ନବୂଖଦ୍ନିତ୍ସର ଉଣ୍ତିଙ୍ଗ୍ ବିସାର୍
28 ରାଜା ନବୂଖଦ୍ନିତ୍ସରତି ୱାଲେ ଇୟାୱାଜା ଗଟାତାତ୍ । 29 ବାର ଲେଜୁଦି ୱେନ୍କା ୱାନ୍ ବାବିଲଦି ରାଜା ମେଡ଼୍ତୁ ବୁଲାଜି ମାର୍ହାନ୍ । 30 ରାଜା ଇୟା ମାଟା ଇର୍ହାନ୍, "ନାନ୍ ନା ସାକ୍ତିଦାନ୍ ମାରି ନିଜେଦି ନିଜେ ସୁଡ଼ୁନି ଉଣ୍ତିଙ୍ଗ୍ ରାଜି କିନି ଉଣ୍ତିଙ୍ଗ୍ ଆମାକା ତିଆର୍ କିତା ମାନା, ଇୟାକା ଆୟା ବାବିଲ ଆଏତ୍ ନୋ ?"
31 ରାଜାଦି ମୋକମି ଇୟା ମାଟା ମାନ୍ବୁ ମାନ୍ବୁ ଇୟା ମୁସ୍କୁପୁର୍ତି ମାଟା ୱାତାତ୍, "ଏ ରାଜା ନବୂଖଦ୍ନିତ୍ସର, ନିଙ୍ଗିଁ ଇୟା ମାଟା ଇନାୟ୍ଆଜିନାତ୍, ନି ମାଣାନ୍ ରାଜି ସର୍ହାତ୍ । 32 ମାରି, ନିନ୍ ଲୋକା ମାଣାନ୍ ଆକଆନି ମାରି ଆତ୍ରେଦି ଜାତୁଙ୍ଗାଁ ୱାଲେ ନି ବାସାନିକା ଆନାତ୍; କଡିଦି ବାଦ୍ଲୁ ନିଙ୍ଗିଁ ଲାଟା କିଆୟ୍ ଆନାତ୍, ଇୟାୱାଜା ନି ମୁସୁକୁ ସାତ୍ ବାର୍ସେକ୍ ସୋନାତ୍; ନାସ୍ତିୱାଲେ ଜେ ୱିଜୁ ୱେଡ଼ାଦୁ ୱାନ୍ ଜେ ଲୋକା ରାଜିଦୁ ସାସନ୍ କିନାନ୍ ମାରି ଏଙ୍ଗ୍ ୱାନି ବଦା, ୱାନିଙ୍ଗ୍ ୱାନ୍ ଆକା ସିନାନ୍, ଇକା ନିନ୍ ନେସ୍ନି ।"
33 ଆୟା ଦଣ୍ତ୍ତୁ ନବୂଖଦ୍ନିତ୍ସର ଉଣ୍ତିଙ୍ଗ୍ ଆୟା ମାଟା ସତ୍ ଆତାତ୍; ମାରି, ୱାନ୍ ଲୋକା ମାଣାନ୍ ଆକ ଆଜି କଡିଙ୍ଗା ୱାଜା ଲାଟା ତିର୍ହାନ୍, ୱାନି ମେନ୍ଦଲ୍ ବାଦଡ଼୍ତି ମାସୁଦୁ ଉଦିତାତ୍, ସେସ୍ତୁ ୱାନି କୁକୁଟି ଡେଗା ପଟିଦି ରେକାଦି ୱାଜା ମାରି ୱାନି ଗୋର୍କୁ ପଟିଦି ଗୋର୍କା ୱାଜା ପିରିତେ ।
ନବୂଖଦ୍ନିତ୍ସର ମାପୁରୁଦି ଦନ୍ୟବାଦ୍ କିନିକା
34 ଏସ୍ତିୱାଲେ ଆୟା ସାତ୍ ବାର୍ସେକ୍ ୱିଜିତାତ୍, ନାନ୍ ନବୂଖଦ୍ନିତ୍ସର ମୁସ୍କୁପୁର୍ ତରିନ୍ ସୁଡ଼ୁତା, ଆବେନୁ ନା ବୁଦ୍ଧି ନା ତରିନ୍ ଡ଼େସି ୱାତାତ୍, ଆଦେଙ୍ଗ୍ ନାନ୍ ୱିଜୁ ତିଆର୍ କିତି ମାପୁରୁଦିଙ୍ଗ୍ ଦନ୍ୟବାଦ୍ କିତା;
ଇର୍ରିଙ୍ଗା ୱାନ୍ ଶାସନ୍ କିନିକା ଏସେଙ୍ଗ୍ ୱିଜ୍ଏତ୍
ମାରି ୱାନି ରାଜି କାଡ଼ା କାଡ଼ା ମାନ୍ଜିନାତ୍ ।
35 ମାରି, ଦୁନିଆଦି ଲୋକୁ ୱିଜେରେ ଇନିକାସିଲି ୱାଜା ଇସାବ୍ ଆନାର୍;
ମାରି ୱାନ୍ ମୁସ୍କୁପୁର୍ତି ସୌନ୍ୟରି ମାଣାନ୍ ମାରି ଦେସ୍ତି ଲୋକା ମାଣାନ୍
ନିଜେଦି ବଦାଦାନ୍ ପାଣି କିନାର୍;
ମାରି, ଏନ୍ ୱାନି କିୟୁଦିଙ୍ଗ୍ ତେବା କିଦେଙ୍ଗ୍ ଆଟ୍ଏନ୍ ମାରି ନିନ୍ ଇନିକା କିଜିନି ଇକା
ୱାନିଙ୍ଗ୍ ଇଣ୍ଡ୍ରେଙ୍ଗ୍ ଆଟ୍ଏନ୍ ।
36 ଆୟାୱେଡ଼ାଦୁ ନା ବୁଦି ନାଙ୍ଗି ଡ଼େସି ୱାତାତ୍ ମାରି ନା ରାଜିଦି ଗୌରବ୍ ଉଣ୍ତିଙ୍ଗ୍ ନା ସାକ୍ତି ମାରି ଅଦିକାର୍ ନା ତରିନ୍ ଡ଼େସି ୱାତାତ୍; ଆବେନୁ ନା ମନ୍ତ୍ରି ମାରି ପେରିଲୋକୁ ନାଙ୍ଗି କୁକ୍ତାର୍; ମାରି, ନାନ୍ ନିଜେଦି ରାଜିଦୁ ୱାତା ମାରି ନାନ୍ ସେବା କିନିକା ନାଣ୍ଡ ପିରିତାତ୍ ।
37 ଆଦେଙ୍ଗ୍ ନାନ୍ ନବୂଖଦ୍ନିତ୍ସର ଆୟା ମୁସ୍କୁପୁର୍ ରାଜାଦି ଗୌରବ୍, ଦନ୍ୟବାଦ୍ ମାରି ସନ୍ମାନ୍ କିଜିନା; ଇର୍ରିଙ୍ଗା ୱାନ୍ କିତି ୱିଜୁ ପାଣି ସତ୍ ମାରି ୱାନି ସାରି ନେଗିକା; ମାରି, ଆମାକାର୍ ଗର୍ବ କିନାର୍, ୱାରିଙ୍ଗ୍ ଆଡ୍ଗି କିଦେଙ୍ଗ୍ ୱାନି ସାକ୍ତି ମାନାତ୍ ।