Êxodo 3

ମ଼ସାଇଁ ମାହାପୂରୁ ହା଼ଟିନାୟି

1 ଏଚିବେ଼ଲାତା ମ଼ସା ତାନି ପତ୍‌ଲେଏସି ଜିତ୍ର ଦ଼ରୁତି ମିଦିୟନ ପୂଜେରାତି ମେ଼ଣ୍ତାୟାଁ ମେଚିମାଚେସି; ର଼ ଦିନା ଏ଼ୱାସି ହ଼ରୁ ଡା଼ୟୁୱାକି ମେ଼ଣ୍ତାୟାଁ ଅ଼ହିଁ ହରେବ୍‌ ଦ଼ରୁତି ମାହାପୂରୁତି ହ଼ରୁତା ହାଚେସି। 2 ଏଚେଟିଏ ପ୍ରବୁତି ଦୂତୁ ହିଚୁ ଗୁଦ୍‌ୱା ତଲେ ର଼ ଦୁପାଟି ତ଼ଞ୍ଜାଆ଼ତେ; ଏଚେଟିଏ ଏ଼ୱାସି ସିନିକିତେସି, ଅ଼ଡ଼େ ମେହ୍‌ଦୁ, ଦୁପା ହିଚୁତଲେ ଡ଼ୀଞ୍ଜିମାନେ ଆ଼ତିୱା ଦୁପା ୱେହିହିଲେଏ। 3 ଏ଼ଦାଆଁତାକି ମ଼ସା ଏଲେଇଚେସି, "ନା଼ନୁ ର଼ ଦାରିତା ହାଜାହାଁ ଈ କାବାଆ଼ନି କାମା ସିନିକିଇଁ, ଦୁପା ଏ଼ନାଆଁତାକି ୱେହିହିଲେଏ।"

4 ସାମା ପ୍ରବୁ ଏଚିବେ଼ଲା ମେସ୍ତେସି, ସିନିକିହାଲି ମ଼ସା ଡାଗେ ୱା଼ହିମାନେସି, ଏଚିବେ଼ଲା ପ୍ରବୁ ଦୁପାଟି ଏ଼ୱାଣାଇଁ ହା଼ଟାହାଁ ଏଲେଇଚେସି, "ମ଼ସା, ମ଼ସା" ଏଚେଟିଏ ଏ଼ୱାସି ଏଲେଇଚେସି, "ନା଼ନୁ ଇମ୍ବାଆଁ ମାଇଁ।"

5 ଏଚେଟିଏ ମାହାପୂରୁ ଏଲେଇଚେସି, "ଈ ଡାଗେ ୱା଼ଆନି, ନୀ କଡାତି ସେପୁୟାଁ ହୁକ୍‌ମୁ; ଇଚିହିଁ ନୀନୁ ଆମିନି ଟା଼ୟୁତା ନିଚାମାଞ୍ଜି, ଏ଼ଦି ସୁଦୁଗାଟି ଟା଼ୟୁ।" 6 ଏ଼ୱାସି ଅ଼ଡ଼େ ଏଲେଇଚେସି, "ନା଼ନୁ ନୀ ଆକୁ ଆ଼ବାୟାଁତି ମାହାପୂରୁ, ଇଚିହିଁ ଅବ୍ରାହାମତି ମାହାପୂରୁ, ଇସାହାକତି ମାହାପୂରୁ ଅ଼ଡ଼େ ଜାକୁବତି ମାହାପୂରୁତେଏଁ।" ଏଚେଟିଏ ମ଼ସା ତାନି ମୂମ୍ବୁ ପିଡ଼୍‌କ୍‌ହା କଡିତେସି, ଇଚିହିଁ ଏ଼ୱାସି ମାହାପୂରୁଇଁ ସିନିକିହାଲି ଆଜିତେସି।

