1 Hule kwayikoku ndakabona umwe ntumwa wekudzimu ejita ebva kudzimu, enamasimba kwazo, hango yakaba netjedza nentha yepenya kukwe. 2 Wakadanilila newhi gulugulu eti, "Lawa, Lawa, ilo Bhabhiloni gulugulu! Latjibe bugalo gwemeyambi, neguwhu lemeya dzose dzehambgwa, neguwhu lenyunyi dzose dzinohemesa dzina hambgwa. 3 Ngobe njudzi dzose dzakan'wa wayini yenjemulo dzebupombgwe gwalo, bomambo behango bakathama bupombgwe nalo, bemuhango banoyingidza zwinhu zwabo bakafumisiwa nefumwa yesazwibhata kwalo."

4 Ndakawha limwe whi libva kudzimu liti,

"Bhudani mulili, banhu bangu,

kuyetila kuti musidlidzane nalo mumatjinyo alo,

kuyetila kuti musiwigwe bo nemboli dzaliwila,

5 ngobe matjinyo alo akabutitikiwa akanoswika pehhugwi kudzimu,

ndizo Ndzimu waalakana matjinyo alo.

6 Mulibhate nezila yalakamubhata nayo,

mulibgwilizile mihingo yalo nezila yakapamhiwa kabili,

mulidilile mikombe mibili

yenkombe yalakamudilila.

7 Muliwhise zogwadza nebuyendasi,

kwakalizana nezila yalakalizwikudza nayo neyalakalitjila zwakanaka nayo,

‘Ndigele samambokadzi,

andita tjilikadzi

andingafe ndaziba dziyila."

8 Ndizo ke mboli dzalo dzowhohha muhhuba lin'ompela,

bugwele, lila nebhamba.

Lowhopisiwa nemoto,

ngobe He Ndzimu unamasimba unowholitonga."

9 Bomambo behango bakabethama bupombgwe nalo, betjila zwinozipa nalo, banowhokuwa bakalililila hapa bebona busi gwetshwa kwalo. 10 Banowhoma kulekule, ngobe behla dziyidziwa kwalo, beti, "Kwakakubangalalila! Kwakakubangalalila iwe nzi-nkulu unamasimba, iwe Bhabhiloni! Mu awa in'ompela tongwa kuko kwakuswikila."

11 Bayingidzi benhundu bemuhango, banowhokuwa beyililila ngobe kusitjina nhu unotenga nhundu dzabanoyingidza, 12 nhundu dzezeezi, dzesiliva, dzemabgwe anantengo upehhugwi nendalama; nhundu dzejila lelineni lakanakisa, nejila lembala welubende, nejila linopenyelela, nejila haba; nemakwasayila ose akasima anonhuwilila, nezwinhu zose zwakabehhewa nenyanga, nezwekuni zwakabehhewa nemiti inantengo upehhugwi; nezwakabehhewa nemhangula, nezwakabehhewa netshipi, nezwakabehhewa nemabgwe, 13 nenhundu dzesinamoni, nemithariyo, nemhoza, nemure, nenyonje, newayini, nemafuta entoba, nebgwisa gwetjinkwa, nezwidlo, nen'ombe nemwizi, nembizi, nekoloyi, nebalanda kose kene nebupenyu gwebanhu. 14 "Mitjelo yawaka uyemula nemoyo yatjibva pakuli, nefumwa iyo yose nekwakanaka kuko kose kwapalala awungatjakuwane kakale!" 15 Bayingidzi bezwinhu izwezwi, bakafumisiwa nayilo, banowhoma kule, behla dziyidziwa kwalo. Banowholila bakakuwa kwazo, 16 beti, "Kwakakubangalalila, kwakakubangalalila, nzi-nkulu unkulunkulu waka unga nkadzimayi wakambala zwiyambalo zwejila lelineni lakanakisa lembala welubende nen'haba, wakanjenjemisiwa zeezi nemabgwe anantengo upehhugwi nendalama! 17 Mu awa in'ompela bufumi gose igogu gwapaladziwa."

Bose balawuli bezwikepe, nebakatanha kepe, nebanohinga muzwikepe, nebanotjila neyingidza muzwikepe, bakama kule. 18 Bakalila pabakabona busi gwepfuta kukwe beti, "Kwakatongoba nenzi-nkulu unonga sa iwhoyu?" 19 Bakazwidila whuluba mumiholo, bekuwa beti, "Kwakakubangalalila, kwakakubangalalila nzi-nkulu, waka ufumisa nefumwa iyo bose bakabenazwikepe zwimugungwa! Mu awa in'ompela wapaladziwa.

20 Kudzimu ngakuhanhile tjayetika kuwunli, kuhanhe kan'ompela namwi bayengemali nebapositoli nebalebesambeli, ngobe Ndzimu wawutonga nentongo iwo zwawo nzi-nkulu wawakamutonga nawo!"

21 Ntumwa wekudzimu unamasimba wakanunga bgwe linonga gwiyo gulugulu akaliposela mugungwa, eti, "Ndiyo zwayo zila Bhabhiloni nzi-nkulu, wayinowhoposegwa pasi nebuhongola, kakale ayitjowhopamha ikawanika, 22 Hhoba yebanhu banolidza dende neyebanomba, neyebanolidza nyele nebanolidza lunyanga, ayitjowhopamha ikawhika mukuli iwe nzi-nkulu, banabumhihha kene gwawupi zwawo n'hingo wemaboko abatjowhowanikwa munzi iwhoyu, nsindo webanhu banokhwa awutjopamha ukawhika munzi iwhoyu. 23 Tjedza tjetjivoneko, atjitjowhopamha tjikapenya imomu; newhi lenkwaha nelenlongo alingatjapamhe likawhika imomu, ngobe bayingidzi babo baka bali banhu banamasimba muhango, kakale nenjudzi dzose dzakatjebegwa nemalipa awo emanyepwa.

24 Ngobe muBhabhiloni kwakawanika malopa ebalebesambeli neebayengemali, neebanhu bose bakabulawa muhango.