1 ଏଚେଟିଏ ପ୍ରବୁ ମ଼ସାଇଁ ଏଲେଇଚେସି, "ନୀନୁ ତଲିତି ଲେହେଁ ରୀ ୱାଲି ପା଼ଟାୟାଁ ପତ୍‌ମୁ। ନୀନୁ ଏମିନି ୱାଲିତି ପା଼ଟାୟାଁ ଡିକ୍‌ହାମାଞ୍ଜି, ଏ଼ଦାଣି ଲାକ ଏ଼ନାୟି ରା଼ସ୍‌କି ଆ଼ହାମାଚେ, ଏ଼ ବାରେ କାତା ନା଼ନୁ ଈ ରୀ ୱାଲି ପା଼ଟାୟାଁଣା ରା଼ଚିଇଁ। 2 ଅ଼ଡ଼େ ନୀନୁ ଲା଼ଇଏ ତିୟାରା ଆ଼ହାଁ ଡ଼ୟାମୁ ଅ଼ଡ଼େ ଲା଼ଇଏ ସିନୟ ହ଼ରୁତା ହ଼ଚାହାଁ ଏ଼ ହ଼ରୁ ସିଣ୍ତିତା ନା଼ ତା଼ଣା ୱା଼ମୁ। 3 ସାମା ନୀ ତଲେ ଆମ୍ବାଆସି ଜିକେଏ ହ଼ରୁ ଲାକ ୱା଼ଆପେସି, ଇଞ୍ଜାଁ, ଈ ବାରେ ହ଼ରୁତା ଆମ୍ବାଆସି ତ଼ଞ୍ଜା ଆ଼ଆପେସି ଅ଼ଡ଼େ କ଼ଡି ଗରି ଜିକେଏ ଈ ହ଼ରୁ ଦାରିତା ମେୟାଁଆପୁ।" 4 ଏଚେଟିଏ ମ଼ସା ତଲିତି ୱାଲ୍‌କା ଲେହେଁ ରୀ ୱାଲିତି ପା଼ଟାୟାଁ ପତ୍‌ହେସି; ଇଞ୍ଜାଁ, ଏ଼ୱାସି ପ୍ରବୁତି ହୁକୁମି ଲେହେଁ ଲା଼ଇସିଏ ନିଙ୍ଗାହାଁ ଏ଼ ରୀ ୱାଲିତି ପା଼ଟାୟାଁ କେୟୁତା ଆସାହାଁ ସିନୟ ହ଼ରୁ ଲାକ ହାଚେସି।

5 ଏଚେଟିଏ ପ୍ରବୁ ହା଼ଗୁତା ରେ଼ଚା ୱା଼ହାଁ ଏ଼ ଟା଼ୟୁତା ତାନି ତଲେ ନିଚାହାଁ ପ୍ରବୁତି ଦ଼ରୁ ୱେ଼କ୍‌ହେସି। 6 ଅ଼ଡ଼େ ପ୍ରବୁ ତାନି ନ଼କିଟି ହାଜିହିଁ ଈ କାତା ୱେ଼କ୍‌ହେସି, "ପ୍ରବୁ ମାହାପୂରୁ ଜୀୱୁ ନ଼ନାସି ଅ଼ଡ଼େ କାର୍ମା ମେହ୍‌ନାସି, କାର୍‌ବି ଊଣା କିନାସି, କାର୍ମା ଅ଼ଡ଼େ ସାତାତା ନେଞ୍ଜାମାନାସି; 7 ମା଼ଣା ମା଼ଣା ଆକୁ ଆ଼ବାୟାଁ ପାତେକା କାର୍ମା ମେହ୍‌ନାସି, ଦ଼ହ ଅ଼ଡ଼େ ହୁକୁମି ଊରିନାଣି ଅ଼ଡ଼େ ପା଼ପୁ ମ୍ଣେକ୍‌ନାସି, ଆ଼ତି ଜିକେଏ ଏମ୍ବାତି ଡଣ୍ତ ହୀନାସି, ତୀନି ଅ଼ଡ଼େ ସା଼ରି ପା଼ଟୁ ପାତେକା ତାଙ୍ଗା ମୀର୍‌କା ମା଼ସ୍‌କା ପାତେକା ଏ଼ୱାରି ମୁହେଁ ତାମି ଆକୁୟାଁ ଦ଼ହତି ଡଣ୍ତ ହୀନାସି।"

