1 ଆୟା ସମୟତୁ ମି ଲୋକାଙ୍ଗ୍‌ ସାକା କିନିକାନ୍‌ ମିକାୟେଲ ପେରିକାନ୍‌ ନିଲ୍‌ନାନ୍‌ ମାରି ଲୋକା ଜାତିଦି ଆଗିଡ଼ିରାନ୍‌ ଆୟା ବେଡ଼ାଦି ସାନ୍ଦି ଆୟା ରକମ୍‌ଦି କାସ୍ଟୁଦି ବେଡ଼ା ଏସେଙ୍ଗ୍‌ ଆଏତ୍‌ନେ, ଇୟାୱାଜା କାସ୍ଟୁଦି ଦିନ୍ ୱାନାତ୍‌, ମାରି, ମି କୁଟୁମ୍‌ଦି ଆମା ୱିଜୁ ଲୋକା ଦରୁ ମାପୁରୁଦି ବଇଦୁ ରାସାତାମାନାତ୍‌, ୱାର୍‌ ୱିଜେରେ ଆୟା ସମୟତୁ ରକିୟା ପୋଇନାର୍‌ । 2 ମାରି, ଦୁନିଆଦି ଦୁଡ଼ିଦୁ ଆମାକାର୍‌ ଗୁରିତାମାନାର୍‌, ୱାରିମାଣାନ୍‌ ଏସୋଲୋକୁ ନିଙ୍ଗ୍‌ନାର୍‌; ଏସୋଲୋକୁ ଏସେଙ୍ଗ୍‌ ୱିଜ୍‌ଇ ଜିବନ୍‌ ମାରି ଏସୋ ସେମାର୍ ମାରି ଏସେଙ୍ଗ୍‌ ୱିଜ୍‌ଇ ଦଣ୍ତ୍‌ ପୋଇଦେଙ୍ଗ୍‌ ନିଙ୍ଗ୍‌ନାର୍‌ । 3 ମାରି, ଆମାକାର୍‌ ଜ୍ଞାନ୍‌ତିକାର୍‌, ୱାର୍‌ ବାଦଡ଼୍‌ଦି ଜାୟ୍‌ଦି ୱାଜା ମାରି ଆମାକାର୍‌ ନାଣ୍ତ ଲୋକାଙ୍ଗ୍‌ ଦାର୍ମୁଦି ତରିନ୍‌ ତାନାର୍‌, ୱାର୍‌ ସୁକେଙ୍ଗା ୱାଜା ୱିଜୁଦିନ୍‌ ସାନ୍ଦି ଜାୟ୍‌ ଆନାର୍‌ ।

4 ମାତର ଏ ଦାନିୟେଲ, "ନିନ୍‌ ୱିଜ୍‌ନି କାଡ଼ା ସାନ୍ଦି ଇୟା ବାକ୍ୟ ୱିଜୁ ବନ୍ଦ କିଜି ମାରି ଇୟା ବଇ ଟାପ୍‌ ଡାକ୍‌ସି ଇଡ୍‌ଆ; ନାଣ୍ତ ଲୋକୁ ଇନିଙ୍ଗା ଆନିଙ୍ଗାଁ ଆନାର୍‌ ମାରି ବୁଦି ପିର୍‌ନାତ୍‌ ।"

5 ନାସ୍ତିୱାଲେ ନାନ୍‌ ଦାନିୟେଲ ସୁଡ଼ୁତା, ମାରି ସୁଡ଼ୁଦୁ, ଆଇ ରୁଣ୍ଡି ଲୋକୁ ନିଲ୍‌ତା ମାନାର୍‌, ଅରେନ୍‌ ଗାଡାଦି ଇୟା ପାଡ଼ିଦୁ ମାରି ଅରେନ୍‌ ଗାଡାଦି ଆୟା ପାଡ଼ିଦୁ । 6 ମାରି, ଅଡ଼ିନି ଆଙ୍ଗିଁ ଆରାତିକାନ୍‌ ମାରି ଗାଡାଦି ଏରୁ ମୁସୁକୁ ନିଲ୍‌ତି ଆମା ଲୋକ୍‌, ୱାନିଙ୍ଗ୍‌ ଅରେନ୍‌ ଇର୍ହାନ୍‌, "ଇୟାୱିଜୁ କାବାଆନି ବିସୟ୍‌ଦି ୱିଜ୍‌ନି ସାନ୍ଦି ଏସ ବାର୍ସେକ୍‌ ଆସ୍‌ନାତ୍‌ ?"

