1 ଏଚେଟିଏ ପ୍ରବୁ ମ଼ସାଇଁ ଏଲେଇଚେସି, 2 "ନୀନୁ ମୂଲୁ ଲେ଼ଞ୍ଜୁତି ମୂଲୁ ଦିନା ଆଣ୍ତ୍‌ୱିଆ଼ନି ତୂମୁତି ବାସା ଟା଼ୟୁ କିଦି। 3 ଇଞ୍ଜାଁ, ଏ଼ ବିତ୍ରା ରା଼ଜିମା଼ନା ପେ଼ଡ଼ା ଇଟାହାଁ ଏଟ୍‌କା କିନି ଟା଼ଟନି ହିମ୍ବରି ଲେଚାନା ଏ଼ ରା଼ଜିମା଼ନା ପେ଼ଡ଼ାତି ପ୍ଡିକ୍‌ଦି। 4 ଏଚେଟିଏ ବାଲାପା଼ଟା ବିତ୍ରା ତାଚାହାଁ ଏ଼ ଲାକତି ଆ଼ସ୍ତି ଇଟିନି ଲେକା ତଲେ ଇଟିଦି; ଅ଼ଡ଼େ ଦୀୱଁ ମୁଣ୍ତା ବିତ୍ରା ତାଚାହାଁ ଏମ୍ବାତି ଦୀୱଁ ବାରେ ଡ଼଼ହ୍‌ଦି। 5 ରା଼ଜିମା଼ନା ପେ଼ଡ଼ା ନ଼କିତା ବାଂଗାରା ଦୁପ୍‌ଣି ପିଣ୍ତା ଇଟିଦି, ଇଞ୍ଜାଁ, ବାସା ଟା଼ୟୁତି ଦୁୱେରିତା ଟା଼ଟିନି ହିମ୍ବରି ଲେଦି। 6 ଅ଼ଡ଼େ ଆଣ୍ତ୍‌ୱିଆ଼ନି ତୂମୁତି ବାସା ଟା଼ୟୁ ଦୁୱେରି ନ଼କିତା ହୂଡିନି ପିଣ୍ତା ଇଟିଦି। 7 ଆଣ୍ତ୍‌ୱିଆ଼ନି ତୂମୁ ଅ଼ଡ଼େ ପିଣ୍ତା ମାଦି ନର୍‌ହା କଡିନି କୁଣ୍ତି ଇଟାହାଁ ଏମ୍ବାଆଁ ଏ଼ୟୁ ୱା଼କ୍‌ଦି। 8 ଇଞ୍ଜାଁ, ସା଼ରିୱାକି ଆଂଗେଣି ତିୟାରା କିଦି ଅ଼ଡ଼େ ଆଂଗେଣି ଦୁୱେରିତା ଟା଼ଟିନି ହିମ୍ବରିକା ଲେଦି।"

9 "ଏଚେଟିଏ ହେର୍‌ପିନି ନିୟୁଁ ଅ଼ହାଁ ବାସା ଟା଼ୟୁ ଅ଼ଡ଼େ ଏମ୍ବାଆଁ ମାନି ବାରେ ଆ଼ସ୍ତି ଲାକ ନିୟୁଁ ୱା଼କ୍‌ହାଁ ଏମ୍ବାଆଁ ମାନି ବାରେ ଆ଼ସ୍ତି ସୁଦୁ କିଦି; ଏଚେଟିଏ ଏ଼ ବାରେ ସୁଦୁ ଆ଼ନୁ। 10 ଅ଼ଡ଼େ ନୀନୁ ଏ଼ ହୂଡିନି ପିଣ୍ତା ଅ଼ଡ଼େ ଏମ୍ବାତି ବାରେ ଗିନା ସିପା ନିୟୁଁ ୱା଼କ୍‌ହାଁ ସୁଦୁ କିଦି; ଏଚେଟିଏ ଏ଼ ପିଣ୍ତା ହା଼ରେକା ସୁଦୁ ଆ଼ନେ। 11 ଅ଼ଡ଼େ ନୀନୁ ଏ଼ ନର୍‌ନି କୁଣ୍ତି ଅ଼ଡ଼େ କୁଣ୍ତି କୁଗିନି ପିଣ୍ତା ନିୟୁଁ ୱା଼କ୍‌ହାଁ ସୁଦୁ କିଦି।"

