1 ଏଚେଟିଏ ପ୍ରବୁ ମ଼ସାଇଁ ଏଲେଇଚେସି, 2 "ନୀନୁ ଇସ୍ରାୟେଲ ମୀର୍‌କାଣି ଏଲେଇନାମୁ, ମୀରୁ ୱେଣ୍ତାହାଁ ମିଗ୍‌ଦଲ ଅ଼ଡ଼େ ସାମ୍‌ଦୁରି ମାଦି ପିହହିରତ ୱେ଼ଡ଼ା ହ଼ପୁ ୱାକିତି ବାଲ-ସପନ ନ଼କିତା ତୂମୁୟାଁ ଗ଼ଞ୍ଜାଦୁ; ଇଚିହିଁ ତାନି ନ଼କିତା ସାମ୍‌ଦୁରି ଦାରି ତୂମୁୟାଁ ଗ଼ଞ୍ଜାଦୁ। 3 ଏଚେଟିଏ ପା଼ର ଇସ୍ରାୟେଲ ଲ଼କୁତି କାତା ଏଲେଇନେସି, ‘ଏ଼ୱାରି ଦେ଼ସାତା ଆଲାରା ଆ଼ହାମାନେରି ଅ଼ଡ଼େ ବାଟାତା ଜିରୁ ବା଼ଣା ଆ଼ହାମାନେରି।’ 4 ଅ଼ଡ଼େ, ନା଼ନୁ ପା଼ରତି ହିୟାଁ ଆ଼ଟ୍‌ୱା କିଇଁ, ଏଚେଟିଏ ଏ଼ୱାସି ଏ଼ୱାରି ଜେ଼ଚ ହାନେସି; ଇଞ୍ଜାଁ ନା଼ନୁ ପା଼ର ଅ଼ଡ଼େ ତାନି ବାରେ ରିଜାରି କ଼ସ୍‌କା ତା଼ଣାଟି ସାମ୍ବ୍ରମି ବେଟାଆ଼ଇଁ; ଏଚେଟିଏ ନା଼ନୁ ପ୍ରବୁତେଏଁ ଈଦାଆଁ ମିସର ଦେ଼ସାତି ଲ଼କୁ ପୁନେରି।" ଏଚେଟିଏ ଏ଼ୱାରି ଏଲେକିତେରି।

5 ଏଚେଟିଏ ଇସ୍ରାୟେଲ ଲ଼କୁ ହାଜାତୁସ୍ତେରି, ଈ କାତା ମିସରତି ରାଜାଇଁ ୱେସାଲିଏ, ଲ଼କୁ ତାକି ପା଼ର ଅ଼ଡ଼େ ତାନି ହ଼ଲିୟାଙ୍ଗା ହିୟାଁ ତିରିମ୍ଣିହେ; ଏଚେଟିଏ ଏ଼ୱାରି ଏଲେଇଚେରି, "ମା଼ର ଈଦାଆଁ ଏ଼ନିଲେହେଁତି କାମା କିହାମାନାୟି ? ଏ଼ନାଆଁତାକି ଇସ୍ରାୟେଲ ଲ଼କୁଣି ମା଼ ହ଼ଲିୟାଙ୍ଗା କାମା କିନି ତା଼ଣାଟି ପିସା ହୀତାୟି ?" 6 ଏଚେଟିଏ ରାଜା ତାନି ରାତା ତିୟାରା କିୱିକିତେସି ଅ଼ଡ଼େ ତାନି ଲ଼କୁଣି ତାନି ତଲେ ଅ଼ତେସି। 