1 ଏଚେଟିଏ ମ଼ସା ହ଼ରୁ ଲାକଟି ରେ଼ଚା ୱା଼ନାୟି ୱେ଼ଡ଼ା ଆ଼ତାଣି ମେସାହାଁ ଲ଼କୁ ହାରଣ ତା଼ଣା ରୁଣ୍ତା ଆ଼ହାଁ ଏ଼ୱାଣାଇଁ ଏଲେଇଚେରି, "ନିଙ୍ଗାମୁ, ମା଼ ନ଼କି ନ଼କିତା ତା଼କାଲି ତାକି ର଼ ପେ଼ନୁତି ତିୟାରା କିମୁ; ଏ଼ନିଇଚିହିଁ ଏମିନି ମ଼ସା ମାଙ୍ଗେ ମିସର ଦେ଼ସାଟି ହ଼ପ୍‌ହା ତାତାତେସି, ଏ଼ୱାଣାକି ଏ଼ନାଆଁ ଆ଼ହାମାନେ, ଏ଼ଦାଆଁ ମା଼ମ୍ବୁ ପୁଞ୍ଜାହିଲଅମି।"

2 ଏଚେଟିଏ ହାରଣ ଏ଼ୱାରାଇଁ ଏଲେଇଚେସି, "ଆତିହିଁ ମୀରୁ ମୀ ଡକ୍ରିସିକା ଅ଼ଡ଼େ ମା଼ସ୍‌କା ମୀର୍‌କା କୀର୍କାତି ବାଂଗାରା ହୁକ୍‌ହାଁ ନା଼ ତା଼ଣା ତାଦୁ।" 3 ଏଚେଟିଏ ବାରେ ଲ଼କୁ ଜାହା ଜାହାରା କୀର୍କାତି ବାଂଗାରା ବାରେ ହୁକ୍‌ହାଁ ହାରଣ ତା଼ଣା ତାତେରି। 4 ଏ଼ୱାସି ଏ଼ୱାରି କେୟୁଟି ଏ଼ ବାଂଗାରା ଅ଼ହାଁ ର଼ ଗାରା କିହାଁ ର଼ ୱା଼ରିକିତି କ଼ଡି ଡା଼ଲୁ ତିୟାରା କିତେରି; ଏଚେଟିଏ ଲ଼କୁ ଏଲେଇଚେରି, "ହେ଼ ଇସ୍ରାୟେଲ ମେହ୍‌ଦୁ, ଏମିନି ପେ଼ନୁ ମିଙ୍ଗେ ମିସର ଦେ଼ସାଟି ହ଼ପ୍‌ହା ତାତାତେ ଏ଼ଦିଏ ଈଦି।"

5 ଏଚେଟିଏ ହାରଣ ଏ଼ଦାଣି ମେସାହାଁ ଏ଼ଦାଣି ନ଼କିତା ର଼ ପୂଜା ପିଣ୍ତା କେ଼ପିତେସି, ଇଞ୍ଜାଁ ଲ଼କୁଣି ଏଲେଇଚେସି, "ୱିଏ ପ୍ରବୁତି କ଼ସମି ର଼ ପାର୍ବୁ ଆ଼ନେ।" 6 ଏଚେଟିଏ ଲ଼କୁ ଅ଼ର ଦିନା ଲା଼ଇସିଏ ନିଙ୍ଗାହାଁ ହିଚୁତା ହୂଡିନି ପୂଜା ହେର୍‌ପିତେରି ଅ଼ଡ଼େ ନେହିଁ ପୂଜାତି ଦା଼ନା ତାତେରି; ଏଚେଟିଏ ବାରେ ଲ଼କୁ ତିଞ୍ଜାଲି ଉଣ୍ତାଲି କୁଗିତେରି; ଏଚେଟିଏ ରା଼ହାଁ କିହାଲି ନିଙ୍ଗିତେରି।

