1 Hule kwayikoko ndakabona batumwa bekudzimu bana balimile kuntha dzilina dzehango, bakabhata mhepo dzilina dzehango kuyeta kuti kusibe nemhepo inohhuhhudza pehhugwi kwehango, kene pehhugwi kwegungwa, kene inozunguza wupi nti zwawo. 2 Ndakabona umwe ntumwa wekudzimu eyenda pehhugwi ebva kunobhuda hhuba akabhata tjizwino tjeNdzimu unotjila, wakadanilila newhi gulugulu kubatumwa bekudzimu bana bakabapiwa masimba ekubadza hango negungwa, 3 waka eti, "Musikubadze hango kene gungwa kene miti, kuswikila balanda beNdzimu wedu balongwa lutjayo pamhahha dzabo." 4 Ndakawha bunji gwabo, gwayibabo baka bakalongwa lutjayo, bakabali gulu lezwiwulu lina zwiwulu zwili makumi mana nemana, ezwiwulu, bebva munjudzi dzose dzebakololo baIsirayeli. 5 Beludzi gwaJuda bakalongwa lutjayo baka baligumi nembili lezwiwulu, baka bebva muludzi gwaRubheni baligumi nembili lezwiwulu, gumi nembili lezwiwulu bebva kuludzi gwaGadi, 6 beludzi gwaAseri bali gumi nembili lezwiwulu, beludzi gwaNafithali bali gumi nembili lezwiwulu, beludzi gwaManase bali gumi nembili lezwiwulu, 7 beludzi gwaSimiyoni baligumi nembili lezwiwulu, beludzi gwaLevi bali gumi nembili lezwiwulu, beludzi gwaIsakha bali gumi nembili lezwiwulu, 8 beludzi gwaZebhuloni baligumi nembili lezwiwulu, beludzi gwaJosefa baligumi nembili lezwiwulu, beludzi gwaBhenjamini baligumi nembili.

9 Hule kwayikoko ndikabona mbunga webanhu nkulu usingake ukatubugwa bagwa nenhu, bebva mutjimwe netjimwe tjaba, nemuludzi gose, nemubanhu bose, bebva nemundimi dzose, balimile mbeli kwetjigalo tjobumambo nambeli kweMwizana. Bakabakambala majila matjena, bakabhata nhabi dzemilala, 10 bakamimila newhi gulugulu beti, "Tjidziwa ndekweNdzimu wedu, ugele patjigalo tjobumambo, kakale ndekweMwizana bo!" 11 Batumwa bekudzimu bose bakabelimile baka kombeledza tjigalo tjobumambo kakale bakakombeledza bawhola nezwipuka zwina zwinotjila, bakakotama mbeli kwetjigalo tjobumambo, bakanamata Ndzimu, 12 beti, "Akujalo! Kombolegwa negudzo nebutjenjebvu, nebokewa, nelemekedzewa, masimba, nemasimba ose ngakube kuNdzimu wedu, nekusingapele! Akujalo."

13 Umwe webawhola, wakalebeleka nemi eti, "Ndiboyani ibaba bakambala zwiyambalo zwitjena kakale banobva poni?"

14 Ndakahandula nditi kuwunli, "He, imwi moziba."

Wakati kundili, "Ibaba ndibo banobhuda mukudziyila kukulukulu, bakasuka zwiyambalo zwabo bakazwithama zwikaba zwitjenatjena mumalopa eMwizana. 15 Ndizo ndiko belimbeli kwetjigalo tjebumambo tjeNdzimu, bewuhingila siku nesikati muthempeli lile, iwhoya ugele patjigalo tjobumambo unowhobatjengeta nebuyapo gugwe. 16 Habatowhopamha bakawha hhala kakale habatowhopamha bakawha nyota, kene tshwa nehhuba, kene pisiwa nekumwe kuno pisa kwazo. 17 Ngobe Mwizana ipakati kwetjigalo tjobumambo, inowhoba nlisi wabo, unowhoba tungamilila kumisenya yevula dzebupenyu, kakale Ndzimu unowhobuhika mihodzi yabo yose kumeho abo."