7 ଇଞ୍ଜାଁ ସ଼ୱାଞ୍ଜା ଆ଼ଚିତି ରାତାୟାଁ, ଅ଼ଡ଼େ ମିସର ଲ଼କୁତି ବାରେ ରାତାୟାଁ ଅ଼ଡ଼େ ବାରେ ରାତାୟାଁଣା ଜୁଜୁ କିନି ବା଼ଡ଼୍‌ୟୁ ଗାଟାରାଇଁ ଅ଼ତେସି। 8 ଅ଼ଡ଼େ ପ୍ରବୁ ମିସରତି ରାଜା ପା଼ରତି ହିୟାଁ ଆ଼ଟ୍‌ୱା କିୟାଲିଏ, ଏ଼ୱାସି ଇସ୍ରାୟେଲ ଲ଼କୁ ଜେ଼ଚ ଜେ଼ଚ ପେ଼ର୍‌ହା ଅ଼ତେସି; ଏଚିବେ଼ଲା ଇସ୍ରାୟେଲ ଲ଼କୁ ଆଜାଆରେ଼ଟୁ ହାଜିମାଚେରି। 9 ଏଚେଟିଏ ମିସର ଲ଼କୁ, ଇଚିହିଁ ପା଼ରତି ବାରେ ଗ଼ଡ଼ାୟାଁ, ରାତାୟାଁ ଅ଼ଡ଼େ ଗ଼ଡ଼ାୟାଁଣା ହ଼ଚାହାଁ ଜୁଜୁ କିନାରି, ଏ଼ୱାରି ଜେ଼ଚ ଜେ଼ଚ ହାଜାହାଁ ବାଲ-ସପନ ନ଼କିତା ପିହହିରତ ଦାରି ସାମ୍‌ଦୁରି ଗାଟୁତା ଇସ୍ରାୟେଲ ଲ଼କୁ ତୂମୁ ଗ଼ଞ୍ଜାମାଚି ବେ଼ଲାତା ଏ଼ୱାରି ତା଼ଣା ଏଗାହାଚେରି।

10 ଅ଼ଡ଼େ ପା଼ର ଦାରି ୱା଼ହାଲିଏ, ଇସ୍ରାୟେଲ ଲ଼କୁ ତାମି ଜେ଼ଚ ମିସର ଲ଼କୁ ପେର୍‌ହା ତାଚିମାନାଣି ମେସାହାଁ ହା଼ରେକା ଆଜିତେରି, ଇଞ୍ଜାଁ ଇସ୍ରାୟେଲ ଲ଼କୁ ପ୍ରବୁଇଁ ହା଼ଟିତେରି। 11 ଇଞ୍ଜାଁ, ମ଼ସାଇଁ ଏଲେଇଚେରି, "ମିସର ଦେ଼ସାତା ମାହ୍‌ଣିମାଣ୍ତା ହିଲାଆତେ ଇଞ୍ଜିଁ କି ଈ ବାଟାତା ନୀନୁ ମାଙ୍ଗେ ପା଼ୟାଲି ତାତାତି ? ମା଼ ତଲେ ଇଲେକିହିଁ ଲେ଼ମ୍ବାହାଁ ମାଙ୍ଗେ ମିସର ଦେ଼ସାଟି ଏ଼ନାଆଁତାକି ହ଼ପ୍‌ହା ତାତାତି ? 12 ମାଙ୍ଗେ ଡ଼ୟାଲି ହିୟାମୁ, ମା଼ମ୍ବୁ ମିସର ଲ଼କୁତି ହ଼ଲିୟା କାମା କିନମି, ଇଚିହିଁ ଈ ବାଟାତା ହା଼ନି କିହାଁ ମିସର ଲ଼କୁତି ସେ଼ବା କିନାୟି ମାଙ୍ଗେ ତାକି ହା଼ରେକା ନେହିଁ; ମା଼ମ୍ବୁ କି ମିସରତା ଈ କାତା ନିଙ୍ଗେ ୱେସାମାଞ୍ଜାଆ଼ତମି ?"