12 "ଏଚେଟିଏ ନୀନୁ ହାରଣଇଁ ଅ଼ଡ଼େ ତାନି ମୀର୍‌କାଣି ଆଣ୍ତ୍‌ୱିଆ଼ନି ତୂମୁ ଦୁୱେରି ଦାରି ତାଚାହାଁ ଏ଼ୟୁ ମୀତ୍‌ମୁ। 13 ଇଞ୍ଜାଁ, ନା଼ କ଼ସମି ପୂଜେରା କାମା କିୟାଲି ହାରଣଇଁ ସୁଦୁ ସକାୟାଁ ତୁର୍‌ୱି କିହାଁ ତା଼ର୍ୟୁଁତା ନିୟୁଁ ୱା଼କ୍‌ହାଁ ସୁଦୁ କିମୁ କି ଏ଼ୱାସି ନା଼ କାମା କିନେସି। 14 ଅ଼ଡ଼େ ତାନି ମୀର୍‌କାଣି ତାଚାହାଁ ସକାୟାଁ ତୁର୍‌ୱି କିମୁ। 15 ଇଞ୍ଜାଁ, ତାମି ଆ଼ବାଇଁ ଏ଼ନିକିଁ ତା଼ର୍ୟୁଁତା ନିୟୁଁ ୱା଼କ୍‌ହି, ଏଲେକିହିଁ ଏ଼ୱାରାଇଁ ନିୟୁଁ ୱା଼କ୍‌ଦି, ଏଚେଟିଏ ଏ଼ୱାରି ନା଼ ପୂଜେରା କାମା କିନେରି; ଏ଼ ନିୟୁଁ ୱା଼କ୍‌ନାୟି ଏ଼ୱାରି ଆକୁ ଆ଼ବାୟାଁ ଲେକା ତଲେ କା଼ଲାକା଼ଲାତି ପୂଜେରା କାମା କିନେରି।"

16 ମ଼ସା ଇଲେକିହିଁ କିତେସି; ଏ଼ୱାସି ପ୍ରବୁତି ହୁକୁମି ଲେହେଁ ବାରେ କାମା କିତେସି। 17 ଏଚେଟିଏ ମ଼ସାକି ପ୍ରବୁତି ହୁକୁମି ହୀତିଲେହେଁ ରୀ ବାର୍ସାତି ମୂଲୁ ଲେ଼ଞ୍ଜୁତି ମୂଲୁ ଦିନାତା ବାସା ଟା଼ୟୁ କେ଼ପିତେସି। 18 ଇଞ୍ଜାଁ, ମ଼ସା ବାସା ଟା଼ୟୁ ତିୟାରା କିହାଁ ଏମ୍ବାଆଁ ପତ୍‌ପିଆ଼ତି କଟ୍‌ଲା* ଇଟାହାଁ ପା଼ଟାୟାଁ ନିପ୍‌ହାଁ ଅର୍ଗଡ଼ିକା ପେନ୍ଦାହାଁ ଏମ୍ବାତି ମୁଣ୍ତାୟାଁ ନିପ୍‌ହେସି। 19 ଏଚେଟିଏ ମ଼ସା ବାସା ଟା଼ୟୁ ଲାକ ତୂମୁ ଗ଼ଞ୍ଜିତେସି ଅ଼ଡ଼େ ତୂମୁ ଲାକ ତେପରି କିତେସି। 20 ଏଚେଟିଏ ମ଼ସାକି ପ୍ରବୁ ହୁକୁମି ହୀତିଲେହେଁ ଏ଼ୱାସି ହୁକୁମିତି ୱାଲି ପା଼ଟାୟାଁ ଅ଼ହାଁ ରା଼ଜିମା଼ନା ପେ଼ଡ଼ା ବିତ୍ରା ଇଟିତେସି ଅ଼ଡ଼େ ଏ଼ ପେ଼ଡ଼ାତା ଟେଙ୍ଗାୟାଁ ପେନ୍ଦାହାଁ ଏ଼ ପେ଼ଡ଼ା ଲାକ ପା଼ପୁ ପ୍ଡିକ୍‌ନି ଡା଼ପ୍‌ଣା ଇଟିତେସି; 21 ଇଞ୍ଜାଁ, ବାସା ଟା଼ୟୁ ବିତ୍ରା ରା଼ଜିମା଼ନା ପେ଼ଡ଼ା ତାତେରି ଅ଼ଡ଼େ ପ୍ଡିକ୍‌ନି ଟା଼ଟିନି ହିମ୍ବରି ଲେଚାନା ରା଼ଜିମା଼ନା ପେ଼ଡ଼ାତି ପ୍ଡିକ୍‌ହେରି।

