ହାନାୟି 4

ମ଼ସାକି କାବାଆ଼ନି ବା଼ଡ଼୍‌ୟୁ ହୀନାୟି

1 ଏଚେଟିଏ ମ଼ସା ମାହାପୂରୁଇଁ ଏଲେଇଚେସି, "ମେହ୍‌ମୁ ଏ଼ୱାରି ନାଙ୍ଗେ ନାମଅରି ଅ଼ଡ଼େ ନା଼ କାତାତି ମ଼ନ ହୀଅରି; ସାମା ଏ଼ୱାରି ଏଲେଇନେରି, ପ୍ରବୁ ନିଙ୍ଗେ ତ଼ଞ୍ଜାଆ଼ହା ମାଞ୍ଜଅସି ?"

2 ଏଚେଟିଏ ପ୍ରବୁ ଏ଼ୱାଣାଇଁ ଏଲେଇଚେସି, "ନୀ କେୟୁତା ଏ଼ନାୟି ମାନେ ?" ଏ଼ୱାସି ଏଲେଇଚେସି, "ବାଡ଼୍‌ଗା।" 3 ଏଚେଟିଏ ପ୍ରବୁ ଏଲେଇଚେସି, "ଏ଼ଦାଣି ବୂମିତା ମେତ୍‌ମୁ।" ଇଞ୍ଜାଁ ଏ଼ୱାସି ଏ଼ଦାଣି ବୂମିତା ମେତ୍‌ହାଲିଏ, ଏ଼ଦି ରା଼ଚୁ ଆ଼ତେ; ଏଚେଟିଏ ମ଼ସା ଏ଼ଦାଣି ନ଼କିଟି ହଟେସି। 4 ପ୍ରବୁ ମ଼ସାଇଁ ଏଲେଇଚେସି, "ଈଦାଆଁତାକି ନୀନୁ ନୀ କେୟୁ ତଲେ ରା଼ଚୁତି ଲେଂଗୁଣି ଆସାଁ ପେର୍‌ମୁ;" ଏ଼ୱାସି କେୟୁ ଦା଼ସାହାଁ ରା଼ଚୁତି ଆସ୍ତେସି, ଏଚେଟିଏ ଏ଼ଦି ୱେଣ୍ତେ ବାଡ଼୍‌ଗା ଆ଼ତେ, 5 ଏଚେଟିଏ ଏ଼ୱାରି ଆକୁ ଆ଼ବାୟାଁ ପ୍ରବୁ ମାହାପୂରୁ ଇଚିହିଁ ଅବ୍ରାହାମତି ମାହାପୂରୁ, ଇସାହାକତି ମାହାପୂରୁ ଅ଼ଡ଼େ ଜାକୁବତି ମାହାପୂରୁ ନିଙ୍ଗେ ତ଼ଞ୍ଜା ଆ଼ହାମାଞ୍ଜାନେସି, ଈଦାଆଁ ଏ଼ୱାରି ଏ଼ନିକିଁ ନାମିନେରି। 6 ଏଚେଟିଏ ପ୍ରବୁ ମ଼ସାଇଁ ଅ଼ଡ଼େ ଏଲେଇଚେସି, "ନୀନୁ ନୀ କେୟୁ ପାଡ଼୍‌କାତା ଇଟାହାଁ ପ୍ଡିକ୍‌ମୁ।" ଏଚେଟିଏ ଏ଼ୱାସି ତାନି କେୟୁ ପାଡ଼୍‌କାତା ଇଟାହାଁ ହ଼ପ୍‌ହେସି, ଅ଼ଡ଼େ ମେହ୍‌ଦୁ ତାନି କେୟୁ ପେଣ୍ତି ଲେହେଁ ଦବ୍‌ଲା ଆ଼ହିଁ କାଜା ର଼ଗ ଆ଼ତେ। 7 ଏଚେଟିଏ ପ୍ରବୁ ଏଲେଇଚେସି, "ନୀନୁ ଅ଼ଡ଼େ ୱେଣ୍ତେ ନୀ କେୟୁ ପାଡ଼୍‌କାତା ଇଟାହାଁ ପ୍ଡିକ୍‌ମୁ, ଏ଼ୱାରି ନୀ କାତାତା ମ଼ନ ହୀଅରି, 8 ଅ଼ଡ଼େ ଏ଼ୱାରି ନୀ ମୂଲୁ ସିନାତା ନାମଅରି, ଆତିହିଁ ଅ଼ର ସିନାତି ନାମିନେରି।" ଏଚେଟିଏ ଏ଼ୱାସି ଅ଼ଡ଼େ ୱେଣ୍ତେ କେୟୁ ପାଡ଼୍‌କାତା ଇଟାହାଁ ପ୍ଡିକ୍‌ହେସି ଇଞ୍ଜାଁ ୱେଣ୍ତେ କେୟୁ ରେଜାଲିଏ, ଏ଼ଦି ତଲିତି ଲେହେଁ ନେହିଁ ଆ଼ତେ। 9 "ଈ ରୀ ସିନାତି ନାମଅରି, ଅ଼ଡ଼େ ନୀନୁ ୱେହ୍‌ନି କାତାତା ମ଼ନ ହୀଅରି, ଆତିହିଁ ନୀନୁ ନିଲ କାଡାଟି ଇଚରା ଏ଼ୟୁ ଅ଼ହାଁ ୱା଼ୟା ବୂମିତା ୱା଼କ୍‌ମୁ; ଏଚେଟିଏ ନୀନୁ କାଡାଟି ଏମିନି ଏ଼ୟୁ ତାଦି ଏ଼ୱି ୱା଼ୟା ବୂମିତା ନେତେରି ଆ଼ନେ।"