7 ଏ଼ଦାଆଁତାକି ପ୍ରବୁ ମ଼ସାଇଁ ଏଲେଇଚେସି, "ନୀନୁ ରେ଼ଚା ହାଲାମୁ, ଇଚିହିଁ ନୀନୁ ଏମିନି ଲ଼କୁଣି ମିସର ଦେ଼ସାଟି ହ଼ପ୍‌ହା ତାତି, ଏ଼ୱାରି ଜାହାରାଇଁ ଲାଗେଏ କିହାମାନେରି। 8 ନା଼ନୁ ଏ଼ୱାରାଇଁ ଏମିନି ଜିରୁତା ତା଼କାଲି ହୁକୁମି ହୀତେଏଁ, ଏ଼ୱାରି ଏ଼ ଜିରୁଟି ତବେ ଏଟ୍‌କା ଆ଼ତେରି; ଏ଼ୱାରି ତାମ୍‌ଙ୍ଗେ ତାକି ର଼ ଗାରାତା ୱା଼ରିକିତି କ଼ଡି ଡା଼ଲୁ କେ଼ପାହାଁ ଏ଼ଦାଣି ପୂଜା କିତେରି, ଇଞ୍ଜାଁ ଏ଼ଦାଣି ନ଼କିତା ପୂଜା ହେର୍‌ପାହାଁ ଏଲେଇଚେରି, ‘ହେ଼ ଇସ୍ରାୟେଲ, ଏମିନି ପେ଼ନୁ ମିଙ୍ଗେ ମିସର ଦେ଼ସାଟି ହ଼ପ୍‌ହା ତାତାତେ ଏ଼ଦିଏ ଈଦି।’" 9 ପ୍ରବୁ ମ଼ସାଇଁ ଅ଼ଡ଼େ ଏଲେଇଚେସି, "ନା଼ନୁ ଈ ଲ଼କୁଣି ମେସାମାଇଁ; ମେହ୍‌ମୁ, ଈୱାରି କାତା ଆହ୍‌ଆଗାଟି ଲ଼କୁ। 10 ଈଦାଆଁତାକି ନୀନୁ ନୀଏଁ ନାଙ୍ଗେ ପିସ୍ତାମୁ, ନା଼ କାର୍‌ବି ଏ଼ୱାରି କ଼ପାଟି ହା଼ରେକା ଗାଡି ଆ଼ପେ, ଏଚେଟିଏ ନା଼ନୁ ଏ଼ୱାରାଇଁ ନା଼ସା କିଇଁ; ସାମା ନା଼ନୁ ନିଙ୍ଗେ କାଜା କୂଲୁ କିୟାଇଁ।"

11 ଏଚେଟିଏ ମ଼ସା ତାନି ପ୍ରବୁ ମାହାପୂରୁଇଁ ବାତିମା଼ଲିହିଁ ଏଲେଇଚେସି, "ହେ଼ ପ୍ରବୁ, ନୀନୁ ନୀ ଏମିନି ଲ଼କୁଣି ହା଼ରେକା ବା଼ଡ଼୍‌ୟୁଗାଟି କେୟୁତଲେ ମିସର ଦେ଼ସାଟି ହ଼ପ୍‌ହା ତାଚାମାଞ୍ଜି, ନୀନୁ ଏ଼ୱାରି କ଼ପାଟି ଏ଼ନାଆଁ ତାକି କାର୍‌ବି ଆ଼ଦି ? 12 ଏ଼ୱାସି ହ଼ର୍‌କା ଦେ଼ସାତା ଏ଼ୱାରାଇଁ ନା଼ସା କିହାଁ ଦାର୍‌ତିଟି ମ୍ଣେକ୍‌ହାଲି ତାକି, ଏ଼ୱାରାଇଁ ଲାଗେଏ କିହାଲି ହ଼ପ୍‌ହା ତାତେସି, ଇଲେତି କାତା ମିସରତି ଲ଼କୁ ଏ଼ନାଆଁତାକି ଏଲେଇନେରି ? ନୀନୁ ନୀ ହା଼ରେକା କାର୍‌ବିଟି ୱେଣ୍ତାମୁ ଅ଼ଡ଼େ ନୀ ଲ଼କୁତି ଲାଗେଏତି ଅଣ୍‌ପୁଟି ସାପି ଆ଼ମୁ। 13 ନୀ ହ଼ଲେଏସି ଅବ୍ରାହାମ, ଇସାହାକ ଅ଼ଡ଼େ ଜାକୁବଇଁ ଅଣ୍‌ପାମୁ, ନୀନୁ ନୀ ଜାହାରା ଦ଼ରୁ ତଲେ ପାର୍‌ମାଣା କିହିଁ ଏ଼ୱାରାଇଁ ୱେସାମାଞ୍ଜି, ନା଼ନୁ ହା଼ଗୁତି ହୁକାୟାଁ ଲେହେଁ ମୀ କୂଡ଼ାତି ଏ଼ପା କିଇଁ ଅ଼ଡ଼େ ଏମିନି ବାରେ ଦେ଼ସାତି କାତା ଏଲେଇଞ୍ଜାତେଏଁ, ଏ଼ଦାଆଁ ମୀ କୂଡ଼ାତାକି ହୀଇଁ, ଏ଼ୱାରି କା଼ଲେଏ ତାକି ଏ଼ ଦେ଼ସାତି ଅଦିକାରା କିନେରି।" 14 ଏ଼ଦାଆଁତାକି ପ୍ରବୁ ତାନି ଲ଼କୁଣି ଏମିନି ନା଼ସା କିନି କାତା ଏଲେଇଞ୍ଜାମାଚେସି, ଏମ୍ବାଟି ସାପି ଆ଼ତେସି।

