1 Ndakawha whi gulugulu libva muthempeli libudza batumwa bekudzimu balikutondeka liti, "Tjiyendani munodulula muhango ndigwana dzinabuhongola gweNdzimu."

2 Ntumwa wekudzimu wekutanga wakayenda akanodululila muhango ndigwana iye, banhu baka banalutjayo gwetjibanda benamata tjibumbgwa tjatjo bakamela malonda akayipa kakale anopanda.

3 Ntumwa weNdzimu webubili wakadululila mugungwa ndigwana iye. Vula yakahanduka ikaba selopa lenhu wakafa, kose kwakakutjila mugungwa kwakafa.

4 Ntumwa weNdzimu webutatu wakadululila ndigwana iye munjizi nemadonsa evula, zwakahanduka zwikaba malopa. 5 Ndakawha ntumwa wekudzimu waka akalingisana nekwevula eti, "Makatambunuka imwi mukutonga kwenyu ikoku, imwi Makayengemala, imwi uyapo kakale waka elipo. 6 Ngobe banhu bakatebula malopa ebayengemali neebalebesambeli, ndizo makabapa malopa kuti ban'we. Ikoku kwakabafanila!" 7 Ndakawha limwe whi libva patjibeso liti, "Ndiko ikoko He, Ndzimu, imwi Wemasimba ose, tonga kwenyu ndekwelebeswa, kakale kwakatambunuka."

8 Ntumwa weNdzimu webuna wakadululila ndigwana iye pehhugwi kwehhuba, hhuba lakabvumigwa pisa banhu nemoto, 9 banhu bakatshwa nentha yepisa kukulukulu, bakalonga bhiso zina leNdzimu, iye waka enamasimba pehhugwi kwemboli dzose idzedzi, kakale abazohanduka kubva kumatjinyo abo bekawunkudza.

10 Ntumwa weNdzimu webuhanu wakadululila ndigwana iye pehhugwi kwetjigalo tjobumambo tjetjibanda, bumambo gwetjibanda gukaba muhhalima, banhu bakazwiluma ndimi nentha yegwadziwa, 11 bakalonga bhiso Ndzimu wekudzimu nentha yemalonda abo negwadziwa kwabo, koga abazohanduka kuti basiye mihingo yabo mibi.

12 Ntumwa wekudzimu wobutanhatu wakadululila ndigwana iye mugwizi gukulu gunoyi Yufuretisi, vula yago ikapwa, kuyetila kuti kubaakanyiwe zila yabomambo banowhohha bebva kunobhuda hhuba. 13 Ipapo ndakabona meya nhatu dzinahambgwa dzaka dzinga mahhula. Dzakadzibhuda munlomo wehangale, nemunlomo wenlebesambeli wemanyepwa. 14 Idzedzi imeya dzemeyambi, dzinoyeta makaabadzo, meya idzedzi nhatu dzoyenda kunabomambo behango dzose, dzibakubunganyila ngwa yehhuba gulu leNdzimu Wemasimba Ose.

15 "Whililani, ndohha sembava! Wakakombolegwa unogala akalinga, elondolodza zwiyambalo zwizwe kuyetila kuti asiyende akati piti banhu bebona bumbudlo gugwe!"

16 Kakale meya idzedzo dzakakubunganya bomambo panhu pan'ompela pabugalo gunoyi Aramagidiyoni nelulimi gwetjiHhebheru.

17 Ntumwa wekudzimu wekubutondeka wakadululila ndigwana iye mumhepo, whi gulugulu lakabhuda libva muthempeli, patjigalo tjobumambo liti, "Kwapela." 18 Kwakaba nepenya kwenthari, nebomba, netitima kwevula, netengenyeka kwehango kukulukulu kunotjenamisa, kusakatongobeyapo muhango kwetjingabanhu kwabakabumbiwa muhango, tengenyeka ikoku kwakaba kunjisa. 19 Nzi-nkulu wakapaluka ukaba zwikamu zwitatu, mizi-mikulu yehango ikapalala, Ndzimu wakaalakana Bhabhiloni linamasimba, akalin'wisa nkombe wewayini yebuhongola gugwe. 20 Zwigwizi zose zwimu gungwa zwakatihha, matombo ose akahayika, 21 mabgwe makulukulu etjivulamabgwe, limwe nelimwe bgwe lakalinansindo ungalizana nemakhilogiremu ali makumi mana anamahanu, akawila banhu ebva kudzimu, banhu bakalonga bhiso Ndzimu nentha yemboli yetjivulamabgwe, mboli iyeyo yaka ihlisa kwazo.