Êxodo 2

ମ଼ସାତି ଜାର୍ନା

1 ଏଚେଟିଏ ଲେ଼ବି କୂଡ଼ାତା ଜାର୍ନାଆ଼ତି ର଼ ମାଣ୍‌ସି ଲେ଼ବି କୂଡ଼ାଟି ଜାର୍ନାଆ଼ତି ର଼ ପ଼ଦାନି ବୀହା ଆ଼ତେସି। 2 ଏଚେଟିଏ ଏ଼ ଇୟା ପୂରାମା଼ସା ଆ଼ହାଁ ର଼ ମୀର୍‌ଏଣାଇଁ ଜାର୍ନି କିତେ; ଇଞ୍ଜାଁ, କକାଣି ହା଼ରେକା ଅ଼ଜୁ ମେସାହାଁ ଏ଼ଦି ଏ଼ୱାଣାଇଁ ତୀନି ଲେ଼ଞ୍ଜୁ ପାତେକା ଡ଼ୁକ୍‌ହାଁ ଇଟିତେ। 3 ଏଚେଟିଏ ଏ଼ଦି ଅ଼ଡ଼େ ଡ଼ୁକ୍‌ହାଲି ଆ଼ଡାଆନା ଏ଼ଦି ର଼ ନା଼ଡା ତଲେ କିତି ପେ଼ଡ଼ା ଅ଼ହାଁ, ସୁନ୍ଦାଁ ଇର୍‌ଆତି ନିୟୁଁ ଅ଼ଡ଼େ ହା଼ନିତି ହିଞ୍ଜୁ ତଲେ ଊସ୍‌ପାହାଁ ଏ଼ ବିତ୍ରା କକାଣି ଡା଼ଲୁଇଁ ଇଟାହାଁ ନିଲ କାଡା ଗାଟୁତି ନା଼ଡା ଜା଼ଡ଼ାତା ଇଟିତେ। 4 ଇଞ୍ଜାଁ ଏ଼ୱାଣାଇଁ ଏ଼ନାଆଁ ଆ଼ନେ, ଏ଼ଦାଆଁ ସିନିକିହାଲି ତାକି ତାନି ତାଙ୍ଗି ହେକଟି ନିଚାହାଁ ଡ଼ୟିତେ।

5 ଏଚେଟିଏ ପା଼ରତି ମା଼ଙ୍ଗା ଏ଼ୟୁ ମୀହାଲି ନିଲ କାଡାତା ୱା଼ତେ, ତାନି ହ଼ଲେଣିସିକା କାଡା ଗିଚୁତା ରେ଼ଜିମାଚୁ। ଏଚିବେ଼ଲା ଏ଼ଦି ନା଼ଡାୟାଁ ଡାଙ୍ଗୁତା ର଼ ପେ଼ଡ଼ା ମେସାହାଁ ଏ଼ଦାଆଁ ତାଚାଲି ତାନି ହ଼ଲେଣିନି ପାଣ୍ତିତେ। 6 ଏ଼ଦି ପେ଼ଡ଼ା ଦେଚାଲିଏ କକାଣି ଡା଼ଲୁଇଁ ମେସ୍ତେ; ଇଞ୍ଜାଁ ଏ଼ କକାସି ଡ଼ୀହିଁ ମାନେସି; ଏଚେଟିଏ ଏ଼ଦି କାର୍ମା ଆ଼ହାଁ ଏଲେଇଚେ, "ଈୱାସି ର଼ ଏବ୍ରି କକାସି।"

7 ଏଚିବେ଼ଲା ତାନି ତାଙ୍ଗି ପା଼ର ମା଼ଙ୍ଗାନି ଏଲେଇଚେ, "ନା଼ନୁ ହାଜାହାଁ କକାଣାକି ପା଼ଲୁ ଊଟ୍‌ହାଲି ଏବ୍ରି ଇୟାସିକା ବିତ୍ରାଟି ର଼ ହ଼ଲେଣିନି ହା଼ଟା ତାଇଁ କି ?"