15 ଏଚେଟିଏ ମ଼ସା ୱେଣ୍ତାହାଁ ସା଼କି ଲେହେଁତି ରୀ ୱାଲ୍‌କା ପା଼ଟାୟାଁ ଆସାହାଁ ହ଼ରୁଟି ରେ଼ଚା ୱା଼ତେସି; ଏ଼ ୱାଲ୍‌କା ପା଼ଟାୟାଁ ରିକୱାକି ରା଼ସ୍‌କି ଆ଼ହାମାଚୁ। 16 ଏ଼ ୱାଲ୍‌କାତି ପା଼ଟାୟାଁ ମାହାପୂରୁ କିତାଇ; ଇଞ୍ଜାଁ, ଏ଼ଦି ଏମ୍ବାଆଁ ପତ୍‌ହାଁ ରା଼ଚିତାୟି ମାହାପୂରୁ ରା଼ଚିତାୟି ମାଚେ।

17 ଏଚେଟିଏ ଲ଼କୁ ଗାଡି କା଼ଲୱି ଆ଼ହାଲିଏ, ଜିହସୁୟ ଲ଼କୁତି କା଼ଲୱି ୱେଞ୍ଜାହାଁ ମ଼ସାଇଁ ଏଲେଇଚେସି, "ତୂମୁୟାଁଣା ଜୁଜୁତି ହା଼ଡା ୱେ଼ଙ୍ଗିମାନେ।"

18 ଏଚେଟିଏ ମ଼ସା ଏଲେଇଚେସି, "ଈଦି ଜୀଣାଆ଼ତି କା଼ଲୱି ଆ଼ଏ କି ହା଼ରୱିଆ଼ତି ହା଼ଡା ଆ଼ଏ, ସାମା ନା଼ନୁ ପା଼ଚିମାନି ହା଼ଡା ୱେଞ୍ଜିମାଇଁ।"

19 ଏଚେଟିଏ ଏ଼ୱାସି ତୂମୁୟାଁ ଦାରି ଆୟାଲିଏ, ଏ଼ ବାଂଗାରା କ଼ଡି ଡା଼ଲୁ ଅ଼ଡ଼େ ଏ଼ନ୍ଦିମାନାଣି ମେସ୍ତେସି; ଏଚେଟିଏ ମ଼ସାକି କାର୍‌ବି ହ଼ତେ; ଏ଼ଦାଆଁତାକି ଏ଼ୱାସି ତାନି କେୟୁଟି ଏ଼ ରୀ ୱାଲ୍‌କାତି ପା଼ଟାୟାଁ କୁତାହାଁ ହ଼ରୁ ଡ଼଼ଇ ଡିକ୍‌ହେସି। 20 ଇଞ୍ଜାଁ, ଏ଼ୱାରି ତିୟାରା କିହାମାଚି କ଼ଡି ଡା଼ଲୁ ଅ଼ହାଁ ହିଚୁତା ହୂଡିତେସି ଅ଼ଡ଼େ ଏ଼ଦାଣି ନୂୟାହାଁ ଗୁଣ୍ତା କିତେସି, ଅ଼ଡ଼େ ଏ଼ୟୁଣା ଡ଼ାଞ୍ଜାହାଁ ଇସ୍ରାୟେଲ ଲ଼କୁଣି ଊଟ୍‌ହେସି। 21 ଏଚେଟିଏ ମ଼ସା ହାରଣଇଁ ଏଲେଇଚେସି, "ଈ ଲ଼କୁ ନୀ ତାକି ଏ଼ନାଆଁ କିୟାତେରି କି, ନୀନୁ ଏ଼ୱାରି ମୁହେଁ ଇଲେତି କାଜା ପା଼ପୁ କିୱିକିତି ?"