13 ଏଚେଟିଏ ମ଼ସା ଲ଼କୁଣି ଏଲେଇଚେସି, "ମୀରୁ ଆଜାଆଦୁ, ସୁସ୍ତି ଆ଼ଦୁ; ନୀଞ୍ଜୁ ପ୍ରବୁ ଏ଼ନିକିହିଁ ମିଙ୍ଗେ ଗେଲ୍‌ପାନେସି, ଏ଼ଦାଆଁ ସିନିକିଦୁ; ମୀରୁ ନୀଞ୍ଜୁ ଏ଼ନିକିହିଁ ମିସର ଦେ଼ସାତି ଲ଼କୁଣି ମେସିମାଞ୍ଜେରି, ଏଲେକିହିଁ ଅ଼ଡ଼େ କା଼ଲେଏ ଏ଼ୱାରାଇଁ ମେହ୍‌ଅତେରି।" 14 ପ୍ରବୁ ମୀ କ଼ସମି ଜୁଜୁ କିନେସି, ମୀରୁ ପାଲେଏ ମାଞ୍ଜେରି।

15 ଏଚେଟିଏ ପ୍ରବୁ ମ଼ସାଇଁ ଏଲେଇଚେସି, "ନୀନୁ ନାଙ୍ଗେ ଏ଼ନାଆଁତାକି ହା଼ଟିମାଞ୍ଜାଦି ? ଇସ୍ରାୟେଲ ଲ଼କୁଣି ୱେହ୍‌ମୁ; ଏ଼ୱାରି ନ଼କିତା ହାଲ୍‌ବେରି। 16 ଇଞ୍ଜାଁ ନୀନୁ ନୀ ବାଡ଼୍‌ଗା ପେର୍‌ମୁ ଅ଼ଡ଼େ ସାମ୍‌ଦୁରି ଲାକ କେୟୁ ଦା଼ସାହାଁ ଏ଼ଦାଆଁ ରୀ ବା଼ଗା କିମୁ; ଏଚେଟିଏ ଇସ୍ରାୟେଲ ଲ଼କୁ ୱା଼ୟିତି ଜିରୁତା ସାମ୍‌ଦୁରି ବିତ୍ରା ତା଼କିନେରି। 17 ଇଞ୍ଜାଁ, ମେହ୍‌ଦୁ, ନା଼ନୁ ମିସର ଲ଼କୁ ହିୟାଁତି ଆ଼ଟ୍‌ୱା କିଇଁ, ଏଚେଟିଏ ଏ଼ୱାରି ଇସ୍ରାୟେଲ ଲ଼କୁ ଜେ଼ଚ ଜେ଼ଚ ପେର୍‌ହା ଅ଼ନେରି, ଏଚେଟିଏ ନା଼ନୁ ପା଼ର ଅ଼ଡ଼େ ତାନି ବାରେ ରିଜାରି କ଼ସ୍‌କା, ରାତାୟାଁ ଅ଼ଡ଼େ ଗ଼ଡ଼ାୟାଁଣା ହ଼ଚାହାଁ ଜୁଜୁ କିନାରି ତା଼ଣାଟି ସାମ୍ବ୍ରମି ବେଟାଆ଼ଇଁ। 18 ଅ଼ଡ଼େ ପା଼ର ଇଞ୍ଜାଁ ତାନି ରାତାୟାଁ ଅ଼ଡ଼େ ଗ଼ଡ଼ାୟାଁଣା ହ଼ଚାହାଁ ଜୁଜୁ କିନାରି ତା଼ଣାଟି ସାମ୍ବ୍ରମି ବେଟାଆ଼ତି ଡା଼ୟୁ ନା଼ନୁ ପ୍ରବୁତେଏଁ, ଈଦାଆଁ ମିସର ଲ଼କୁ ପୁନେରି।"