8 ଏଚେଟିଏ ମ଼ସା ଦେବୁଣିଏ ବୂମିତା ମୁନୁ କୁତିହିଁ ରିହାଁ ଜହରା କିତେସି, 9 ଅ଼ଡ଼େ ଏ଼ୱାସି ଏଲେଇଚେସି, "ପ୍ରବୁ ନା଼ନୁ ନୀ କାନୁତା କାର୍ମା ବେଟାଆ଼ହାମାଇଁ, ଆତିହିଁ ବାତିମା଼ଲି ମାଞ୍ଜାଇଁ, ପ୍ରବୁ ମା଼ ମାଦି ଆ଼ହାଁ ତା଼କାମୁ; ଇଚିହିଁ ଈୱାରି କାତା ମା଼ନୱି ଆ଼ଆଗାଟି ଲ଼କୁ, ଅ଼ଡ଼େ ମା଼ ଦ଼ହ ଅ଼ଡ଼େ ପା଼ପୁ ମ୍ଣେକ୍‌ହାଁ ନୀ ଅଦିକାରା ତାକି ମାଙ୍ଗେ ଆବାମୁ।"

10 ଏଚେଟିଏ ପ୍ରବୁ ଏଲେଇଚେସି, "ମେହ୍‌ମୁ, ନା଼ନୁ ର଼ ରା଼ଜିମା଼ନା କିଇଁ; ବାରେ ଦାର୍‌ତିତା ଅ଼ଡ଼େ ବାରେ କୂଲୁ ବିତ୍ରା ଏ଼ନାୟି ଏଚେଲା କିୱି ଆ଼ହାହିଲେଏ, ଇଲେତି କାବାଆ଼ନି କାମା ନୀ ନ଼କିତା ଅ଼ଡ଼େ ବାରେ ଲ଼କୁ ନ଼କିତା କିଇଁ; ଏଚେଟିଏ ମୀରୁ ବାରେ ଏମିନି ଲ଼କୁ ତା଼ଣା ମାଞ୍ଜେରି, ଏ଼ୱାରି ପ୍ରବୁତି ଏ଼ କାମା ମେହ୍‌ନେରି, ଇଚିହିଁ ନା଼ନୁ ମୀ ନ଼କିତା ଏ଼ନାଆଁ କିଇଁ, ଏ଼ଦି ହା଼ରେକା ଆଜି ହ଼ପେତାୟି। 11 ନୀଞ୍ଜୁ ନା଼ନୁ ନିଙ୍ଗେ ଏ଼ନା ଏ଼ନାଆଁ ହୁକୁମି ହିୟାଇଁ ଏ଼ଦାଆଁ ନୀନୁ ମ଼ନ ହୀହାଁ ୱେନାମୁ; ମେହ୍‌ମୁ, ନା଼ନୁ ଇମରିୟ, କିଣାନିୟ, ହୀତିୟ, ପରିସିୟ, ହିବିୟ ଅ଼ଡ଼େ ଜିବୁସିୟ ଲ଼କୁଣି ମୀ ନ଼କିଟି ପେ଼ର୍‌ହାତୁହ୍‌ଇଁ। 12 ନୀନୁ ନିଙ୍ଗେ ତାକି ଜାଗ୍ରାତା ଆ଼ମୁ, ଏମିନି ଦେ଼ସାତା ମୀରୁ ହାଜିମାଞ୍ଜେରି, ଏ଼ ଦେ଼ସାତା ବାସା କିହାମାନାରି ତଲେ ମୀରୁ ମେ଼ରା କିଆଦୁ; କିତିହିଁ ମିଙ୍ଗେ ତାକି ଏ଼ଦି ର଼ ପା଼ନ୍ଦା ସମାନା ଆ଼ନେ। 13 ସାମା ମୀରୁ ଏ଼ୱାରି ପୂଜା ପିଣ୍ତା ବାରେ ବ୍ଡିପ୍‌ହାତୁହ୍‌ଦେରି; ଅ଼ଡ଼େ ଏ଼ୱାରି ପୂଜା ମୁଣ୍ତାୟାଁ ବାରେ ଡିକ୍‌ହାତୁହ୍‌ଦେରି ଅ଼ଡ଼େ ଆସେର ପେ଼ନୁତି ବମାୟାଁ ଟୂଣ୍‌ଦେରି।