22 ଏଚେଟିଏ ମ଼ସାକି ପ୍ରବୁ ହୁକୁମି ହୀତିଲେହେଁ ଏ଼ୱାସି ବାସା ଟା଼ୟୁତି ଟେ଼ବ୍ରିୱାକି, ଏଟ୍‌କା କିନି ହିମ୍ବରିତି ପାଙ୍ଗାତା ଆଣ୍ତ୍‌ୱିଆ଼ନି ତୂମୁତା ବାଲାପା଼ଟା* ଇଟିତେସି; 23 ଇଞ୍ଜାଁ, ଏ଼ୱାସି ପ୍ରବୁତି ନ଼କିତା ମେ଼ରା ତଲେ ଏ଼ଦାଣି ଲାକ ରୂଟି ଇଟିତେସି। 24 ଅ଼ଡ଼େ ବାଲାପା଼ଟା ନ଼କିତା, ବାସା ଟା଼ୟୁତି ଟିଃନି ୱାକି ଆଣ୍ତ୍‌ୱିଆ଼ନି ତୂମୁତା ଦୀୱଁ ମୁଣ୍ତା ଇଟିତେସି। 25 ଏଚେଟିଏ ମ଼ସାକି ପ୍ରବୁ ହୁକୁମି ହୀତିଲେହେଁ ପ୍ରବୁତି ନ଼କିତା ଦୀୱଁ ପ୍ରତ୍‌ହେସି।

26 ଏ଼ୱାସି ଆଣ୍ତ୍‌ୱିଆ଼ନି ତୂମୁତା ଏଟ୍‌କା କିନି ହିମ୍ବରି ନ଼କିତା ବାଂଗାରା ପିଣ୍ତା ଇଟିତେସି। 27 ଅ଼ଡ଼େ ଏ଼ଦାଣି ଲାକ ନେହିଁ ଗାନ୍ଦା ଦୁପ୍‌ଣି ହୂଡିତେସି। 28 ଇଞ୍ଜାଁ, ଏ଼ୱାସି ବାସା ଟା଼ୟୁ ଦୁୱେରିତା ଟା଼ଟିନି ହିମ୍ବରି ଲେତେସି। 29 ଏଚେଟିଏ ମ଼ସାକି ପ୍ରବୁ ହୁକୁମି ହୀତିଲେହେଁ ଆଣ୍ତ୍‌ୱିଆ଼ନି ତୂମୁତି ବାସା ଟା଼ୟୁ ଦୁୱେରି ଦାରି ହୂଡିନି ପିଣ୍ତା ଇଟାହାଁ ଏ଼ଦାଣି ଲାକ ହୂଡିନି ପୂଜା ଅ଼ଡ଼େ ଦା଼ନା ହେର୍‌ପିତେସି।

