Êxodo 7

1 ଏଚେଟିଏ ପ୍ରବୁ ମ଼ସାଇଁ ଏଲେଇଚେସି, "ମେହ୍‌ମୁ ନା଼ନୁ ନିଙ୍ଗେ ପା଼ର ନ଼କିତା ମାହାପୂରୁ ଲେହେଁ କିହାମାଞ୍ଜାଇଁ, ଅ଼ଡ଼େ ନୀ ତାୟି ହାରଣ ନୀ ବ଼ଲୁ ୱେହ୍‌ନାସି ଆ଼ନେସି। 2 ନା଼ନୁ ନିଙ୍ଗେ ଏ଼ନାଆଁ ହୁକୁମି ହିୟାଇଁ, ଏ଼ ବାରେ ନୀନୁ ଏ଼ୱାଣାଇଁ ୱେହ୍‌ଦି; ଇଞ୍ଜାଁ ନୀ ତାୟି ହାରଣ ଇସ୍ରାୟେଲ ଲ଼କୁଣି ତାନି ଦେ଼ସାଟି ପିସା ହାଜାଲି ପା଼ରଇଁ ୱେହ୍‌ନେସି। 3 ସାମା ନା଼ନୁ ପା଼ରତି ହିୟାଁ ଆ଼ଟ୍‌ୱା କିଇଁ, ଇଞ୍ଜାଁ ମିସର ଦେ଼ସାତା ନା଼ ସିନା ଅ଼ଡ଼େ ହା଼ରେକା କାବାଆ଼ନି କାମା କିଇଁ। 4 ଆ଼ତିଜିକେଏ ପା଼ର ମୀ କାତାତା ମ଼ନ ହୀଅସି; ଏ଼ଦାଆଁତାକି ନା଼ନୁ ମିସର ଦେ଼ସାତା ନା଼ କେୟୁ ଦା଼ସାହାଁ ହା଼ରେକା ଡଣ୍ତ ହୀହାଁ ମିସରଟି ନା଼ ମାନ୍ଦା, ନା଼ ଲ଼କୁ ଇସ୍ରାୟେଲ ମୀର୍‌କାଣି ହ଼ପ୍‌ହା ତାଇଁ। 5 ଏଚେ଼ତା ନା଼ନୁ ମିସର କ଼ପାଟି ନା଼ କେୟୁ ପେର୍‌ହାଁ ଏ଼ୱାରି ତା଼ଣାଟି ଇସ୍ରାୟେଲ ମୀର୍‌କାଣି ହ଼ପ୍‌ହା ତାନାଟି ନା଼ନୁ ପ୍ରବୁତେଏଁ, ଏ଼ଦାଆଁ ଏ଼ୱାରି ପୁନେରି।" 6 ଏଚେଟିଏ ମ଼ସା ଅ଼ଡ଼େ ହାରଣ ଏଲେକିହିଁ କିତେରି; ପ୍ରବୁତି ହୁକୁମି ଲେହେଁ ଏ଼ୱାରି କାମା କିତେରି। 7 ଏ଼ୱାରି ପା଼ର ରାଜା ତଲେ କାତା ଆ଼ତି ବେ଼ଲାତା ମ଼ସାକି ସା଼ରିକ଼ଡ଼ି ବାର୍ସା ଅ଼ଡ଼େ ହାରଣକି ସା଼ରିକ଼ଡ଼ି ତିନି ବାର୍ସା ଆ଼ହାମାଚେ।

