1 Ndakalinga ndikabona Mwizana ilimile pehhugwi kwedombo leZiyoni, yaka ilimile nebanhu balizwiwulu zwili gulu zwina zwiwulu zwili makumi mana nezwina (144,000), baka bakakwagwa zina layo nelaTate bayo pawhuma dzabo. 2 Kakale ndakawha whi libva kudzimu, laka liwhika sensindo wewona kwevula njinji kakale setitima sevula kukulu, whi landakawha lakaliwhika sehhoba yedende linolidziwa nebalidzi, 3 bakabemba lumbo gutshwa belimbeli kwetjigalo tjebumambo, belimbeli kwezwipuka zwinotjila zwina, nambeli kwebawhola. Akuna engadiyika lumbo igogo kuhhe kwayibo bali zwiwulu zwili gulu nemakumi mana ezwiwulu nezwina (144,000) baka bawangugwa kubva muhango. 4 Ibaba ndibo basakatongozwilonga hambgwa nebakadzi, ngobe bakazwitjengeta bali babuya, ibaba ndibo banotobela Mwizana kose kwayinoyenda, bakabvubugwa pakati kwebanhu, beli mitjelo yekutanga kuNdzimu nekuMwizana. 5 Mumilomo yabo akuzotongowanika manyepwa, ngobe abana tjibi.

6 Ndakakobona umwe ntumwa wekudzimu ewuluka kuhhuhhugwi, waka ana ndebo mbuya inogala nekusingapele kuti ayisumikile kuna ibabo bagele muhango, kuhango dzose, kunjudzi dzose, kundimi dzose, nekubanhu bose, 7 wakati newhi lipehhugwi, "Lemekedzani Ndzimu, kakale muwumpe gudzo, ngobe lubaka gwetonga kukwe gwaswika, namatani iye wakathama kudzimu nehango, negungwa nemisenya yevula.

8 Umwe ntumwa wekudzimu webubili wakatobela eti, "Bhabhiloni lawa, wawa iwo nzi-nkulu, iwo wakathama kuti njudzi dzose dzin'we wayini yenjemulo dzawo dzisakalulama."

9 Ntumwa wekudzimu webutatu wakabatobela eti newhi lipehhugwi, "Hapa umwe nhu enamata tjibanda netjibumbwa tjatjo, kakale ebvuma siwa lutjayo gwatjo pawhuma kene paluboko, 10 iwhoyo nhu unowhon'wa wayini yebuhongola gweNdzimu, inodulugwa munkombe webuhongola gugwe isina tjayakahanganyisiwa natjo, kakale unowhowhisiwa zogwadza nemoto nesalifa mbeli kwebatumwa bekudzimu bakayengemala nambeli kweMwizana. 11 Nebusi gwewhisiwa zogwadza kwabo gowhomilika gunda pehhugwi nekusingapele, ibaba banonamata tjibanda netjibumbgwa tjatjo nakene unolongwa lutjayo gwezina letjibanda abatowhoba nenyaluluka, siku nesikati.

12 Ikoku kohaka dzikitidza kwebayengemali, ibabo banotjengeta milayo yeNdzimu, kakale begalamoyo munaYesu.

13 Ndakakowha whi libva kudzimu liti, "Kwala whoku. Bakakombolegwa bafi banofila munaHe kubvila ngwenuwali."

Meya yakati, "Bakakombolegwa kwelebeswa, kudze kuti banyaluluke muhinga kwabo, ngobe zwiyeto zwabo zobatobela!"

14 Ndakalinga, ndikabona gole jena mbeli kwangu, pehhugwi kwalo kwaka kuligele umwe unonga Nkololo wenhu, waka ana tjiyala tjezeezi pan'holo uwe, muluboko gugwe kwaka kuna mpanga unopiza. 15 Umwe ntumwa wekudzimu wakabhuda muThempeli, emimilila iwhoya waka eligele pehhugwi kwegole, "Tjeka nempanga uwo ukowhe, ngobe lubaka gokowha gwaswika, zwidlo zwimuhango zwayibva." 16 Iwhoya waka eligele pehhugwi kwegole, waka zunguza mpanga uwe muhango, hango yakakowhewa.

17 Umwe ntumwa wekudzimu wakabhuda muThempeli yekudzimu, iyebo waka akabhata mpanga unopiza.

18 Umwe ntumwa wekudzimu wakabhuda ebva mutjibeso tjepisila zwibhayilo, ntumwa wakabe n'hingo uwe uli welinga moto, wakamimilila iwhoya waka akabhata mpanga unopiza eti, "Tjeka nempanga, ukubunganye nhabi dzemihhambi imuhango, ngobe mahhambi atjiyibva." 19 Ntumwa wekudzimu wakazunguza mpanga uwe muhango akakubunganya mahhambi amuhango, akawaposela mutjiswino tjemahhambi tjikulukulu tjebuhongola gweNdzimu. 20 Tjiswino tjemahhambi tjakaswinigwa kuhhe kwenzi-nkulu, malopa akabhuda mutjiswino, eyenda pehhugwi kungaswika pantshibha wembizi, ewunga gwendo gungaba makhilomitha ali makulu matatu.