30 ଏ଼ୱାସି ଆଣ୍ତ୍‌ୱିଆ଼ନି ତୂମୁ ଅ଼ଡ଼େ ହୂଡିନି ପିଣ୍ତା ମାଦିଏ ନର୍‌ହା କଡିନି କୁଣ୍ତି ଇଟାହାଁ ଏମ୍ବାଆଁ ନର୍‌ହା କଡାଲି ଏ଼ୟୁ ୱା଼କ୍‌ହେସି। 31 ଏଚେଟିଏ ମ଼ସା, ହାରଣ ଅ଼ଡ଼େ ତାନି ମୀର୍‌କା ତାମି କେସ୍କା କଡାୟାଁ ନର୍‌ହା କଡିତେରି। 32 ଏମିନି ବେ଼ଲାତା ଜିକେଏ ଏ଼ୱାରି ଆଣ୍ତ୍‌ୱିଆ଼ନି ତୂମୁତା ହ଼ଟେରି କି ଏ଼ ପିଣ୍ତା ଦାରି ହାଚେରି, ଏଚିବେ଼ଲା ଏ଼ୱାରି ଏ଼ କୁଣ୍ତିତା ନର୍‌ହା କଡିତେରି। 33 ଏଚେଟିଏ ଏ଼ୱାସି ବାସା ଟା଼ୟୁ ଅ଼ଡ଼େ ପିଣ୍ତାତି ସା଼ରି ୱାକି ଆଂଗେଣି କିତେସି ଅ଼ଡ଼େ ଆଂଗେଣି ଦୁୱେରିତା ଟା଼ଟିନି ହିମ୍ବରି ଲେତେସି, ଇଲେକିହିଁ ମ଼ସା ଏ଼ ବାରେ କାମା ରା଼ପ୍‌ହେସି।

34 ଏଚେଟିଏ ହା଼ଗୁ ଏ଼ ଆଣ୍ତ୍‌ୱିଆ଼ନି ତୂମୁତି ପ୍ଡିକ୍‌ହେ ଅ଼ଡ଼େ ପ୍ରବୁତି ତ୍ରାହାଣା ବାସା ଟା଼ୟୁତା ନେଞ୍ଜିତେ। 35 ଏଚେଟିଏ ମ଼ସା ଆଣ୍ତ୍‌ୱିଆ଼ନି ତୂମୁ ବିତ୍ରା ହ଼ଡାଲି ଆ଼ଡାଆତେସି, ଇଚିହିଁ ହା଼ଗୁ ଏ଼ ଲାକ ପ୍ଡିକ୍‌ହା ମାଚେ ଅ଼ଡ଼େ ପ୍ରବୁତି ତ୍ରାହାଣା ଏ଼ ବାସା ଟା଼ୟୁତା ନେଞ୍ଜାମାଚେ। 36 ଏଚିବେ଼ଲା ବାସା ଟା଼ୟୁଟି ହା଼ଗୁ ଲାକ ଅ଼ୱିଆ଼ତେ, ଏଚିବେ଼ଲା ଇସ୍ରାୟେଲ ଲ଼କୁ ତାମି ଜିରୁତା ତା଼କାଲି ମା଼ଟ୍‌ହେରି। 37 ସାମା ହା଼ଗୁ ଏଚିବେ଼ଲା ଲାକ ଅ଼ୱିଆ଼ଆତେ, ଏଚିବେ଼ଲା ପାତେକା ଏ଼ୱାରି ହାଲାଆତେରି। 38 ଇଚିହିଁ, ବାରେ ଇସ୍ରାୟେଲ କୂଡ଼ା ନ଼କିତା, ଏ଼ୱାରି ବାରେ ତା଼କିନି ଜିରୁତା ମାଦେନା ପ୍ରବୁତି ହା଼ଗୁ ଅ଼ଡ଼େ ଲା଼ଆଁୟାଁ ହିଚୁ ଉଜେଡ଼ି ବାସା ଟା଼ୟୁ ଲାକ ଡ଼ୟିତେ।