ହାରଣତି ବାଡ଼୍‌ଗା

8 ପ୍ରବୁ ମ଼ସା ଅ଼ଡ଼େ ହାରଣଇଁ ଏଲେଇଚେସି, 9 "ମୀରୁ ମିଙ୍ଗେ ତାକି ର଼ ସିନା ତ଼ସ୍ତାଦୁ ଇଞ୍ଜିଁ ପା଼ର ମିଙ୍ଗେ ଏଲେଇଞ୍ଜାନେସି, ଆ଼ତିସାରେ ନୀନୁ ହାରଣଇଁ ଏଲେଇଞ୍ଜି, ନୀ ବାଡ଼୍‌ଗା ଅ଼ହାଁ ପା଼ର ରାଜା ନ଼କିତା ଡ଼଼ଇକା ମେତ୍‌ମୁ; ଏଚେଟିଏ ଏ଼ ବାଡ଼୍‌ଗା ରା଼ଚୁ ଆ଼ନେ।" 10 ଏଚେଟିଏ ମ଼ସା ଅ଼ଡ଼େ ହାରଣ ପା଼ର ରାଜା ତା଼ଣା ହାଜାହାଁ ପ୍ରବୁତି ହୁକୁମି ଲେହେଁ କାମା କିତେରି; ହାରଣ ପା଼ର ଅ଼ଡ଼େ ତାନି ହ଼ଲିୟାଙ୍ଗା ନ଼କିତା ତାନି ବାଡ଼୍‌ଗା ଡ଼଼ଇକା ମେତ୍‌ହାଲିଏ, ଏ଼ଦି ରା଼ଚୁ ଆ଼ତେ। 11 ଏଚେଟିଏ ପା଼ର ତାନି ବୁଦି ଗାଟାରାଇଁ ଅ଼ଡ଼େ ଗୂର୍‌କାଣି ହା଼ଟିତେସି; ଏଚେଟିଏ ମିସରତି ଗୂର୍‌କା ଜିକେଏ ତାମି ଗାର୍‌ଡ଼ି ତଲେ ଏଲେକିତେରି। 12 ଇଚିହିଁ ଏ଼ୱାରି ବାରେ ଜାହାରା ଜାହାରା ବାଡ଼୍‌ଗା ମେତ୍‌ହାଲିଏ, ଏ଼ୱି ରା଼ସ୍‌କା ଆ଼ତୁ; ସାମା ହାରଣତି ବାଡ଼୍‌ଗା ଏ଼ୱାରି ବାରେ ବାଡ଼୍‌ଗାଣି ଗୂସ୍ତେ। 13 ଏଚେଟିଏ ପ୍ରବୁତି ବ଼ଲୁ ଲେହେଁ ପା଼ରତି ହିୟାଁ ଆ଼ଟ୍‌ୱା ଆ଼ତେ, ଅ଼ଡ଼େ ଏ଼ୱାସି ଏ଼ୱାରି କାତା ୱେନାଆତେସି।

ମୂଲୁ ମର୍‌ଡ଼ି - ଏ଼ୟୁ ନେତେରି ଆ଼ନାୟି

14 ଏଚେଟିଏ ପ୍ରବୁ ମ଼ସାଇଁ ଏଲେଇଚେସି, "ପା଼ର ରାଜାତି ହିୟାଁ ଆ଼ଟ୍‌ୱା ଆ଼ହାମାନେ, ଏ଼ୱାସି ଲ଼କୁଣି ହାଜାଲି ହୀହିହିଲଅତି।" 15 ଏ଼ଦାଆଁତାକି ନୀନୁ ଲା଼ଇ ପା଼ର ତା଼ଣା ହାଲାମୁ; ମେହ୍‌ମୁ ଏ଼ୱାସି ଏଚେ଼ତା ଏ଼ୟୁ ୱାକି ହାନେସି, ନୀନୁ ଏ଼ୱାଣି ତଲେ କାତା ଆ଼ହାଲି ନିଲ କାଡା ଗିଚୁତା ନିମୁ; ଆମିନି ବାଡ଼୍‌ଗା ରା଼ଚୁ ଆ଼ହାମାଚେ, ଏ଼ଦାଆଁ ଜିକେଏ କେୟୁତା ଅ଼ମୁ। 16 ଏଚେଟିଏ ରାଜାଇଁ ଏଲେଇନାମୁ, ଏବ୍ରିୟ ଲ଼କୁତି ପ୍ରବୁ ମାହାପୂରୁ ନାଙ୍ଗେ ନୀ ତା଼ଣା ପାଣ୍ତାହାଁ ଏଲେଇଞ୍ଜାତେସି, "ନୀନୁ ନା଼ ଲ଼କୁଣି ବାଟାତା ସେ଼ବା କିହାଲି ପିସା ହିୟାମୁ; ସାମା ନୀନୁ ନୀଏଁ ପାତେକା ଈ କାତାତା ମ଼ନ ହୀହାହିଲଅତି।" 17 ପ୍ରବୁ ଇଲେକିଁ ୱେସିମାନେସି, "ନା଼ନୁ ପ୍ରବୁତେଏଁ ଏ଼ଦାଆଁ ତଲେ ନୀନୁ ପୁଞ୍ଜି; ମେହ୍‌ମୁ, ନା଼ନୁ ନା଼ କେୟୁତି ଈ ବାଡ଼୍‌ଗା ତଲେ ନିଲ କାଡାତି ଏ଼ୟୁ ଲାକ ୱେ଼ଇଁ, ଏଚେଟିଏ ଏ଼ ଏ଼ୟୁ ନେତେରି ଆ଼ହାହାନୁ। 18 ଇଞ୍ଜାଁ କାଡାତା ମାନି ମୀଣ୍‌କା ବାରେ ହା଼ହାହାନୁ, ଅ଼ଡ଼େ କାଡା ଗାନ୍ଦା ଆ଼ନେ; ଏଚେଟିଏ ମିସରତି ଲ଼କୁ କାଡାତି ଏ଼ୟୁ ଗସାଲି ଆ଼ଡଅରି।"

