1 ଏଚିବେ଼ଲା ପ୍ରବୁ ମ଼ସାଇଁ ଏଲେଇଚେସି, "ନା଼ନୁ ପା଼ରଇଁ ଏ଼ନାଆଁ କିଇଁ ଏ଼ଦାଆଁ ନୀନୁ ନୀଏଁ ମେହ୍‌ଦି; ଇଚିହିଁ ନା଼ ବା଼ଡ଼୍‌ୟୁତି କେୟୁ ତ଼ଞ୍ଜାଆ଼ତିସାରେ, ଏ଼ୱାସି ଲ଼କୁଣି ହାଜାଲି ହୀନେସି ଅ଼ଡ଼େ ବା଼ଡ଼୍‌ୟୁତି କେୟୁ ତ଼ଞ୍ଜାଆ଼ତିସାରେ ଏ଼ୱାସି ତାନି ଦେ଼ସାଟି ପେ଼ର୍‌ହା ପାଣ୍ତାନେସି।"

2 ମାହାପୂରୁ ମ଼ସା ତଲେ କାତା ଆ଼ହାଁ ଏଲେଇଚେସି, "ନା଼ନୁ ଜିହବା ପ୍ରବୁତେଏଁ; 3 ନା଼ନୁ ଅବ୍ରାହାମ, ଇସାହାକ ଅ଼ଡ଼େ ଜାକୁବଇଁ, ବାରେ ବା଼ଡ଼୍‌ୟୁଗାଟି ମାହାପୂରୁତେଏଁ*6:3 ଏଲ୍‌-ସାୟିଦା ଇଞ୍ଜିଁ ତ଼ଞ୍ଜା ଆ଼ହାମାଚେଏଁ, ସାମା ନା଼ନୁ ଜିହବା ଦ଼ରୁ ତଲେ ଏ଼ୱାରାଇଁ ପୁଣ୍‌ମ୍ବି କିହା ହିଲାଆତେଏଁ। 4 ଇଞ୍ଜାଁ କିଣାନ ଦେ଼ସା, ଇଚିହିଁ, ଏମିନି ତା଼ଣା ଏ଼ୱାରି ବାସା କିତେରି, ଏ଼ ବାସା କିହାମାନି ଦେ଼ସା ଜିକେଏ ଏ଼ୱାରାକି ହୀଇଁ ଇଞ୍ଜିଁ ଏ଼ୱାରି ତଲେ ରା଼ଜିମା଼ନା ତୀରି କିହାମାଚେଏଁ। 5 ନୀଏଁ ମିସରତି ଲ଼କୁ ଆମିନିଗାଟାରାଇଁ ହ଼ଲିୟାଙ୍ଗା କିହାଁ ଇଟାମାନେରି, ଏ଼ ଇସ୍ରାୟେଲ ଲ଼କୁତି ଡ଼ୀକି ହା଼ଡା ୱେଞ୍ଜାହାଁ, ନା଼ନୁ ନା଼ ଏ଼ ରା଼ଜିମା଼ନା ଅଣ୍‌ପାମାଇଁ। 6 ଏ଼ଦାଆଁତାକି ଇସ୍ରାୟେଲ ମୀର୍‌କାଣି ଏଲେଇନାମୁ, ନା଼ନୁ ପ୍ରବୁତେଏଁ, ନା଼ନୁ ମିଙ୍ଗେ ମିସର ଲ଼କୁତି ବ଼ଜୁ ଡେ଼କିନି ତା଼ଣାଟି ହୁକି କିୟାଇଁ ଅ଼ଡ଼େ ନା଼ନୁ ମିଙ୍ଗେ ଏ଼ୱାରି ହ଼ଲିୟା ତା଼ଣାଟି ଗେଲ୍‌ପାଇଁ, ଇଞ୍ଜାଁ ନା଼ କେୟୁ ଦା଼ସାହାଁ ଅ଼ଡ଼େ କାଜା କାଜା ଡଣ୍ତ ହୀହାଁ ମିଙ୍ଗେ ଗେଲ୍‌ପାଇଁ। 7 ନା଼ନୁ ମିଙ୍ଗେ ନା଼ ଲ଼କୁ ଲେହେଁ ଆବାଇଁ, ଇଞ୍ଜାଁ ନା଼ନୁ ମୀ ମାହାପୂରୁ ଆ଼ଇଁ; ଏଚେଟିଏ ମିସର ଲ଼କୁତି ବ଼ଜୁ ଡେ଼କିନି ତା଼ଣାଟି ମୀ ହୁକି କିୟାନାତେଏଁ ନା଼ନୁ ମୀ ପ୍ରବୁ ମାହାପୂରୁତେଏଁ ଏ଼ଦାଆଁ ମୀରୁ ପୁଞ୍ଜେରି। 8 ନା଼ନୁ ଅବ୍ରାହାମ, ଇସାହାକ ଅ଼ଡ଼େ ଜାକୁବକି ଏମିନି ଦେ଼ସା ହୀହାଲି ତାକି ଆ଼ଞ୍ଜାମାଇଁ, ଏ଼ ଦେ଼ସାତା ନା଼ନୁ ମିଙ୍ଗେ ଅୟାଇଁ; ନା଼ନୁ ଅଦିକାରା ତାକି ଏ଼ଦାଆଁ ମିଙ୍ଗେ ହିୟାଇଁ; ନା଼ନୁ ଏ଼ ପ୍ରବୁତେଏଁ।" 9 ଏଚେଟିଏ ମ଼ସା ଇସ୍ରାୟେଲ ମୀର୍‌କାଣି ଏଲେକିହିଁ ୱେସ୍ତେସି, ସାମା ଏ଼ୱାରି ମ଼ନତି ଦୁକୁ ଅ଼ଡ଼େ କସ୍ତତି ହ଼ଲିୟା କାମା ତାକି ମ଼ସାତି କାତା ୱେନାଆତେରି।

