, ର଼ ର଼ ପା଼ଟା ଡ଼଼ଇ ରୀ ରୀ ପତ୍‌ପିଆ଼ତି କଟ୍‌ଲାୟାଁ, ଇଲେକିହିଁ ସ଼ଡ଼ଗଟା ୱେଣ୍ତିତି ପତ୍‌ପିଆ଼ତି କଟ୍‌ଲାୟାଁ କିତେସି।

31 ଅ଼ଡ଼େ ଏ଼ୱାସି ସିଟିମ ମା଼ର୍‌କା ତଲେ ଅର୍ଗଡ଼ି ତିୟାରା କିହାଁ ବାସା ଟା଼ୟୁତି ରକୱାକିତି ପା଼ଟାୟାଁଣା ପା଼ସାଗଟା ଅର୍ଗଡ଼ି, 32 ଅ଼ଡ଼େ ଅ଼ର ୱାକିତି ପା଼ଟାୟାଁଣା ପା଼ସାଗଟା ଅର୍ଗଡ଼ି, ଇଞ୍ଜାଁ, ବାସା ଟା଼ୟୁତି ୱେ଼ଡ଼ା କୂଡ଼୍‌ନି ୱାକିତି ପା଼ଟାୟାଁଣା ପା଼ସାଗଟା ଅର୍ଗଡ଼ି ହୀତେସି। 33 ଇଞ୍ଜାଁ ମାଦିତି ଅର୍ଗଡ଼ି, ପା଼ଟାତି ମାଦି, ଈ ଗାଟୁଟିଏ ଆତାଲା ଗାଟୁ ପାତେକା ଏତେ। 34 ଅ଼ଡ଼େ ଏ଼ୱାସି ଏ଼ ବାରେ ପା଼ଟାୟାଁ ବାଂଗାରା ୱା଼ରିକିତେସି ଅ଼ଡ଼େ ଅର୍ଗଡ଼ି ପେନ୍ଦାଲି ବାଂଗାରା କାଡ୍‌ୱାୟାଁ କିତେସି, ଅର୍ଗଡ଼ିକା ବାରେ ବାଂଗାରା ୱା଼ରିକିତେସି।

35 ଏଚେଟିଏ ଏ଼ୱାସି ନୀଲି, ହେୟାଁ, ନେତେରି ୱା଼ଣା, ରୁତି ଦବ୍‌ଲା ପା଼ତାଡ଼ା ଲୂଲୁ ତଲେ କିରୁବ ଲେହେଁ ର଼ ଏଟ୍‌କା କିନି ହିମ୍ବରି ତିୟାରା କିତେସି। 36 ଇଞ୍ଜାଁ, ଏ଼ୱାସି ଏ଼ଦାଣି ତାକି ସିଟିମ ମା଼ର୍‌କାତି ସା଼ରିଗଟା ମୁଣ୍ତାୟାଁ କିହାଁ ବାଂଗାରା ୱା଼ରି କିତେସି ଅ଼ଡ଼େ ଏ଼ ବାରେତି ଡ:ଙ୍କିୟାଁ ବାଂଗାରା ତଲେ କିତେସି ଅ଼ଡ଼େ ଏ଼ଦାଣି ତାକି ୱେଣ୍ତିତି ସା଼ରିଗଟା ପତ୍‌ପିଆ଼ତି କଟ୍‌ଲାୟାଁ କିତେସି। 37 ଅ଼ଡ଼େ ଏ଼ୱାସି ତୂମୁ ଦୁୱେରି ତାକି ନୀଲି, ହେୟାଁ, ନେତେରି ୱା଼ଣା ଅ଼ଡ଼େ ରୁତି ଦବ୍‌ଲା ପା଼ତାଡ଼ା ଲୂଲୁ ତଲେ କା଼ବ୍ରା ସିତ୍ରା ର଼ ପ୍ଡିକ୍‌ନି ହିମ୍ବରି ତିୟାରା କିତେସି। 38 ଏମ୍ବାତି ପା଼ସାଗଟା ମୁଣ୍ତାୟାଁ ଅ଼ଡ଼େ ଏ଼ ବାରେତାକି ଡ:ଙ୍କିୟାଁ କିତେସି; ଇଞ୍ଜାଁ, ଏ଼ ବାରେତି ସିଣ୍ତି ଅ଼ଡ଼େ ତୀଗାୟାଁ ବାଂଗାରା ୱା଼ରି କିତେସି; ସାମା ଏ଼ୱାରି ପା଼ସାଗଟା ପତ୍‌ପିଆ଼ତି କଟ୍‌ଲାୟାଁ ପିତାଡ଼ା ମାଚୁ।