10 ଏଚେଟିଏ ମ଼ସା ପ୍ରବୁଇଁ ଏଲେଇଚେସି, "ହେ଼, ନା଼ ପ୍ରବୁ, ନା଼ନୁ ନେହିକିଁ ଜ଼ଲାଲି ପୁନାଆ ଗାଟାତେଏଁ, ନୀ ତଲେ କାତା ଆୟାତି ଡା଼ୟୁ ଜିକେଏ ନେହିକିଁ ଜ଼ଲାଲି ଆ଼ଡି ହିଲଅଁ, ନା଼ ଜ଼ଲା ଜ଼କଡ଼ି ଦୀରେ ଅ଼ଡ଼େ ତ଼ତ୍‌ଲାତେଏଁ।"

11 ଏଚେଟିଏ ପ୍ରବୁ ଏ଼ୱାଣାଇଁ ଏଲେଇଚେସି, "ମାଣ୍‌ସିତି ଗୂତି ଆମ୍ବାଆସି କେ଼ପାମାନେସି ? ଇଞ୍ଜାଁ ମାଣ୍‌ସିଇଁ ଗୁଲା କି ବେ଼ରା, କାଣ୍‌କା ମେହ୍‌ନାସି କି କା଼ଣା ଆମ୍ବାଆସି କିନେସି ? ନା଼ନୁ ପ୍ରବୁତେଏଁ ଏ଼ଦାଆଁ କିଅଁ ? 12 ଏ଼ଦାଆଁତାକି ନୀନୁ ନୀଏଁ ହାଲାମୁ, ନା଼ନୁ ନୀ ଗୂତିତି ସା଼ୟେମି କିହାଁ ଜ଼ଲିନି କାତା ନିଙ୍ଗେ ଜା଼ପ୍‌ହାଇଁ।"

13 ଏଚେଟିଏ ମ଼ସା ଏଲେଇଚେସି, "ହେ଼ ପ୍ରବୁ, ନା଼ନୁ ବାତିମା଼ଲି ମାଞ୍ଜାଇଁ, ଆମିନିଗାଟାଣାଇଁ ପାଣ୍ତାଲି ଆ଼ନେ ଏ଼ୱାଣାଇଁ ପାଣ୍ତାମୁ।"

14 ଏଚେଟିଏ ପ୍ରବୁ ମ଼ସାଇଁ କାର୍‌ବି ଆ଼ତେସି; ଏ଼ଦାଆଁତାକି ପ୍ରବୁ ଏଲେଇଚେସି, "ଲେ଼ବିୟ ହାରଣ କି ନୀ ତାୟି ଆ଼ଏ ? ନା଼ନୁ ପୁଞ୍ଜାମାଇଁ, ଏ଼ୱାସି ନେହିକିଁ ଜ଼ଲାଲି ଆ଼ଡିନାସି। ଅ଼ଡ଼େ ମେହ୍‌ମୁ ଏ଼ୱାସି ନିଙ୍ଗେ ଆଣ୍ଡାଲି ୱା଼ହିମାନେସି ଇଞ୍ଜାଁ ଏ଼ୱାସି ନିଙ୍ଗେ ମେସାହାଁ ରା଼ହାଁ ଆ଼ନେସି। 15 ନୀନୁ ଏ଼ୱାଣାଇଁ ଏଲେଇଞ୍ଜି, ଏ଼ନାଆଁ ଜ଼ଲିନାୟି ମାନେ ଏ଼ଦାଆଁ ଏ଼ୱାଣାଇଁ ୱେହ୍‌ଦି; ଇଞ୍ଜାଁ ନା଼ନୁ ନୀ ଅ଼ଡ଼େ ଏ଼ୱାଣି ଗୂତିତି ସା଼ୟେମି ଆ଼ହାଁ ମୀ କିନି କାମାତି ଜା଼ପ୍‌ହାଇଁ। 16 ଏ଼ୱାସି ଲ଼କୁ ତା଼ଣା ନିଙ୍ଗେତାକି ଜ଼ଲିନାସି ଆ଼ନେସି; ଏ଼ୱାସି ନୀ ଗୂତି ସମାନା ଆ଼ନେସି ଅ଼ଡ଼େ ନୀନୁ ଏ଼ୱାଣି ମାହାପୂରୁ ଲେହେଁ ଆ଼ଦି। 17 ଅ଼ଡ଼େ ନୀନୁ ନୀ କେୟୁତା ଈ ବାଡ଼୍‌ଗା ଅ଼ମୁ, ଏ଼ନାଆଁତାକି ଇଚିହିଁ ଈ ବାଡ଼୍‌ଗା ତଲେ ନୀନୁ ଈ ବାରେ କାବାଆ଼ନି କାମାୟାଁ କିଦି।"