22 ଏଚେଟିଏ ହାରଣ ମ଼ସାଇଁ ଏଲେଇଚେସି, "ପ୍ରବୁ ନୀନୁ ଗାଡି କାର୍‌ବି ଆ଼ଆନି, ନୀନୁ ପୁଞ୍ଜାମାଞ୍ଜି, ଈ ଲ଼କୁ ଲାଗେଏତି କାମାତା ମ଼ନ ହୀନାରି। 23 ଈୱାରି ନାଙ୍ଗେ ଏଲେଇଞ୍ଜାତେରି, ‘ମା଼ ନ଼କି ନ଼କିତା ତା଼କାଲି ମାଙ୍ଗେ ତାକି ର଼ ପେ଼ନୁତି ତିୟାରା କିମୁ; ଇଚିହିଁ ଏମିନି ମ଼ସା ମାଙ୍ଗେ ମିସର ଦେ଼ସାଟି ହ଼ପ୍‌ହା ତାତାତେସି, ଏ଼ ମ଼ସାକି ଏ଼ନାଆଁ ଆ଼ତେ ଏ଼ଦାଆଁ ମା଼ମ୍ବୁ ପୁଞ୍ଜାହିଲଅମି।’ 24 ଏ଼ଦାଆଁତାକି ନା଼ନୁ ଏଲେଇଚେଏଁ, ମୀ ତା଼ଣା ଆମ୍ବାଆରାକି ଏଚେକା ବାଂଗାରା ମାନେ, ଏ଼ ବାରେ ହୁକ୍‌ହାଁ ନା଼ ତା଼ଣା ତାଦୁ; ଏଚେଟିଏ ଏ଼ୱାରି ନାଙ୍ଗେ ହିୟାତେରି; ନା଼ନୁ ଏ଼ଦାଆଁ ଅ଼ହାଁ ହିଚୁତା ମେତ୍‌ହେଏଁ, ଏଚେଟିଏ ଈ କ଼ଡି ଡା଼ଲୁ ହ଼ଚାୱାତେ।"

25 ଅ଼ଡ଼େ ମ଼ସା ଲ଼କୁଣି ଜାହାରା ତାକି ଅଣ୍‌ପିନାଣି ମେସ୍ତେସି, ଇଚିହିଁ ହାରଣ ଏ଼ୱାରି ସାତ୍ରୁୟାଁ ବିତ୍ରା ଲାଜା ପା଼ଣ୍‌ନି ଲେହେଁତି କାମା କିହାଁ ପିସାମାଚେସି। 26 ଏଚେଟିଏ ମ଼ସା ତୂମୁ ଦୁୱେରିତା ନିଚାହାଁ ଏଲେଇଚେସି, "ପ୍ରବୁତି ୱାକି ଆମ୍ବାଆସି ମାନେସି ? ଏ଼ୱାସି ନା଼ ତା଼ଣା ୱା଼ପେସି।" ଏଚେଟିଏ ଲେ଼ବି ମୀର୍‌କା ତାନି ତା଼ଣା ୱା଼ହାଁ ରୁଣ୍ତା ଆ଼ତେରି। 27 ଏଚେଟିଏ ଏ଼ୱାସି ଏ଼ୱାରାଇଁ ଏଲେଇଚେସି, ଇସ୍ରାୟେଲତି ପ୍ରବୁ ମାହାପୂରୁ ଈ କାତା ଏଲେଇନେସି, "ମୀରୁ ବାରେ ଜା଼ଣା ଜାହା ଜାହାରା କୁଦ୍‌ଗୁତା କାଣ୍ତା ଦସାହାଁ ତୂମୁୟାଁ ଈ ଦୁୱେରିଟିଏ ଅ଼ର ଦୁୱେରି ପାତେକା ହାଜୁ, ବାରେ ଜା଼ଣା ଜାହାରା ଜାହାରା ତାୟି, ତ଼ଣେ ଅ଼ଡ଼େ ପା଼ଡ଼ିତି ଲ଼କୁଣି ପା଼ୟାଦୁ।" 28 ଏଚେଟିଏ ଲେ଼ବି ମୀର୍‌କା ମ଼ସାତି କାତା ଲେହେଁ ଏଲେକିହାଲିଏ, ଏ଼ ଦିନା ତୀନି ମା଼ଣା ଲ଼କୁ ହା଼ତେରି। 29 ଅ଼ଡ଼େ ମ଼ସା ଏଲେଇଚେସି, "ମୀରୁ ବାରେ ଜା଼ଣା ଜାହା ଜାହାରା ମୀର୍‌କା ଅ଼ଡ଼େ ତାୟିୟାଁ କ଼ପାଟି ନିଙ୍ଗାହାଁ ମାହାପୂରୁ କ଼ସମି ମୀରୁ ହେର୍‌ପିଆ଼ଦୁ, ଏଚେଟିଏ ଏ଼ୱାସି ଈ ଦିନାତା ମିଙ୍ଗେ ବ଼ର ହିୟାନେସି।"

