1 BaKhorinte 12

Mbili un’ompela unaNhango njinji

12 Sembili uli un’ompela una nhango njinji, nhango dzose dzembili, nekene dzilinjinji, dzimbili un’ompela, Khirisitu bo wakajalo. 13 Ngobe ngeMeya in’ompela takabvubikiwa mumbili un’ompela, maJuta kene maGiriki, balanda kene bakasunungugwa-kakale tose takatiwa kuti tin’we kweMeya in’ompela.

14 Ngobe mbili awuna nhango in’ompela koga una njinji. 15 Hapa gumbo lingati, "Ngobe andita luboko, andita wembili," ikoku akutowholithama likasibe nhango yembili. 16 Hapa zebe ingati, "Ngobe andita hhiho, andita wembili," ikoku akutowhoyithama ikasibe nhango yembili. 17 Kadzene mbili wose waka uli hhiho, wawowha neni? Hapa mbili wose waka uli zebe, wawonhuwidza neni? 18 Koga sekwawuli, Ndzimu wakabiganya imwe neyimwe nhango mumbili, sehala kukwe. 19 Hapa nhango dzose dzembili dzadzili nhango in’ompela, mbili wawhoba poni? 20 Sekwawuli iko, unanhango njinji, koga ulimbili un’ompela.

21 Hhiho alingati kuluboko, "Andina n’hingo nawe," kene n’holo uti kugumbo, "Andina n’hingo nawe." 22 Koga nayidzo nhango dzembili dzinolingika dzisina n’hingo atingatjile kuhhe kwadzo, 23 nhango dzembili dzatinokumbula kuti adzina n’hingo ndidzo dzatinokudza kwazo, nenhango dzembili dzisingadusigwe patjena dzobhakwa ngenjele whulu 24 kupinda nhango dzinodusigwa patjena. Koga Ndzimu wakabumba mbili, epa gudzo gulu kunhango dzinolingigwa pasi, 25 kuyetila kuti kusibe nesawhisisana mumbili, koga kuyetila kuti nhango dzibhatshane nekwakalizana. 26 Hapa imwe nhango idziyidzika, dzose dzodziyidzika panhu pan’ompela; hapa in’ompela ikudziwa, dzohanha dzose panhu pan’ompela.

27 Mabe mbili waKhirisitu nenhango dzawo umwe newumwe.