19 ଏଚିବେ଼ଲା ଇସ୍ରାୟେଲ ଲ଼କୁ ନ଼କିତା ହାଜିମାଚି ମାହାପୂରୁତି ଦୂତୁ ଏ଼ ଟା଼ୟୁ ପିସାହାଁ ଏ଼ୱାରି ଜେ଼ଚ ଆ଼ତେ ଇଞ୍ଜାଁ ହା଼ଗୁ ମୁଣ୍ତା ଏ଼ୱାରି ନ଼କିଟି ଗୁଚାଆ଼ହାଁ ଏ଼ୱାରି ଡା଼ୟୁ ନିତେ। 20 ଏ଼ ହା଼ଗୁ ମୁଣ୍ତା ମିସର ଗଚି ଅ଼ଡ଼େ ଇସ୍ରାୟେଲ ଗଚି ମାଦି ୱା଼ତେ, ଇଞ୍ଜାଁ, ହା଼ଗୁ ଅ଼ଡ଼େ ଆନ୍ଦେରି ଆ଼ତି ଜିକେଏ ଏ଼ଦି ଲା଼ଆଁୟାଁ ଉଜେଡ଼ି କିତେ; ଏ଼ଦାଆଁତାକି ଲା଼ଆଁୟାଁ ର଼ ଗଚି ଅ଼ର ଗଚି ଦାରି ୱା଼ହାଲି ଆ଼ଡାଆତେରି।

21 ଏଚେଟିଏ ମ଼ସା ସାମ୍‌ଦୁରି ଲାକ ତାନି କେୟୁ ଦା଼ସାଲିଏ, ପ୍ରବୁ ଲା଼ଆଁୟାଁ ୱେ଼ୟେ ୱେ଼ଡ଼ା ହ଼ପୁ ୱାକିତି ଗା଼ଲି ତଲେ ସାମ୍‌ଦୁରି ରୀ ବା଼ଗା କିହାଁ ୱା଼ୟିତି ବୂମି କିତେସି ଅ଼ଡ଼େ ଏ଼ୟୁ ରୀ ବା଼ଗା ଆ଼ତୁ। 22 ଏଚେଟିଏ ଇସ୍ରାୟେଲ ଲ଼କୁ ୱା଼ୟିତି ଜିରୁ ହୀହାଁ ସାମ୍‌ଦୁରି ମାଦିଟି ତା଼କିତେରି, ଇଞ୍ଜାଁ ଏ଼ୱାରି ଟିଃନି ଅ଼ଡ଼େ ଟେ଼ବ୍ରି ୱାକି ଏ଼ୟୁ କ଼ଟା ଲେହେଁ ନିତୁ। 23 ଏଚେଟିଏ ମିସର ଲ଼କୁ, ଇଚିହିଁ ପା଼ର ରାଜାତି ବାରେ ଗ଼ଡ଼ାୟାଁ, ରାତାୟାଁ ଅ଼ଡ଼େ ଗ଼ଡ଼ାୟାଁଣା ହ଼ଚାହାଁ ଜୁଜୁ କିନାରି ବାରେ ଜା଼ଣା ଏ଼ୱାରି ଜେ଼ଚ ହଟି ହଟିହିଁ ସାମ୍‌ଦୁରିତା ହ଼ଟେରି। 24 ସାମା ଏ଼ ୱେ଼ୟା ନେ଼କେରି ପ୍ରବୁ ହିଚୁ ଅ଼ଡ଼େ ହା଼ଗୁ ମୁଣ୍ତା ତଲେ ମିସର ଲ଼କୁତି ଜୁଜୁ କିନାରାଇଁ ସିନିକିତେସି ଅ଼ଡ଼େ ମିସର ଲ଼କୁତି ରିଜାରି କ଼ସ୍‌କାଣି କିଲିବିଲି କିତେସି। 25 ଏ଼ୱାସି ଏ଼ୱାରି ରାତାତି ବିଲାୟାଁ ହୁକ୍‌ହା ତୁସାଲିଏ, ଏ଼ୱାରି ହା଼ରେକା କସ୍ତ ତଲେ ରାତାୟାଁଣି ତା଼କିକିତେରି; ଏଚେଟିଏ ମିସର ଲ଼କୁ ଏଲେଇଚେରି, "ୱା଼ଦୁ ଇସ୍ରାୟେଲ ଲ଼କୁ ତା଼ଣାଟି ହଟାତୁହ୍‌ନ; ଇଚିହିଁ ପ୍ରବୁ ଏ଼ୱାରି ୱାକି ଆ଼ହାଁ ମିସର ଲ଼କୁ କ଼ପାଟି ଜୁଜୁ କିହିମାନେସି।"