10 ଏଚେଟିଏ ପ୍ରବୁ ମ଼ସାଇଁ ଏଲେଇଚେସି, 11 "ନୀନୁ ହାଜାହାଁ ମିସରତି ରାଜା ପା଼ରଇଁ ୱେହ୍‌ମୁ, ନୀ ଦେ଼ସାଟି ଇସ୍ରାୟେଲ ମୀର୍‌କାଣି ହାଜାଲି ହୀମୁ।"

12 ଏଚେଟିଏ ମ଼ସା ପ୍ରବୁତି ନ଼କିତା ଏଲେଇଚେସି, "ମେହ୍‌ମୁ, ଇସ୍ରାୟେଲ ଲ଼କୁ ନା଼ କାତା ୱେଞ୍ଜାହିଲଅରି; ଇଚିହିଁ, ନା଼ନୁ ନେହିକିଁ ଜ଼ଲାଲି ପୁନାଆଗାଟାତେଏଁ, ନା଼ କାତା ପା଼ର ଏ଼ନିକିଁ ୱେନେସି ?"

13 ଇଲେକିହିଁ ପ୍ରବୁ ମ଼ସା ଅ଼ଡ଼େ ହାରଣ ତଲେ କାତା ଆ଼ତେସି, ଇଞ୍ଜାଁ ଇସ୍ରାୟେଲ ଲ଼କୁଣି ମିସର ଦେ଼ସାଟି ହ଼ପ୍‌ହା ତାଚାଲି ତାକି ମିସରତି ରାଜା ପା଼ର ତା଼ଣା ଅ଼ଡ଼େ ଇସ୍ରାୟେଲ ଲ଼କୁ ତା଼ଣା ଜ଼ଲାଲି ହୁକୁମି ହୀତେସି।

14 ଈ ବାରେ ଲ଼କୁ ଜାହାରା ଜାହାରା ତାଞ୍ଜି କୂଡ଼ାତା କାଜାରି ମାଚେରି। ଇସ୍ରାୟେଲତି ପା଼ଣ୍‌ୱା ମୀର୍‌ଏସି ରୁବେନ୍‌ ତାନି ମୀର୍‌ଏସି ହନକ, ପଲ୍‌ଲୁ, ହିସ୍ରଣ ଅ଼ଡ଼େ କର୍ମି; ଈୱାରି ରୁବେନ୍‌ତି କୂଡ଼ା। 15 ଇଞ୍ଜାଁ ସିମିୟନ ମୀର୍‌ଏସି ଜିମୁୟେଲ, ଜାମିନ୍‌, ଅହଦ୍‌, ଜାକିନ୍‌, ସହର ଅ଼ଡ଼େ କିଣାନିୟ ଡକ୍ରିନି ମୀର୍‌ଏସି ସୟିଲ; ଈୱାରି ସିମିୟନତି କୂଡ଼ା। 16 କୂଡ଼ାତି ଲେକା ତଲେ ଲେ଼ବିତି ମୀର୍‌କା ଦ଼ର୍‌କା, ଗେର୍ସନ, କହାତ ଅ଼ଡ଼େ ମରାରି; ଲେ଼ବିତି ସ଼କ଼ଡ଼ି ସତର ବାର୍ସା ମାଚେ। 17 ଇଞ୍ଜାଁ ଜାହାରା କୂଡ଼ାତି ଲେକା ତଲେ ଗେର୍ସନ ମୀର୍‌ଏସି ଲିବ୍‌ନି ଅ଼ଡ଼େ ସିମିୟି। 18 ଇଞ୍ଜାଁ କହାତ ମୀର୍‌କା ଅମ୍ରାମ୍‌, ଜିସ୍‌ହର, ହିବ୍ରଣ, ଉସିୟେଲ; ଏ଼ କହାତ ସ଼କ଼ଡ଼ି ତେ଼ର ବାର୍ସା ନୀଡିତେସି। 19 ମରାରି ମୀର୍‌ଏସି ମହଲି ଅ଼ଡ଼େ ମୂସି; ଈୱାରି କୂଡ଼ାତି ଲେକାତଲେ ଲେ଼ବି କୂଡ଼ାତାରି।