7 ଆବେନୁ ନାନ୍‌ ୱେର୍ହା, ଅଡ଼ିନି ଆଙ୍ଗିଁ ଆରାତିକାନ୍‌ ମାରି ଗାଡାଦି ଏରୁ ମୁସୁକୁ ନିଲ୍‌ତିମାନି ଲୋକୁ ନିଜେଦି ଉଣେର୍‌ ମାରି ଡେବ୍‌ରା କିୟୁ ବାଦଡ଼୍‌ତି ତରିନ୍‌ ପେର୍‌ଜି ଜିବନ୍‌ତି ମାପୁରୁ ଦର୍‌ତାନ୍‌ ପାର୍‌ମାଣ୍‌ କିଜି ଇର୍ହାନ୍‌, ଇକା ତିନ୍‌ ବାର୍ସେକ୍‌ ଅଦା ସାନ୍ଦି ଆନାତ୍‌; ମାରି, ୱାର୍‌ ପବିତ୍ର ଲୋକା ସାକ୍‌ତି ରୁକୁତେଙ୍ଗ୍‌ ୱିସ୍‌ତାନ୍‌, ଇୟା ୱିଜୁ ବିସୟ୍‌ ସତ୍‌ ଆନାତ୍‌ । 8 ମାରି, ନାନ୍‌ ୱେର୍ହା, ମାତର ବୁଜାଏତା; ଆଦେଙ୍ଗ୍‌ ନାନ୍‌ ଇର୍ହା, "ଏ ନା ପ୍ରବୁ, ଇୟାୱିଜୁଦି ଦଣ୍ତ୍‌ ଇନିକା ଆନାତ୍‌ ?"

9 ଆବେନୁ ୱାନ୍‌ ଇର୍ହାନ୍‌, ଏ ଦାନିୟେଲ, ନିନ୍‌ ନିଜେଦି ସାରିଦୁ ବୁଲାଆ; ଇର୍ରିଙ୍ଗ୍‌ ୱିଜ୍‌ନି କାଡ଼ା ସାନ୍ଦି ଇୟା ବାକ୍ୟୱିଜୁ ବନ୍ଦ ମାରି ଟାପ୍‌ ଡାକ୍‌ସି ଇଡାତା ମାନାତ୍‌ । 10 ନାଣ୍ଡ ଲୋକୁ ନିଜେଦିଙ୍ଗ୍‌ ନେଗିକା କିନାର୍‌ ମାରି ପବିତ୍ର ଆନାର୍‌; ମାତର୍‌ ତାଗ୍‌ଇଲୋକୁ ତାଗ୍‌ଇପାଣି କିନାର୍‌ ମାରି ତାଗ୍‌ଇ ଲୋକା ମାଣାନ୍‌ ଏନ୍‌ବା ବୁଜାଏନ୍‌; ମାତର୍‌ ବୁଦିଦି ଲୋକୁ ବୁଜାନାର୍‌ ।

11 ମାରି, ଆମା ସମୟତୁ ସତ୍‌ଦି ପୁଜା ସିନିକା ବନ୍ଦ୍‌ ଆନାତ୍‌ ମାରି ନାସ୍ଟୁ କିନିକାନ୍‌ କାଡ଼୍‌ନି ଜିନିସ୍‌ ତିୟାର୍‌ ଆନାତ୍‌, ଆୟା ବେଡ଼ାଦାନ୍‌ ଏକ୍‌ ଆଜାର୍‌ ଦୁଇସ ନବେ ଦିନ୍‌ ଆନାତ୍‌ । 12 ଆମା ଲୋକୁ କାପ୍‌କିଜି ମାନ୍‌ଜିନାନ୍‌ ମାରି ଏକ୍‌ ଆଜାର୍‌ ତିନ୍‌ସ ତିରିସ୍ ପାସ୍‌ ଦିନ୍‌ ସାନ୍ଦି ମାନ୍‌ଜିନାନ୍‌, ୱାନ୍‌ ଦନ୍ୟ ।

13 ମାତର ୱିଜ୍‌ନି କାଡ଼ା ସାନ୍ଦି ମିର୍‌ ନିଜେଦି ସାରିଦୁ ବୁଲାଦୁ; ଇର୍ରିଙ୍ଗ୍‌ ମିର୍‌ ରୋମ୍‌ନିଦେର୍‌ ମାରି କାଡ଼ାଦି ୱିଜ୍‌ନି ୱାଲେ ନିଜେଦି ଅଦିକାର୍‌ତାନ୍‌ ନିଲ୍‌ନାନ୍‌ ।