7 ଏଚେଟିଏ ପ୍ରବୁ ଏଲେଇଚେସି, "ନା଼ନୁ ମିସର ଦେ଼ସାତି ନା଼ ଲ଼କୁତି କସ୍ତ ମେସାମାଇଁ ଅ଼ଡ଼େ କାମା କିୱି କିହିମାନାରି ତାକି ଏ଼ୱାରି ଡ଼ୀକି ୱେଞ୍ଜାମାଇଁ; ନା଼ନୁ ଏ଼ୱାରି କସ୍ତ ପୁଞ୍ଜାମାଇଁ। 8 ଈଦାଆଁତାକି ମିସର ଲ଼କୁ କେୟୁଟି ଏ଼ୱାରାଇଁ ଗେଲ୍‌ପାଲି, ଇଞ୍ଜାଁ ଏ଼ ଦେ଼ସାଟି ନେହେଁ ଅ଼ଡ଼େ ଅ଼ସାରା ର଼ ଦେ଼ସାତା; ଇଚିହିଁ, କିଣାନ, ହୀତିୟ, ଇମରିୟ, ପରିସିୟ, ହିବିୟ ଅ଼ଡ଼େ ଜିବୁସିୟ ଲ଼କୁ ଏମିନି ଟା଼ୟୁତା ଡ଼ୟିନେରି ଏ଼ ପା଼ଲୁ ଅ଼ଡ଼େ କିର୍‌ୟାଁ ରେ଼ଚାୱା଼ନି ଦେ଼ସାତା ଏ଼ୱାରାଇଁ ଅ଼ହାଲି ରେ଼ଚା ୱା଼ତେଏଁ। 9 ଏ଼ଦାଆଁତାକି ମେହ୍‌ଦୁ, ଇସ୍ରାୟେଲ ମୀର୍‌କାତି ଡ଼ୀକି ନା଼ କିର୍ୟୁଁତା ୱା଼ହାମାନେ; ଅ଼ଡ଼େ ମିସରତି ଲ଼କୁ ଏ଼ୱାରାଇଁ ଏ଼ନିକିଁ ଲାଗେଏ କିହିଁ ଲେ଼ମ୍ବାମାନେରି, ଏ଼ଦାଆଁ ନା଼ନୁ ମେସାମାଇଁ। 10 ଏ଼ଦାଆଁତାକି ନୀଏଁ ନା଼ନୁ ନିଙ୍ଗେ ମିସରତି ରାଜା ପା଼ର ତା଼ଣା ପାଣ୍ତାଇଁ, ନୀନୁ ମିସରଟି ନା଼ ଇସ୍ରାୟେଲ ଲ଼କୁଣି ହ଼ପ୍‌ହା ତାଦି।"

11 ଏଚେଟିଏ ମ଼ସା ମାହାପୂରୁଇଁ ଏଲେଇଚେସି, "ନା଼ନୁ ଆମ୍ବାଆତେଏଁ ଲାକା, ପା଼ର ରାଜା ତା଼ଣା ହାଜାହାଁ ମିସର ଦେ଼ସାଟି ଇସ୍ରାୟେଲ ଲ଼କୁଣି ହ଼ପ୍‌ହା ତାଇଁ ?"

12 ଏଚେଟିଏ ମାହାପୂରୁ ଏଲେଇଚେସି, "ନା଼ନୁ ନୀ ତଲେ ଡ଼ୟିଇଁ, ଅ଼ଡ଼େ ନା଼ନୁ ନିଙ୍ଗେ ପାଣ୍ତାତେଏଁ, ଏମ୍ବାତି ର଼ ସିନା ନୀନୁ ପୁଞ୍ଜି, ନୀନୁ ମିସର ଦେ଼ସାଟି ଲ଼କୁଣି ହ଼ପ୍‌ହା ତାତି ଡା଼ୟୁ ମୀରୁ ଈ ହ଼ରୁତା ମାହାପୂରୁତି ସେ଼ବା କିଦେରି।"

13 ଏଚେଟିଏ ମ଼ସା ମାହାପୂରୁଇଁ ଏଲେଇଚେସି, "ମେହ୍‌ମୁ ନା଼ନୁ ଇସ୍ରାୟେଲ ଲ଼କୁ ତା଼ଣା ହାଜାହାଁ ଏ଼ୱାରାଇଁ ଏଲେଇଇଁ, ମୀ ଆକୁ ଆ଼ବାୟାଁତି ମାହାପୂରୁ ମୀ ତା଼ଣା ପାଣ୍ତା ମାଞ୍ଜାନେସି; ଇଞ୍ଜାଁ ଏ଼ୱାରି ନାଙ୍ଗେ ୱେଞ୍ଜାନେରି, ଏ଼ୱାଣି ଦ଼ରୁ ଏ଼ନାୟି ? ଆତିହିଁ ନା଼ନୁ ଏ଼ନାଆଁ ୱେହ୍‌ଇଁ ?"