30 ତାନି ଅ଼ର ଦିନା ମ଼ସା ଲ଼କୁଣି ଏଲେଇଚେସି, "ମୀରୁ ହା଼ରେକା ପା଼ପୁ କିହାମାଞ୍ଜେରି, ନୀଏଁ ନା଼ନୁ ପ୍ରବୁ ତା଼ଣା ହାଜିମାଇଁ; ଆ଼ହାଲି ଆ଼ଡିତିହିଁ, ନା଼ନୁ ମୀ ପା଼ପୁତି ବାଦୁଲି ହେର୍‌ପିଇଁ।" 31 ଏଚେଟିଏ ମ଼ସା ପ୍ରବୁ ତା଼ଣା ୱେଣ୍ତା ହାଜାହାଁ ଏଲେଇଚେସି, "ଅହ଼ତା, ଈ ଲ଼କୁ ହା଼ରେକା ପା଼ପୁ କିହାଁ ତାମ୍‌ଙ୍ଗେ ତାକି ବାଂଗାରା ପେ଼ନୁ ତିୟାରା କିହାମାନେରି। 32 ଆ଼ତିଜିକେଏ ନୀଏଁ, ଏ଼ୱାରି ପା଼ପୁ ମ୍ଣେକ୍‌ମୁ; ମ୍ଣେକ୍‌ଅତି, ଆତିହିଁ ନା଼ନୁ ବାତିମା଼ଲି ମାଞ୍ଜାଇଁ, ନୀ ରା଼ଚାମାନି ପତିଟି ନା଼ ଦ଼ରୁ ମ୍ଣେକ୍‌ହାତୁହ୍‌ମୁ।"

33 ଏଚେଟିଏ ପ୍ରବୁ ମ଼ସାଇଁ ଏଲେଇଚେସି, "ଏମିନିଗାଟାସି ନା଼ କ଼ପାଟି ପା଼ପୁ କିହାମାନେସି, ନା଼ନୁ ନା଼ ପତିଟି ଏ଼ୱାଣି ଦ଼ରୁ ମ୍ଣେକ୍‌ହାତୁହ୍‌ଇଁ। 34 ନୀଏଁ ନୀନୁ ହାଲାମୁ, ନା଼ନୁ ଏମିନି ଦେ଼ସାତି କାତା ନିଙ୍ଗେ ୱେସାମାଞ୍ଜାଇଁ, ଏ଼ ଦେ଼ସାତା ଈ ଲ଼କୁଣି ଅ଼ହିଁ ହାଲାମୁ; ମେହ୍‌ମୁ, ନା଼ ଦୂତୁ ନୀ ନ଼କି ନ଼କିତା ହାନେସି; ସାମା ନା଼ନୁ ଡଣ୍ତ ହୀନି ଦିନା ଏ଼ୱାରି ପା଼ପୁତି ଡଣ୍ତ ଏ଼ୱାରାକି ହୀଇଁ।"

35 ଇଞ୍ଜାଁ, ପ୍ରବୁ ଏ଼ୱାରାଇଁ ମର୍‌ଡ଼ି ପାଣ୍ତାହାଁ ୱେ଼ତେସି, ଏ଼ନାଆଁତାକି ଇଚିହିଁ ଏ଼ୱାରି ଏଲେଇଞ୍ଜାମାଚାକି ହାରଣ କ଼ଡି ଡା଼ଲୁତି ତିୟାରା କିହାମାଚେସି।