ମ଼ସା ମିସରତା ୱେଣ୍ତିନାୟି

18 ଏଚେଟିଏ ମ଼ସା ତାନି ପତ୍‌ଲେଏସି ଜିତ୍ର ତା଼ଣା ୱେଣ୍ତା ହାଜାହାଁ ଏଲେଇଚେସି, "ନା଼ନୁ ବାତିମା଼ଲି ମାଞ୍ଜାଇଁ, ମିସର ଦେ଼ସାତା ମାନି ନା଼ ତାୟିୟାଁ ତା଼ଣା ନୀଏଁ ୱେଣ୍ଡାହାଜାଲି ତାକି ଇଞ୍ଜାଁ ଏ଼ୱାରି ନୀଞ୍ଜୁ ପାତେକା ନୀଡାମାନେରି କି ଆ଼ଏ, ଏ଼ଦାଆଁ ସିନିକିହାଲି ନାଙ୍ଗେ ହାଜାଲି ହେଲ ହିୟାମୁ।" ଏଚେଟିଏ ଜିତ୍ର ମ଼ସାଇଁ ଏଲେଇଚେସି, "ନେହିଁ ତଲେ ହାଲାମୁ।"

19 ଅ଼ଡ଼େ ପ୍ରବୁ ମିଦିୟନତା ମ଼ସାଇଁ ଏଲେଇଚେସି, "ନୀନୁ ମିସର ଦେ଼ସାତା ୱେଣ୍ଡାହାଲାମୁ, ଏ଼ନିଇଚିହିଁ ଆମିନିଗାଟାରି ନିଙ୍ଗେ ପା଼ୟାଲି ଅଣ୍‌ପାମାଚେରି ଏ଼ ବାରେ ଜା଼ଣା ହା଼ହାମାନେରି।" 20 ଏଚେଟିଏ ମ଼ସା ତାନି ଡକ୍ରି ଅ଼ଡ଼େ ମୀର୍‌କାଣି ଗା଼ଡ଼୍‌ଦେ ଲାକ କୁଗିକିହାଁ ମିସର ଦେ଼ସା ୱେଣ୍ଡାହାଚେସି; ଇଞ୍ଜାଁ ଏ଼ୱାସି ତାନି କେୟୁତା ମାହାପୂରୁତି ଏ଼ ବାଡ଼୍‌ଗା ଅ଼ତେସି।

21 ଏଚେଟିଏ ପ୍ରବୁ ମ଼ସାଇଁ ଏଲେଇଚେସି, "ଜାଗ୍ରାତା, ନୀନୁ ମିସର ଦେ଼ସାତା ୱେଣ୍ଡାହାଚିସାରେ, ନା଼ନୁ ନୀ କେୟୁତା ଆମିନି କାବାଆ଼ନି କାମାୟାଁ କିହାଲି ହୀହାମାଞ୍ଜାଇଁ, ଏ଼ଦାଆଁ ପା଼ର ନ଼କିତା କିଦି; ସାମା ନା଼ନୁ ଏ଼ୱାଣି ହିୟାଁ ଆ଼ଟ୍‌ୱା କିଇଁ; ଏଚେଟିଏ ଏ଼ୱାସି ଲ଼କୁଣି ହାଜାଲି ହୀଅସି। 22 ଇଞ୍ଜାଁ ନୀନୁ ପା଼ରଇଁ ଏଲେଇଞ୍ଜି, ‘ପ୍ରବୁ ଏଲେଇଞ୍ଜି ମାନେସି, ଇସ୍ରାୟେଲ ନା଼ ମୀର୍‌ଏସି, ନା଼ ପା଼ଣ୍‌ୱା ମୀର୍‌ଏସି; 23 ନା଼ନୁ ନିଙ୍ଗେ ୱେସାମାଞ୍ଜାଇଁ, ନା଼ ମୀର୍‌ଏଣାଇଁ ହାଜାଲି ହୀମୁ କି ଏ଼ୱାସି ନା଼ ସେ଼ବା କିପାସି; ଅ଼ଡ଼େ ନୀନୁ ନୀଏଁ ପାତେକା ଏ଼ୱାଣାଇଁ ପିସାଲି କୂହାମାଞ୍ଜି, ଈଦାଆଁତାକି ନା଼ନୁ ନୀ ମୀର୍‌ଏଣାଇଁ ଇଚିହିଁ ନୀ ପା଼ଣ୍‌ୱା ମୀର୍‌ଏଣାଇଁ ପା଼ୟିଇଁ।’"