26 ଏଚେଟିଏ ପ୍ରବୁ ମ଼ସାଇଁ ଏଲେଇଚେସି, "ନୀନୁ ସାମ୍‌ଦୁରି ଲାକ ନୀ କେୟୁ ଦା଼ହ୍‌ମୁ; ଏଚେଟିଏ ମିସର ଲ଼କୁତି ରାତାୟାଁ ଅ଼ଡ଼େ ଗ଼ଡ଼ାୟାଁଣା ହ଼ଚାହାଁ ଜୁଜୁ କିନାରି ମୁହେଁ ୱେଣ୍ତେ ଏ଼ୟୁ ୱା଼ନୁ।" 27 ଏଚେଟିଏ ମ଼ସା ସାମ୍‌ଦୁରି ଲାକ ତାନି କେୟୁ ଦା଼ସ୍‌ତେସି, ଅ଼ଡ଼େ ଲା଼ଇ ବେ଼ଲାତାକି ସାମ୍‌ଦୁରିତି ଏ଼ୟୁ ୱେଣ୍ଡେ କାଲ୍‌ହାଲି ମା଼ଟ୍‌ହୁ; ଏଚେଟିଏ ମିସର ଲ଼କୁ ୱେଣ୍ତେ ହଟାଲିଏ, ପ୍ରବୁ ଏ଼ୱାରାଇଁ ସାମ୍‌ଦୁରିତା ମୁସା ତୁସ୍ତେସି। 28 ଇଞ୍ଜାଁ, ଏ଼ୟୁ ୱେଣ୍ଡେ ୱା଼ହାଁ ଏ଼ୱାରି ରାତାୟାଁ ଅ଼ଡ଼େ ଗ଼ଡ଼ାୟାଁଣା ହ଼ଚାମାଚି ଲ଼କୁଣି ମୁସ୍ତେ; ଏଚେଟିଏ ପା଼ରତି ଏମିନି ରିଜାରି କ଼ସ୍‌କା ଏ଼ୱାରି ଜେ଼ଚ ଜେ଼ଚ ସାମ୍‌ଦୁରି ମାଦି ହାଜାମାଚେରି, ଏ଼ୱାରି ବିତ୍ରାଟି ରଅସି ଜିକେଏ ଡ଼ୟାଆତେସି। 29 ସାମା ଇସ୍ରାୟେଲ ଲ଼କୁ ୱା଼ୟିତି ଜିରୁଟି ସାମ୍‌ଦୁରି ମାଦିଟି ତା଼କା ହାଚେରି; ଇଞ୍ଜାଁ ସାମ୍‌ଦୁରି ଏ଼ୟୁ ଏ଼ୱାରି ଟିଃନି ଅ଼ଡ଼େ ଟେ଼ବ୍ରି ୱାକି କ଼ଟା ଲେହେଁ ଆ଼ତୁ।

30 ଇଲେକିହିଁ ଏ଼ ଦିନା ପ୍ରବୁ ମିସର ଲ଼କୁ ତା଼ଣାଟି ଇସ୍ରାୟେଲ ଲ଼କୁଣି ଗେଲ୍‌ପିତେସି, ଅ଼ଡ଼େ ଇସ୍ରାୟେଲ ଲ଼କୁ ମିସର ଲ଼କୁଣି ସାମ୍‌ଦୁରି ଗାଟୁତା ହା଼ତାରାଇଁ ମେସ୍ତେରି। 31 ପ୍ରବୁ ମିସର ଲ଼କୁ କ଼ପାଟି ଏମିନି କାଜା କାମା କିତେସି, ଏ଼ଦାଆଁ ଇସ୍ରାୟେଲ ଲ଼କୁ ମେସ୍ତେରି; ଏଚେଟିଏ ଇସ୍ରାୟେଲ ଲ଼କୁ ଆଜାହାଁ ପ୍ରବୁ ତା଼ଣା ଅ଼ଡ଼େ ତାନି ହ଼ଲେଏସି ମ଼ସା ତା଼ଣା ଜିକେଏ ନାମିତେରି।