1 "Kwalila ntumwa wekugubungano lebagalimoyo bakuEfesu uti. ‘Ihawa ndiwomatama awe wakabhata muluboko gugwe goludli nyenyedzi dzili kutondeka, iye unoyenda yenda pakati kwezwigadziko zwezwivoneko zwezeezi. 2 Ndoziba mihingo iyo, hinga zwakabangalala kuko, simidzila kuko nemoyo nlefu uwo, nekuti awutowamutjila banhu babi koga wakaholesesa ibo banozwidana bezwiti bapositoli ibo besi ibo, ukababhata kuti banoleba manyepwa; 3 Ndoziba kuti nosimidzila nemoyo nlefu mubulemo nentha yezina langu, awuzotongonyala. 4 Koga ndina kumwe kwandinon'un'urika pehhugwi kuko, kuti wakalaha ludo gwawaka unago kutanga. 5 Uyalakane pawakathewuka, uhanduke kakale uthame mihingo yawaka uthama kwekutanga. Hapa kusakajalo, ndowhokukumba ndihha ndidusa tjigadziko tjetjivoneko tjitjo pabugalo gwatjo, hapa usahanduka. 6 Koga tjawunatjo ndiyetji, kuti nobenga zwiyeto zwemaNikhola, zwinoba zwiyeto zwandinobenga bo.’ "

7 "Iye unazebe, ngaawhe tjinolebgwa neMeya kumakubungano ebagalimoyo.

"Kuna iwhoya unowhokunda ndowhowumpa masimba ekuti adle ntjelo wenti webutjilo, umukati kwePharadayisi leNdzimu."

8 "Kwalila kuntumwa wekugubungano lebayengemali likuSimayina uti,

‘Ihawa ndiwo matama awe iye wekutanga newebupelo, wakafa koga akabuya akatjila. 9 Ndoziba dziyila nebuhayi gugo, koga iwe wakafuma, kakale ndoziba masapa anolebgwa nayibabo banozwiti ibo maJuta ibo basi iwo, koga bali sinagogu yaSatane. 10 Usihle iko dziyila kwabapedlo nekukuwila, muzibe kuti Satane wabapedlo neposela bamwe benyu mujele kuti mulikiwe, mowhomanikana kwemahhuba aligumi. Ube wakagalikabgwe kuswikila palufu, ndowhokupa tjiyala tjebutjilo.’ "

11 "Iye unazebe ngaawhe kunolebgwa neMeya kumakubungano ebagalimoyo."

"Iye unokunda atowhowhisiwa zogwadza nelufu gwebubili."

12 "Kwalila ntumwa wekugubungano lebayengemali bakuPhegamamu uti, ‘Ihawa matama awe unabhangatjeke linopiza ntha dzose. 13 Ndoziba, pawunogala, ipapo panatjigalo tjaSatane; wakabhatilila pazina langu, kakale awuzotongolandula galamoyo kuko mundili, kene mumahhuba aAntipasi nsupi wangu unogalikabgwe iye wakabulawa pakati kwenyu ipapo panogala Satane. 14 Koga ndina zwinhu zwihomanana zwandino n'un'urika nekwazo pehhugwi kuko, ngobe muna bamwe pakati kwenyu batjakabhatilila pazwidiyo zwaBhalamu, iye wakadiya Balaki kuti ateye bana beIsirayeli, kuti badle zodliwa zwakapigwa midzimwana, kakale bayete bupombgwe. 15 Kakale unabamwe bakabhatilila pazwidiyo zwebaNikhola. 16 Ndizoke handuka. Hapa kusakajalo, ndowhohha kukuli nekulibilidza, kakale ndowhogwa nabo nebhangatjeke lenlomo wangu.’ "

17 "Iye unazebe ngaawhe kunolebgwa neMeya kumakubungano ebagalimoyo!"

"Iwhoyo unokunda ndowhowumpa imwe yemana yakasumbikika, kakale ndowumpa bgwe jena, lakakwagwa zina dzwa lisina unoliziba kuhhe kwa iwhoyo unoliwamutjila."

18 "Kwalila ntumwa wegubungano lebayengemali bakuTiyatira uti, ‘Ihawa matama eNkololo weNdzimu, unameho anonga bibi lemoto; Unamakumbo anonga tshipi yakabulungiwa. 19 Ndoziba mihingo iyo, neludo gugo, nebugalimoyo gugo, nehingila kuko Ndzimu, nemoyo nlefu uwo wesimidzila, kakale kuti mihingo iyo yangwenu inopinda yekutanga. 20 Koga ndina whoku kwandinon'un'urika pehhugwi kuko, kuti unowamutjila nkadzimayi iwhoya unoyi Jezebheli, unozwidana eti unlebesambeli wetjikadzi. Unodiya ethewula balanda bangu eyeta kuti bathame bupombgwe, kakale kuti badle zodliwa zwakapigwa kumidzimwana. 21 Ndakawumpa lubaka gokuti ahanduke, asiye bupombgwe gugwe koga unolamba handuka kubva mubupombgwe gugwe. 22 Ndizoke ndowumposela panhobo yebugwele, kakale nayibabo banothama bupombgwe naye ndowhobasa mukudziyidzika kukulu hapa besingahanduke muzwiyeto zwizwe, 23 ndowhobulaya bana babe. Ipapo makubungano ebagalimoyo ose anowhoziba kuti ndimi ndinofunyungudza nkumbulo nemoyo, ndowhopa umwe newumwe kunoyendilana nemihingo iye.’ "

24 "Koga kumuli mose bakuTiyatira, basakabhatilila pazwidiyo zwizwe, basakazwidiya ikoku kunodan'wa nebamwe kuyi ‘zwinhu zwakasumbikika zwikukutu zwaSatane,’ kumuli ndoti, akuna gumwe bulemo gwandinotilika pehhugwi kwenyu. 25 Bhatisisani kwamunako ndidzina ndihha. 26 Iye unokunda kakale ehinga mihingo yangu kudza kunoti kubupelo, ndowhowumpa masimba pehhugwi kwenjudzi, 27 unowhotonga pehhugwi kwadzo neswimbo yetshipi; unowhobapwanya sehali dzentapwi, sekwandakawamutjila masimba kubva kunaTate bangu, 28 ndowumpa nyenyedzi inoyi masasi."

29 "Iye unazebe ngaawhe kunolebgwa neMeya kumakubungano ebagalimoyo."