24 ଏଚେଟିଏ ଜିରୁତା ବାସା କିହାମାଚି ଟା଼ୟୁତା ପ୍ରବୁ ମ଼ସାଇଁ ବେଟାଆ଼ହାଁ ପା଼ୟାଲି ଅଣ୍‌ପିତେସି। 25 ଏଚିବେ଼ଲାତା ସିପରା ର଼ ୱାହ୍‌ନି ୱାଲି ଅ଼ହାଁ ତାନି ମୀର୍‌ଏଣା ତ଼ଲୁତି ଦା଼ତେ ଅ଼ଡ଼େ ଏ଼ଦାଆଁ ମ଼ସା ପାଃଆନା ଡ଼଼ଇକା ମେତ୍‌ହାଁ ଏଲେଇଚେ, "ସାତେଏ ନୀନୁ ନା଼ କାସାତି ଡକ୍ରା।" 26 ଇଲେକିହିଁ ମାହାପୂରୁ ଏ଼ୱାଣାଇଁ ପିସ୍ତେସି। ଏଚେଟିଏ ଏ଼ ଆୟାଟି ଏଲେଇଚେ, "ନୀନୁ ତ଼ଲୁ ଦା଼ପି ଆ଼ତି କାସାତି ଡକ୍ରା।"

27 ଏଚେଟିଏ ପ୍ରବୁ ହାରଣଇଁ ଏଲେଇଚେସି, "ନୀନୁ ମ଼ସାଇଁ ଆଣ୍ଡାଲି ବାଟାତା ହାଲାମୁ।" ଏଚେଟିଏ ଏ଼ୱାସି ହାଜାହାଁ ମାହାପୂରୁତି ହ଼ରୁତା ଏ଼ୱାଣାଇଁ ବେଟାଆ଼ହାଁ ଏ଼ୱାଣାଇଁ ନଣ୍ତିତେସି। 28 ଏଚିବେ଼ଲା ମ଼ସା ପ୍ରବୁ ତା଼ଣାଟି ପାଣ୍ତ୍‌ୱି ଆ଼ହାମାନି ବାରେ କାତା ଅ଼ଡ଼େ ତାନି ହୁକୁମିଟି ହୀପ୍‌କି ଆ଼ହାମାନି ବାରେ ସିନା ହାରଣଇଁ ୱେସ୍ତେସି। 29 ଏଚେଟିଏ ମ଼ସା ଅ଼ଡ଼େ ହାରଣ ମିସର ଦେ଼ସାତା ହାଜାହାଁ ଇସ୍ରାୟେଲତି କାଜାରାଇଁ କୂଡ଼ି କିତେରି। 30 ଇଞ୍ଜାଁ ହାରଣ ଏ଼ୱାରାଇଁ ମ଼ସାକି ୱେସ୍‌ପିଆ଼ହାମାନି ପ୍ରବୁତି ବାରେ ବ଼ଲୁ ୱେସ୍ତେସି, ଅ଼ଡ଼େ ଲ଼କୁ ନ଼କିତା ଏ଼ ବାରେ ସିନାୟାଁ ତ଼ସ୍ତେସି। 31 ଏଚେଟିଏ ଲ଼କୁ ନାମିତେରି, ଇଞ୍ଜାଁ ପ୍ରବୁ ଇସ୍ରାୟେଲ ମୀର୍‌କାଣି ଜାତ୍‌ନୁ କିହାଁ ଏ଼ୱାରି ଦୁକୁ ମେସାମାନେସି, ଏ଼ଦାଆଁ ୱେଞ୍ଜାହାଁ ଏ଼ୱାରି ତା଼ର୍ୟୁଁ ଲେ଼ସାହାଁ ଏ଼ୱାଣାଇଁ ଜହରା କିତେରି।