1 Ndakabona ntumwa wekudzimu ejita ebva kudzimu, akabhata khii yekugomba lisina palinopelela, neketane whuluwhulu muluboko gugwe. 2 Wakabhata hangale nemasimba, iyo nyoka yantolo, inoyi Mvanganyi iye Satane, wakawunsunga kwemakole ali tjiwulu. 3 Ntumwa wekudzimu wakaposela Satane mugomba, wakahhalila akalibuwa kuti asitjapamhe tjebela njudzi kakale, kuswikila makole alitjiwulu apela. Hule kwayikoko wakafanila sunungugwa kwelubakanyana.

4 ✝ Ndakakobona zwigalo zobumambo, bakabeligele pazwili ndiyibabo bakapiwa masimba etonga. Kakale ndakabona meya dzayibabo bakabathubugwa miholo nentha yepa busupi nekwaYesu kose nentha yedama leNdzimu, ibabo basakanamata tjibanda kene tjibumbwa tjatjo, kakale basakalongwa lutjayo gwatjo pawhuma dzabo kene pamaboko abo. Bakatjila kakale, bakatonga panhu pan'ompela naKhirisitu kwemakole alitjiwulu. 5 (Bamwe bafi bose abazwotjila kuswikila kwapela makole ali tjiwulu.) Whoku ndiko muka kwebafi kwekutanga. 6 Wakakombolegwa kakale wakayengemala iwhoya unowhohanganyila mukumuka kwebafi kwekutanga! Lufu gwebubili agutjina masimba pehhugwi kwewakajalo, koga ibo banowhoba baphirisiti beNdzimu nebaKhirisitu, kakale banowhotonga naye kwemakole alitjiwulu.

7 Hapa kwapela makole elitjiwulu Satane unowhosunungugwa mujele lile 8 ✝ unowhobhuda akayenda enotjebela njudzi kuntha dzilina dzehango, kubva kuti Gogu naMagogu, ebakubunganya kuti bamuse ngwa; bunji gwabo gwakagunga nsetje wegungwa. 9 ✝ Bakahhala hango yose, bakakombeledza bugalo gwebayengemali, iwo nzi-nkulu unodikala, koga kwakajita moto ubva kudzimu ukapisa bose. 10 Mvanganyi iye waka abatjebela wakaposegwa mubibi lemoto nesalifa, paka pena tjibanda nenlebesambeli wemanyepwa; ibo banowhodziyidziwa tjoselele siku nesikati.

11 Ndakakobona tjigalo tjebumambo tjitjena tjikulukulu, na iwhoyo waka eligele patjili, nekudzimu nehango kwakatihha pawunli, kukasitjhapamhe kukabon'wa. 12 Ndakabona bafi, bakulu nebatukununu, balimile mbeli kwetjigalo tjebumambo, whalo dzakahhugwa. Kwakahhugwa gumwe lukwalo, gunoba lukwalo gobutjilo. Ndizo bafi bakatongwa kubva muzwinhu zwaka zwakakwagwa muwhalo, kuyendidzana nemihingo yabo. 13 Ipapo gungwa lakapfa bose bakabafila mulili, Lufu neHhedesi kwakadusa bo bose baka bali mukuli, bakatongewa bose kuyendidzana nezwabakabathama. 14 Lufu neHhedesi kwakaposegwa mubibi lemoto. Bibi lemoto ndigo lufu gwebubili. 15 Hapa kuna wakawanika esakakwagwa mulukwalo gobutjilo, iwhoyo wakaposegwa mubibi lemoto.