14 ଏ଼ନିଇଚିହିଁ, ମୀରୁ ଏଟ୍‌କାତି ଏ଼ନି ପେ଼ନୁତି ଜହରା କିଅତେରି, ଇଚିହିଁ ପ୍ରବୁତି ଦ଼ରୁ ତାନି ଗା଼ୱୁରମି ଗେଲ୍‌ପାଲି ରା଼ହାଁ ଗାଟାସି, ଏ଼ୱାସି ତାନି ଗା଼ୱୁରମି ଗେଲ୍‌ପାଲି ରା଼ହାଁଗାଟି ମାହାପୂରୁ। 15 ଇଲେକିଁ ଆ଼ଆପେ କି ମୀରୁ ଏ଼ ଦେ଼ସାତା ବାସା କିହାମାନି ଲ଼କୁ ତଲେ ରା଼ଜିମା଼ନା କିଦେରି; କିତିହିଁ ଏଚିବେ଼ଲା ଏ଼ୱାରି ତାମି ପେ଼ଣ୍‌କାତି ଜେ଼ଚ ହାଜାହାଁ ଦା଼ରି କାମା କିନେରି ଅ଼ଡ଼େ ତାମି ପେ଼ଣ୍‌କା ନ଼କିତା ପୂଜା କିନେରି, ଏଚିବେ଼ଲା ଆମ୍ବାଆସି ମିଙ୍ଗେ ହା଼ଟାତିହିଁ, ମୀରୁ ତାମି ପୂଜା କିତି ଆ଼ସ୍ତି ତିଞ୍ଜେରି; 16 ମୀରୁ ମୀ ମୀର୍‌କାକି ଏ଼ୱାରି ମା଼ସ୍‌କାଣି ତାତିହିଁ, ଏ଼ୱାରି ମା଼ସ୍‌କା ତାମି ପେ଼ଣ୍‌କାତି ଜେ଼ଚ ହାଜାହାଁ ମୀ ମୀର୍‌କାଣି ତାମି ପେ଼ଣ୍‌କାତି ଜେ଼ଚ ଅ଼ହାଁ ଦା଼ରି କିୱିକିନୁ।

17 ମୀରୁ ମିଙ୍ଗେ ତାକି ଏ଼ନି ଆ଼ସ୍ତି ତଲେ ପେ଼ନୁତି ବମା କିଆଦୁ।

18 ମୀରୁ ପୁଲା ଆଣ୍ତାଆତି ରୂଟି ତିନି ପାର୍ବୁ ମା଼ନୱି ଆ଼ଦେରି, ଇଞ୍ଜାଁ, ବାର୍ସାତି ଆବିବ୍‌* ଲେ଼ଞ୍ଜୁତି ଇମିନି ବେ଼ଲାତା ଏ଼ନିକିଁ କିୟାଲି ମିଙ୍ଗେ ହୁକୁମି ହୀହାମାଞ୍ଜାଇଁ, ଏଲେକିହିଁ ମୀରୁ ସା଼ତା ଦିନା ପୁଲା ଆଣ୍ତାଆତି ରୂଟି ତିଞ୍ଜେରି; ଇଚିହିଁ ଏ଼ ଆବିବ୍‌ ଲେ଼ଞ୍ଜୁତା ମୀରୁ ମିସର ଦେ଼ସାଟି ହ଼ଚା ୱା଼ହାମାଚେରି।

19 ଅ଼ଡ଼େ ବାରେ ମୂଲୁ ଜାର୍ନା ଆ଼ତି ମାଣ୍‌ସି ଅ଼ଡ଼େ କ଼ଡି ଗରିତି ପା଼ଣ୍‌ୱା ପ଼ତୁ ଜ଼ନ୍ତ ବାରେ ନା଼ଦି। 20 ସାମା ମୂଲୁ ଜାର୍ନା ଆ଼ତି ଗା଼ଡ଼୍‌ଦେ ବାଦୁଲି ମୀରୁ ମେ଼ଣ୍ତା ଡା଼ଲୁ ହୀହାଁ ଏ଼ଦାଣି ଗେଲ୍‌ପିଦେରି; ଏ଼ଦାଣି ଗେଲ୍‌ପଅତେରି, ଆତିହିଁ ଏ଼ଦାଣି ହେର୍‌କି ଡିକ୍‌ଦେରି। ମୀ ମୂଲୁ ଜାର୍ନା ଆ଼ତି ବାରେ କକାରାଇଁ ଗେଲ୍‌ପିଦେରି। ଅ଼ଡ଼େ ଆମ୍ବାଆସି ୱାର୍‌ଇ କେୟୁଟି ନା଼ ତା଼ଣା ୱା଼ଆପେସି।