19 ଏଚେଟିଏ ପ୍ରବୁ ମ଼ସାଇଁ ଏଲେଇଚେସି, "ହାରଣଇଁ ଈ କାତା ୱେହ୍‌ମୁ, ନୀନୁ ନୀ ବାଡ଼୍‌ଗା ଅ଼ହାଁ ମିସର ଦେ଼ସାତି ଏ଼ୟୁ ଲାକ, ଇଚିହିଁ, ଏମ୍ବାତି କାଡା, ନା଼ଡ଼ା, ବାନ୍ଦା ଅ଼ଡ଼େ ଏ଼ୟୁ ମାନି ଈ ବାରେ ଲାକ ନୀ କେୟୁ ଦା଼ହ୍‌ମୁ, ଏଚେଟିଏ ବାରେ ଏ଼ୟୁ ନେତେରି ଆ଼ନୁ; ଅ଼ଡ଼େ ମିସର ଦେ଼ସାତି ବାରେ ମା଼ର୍‌କା ଅ଼ଡ଼େ ୱାଲ୍‌କା ଟା଼ୟୁତି ଏ଼ୟୁ ଜିକେଏ ନେତେରି ଆ଼ନୁ।"

20 ଏଚେଟିଏ ମ଼ସା ଅ଼ଡ଼େ ହାରଣ ପ୍ରବୁତି ହୁକୁମି ଲେହେଁ କିତେରି; ଏ଼ୱାସି ବାଡ଼୍‌ଗା ଆସାହାଁ ପା଼ର ଅ଼ଡ଼େ ତାନି ହ଼ଲିୟାଙ୍ଗା ନ଼କିତା କାଡାତି ଏ଼ୟୁ ଲାକ ୱେ଼ତେସି; ଏଚେଟିଏ ବାରେ କାଡାତି ଏ଼ୟୁ ନେତେରି ଆ଼ହାହାଚୁ। 21 ଇଞ୍ଜାଁ, କାଡାତି ବାରେ ମୀଣ୍‌କା ହା଼ତୁ ଅ଼ଡ଼େ କାଡା ଗାନ୍ଦା ଆ଼ହାହାଚେ, ଏଚେଟିଏ ମିସରତାରି କାଡାତି ଏ଼ୟୁ ଗସାଲି ଆ଼ଡାଆତେରି; ମିସର ଦେ଼ସାତା ବାରେ ୱାକି ନେତେରି ଆ଼ହାହାଚେ। 22 ଏଚିବେ଼ଲା ମିସରତି ଗୂର୍‌କା ଜିକେଏ ତାମି ଗାର୍‌ଡ଼ି ତଲେ ଏଲେକିତେରି; ଏଚେଟିଏ ପ୍ରବୁତି ବ଼ଲୁ ଲେହେଁ ପା଼ର ରାଜାତି ହିୟାଁ ଆ଼ଟ୍‌ୱା ଆ଼ତେ, ଅ଼ଡ଼େ ଏ଼ୱାସି ଏ଼ୱାରି କାତାତା ମ଼ନ ହୀଆତେସି। 23 ଏଚେଟିଏ ପା଼ର ୱେଣ୍ତାହାଁ ତାମି ଇଜ ହାଚେସି, ଏମ୍ବାଆଁ ଅ଼ଡ଼େ ତାନି ମ଼ନ ହୀଆତେସି। 24 ଇଞ୍ଜାଁ, ବାରେ ମିସରତି ଲ଼କୁ କାଡାତି ଏ଼ୟୁ ଗସାଲି ଆ଼ଡାଆଲିଏ, ଗହ୍‌ନି ଏ଼ୟୁ ତାକି କାଡାତି ସା଼ରିୱାକି କା଼ର୍‌ହେରି।

25 ପ୍ରବୁ କାଡାତି ଡୀଗିତି ଡା଼ୟୁ ସା଼ତା ଦିନା ପୂରା ଆ଼ତେ। 26 ଆଜ୍ଞାମାନେ ଲେଖ, 27 ଆଜ୍ଞାମାନେ ଲେଖ, 28 ଆଜ୍ଞାମାନେ ଲେଖ, 29 ଆଜ୍ଞାମାନେ ଲେଖ ।