1 Hule kwayikoko ndakalinga ndikabona nkoba wakahhulika kudzimu.

Whi landakawha lilebeleka nami kutanga sensindo welunyanga lakati kundili, "Hha ngeno pehhugwi, ndikulakidze zwinhu zwinowhoyetika hule kwayikoku." 2 Tjinyolotjo ndakaba muMeya, ndikabona tjigalo tjobumambo kudzimu, kuna umwe ugele pehhugwi kwatjo. 3 Iwhoya waka eligele pehhugwi kwatjo waka elingika sebgwe lejasipha nelekhaneliya, tjigalo tjobumambo tjaka tjakakombeledzewa nenlanlabungo waka ulingika sebgwe le emaralidi. 4 Kwaka kuna zwimwe zwigalo zwebumambo zwili makumi mabili nezwina zwakakombeledza tjigalo tjobumambo, pehhugwi kwezwigalo izwezo kwakakuligele bawhola bali makumi mabili nebana, bawhola bakabakambala zwiyambalo zwitjena, mumiholo yabo kuna zwiyala zwezeezi. 5 Kubva patjigalo tjobumambo kwakakubhuda penya kwenthari nebomba netitima, mbeli kwetjigalo tjobumambo kopfuta zwivoneko zwilikutondeka, ndidzo meya dzilikutondeka dzeNdzimu. 6 Mbeli kwetjigalo tjobumambo kwaka kuna tjinonga gungwa legilazi linobelengela.

Kwakakuna zwipuka zwinotjila zwilizwina pakati, dzakakombeledza tjigalo tjobumambo dzilihhele meho mbeli nahule. 7 Tjipuka tjinotjila tjekutanga tjaka tjinga humba, tjipuka tjinotjila tjebubili tjinga nkono wen'ombe, tjipuka tjinotjila tjebutatu tjaka tjina buso gunonga gwenhu, tjipuka tjinotjila tjebuna tjinga lumhangu gupururuka. 8 Tjimwe netjimwe tjezwipuka zwina zwinotjila tjaka tjinamapapiro matanhatu kakale tjimwe netjimwe tjilihhele meho ntha dzose, siku nesikati dzimba dzisinganyalale dziti

"Wakayengemala, wakayengemala, wakayengemala, iye He Ndzimu Wemasimba ose,

waka elipo, uyapo, iye unohha."

9 Hapa zwipuka zwinotjila zwikudza zwilemekedza kakale zwiboka, iwhoya ugele patjigalo tjobumambo, iye unotjila nekusingapele, 10 whola dzili makumi mabili nebana dzokotama mbeli kwa iwhoya ugele pehhugwi kwetjigalo tjobumambo, dziwunamata iye unotjila nekusingapele, dzombula dzibiga pasi mbeli kwetjigalo tjobumambo zwiyala zwadzo dziti,

11 "Makafanila He wedu neNdzimu wedu,

kuti muwamutjile gudzo, nelemekedzewa, nemasimba,

ngentha yekuti makabumba zwinhu zose,

ngekuda zwakabumbiwa kakale zwiyapo."