21 ମୀରୁ ସ଼ଦିନା କାମା କିଦେରି, ସାମା ସା଼ତା ଦିନାତା ଜ଼ମିଦେରି; ମାଟିନି ବେ଼ଲା ଅ଼ଡ଼େ ଆର୍ନା ଦା଼ଃନି ବେ଼ଲା ଜିକେଏ ଜ଼ମିଦେରି।

22 ମୀରୁ ୱା଼ରାତି ପାର୍ବୁ ଇଚିହିଁ, ଦା଼ଃଚାମାନି ଗ଼ହଁୟାଁତି ମୂଲୁ ପା଼ଡ଼େୟିତି ପାର୍ବୁ ଅ଼ଡ଼େ ବାର୍ସାତି ରା଼ନି ବେ଼ଲା ଆର୍ନା କୂଡ଼ିକିନି ପାର୍ବୁ କିଦେରି।

23 ମୀ ବାରେ ଆ଼ବାୟାଁ ବାର୍ସା ବିତ୍ରା ତୀନି ଦେବା ଇସ୍ରାୟେଲତି ପ୍ରବୁ ମାହାପୂରୁ ନ଼କିତା ୱା଼ନେରି। 24 ଇଚିହିଁ ନା଼ନୁ ମୀ ନ଼କିଟି ଏଟ୍‌କା ଦେ଼ସାତି ଲ଼କୁଣି ହେକ କିଇଁ ଅ଼ଡ଼େ ମୀ ହାନ୍ଦି ପାଡିକିଇଁ, ଇଞ୍ଜାଁ, ମୀରୁ ବାର୍ସା ତାକି ତୀନି ଦେବା ପ୍ରବୁ ମାହାପୂରୁ ନ଼କିତା ହାଚିହିଁ, ମୀ ବୂମିତି ଆମ୍ବାଆସି ଜୂପ୍‌କା ଆ଼ଅସି।

25 ମୀରୁ ନାଙ୍ଗେ ତାକି ପୂଜାକିତି ନେତେରି ପୁଲା ଆଣ୍ତିତି ଆ଼ସ୍ତି ତଲେ ହେର୍‌ପଅତେରି ଅ଼ଡ଼େ ପିସ୍‌ପିଆ଼ନି ପାର୍ବୁତି ପୂଜା କିତାଣି ଲା଼ଇ ପାତେକା ଇଟଅତେରି।

26 ମୀରୁ ବୂମିତି ମୂଲୁ ପା଼ଡ଼େୟି ମୀ ପ୍ରବୁ ମାହାପୂରୁ ଇଲୁତା ତାଦେରି। ଇଞ୍ଜାଁ ମୀରୁ ଗରି ଡା଼ଲୁତି ତାଲିନି ପା଼ଲୁ ତଲେ ୱାଜଅତେରି।"

27 ଅ଼ଡ଼େ ପ୍ରବୁ, ମ଼ସାଇଁ ଏଲେଇଚେସି, "ନୀନୁ ଈ ବାରେ ବ଼ଲୁ ରା଼ଚାମୁ; ଇଚିହିଁ ନା଼ନୁ ଈ ବ଼ଲୁ ଲେହେଁ ନୀ ତଲେ ଅ଼ଡ଼େ ଇସ୍ରାୟେଲ ତଲେ ରା଼ଜିମା଼ନା ତୀରି କିହାମାଇଁ।" 28 ଏଚିବେ଼ଲା ମ଼ସା, ପ୍ରବୁ ତଲେ ଏ଼ ଟା଼ୟୁତା ଦୁଇ କ଼ଡ଼ି ଦିନା ଲା଼ଆଁୟାଁ ମାଦେନା ଡ଼ୟିତେସି; ଏ଼ୱାସି ରା଼ନ୍ଦା ତିନାଆତେସି କି ଏ଼ୟୁ ଗହ୍‌ଆତେସି। ଏ଼ୱାସି ଏ଼ ରୀ ୱାଲିତି ପା଼ଟାୟାଁଣା ରା଼ଜିମା଼ନାତି ବ଼ଲୁ, ଇଚିହିଁ, ଦସଗଟା ହୁକୁମିକା ରା଼ଚିତେସି।