8 ଏଚେଟିଏ ପା଼ର ମା଼ଙ୍ଗା ଏଲେଇଚେ, "ହାଲାମୁ," ଏଚେଟିଏ ଏ଼ ପ଼ଦା ହାଜାହାଁ କକାଣି ତାମି ଆୟାନି ହା଼ଟା ତାତେ। 9 ଏଚେଟିଏ ପା଼ରନି ମା଼ଙ୍ଗା ଏ଼ଦାଣି ଏଲେଇଚେ, "ନୀନୁ ଈ କକାଣାଇଁ ଅ଼ହାଁ ନା଼ ତାକି ପା଼ଲୁ ଊଟ୍‌ମୁ; ନା଼ନୁ ନିଙ୍ଗେ ଡାବୁୟାଁ ହିୟାଇଁ," ଏଚେଟିଏ ଏ଼ ଇୟା କକାଣାଇଁ ଅ଼ହାଁ ପା଼ଲୁ ଊଟ୍‌ହେ। 10 ଏଚେଟିଏ କକାସି ପାଡା ଆ଼ହାଲିଏ, ଏ଼ଦି କକାଣାଇଁ ପା଼ର ମା଼ଙ୍ଗାକି ହୀତେ, ଏଚେଟିଏ କକାସି ଏ଼ଦାନି ମୀର୍‌ଏସି ଆ଼ତେସି। ଏ଼ଦାଆଁତାକି ଏ଼ଦି ତାନି ଦ଼ରୁ ମ଼ସା ଇଟିତେ; ଇଚିହିଁ ଏ଼ଦି ଏଲେଇଚେ, "ନା଼ନୁ ଈୱାଣାଇଁ ଏ଼ୟୁଟି ରେଜା କଡାମାଇଁ।"

ମ଼ସା ମିଦିୟନ ହଣ୍‌ନାୟି

11 ଏଚିବେ଼ଲା ମ଼ସା ପାଡା ଆ଼ହାଲିଏ ର଼ ଦିନା ଏ଼ୱାସି ତାନି ଏବ୍ରି ତାୟିୟାଁ ତା଼ଣା ହାଜାହାଁ ଏ଼ୱାରି ବ଼ଜୁ ଡେ଼କିମାଚାଣି ମେସ୍ତେସି; ଇଞ୍ଜାଁ ର଼ ମିସରତାସି ତାନି ତାୟିୟାଁ ବିତ୍ରାଟି ର଼ ଏବ୍ରି ଲ଼କୁଇଁ ୱେ଼ଚିମାନାଣି ମେସ୍ତେସି। 12 ଏ଼ଦାଆଁତାକି ମ଼ସା ସା଼ରିସୁଟୁ ସିନିକିତେସି, ଇଞ୍ଜାଁ ଆମ୍ବାଆରାଇଁ ମେହ୍‌ଆଲିଏ ଏ଼ ମିସର ତା଼ଣାଇଁ ହାୟେ ପା଼ୟାହାଁ ବାଃଲିତା ମୁସ୍ତେସି। 13 ତାନି ଅ଼ର ଦିନା ଏ଼ୱାସି ପାଙ୍ଗାତା ହାଜାହାଁ ରୀ ଏବ୍ରି ଲ଼କୁ ଗଡ଼୍‌ହା ଆ଼ହିମାନାଣି ମେସାହାଁ ଦ଼ହ କିହାମାନାଣାଇଁ ଏଲେଇଚେସି, "ଏ଼ନାଆଁ ତାକି ନୀନୁ ନୀ ତାୟିଇଁ ୱେ଼ଚିମାଞ୍ଜି ?"

14 ଏଚେଟିଏ ଏ଼ୱାସି ଏଲେଇଚେସି, "ନିଙ୍ଗେ ଆମ୍ବାଆସି ମା଼ ମୁହେଁ ନୀହାଁୟି ଅ଼ଡ଼େ ସା଼ଲୱି କିହାଲି ହେର୍‌ପାତେସି ? ନୀନୁ ଏ଼ନିକିଁ ମିସରତି ମାଣ୍‌ସିଇଁ ପା଼ୟିତି ଏଲେକିହିଁ ନାଙ୍ଗେ ପା଼ୟାଲି ଅଣ୍‌ପିମାଞ୍ଜି ?" ଏ଼ କାତା ୱେଞ୍ଜାହାଁ ମ଼ସା ଆଜାହାଁ ଏଲେଇଚେସି, "ଈ କାତା ସାତେଏ ଲ଼କୁ ପୁଚେରିଏ।" 15 ଏଚେଟିଏ ପା଼ର ଈ କାତା ୱେଞ୍ଜାହାଁ ମ଼ସାଇଁ ପା଼ୟାଲି ଅଣ୍‌ପିତେସି, ସାମା ମ଼ସା ପା଼ର ତା଼ଣାଟି ହଟାହାଁ ମିଦିୟନ ଦେ଼ସାତା ଡ଼ୟାଲି ହାଜାହାଁ ର଼ କୁହି ଟଟତା କୁଗିତେସି। 16 ମିଦିୟନ ପୂଜେରାତି ସା଼ତା ଜା଼ଣା ମା଼ସ୍‌କା ମାଚୁ; ଏ଼ୱି ଏ଼ କୁହିତା ୱା଼ହାଁ ତାଞ୍ଜିତି ମେ଼ଣ୍ତାୟାଁ ଏ଼ୟୁ ଊଟ୍‌ହାଲି ତାକି ଏ଼ୟୁ ରେଜାହାଁ କୁଣ୍ତିତା ନେଞ୍ଜିକିତୁ। 17 ଏଚେଟିଏ ମେ଼ଣ୍ତା ଗ଼ଡ଼୍‌କା ୱା଼ହାଁ ଏ଼ୱାସିକାଣି ପେ଼ର୍‌ହାଲି ମା଼ଟ୍‌ହେରି, ସାମା ମ଼ସା ନିଙ୍ଗାହାଁ ଏ଼ୱାସିକାଣି ସା଼ୟେମି କିହାଁ ଏ଼ୱାସିକା ମେ଼ଣ୍ତାୟାଁ ମାନ୍ଦାତି ଏ଼ୟୁ ଊଟ୍‌ହେସି। 18 ଏଚିବେ଼ଲା ଏ଼ୱି ତାମି ଆ଼ବା ରୁୟେଲ ତା଼ଣା ୱେଣ୍ତା ହାଜାଲିଏ, ଏ଼ୱାସି ଏ଼ୱାସିକାଣି ୱେଚେସି, "ନୀଞ୍ଜୁ ମୀରୁ ଇଚେକା ତବେ ଏ଼ନିକିହିଁ ୱା଼ତେରି ?"