14 ମାହାପୂରୁ ମ଼ସାଇଁ ଏଲେଇଚେସି, "ନା଼ନୁ ଆମ୍ବାଆତେଏଁ ମାଇଁ, ଏ଼ୱାତେଏଁ ମାଇଁ। ଇଲେକିଁ ଏ଼ୱାରାଇଁ ୱେହ୍‌ଦି, ମାହାପୂରୁ ନାଙ୍ଗେ ମୀ ତା଼ଣା ପାଣ୍ତାମାଞ୍ଜାନେସି।" 15 ମାହାପୂରୁ ମ଼ସାଇଁ ଏଲେଇଚେସି, "ନୀନୁ ଇସ୍ରାୟେଲ ଲ଼କୁଣି ଈ କାତା ୱେହ୍‌ମୁ, ମୀ ଆକୁ ଆ଼ବାୟାଁତି ମାହାପୂରୁ, ଇଚିହିଁ, ଅବ୍ରାହାମତି ମାହାପୂରୁ, ଇସାହାକ ଅ଼ଡ଼େ ଜାକୁବତି ମାହାପୂରୁ ଏମିନି ପ୍ରବୁ*3:15 ପ୍ରବୁ/ତା଼ନୁଏ ଏ଼ୱାସି ନାଙ୍ଗେ ମୀ ତା଼ଣା ପାଣ୍ତା ମାଞ୍ଜାନେସି; ନା଼ ଈ ଦ଼ରୁ କା଼ଲାକା଼ଲାତାୟି, ଅ଼ଡ଼େ ପା଼ଟୁ ପା଼ଟୁ ତାକି ଅଣ୍‌ପୁତା ଡ଼ୟିନେ। 16 ନୀନୁ ହାଜାହାଁ ଇସ୍ରାୟେଲ କୂଡ଼ାତି କାଜାରାଇଁ କୂଡ଼ିକିହାଁ ଈ କାତା ୱେହ୍‌ମୁ, ମୀ ଆକୁ ଆ଼ବାୟାଁତି ମାହାପୂରୁ, ଇଚିହିଁ, ଅବ୍ରାହାମ, ଇସାହାକ ଅ଼ଡ଼େ ଜାକୁବତି ପ୍ରବୁ ମାହାପୂରୁ ନାଙ୍ଗେ ତ଼ଞ୍ଜା ଆ଼ହାଁ ୱେସାମାଞ୍ଜାନେସି, ନା଼ନୁ ମିଙ୍ଗେ ଅ଼ଡ଼େ ମିସରତା ମିଙ୍ଗେ ଏ଼ନା ଏ଼ନାୟି କିୱି ଆ଼ହିମାନେ, ଏ଼ ବାରେ ମ଼ନ ହୀହାମାଇଁ। 17 ଇଞ୍ଜାଁ, ନା଼ନୁ ମିଙ୍ଗେ ମିସରତି ସା଼ସ୍ତିଟି ଗେଲ୍‌ପାହାଁ କିଣାନିୟ, ହୀତିୟ, ଇମରିୟ, ପରିସିୟ, ହିବିୟ, ଅ଼ଡ଼େ ଜିବୁସିୟ ଲ଼କୁତି ପା଼ଲୁ ଅ଼ଡ଼େ କିର୍‌ୟାଁ ରେ଼ଚାୱା଼ନି ଦେ଼ସାତା ଅୟାଇଁ ଇଞ୍ଜିଁ ୱେସାମାଞ୍ଜାଇଁ।"

18 "ଏଚେଟିଏ ଏ଼ୱାରି ନୀ କାତା ୱେନେରି; ଏଚେଟିଏ ନୀନୁ ଅ଼ଡ଼େ ଇସ୍ରାୟେଲ କୂଡ଼ାତି କାଜାରି ମିସରତି ରାଜା ତା଼ଣା ହାଜାହାଁ ଈ କାତା ୱେହ୍‌ଦେରି, ‘ଏବ୍ରିୟ ଲ଼କୁତି ପ୍ରବୁ ମାହାପୂରୁ ମା଼ ତଲେ କାତା ଆ଼ହାମାଞ୍ଜାନେସି; ଏ଼ଦାଆଁତାକି ବାତିମା଼ଲି ମାଞ୍ଜାନମି, ମା଼ ପ୍ରବୁ ମାହାପୂରୁ ତାକି ପୂଜା କିହାଲି ତାକି ନୀଏଁ ମାଙ୍ଗେ ତୀନି ଦିନା ଜିରୁତି ବାଟାତା ହାଜାଲି ହେଲ ହିୟାମୁ।’ 19 ସାମା ନା଼ନୁ ପୁଞ୍ଜାମାଇଁ, ମିସରତି ରାଜା ମିଙ୍ଗେ ହାଜାଲି ହେଲ ହିୟଅସି, ବା଼ଡ଼୍‌ୟୁଗାଟି କେୟୁ ତ଼ଞ୍ଜା ଆ଼ତି ଜିକେଏ ହାଜାଲି ହିୟଅସି। 20 ଏଚେଟିଏ ନା଼ନୁ ନା଼ କେୟୁ ଦା଼ସାହାଁ ଦେ଼ସାତା ଏମିନି କାବାଆ଼ନି କାମା କିଇଁ; ଏମ୍ବାଟି ମିସର ଦେ଼ସାତି ଡଣ୍ତ ହୀଇଁ ଏଚେଟିଏ ଏ଼ୱାସି ହାଜାଲି ହିୟାନେସି।"

21 "ନା଼ନୁ ମିସରତି ଲ଼କୁ ତା଼ଣା ଈ ଲ଼କୁଣି କାର୍ମା ମେହ୍‌ଇଁ ଏଚେଟିଏ ମୀରୁ ହାନାଟି ୱାର୍‌ଇ କେୟୁ ତଲେ ହାଲଅତେରି; 22 ସାମା ବାରେ ଇୟାସିକା ତାମି ପା଼ଡ଼ିତି ଇୟାସିକା ତା଼ଣାଟି ୱେଣ୍ତି, ବାଂଗାରା ଅ଼ଡ଼େ ପୂସାୟାଁ, ହିମ୍ବରିଦୂକି ରୀସା ଅ଼ନୁ; ଇଞ୍ଜାଁ ମୀରୁ ଏ଼ଦାଆଁ ମୀ ମୀର୍‌କା ମା଼ସ୍‌କାଣି ତୁର୍‌ୱି କିଦେରି। ଇଲେକିହିଁ ମୀରୁ ମିସରତି ଲ଼କୁଣି ବାରେ ଆ଼ସ୍ତି ମୀଞ୍ଜିଦେରି।"