18 ଏଚିବେ଼ଲା ବାରେ ଲ଼କୁ ହା଼ଗୁ ଗୂଣ୍ନାଣି ଅ଼ଡ଼େ ମ୍ଣିହ୍ନାଣି ଇଞ୍ଜାଁ ତୀତ୍ରି ହା଼ଡା ଅ଼ଡ଼େ ବ଼ୟିଁ ନିଙ୍ଗିମାନି ହ଼ରୁ ମେସ୍ତେରି; ଇଞ୍ଜାଁ, ଏ଼ଦାଆଁ ମେସାହାଁ ଆଜିତାକି ତୀର୍ଗିହିଁ ହେକ ନିତେରି। 19 ଅ଼ଡ଼େ ଏ଼ୱାରି ମ଼ସାଇଁ ଏଲେଇଚେରି, "ନୀନୁ ମା଼ ତଲେ କାତା ଆୟାମୁ, ମା଼ମ୍ବୁ ୱେନମି, ସାମା ମାହାପୂରୁ ମା଼ ତଲେ କାତା ଆୟାଆପେସି, ଆ଼ଆତିହିଁ ମା଼ମ୍ବୁ ହା଼ହାହାନମି।"
20 ଏଚେଟିଏ ମ଼ସା ଲ଼କୁଣି ଏଲେଇଚେସି, "ଆଜାଆଦୁ; ଇଚିହିଁ ମିଙ୍ଗେ ତାୟିପାରି କିହାଲି ଅ଼ଡ଼େ ମୀରୁ ଏ଼ନିକିଁ ପା଼ପୁ କିଅତେରି, ଏ଼ଦାଆଁତାକି ତାନି ଆଜି ମିଙ୍ଗେ ତ଼ସାଲି ମାହାପୂରୁ ୱା଼ହାମାନେସି।" 21 ଏ଼ଦାଆଁତାକି ଲ଼କୁ ହେକ ନିଚା ଡ଼ୟିତେରି; ସାମା ଏମିନି ଟା଼ୟୁତା ମାହାପୂରୁ ମାଚେସି, ମ଼ସା ଏ଼ ଗାଡି ଆନ୍ଦେରି ଟା଼ୟୁତା ହାଚେସି।
ପୂଜା ପିଣ୍ତାତି ମେ଼ରା
22 ଏଚେଟିଏ ପ୍ରବୁ ମ଼ସାଇଁ ଏଲେଇଚେସି, "ନୀନୁ ଇସ୍ରାୟେଲ ଲ଼କୁଣି ଈ କାତା ୱେହ୍ମୁ, ‘ନା଼ନୁ ହା଼ଗୁ ଲାକ ମାଞ୍ଜାହାଁ ମୀ ତଲେ କାତା ଆୟାତେଏଁ, ଈଦାଆଁ ମୀରୁ ମେସାମାଞ୍ଜେରି। 23 ଈଦାଆଁତାକି ମୀରୁ ନା଼ ସମାନା ଏ଼ନି ମାହାପୂରୁଇଁ ଆଟ୍ଆଦୁ, ଅ଼ଡ଼େ ଏଟ୍କାତି ପେ଼ଣ୍କାତି ମାହାପୂରୁ ତିୟାରା କିଆଦୁ; ମିଙ୍ଗେ ତାକି ବାଂଗାରା କି ୱେଣ୍ତିତି ପେ଼ଣ୍କା ବମାୟାଁ କେ଼ପାଆଦୁ। 24 ମୀରୁ ନା଼ କ଼ସମି ର଼ ଇର୍ଆତି ପିଣ୍ତା କେ଼ପିଦେରି, ଇଞ୍ଜାଁ, ଏ଼ଦାଣି ଲାକ ମୀ କ଼ଡି ଗରି ହିଚୁତା ହୂଡିନି ପୂଜା ଅ଼ଡ଼େ ନେହେଁତି ପୂଜା ହେର୍ପିଦେରି; ନା଼ନୁ ଏମିନି ବାରେ ଟା଼ୟୁତା ନା଼ ଦ଼ରୁ ଅଣ୍ପି କିୟାଇଁ, ଏ଼ ବାରେ ଟା଼ୟୁତା ନା଼ନୁ ମୀ ତା଼ଣା ୱା଼ହାଁ ମିଙ୍ଗେ ବ଼ର ହିୟାଇଁ। 25 ମୀରୁ ନା଼ କ଼ସମି ୱାଲ୍କାତି ପିଣ୍ତା କେ଼ପିଦେରି, ଆତିହିଁ ତୀର୍ସିତି ୱାଲି ତଲେ କେ଼ପଅତେରି; ଇଚିହିଁ ଏ଼ଦାଣି ଲାକ ମୀରୁ ମୀ ସାଜୁ ଡୀଗି କିତିହିଁ ଏ଼ଦାଣି ସୁଦୁ କିହି ହିଲଅତେରି। 26 ଅ଼ଡ଼େ ମୀ ନା଼ଗ୍ଡ଼ା ଏ଼ନିକିଁ ନା଼ ପିଣ୍ତା ଲାକ ତ଼ଞ୍ଜା ଆ଼ଏ, ଏ଼ଦାଆଁତାକି ମୀରୁ ପା଼ୱୁଜି ୱିସାହାଁ ନା଼ ପିଣ୍ତା ଲାକ ହାଲଅତେରି।’"