19 ଏଚେଟିଏ ଏ଼ୱି ଏଲେଇଚୁ, "ମିସରତି ର଼ ମାଣ୍‌ସି ଗ଼ଡ଼୍‌କା ତା଼ଣାଟି ମାଙ୍ଗେ ଗେଲ୍‌ପାତେସି, ଇଞ୍ଜାଁ, ମା଼ ତାକି ଏ଼ୟୁ ରେଜାହାଁ ମେ଼ଣ୍ତାୟାଁ ମାନ୍ଦାତି ଏ଼ୟୁ ଊଟ୍‌ହେସି।" 20 ଏଚେଟିଏ ଏ଼ୱାସି ତାନି ମା଼ସ୍‌କାଣି ଏଲେଇଚେସି, "ଏ଼ୱାସି ଆମ୍ବିୟା ମାନେସି ? ମୀରୁ ଏ଼ନାଆଁତାକି ଏ଼ୱାଣାଇଁ ପିସା ୱା଼ତେରି ? ଏ଼ୱାଣାଇଁ ହା଼ଟାଦୁ; ଏ଼ୱାସି ମା଼ ତଲେ ରା଼ନ୍ଦା ତିନେସି।"

21 ଏଚେଟିଏ ମ଼ସା ଏ଼ ମାଣ୍‌ସି ତଲେ ବାସା କିହାଲି ରା଼ଜି ଆ଼ତେସି; ଇଞ୍ଜାଁ ଏ଼ୱାସି ତାନି ମା଼ଙ୍ଗା ସିପରାଇଁ ମ଼ସାକି ବୀହା କିତେସି। 22 ଏଚେଟିଏ ଏ଼ ଆୟାଟି କକାଣାଇଁ ଜାର୍ନି କିହାଲିଏ, ମ଼ସା ଏ଼ୱାଣି ଦ଼ରୁ ଗେର୍ସମ ଇଟିତେସି; ଇଚିହିଁ ଏ଼ୱାସି ଏଲେଇଚେସି, "ନା଼ନୁ ଏଟ୍‌କା ଦେ଼ସାତାତେଏଁ ଏଟ୍‌କା ଦେ଼ସାତା ବାସା କିହାମାଇଁ।"

23 ଏଚର ବାର୍ସା ଆୟାଲିଏ ମିସରତି ରାଜା ହା଼ତେସି, ଅ଼ଡ଼େ, ଇସ୍ରାୟେଲ ମୀର୍‌କା ୱେଟି କାମାତି କସ୍ତଟି କିଲିବିଲି ଆ଼ହିଁ ଡ଼ୀତେରି, ୱେଟି କାମା କିହିମାଚାକି ତାମି ଡ଼ୀକି ମାହାପୂରୁ ତା଼ଣା ଏଗାହାଚେ। 24 ଏଚେଟିଏ ମାହାପୂରୁ ତାମି ଡ଼ୀକି ହା଼ଡା ୱେଚେସି, ଅ଼ଡ଼େ ଅବ୍ରାହାମ, ଇସାହାକ ଇଞ୍ଜାଁ ଜାକୁବ ତଲେ ତାନି କିହାମାଚି ରା଼ଜିମା଼ନା ଅଣ୍‌ପିତେସି, 25 ଇଞ୍ଜାଁ ମାହାପୂରୁ ଇସ୍ରାୟେଲ ଲ଼କୁଣି ୱେଟି କାମାଟି କିଲିବିଲି ଆ଼ହିମାନାଣି ମେସ୍ତେସି ଅ଼ଡ଼େ ଏ଼ୱାରି କସ୍ତତି ପୁଚେସି।