1 ✝ Ndakakobona kudzimu kutshwa nehango tshwa, ngobe kudzimu kwekutanga nehango yekutanga kwaka kwapinda, negungwa lisitjipo. 2 ✝ Ndakabona nzi-nkulu wakayengemala, Jerusalema tshwa, lijita libva kudzimu kuNdzimu, lakabaakanyiwa, senlongo wakambalila nohangana nenlume uwe. 3 ✝ Ndakawha whi gulugulu libhuda kudzimu liti, "Linga, bugalo gweNdzimu gwatjiba kubanhu, iye unowhogala pakati kwabo nayibo banowhoba banhu babe, kakale Ndzimu tjekukwe unowhoba nabo, akaba Ndzimu wabo. 4 ✝ Unowhobuhika mihodzi yose kumeho abo, kakale lufu nelila kene kuwa, kene gwadziwa akutjowhobayapo, ngobe zwinhu zwikulukugwi zwapinda."

5 ✝ Iwhoyo waka eligele patjigalo tjebumambo wakati, "Ndeyeta kuti zwinhu zose zwibe zwitshwa." Kakale wakati, "Kwala ikoku, ngobe matama iyawa alebeswa kakale anogalikamoyo." 6 ✝ Kakale wakati kundili, "Kwatjiyetika! Ndimi Alifa naOmega, kutangisa nekupedzisila. Unanyota ndowhowumpa vula inobva mudonsa levula yebutjilo kusina nlipo. 7 ✝ Iye unokunda, unowhogala nhaka yayikoku kose, imi ndowhoba Ndzimu uwe iye unowhoba nkololo wangu. 8 ✝ Koga magwala, nebasina bugalimoyo, nebanahambgwa, nebabulayi, nebanopinga, nebanokandila malipa, banonamata zwidzimwana, nebanyepi bose, bugalo gwabo gumubibi lemoto nesalifa, gunoba igo lufu gwebubili."

9 Kwakakohha kundili umwe webatumwa bekudzimu balikutondeka ibabo baka bakasenga ndigwana dzilikutondeka dzakadzilihhele mboli dzilikutondeka dzekupedzisila, wakalebeleka nami eti, "Ihha ngeno ndikulakidze Nlongo, iye mfumakadzi weMwizana." 10 Wakandisenga ndilimuMeya tikayenda kudombo gulugulu lefulefu wakandilakidza nzi-nkulu wakayengemala, ilo Jerusalema, lijita libhuda kudzimu libva kuNdzimu. 11 Waka unagudzo leNdzimu, penyelela kwawo kwaka kunga kwebgwe linatjilemela, sebgwe linoyi jasipa, kubelengela segilazi. 12 ✝ Waka unaguma gulugulu lefulefu lina mikoba ili gumi nemibili, pamikoba kwaka kuna batumwa bekudzimu bali gumi nebabili, pamikoba kwaka kwakakwagwa mazina enjudzi dziligumi nembili dzebakololo ba Isirayeli. 13 Kuntha yekubhehhuba kwaka kuna mikoba mitatu, kuntha yekubunandzwa kuna mikoba mitatu, kuntha yekuburwa kuna mikoba mitatu, kuntha yekumahwahhuba kuna mikoba mitatu. 14 Guma lenzi-nkulu laka lina mbviwa dzili gumi nembili, pehhugwi kwadzo kwaka kwakakwagwa mazina ali gumi nemabili ebapositoli beMwizana. 15 ✝ Ntunwa wekudzimu waka elebeleka nami waka analukombo gwezeezi gweyelesa nzi-nkulu nemikoba yawo nemakuma awo. 16 Ntha dzose dzilina dzenzi-nkulu dzaka dzakalizana, bulefu gulizana nebupabi; wakayela nelukombo gugwe bulefu gukaba makhilomitha angaba zwiwulu zwibili zwinamakulu mabili; bulefu nebupabi neyenda pehhugwi kwaka kwakalizana. 17 Ntumwa wekudzimu wakayela yenda pehhugwi kweguma ehingisa zila yeyela kwenhu, akawana kungalizana nemamitha ali makumi ali kutanhatu anamahanu. 18 Guma lakabe lakabakiwa nemabgwe e jasipa, nzi-nkulu wakabe wakabakiwa nezeezi lakwako, lipenyelela segilazi linobelengela. 19 Mbviwa dzeguma pasi kwadzo dzaka dzakanakisiwa nemabgwe anatjilemela; bgwe lokutanga laka lilijasipa, lebubili lili safaya, lebutatu lili ageti, lebuna lili emaralidi, 20 Lebuhanu lili onikisi, lebutanhatu lili khanelini, lekutondeka lili khirisolithe, lebuhhakadzi lili bheyili, lebuhhanalume lili thopazi, legumi lili khiriyisopasasi, legumi linakun'ompela lili jasiti, legumi linakubili lili ametisiti. 21 Mikoba iligumi nemibili yaka ili yemabgwe endalama dzili gumi nembili, umwe newumwe nkoba wakayetiwa neludzi gun'ompela gwebgwe lendalama, mwahha wenzi-nkulu waka uli wezeezi lakwako segilazi linobelengela.

22 Andizobona thempeli munzi-nkulu iwhoyo, ngobe thempeli yawo ndiHe Ndzimu Wemasimba ose neMwizana. 23 ✝ Akutohakika kuti kube netjedza tjehhuba netjemwedzi munzi-nkulu, ngobe gudzo leNdzimu itjedza tjawo, tjivoneko tjawo iMwizana. 24 Njudzi dzowhotjila ngetjedza tjawo; bomambo behango banowhohha negudzo labo kuwunli, 25 nemikoba yenzi-nkulu iwhoyu ayitowhohhaligwa masikati, ngobe kowhoba kusina busiku ipapo. 26 Kudziwa nelemekedzewa kwehango kowhohhisiwa kunzi-nkulu iwhoyu. 27 Koga akuna tjinahambgwa tjinowhongina munzi-nkulu iwhoyu, kene iye unothama zwinohemesa kene unoleba manyepwa. Koga kowhongina ibabo bakakwagwa mulukwalo gwebutjilo gweMwizana.