20 ଇଞ୍ଜାଁ ଅମ୍ରାମ୍‌ ତାନି ଆ଼ବାତି ତାଙ୍ଗି*6:20 ଆମା ଜକେବଦନି ବୀହା ଆ଼ତେସି, ଏ଼ଦି ହାରଣ ଅ଼ଡ଼େ ମ଼ସାଇଁ ଜାର୍ନିକିତେ; ଏ଼ ଅମ୍ରାମ୍‌ ସ଼କ଼ଡ଼ି ସତର ବାର୍ସା ନୀଡିତେସି। 21 ଜିସ୍‌ହର ମୀର୍‌କା କରହ, ନେପଗ୍‌, ସିକ୍ରି। 22 ଇଞ୍ଜାଁ ଉସିୟେଲ ମୀର୍‌କା ମିସାୟେଲ ଅ଼ଡ଼େ ଇଲିସାପନ୍‌ ଇଞ୍ଜାଁ ସିତ୍ରି।

23 ଇଞ୍ଜାଁ ହାରଣ ଅମିନାଦବ ମା଼ଙ୍ଗା ନହସନ ତାଙ୍ଗି ଇଲିସେବାନି ବୀହା ଆ଼ତେସି; ଏ଼ଦି ନାଦବ, ଅବିହୁ, ଇଲିୟାସର ଅ଼ଡ଼େ ଇତାମରଇଁ ଜାର୍ନି କିତେ। 24 ଇଞ୍ଜାଁ, କରହତି ମୀର୍‌କା ଅସିର, ଇଲ୍‌କାନା ଅ଼ଡ଼େ ଅବିୟାସପ; ଈୱାରି କରହତି କୂଡ଼ା। 25 ଇଞ୍ଜାଁ, ହାରଣତି ମୀର୍‌ଏସି ଇଲିୟାସର ପୁଟିୟେଲତି ର଼ ମା଼ଙ୍ଗାନି ବୀହା ଆ଼ହାଲିଏ, ଏ଼ଦି ତାନି ତା଼ଣାଟି ପିନହସ୍‌ଇଁ ଜାର୍ନି କିତେ, ଈୱାରି ଲେ଼ବି କୂଡ଼ାତି ବା଼ଗାଟି ତାମି ତାଞ୍ଜି କୂଡ଼ା ବିତ୍ରା କାଜାରି ମାଚେରି।

26 ଈ ହାରଣ ଅ଼ଡ଼େ ମ଼ସା, ଈୱାରାଇଁ ପ୍ରବୁ ଏଲେଇଚେସି, "ମୀରୁ ମାନ୍ଦା ମାନ୍ଦା ଇସ୍ରାୟେଲ ଲ଼କୁଣି ମିସର ଦେ଼ସାଟି ହ଼ପ୍‌ହା ତାଦୁ।" 27 ଈୱାରି ମିସରଟି ଇସ୍ରାୟେଲ ଲ଼କୁଣି ହ଼ପ୍‌ହା ତାଚାଲି ତାକି ମିସରତି ପା଼ର ରାଜା ତଲେ ହା଼ଡାକାତା ଆ଼ହାମାଚେରି। ଈୱାରି ଏ଼ ମ଼ସା ଅ଼ଡ଼େ ହାରଣ।

28 ଏମିନି ଦିନା ପ୍ରବୁ ମିସର ଦେ଼ସାତା ମ଼ସା ତଲେ କାତା ଆ଼ତେସି, 29 ଏ଼ ଦିନା ପ୍ରବୁ ମ଼ସାଇଁ ଈ କାତା ଏଲେଇଚେସି, "ନା଼ନୁ ପ୍ରବୁତେଏଁ, ନା଼ନୁ ନିଙ୍ଗେ ଏମିନି କାତା ୱେସ୍ତାଇଁ; ଏ଼ ବାରେ ମିସରତି ରାଜା ପା଼ରଇଁ ୱେହ୍‌ମୁ।"

30 ଏଚେଟିଏ ମ଼ସା ପ୍ରବୁ ନ଼କିତା ଏଲେଇଞ୍ଜା ମାଚେସି, "ନା଼ନୁ ନେହିକିଁ ଜ଼ଲାଲି ପୁନାଆଗାଟାତେଏଁ ଇଞ୍ଜାଁ, ନା଼ କାତା ପା଼ର ଏ଼ନିକିଁ ୱେନେସି ?"