29 ଏଚେଟିଏ ମ଼ସା ସିନୟ ହ଼ରୁଟି ରେ଼ଚା ୱା଼ହିମାଚାଟି ସା଼କି ଲେହେଁତି ରୀ ୱାଲିତି ପା଼ଟାୟାଁ କେୟୁତା ଆସାହାଁ ହ଼ରୁଟି ରେ଼ଚା ୱା଼ତେସି, ସାମା ପ୍ରବୁ ତଲେ କାତା ଆ଼ହାମାଚାକି ତାନି ମୂମ୍ବୁ ଉଜେଡ଼ି ଆ଼ହାମାଚେ, ଏ଼ଦାଣି ମ଼ସା ପୁଞ୍ଜା ହିଲାଆତେସି। 30 ଇଞ୍ଜାଁ, ଏଚିବେ଼ଲା ହାରଣ ଅ଼ଡ଼େ ଇସ୍ରାୟେଲ ଲ଼କୁ ମ଼ସାଇଁ ମେସ୍ତେରି, ଏଚିବେ଼ଲା ଏ଼ୱାଣି ମୂମ୍ବୁ ଉଜେଡ଼ି ଆ଼ହାମାଚେ; ଏ଼ଦାଆଁତାକି ଏ଼ୱାରି ଏ଼ୱାଣି ତା଼ଣା ହାଜାଲି ଆଜିତେରି। 31 ସାମା ମ଼ସା ଏ଼ୱାରାଇଁ ହା଼ଟାଲିଏ, ହାରଣ ଅ଼ଡ଼େ କୁଲମିତି କାଜାରି ଏ଼ୱାଣି ତା଼ଣା ୱେଣ୍ତାହାଚେରି; ଏଚେଟିଏ ମ଼ସା ଏ଼ୱାରି ତଲେ କାତା ଆ଼ତେସି। 32 ଏଚେଟିଏ ଇସ୍ରାୟେଲ ଲ଼କୁ ଏ଼ୱାଣି ଦାରି ହାଚେରି; ଏଚେଟିଏ ପ୍ରବୁ ସିନୟ ହ଼ରୁତା ମ଼ସାଇଁ ଏମିନି ଏମିନି କାତା ୱେସାମାଚେସି, ଏ଼ ବାରେ ହୁକୁମି ଲେହେଁ ଏ଼ୱାରାଇଁ ୱେସ୍ତେସି। 33 ଅ଼ଡ଼େ ମ଼ସା ଏ଼ୱାରି ତଲେ କାତାବାର୍ତା ରା଼ହାଲିଏ ତାନି ମୂମ୍ବୁ ପ୍ଡିକ୍‌ହା କଡିତେସି। 34 ସାମା ମ଼ସା ପ୍ରବୁ ତଲେ କାତା ଆୟାଲି ବିତ୍ରା ତାନି ନ଼କିତା ହାଜାହାଁ ପାଙ୍ଗାତା ୱେଣ୍ଡା ୱା଼ଆ ପାତେକା ଏ଼ ମୂମ୍ବୁତା ପ୍ଡିକ୍‌ହା କଡିନାଣି ଦେଚାହାଁ ଏଟ୍‌କା ଇଟିତେସି; ଅ଼ଡ଼େ ଏମିନି ହୁକୁମି ବେଟାଆ଼ତେସି, ଏ଼ ବାରେ ପାଙ୍ଗାତା ୱା଼ହାଁ ଇସ୍ରାୟେଲ ଲ଼କୁଣି ଏ଼ଦାଆଁ ୱେସ୍ତେସି। 35 ଏଚେଟିଏ ମ଼ସା ମୂମ୍ବୁ ଉଜେଡ଼ି, ଈଦାଆଁ ଇସ୍ରାୟେଲ ଲ଼କୁ ତାନି ମୂମ୍ବୁ ମେସାହାଁ ପୁଚେରି; ମ଼ସା ମାହାପୂରୁ ତଲେ କାତା ଆୟାଲି ବିତ୍ରା ହାଲାଆ ପାତେକା ତାନି ମୂମ୍ବୁତି ପ୍ଡିକ୍‌ହା କଡିତେସି।