1 Shawulu pɔ̃naatɔ nɛ shɔu nyo Istifanu rɛ.

A leukɔ shɔ gaa shɔ Ɗa gɨnnɛyi ratasinɛrɛ fɛ̃ɛm a Urushalima ama yajo Yesɔ jashonɛyi kɔ sheeli; a shɔ Ɗa gɨnnɛyi kpai i sãtirɛ a yɛti tipi Yahudiyani a Samariya.

2 Shɔ gbeteyi ã sisɨn a Ɗabii i gbã Istifanu rɛ i ɔ̃ mɔɔvɔ fɛ̃ɛm au yuu. 3 Ama Shawulu kãnɛn tasi shɔ Ɗa gɨnnɛyi raatɔ fɛ̃ɛm; yɛli wɛrɛ-wɛrɛ u ɗɔ gbete gɔ̃ki vɔshɔ a soroni, a lori a jaahm.

4 Shɔ sisɨn ãnɛyi a Ɗabii gbete shɔ nyiki a Urushalima i sãtirɛ kopiɗɔpiya, i ɗɔ gbete i nwaruu tɔ̃vɨnyɛ. 5 Filibu yɛ komoo Samariya, u ɗɔgbete nwari shɔ ruu Shɔshɔraanɛ a ɗɔukɔ. 6 Mooyi ɔ̃ a Filibu ni ɗɔɔli a ɗɔɔ showenɛ a vigbete shayɛ, aɗagbete si ɗɔgbete i weshoyɛ i zɛ vibiizaanɛ au pɛliyɛtɔ. 7 Suru kɔ̃linɛ i shɛki a shɔbii fɛ̃ɛm i ɗɔɔ sɨnɛ a kakani, a shɔ gati shɔ gbeteyi bivɔ kagbeteyɛ a shɔ dɔgbutuyini kpai. 8 Aru nankɔ a komoo wakɔ shɔ nta yɛti puru fɛ̃ɛm.

9 Jawɔɔ siɗɔn u niinɛ Siman, shɔ gbete a lewɔɔ tasi Samariyayi vibiizaanɛ a gãn nɔkunɛ. Tasi yuu nɛn pɛ shɔ pɛ̃niba. 10 Kopiya a komoouni shɔpẽni a jajjayini i ã yuu ji au bikɔ, i shanɛ, <<Jaam pɛ Ɗalapa kaka, gbete shɔ ɓaanɛ, <Kaka Pɛ̃niba. > >> 11 I weshotɔ au nyani aruviya ɔ̃ tɛttɔ tɛ̃ɛtɛ̃ɛ u ɗɔ gbete tasiyi vibiizaanɛ nɔkunɛ u gãn yɛ. 12 Ama naa i ã sisɨn tɛ a ruu tɔ̃vɨn gbete Filibu shayɛni aru Ɗa Kpati roonɛ, wɔsɔ̃n Yesɔ Kirisi nii, shɔ pɛliyi Batizima rɛ vɔshɔ a soroni. 13 Siman au yuu ã sisɨn sɔ̃njorɛ; Akɨntini shɔ pɛliu Batizima rɛ, a rɛbii a Filibu ni ɗɔɔli, naa zɛ vinɔlusinɛtɛ a vibiizaanɛ pɛ̃niba gbete Filibu pɛliyɛtɛ. 14 Naa jashonɛ gbeteyi Urushalima i ntatɛ nɛ Samariyayi tɛ Ɗa nyaruubiitɛ, i shokɛ Bituru a Yɔhanani ai ɗɔbii. 15 Naa i totɛ, i gaki shɔ sisɨn Ɗabii i Ɗa rɛ, aru i tɛ Ɗa Suru. 16 Aru Ɗa Suru si ji nɔɔpɛ ɓa ai biini ɓa, ko a shɔzɛ gbete bi atete ni ɓa; shɔ pɛliyi ɓɛjo Batizima kɔ sheeli a Uɓeyelapa Yesɔ nii. 17 Kɛɗɔn Bituru a Yɔhanani i pɔ̃siyi naarɛ a bi, ai tɛ Ɗa Sururɛ. 18 Siman zɛrɛ shɔ ã shɔ sisɨn ãnɛyi a Ɗabii Suru a nyaba gbete jashonɛyi pɔ̃siyinaayɛ. Kɛɗɔn a ã Bituru a Yɔhana saa rɛ, 19 a shanɛ,<<Ɔ ãng kakan jo, nɔgbete nkɛ pɔ̃si kopiya naa nɛ bi nɗau tɛ Ɗa Suru jo.>> 20 Ama Bituru kasiunya nɛ,<<Mɛnɛ mɔkɔ aa saani ɔ tokɔɔ yaa, aru a pɔ̃ a sisɨn nɛn yɛ woo Ɗalapa vi-ãnɛ a saa! 21 Viwɔɔ ji ɓasaa ɓa au vishonɛni ɓa, aruviya a sisɨn ɓa tɔ̃vɨn a Ɗalapa ɗekɨn ni ɓa. 22 A kɔsi sisɨn yaa ruuvini pɛlinɛ, a gaki Uɓeyelapa wɔɔɓa yɛ yasaa ruuvinitɔ ayuu vigbete a pɔ̃ sisɨn aɗɔnyɛ. 23 N zɛtɛ a sisɨn gɨnkaanɛ gɔlɔrɔ aɗɔn, ruuvini maatɛ katakata naa shɔ jaahm.>>

24 Siman geli Bituru a Yɔhanani nɛ,<<Sɔkɔ ɔ gaki Uɓeyelapa pɛ ang yuu, aru vigbete ɔ sham ukɔu kpang-nɛ.>> 25 Akɨnti gbete Bituru a Yɔhanani i nwari shɔ nyatɛ ayuu Uɓeyelapa ruubii, Kɛɗɔn Bituru a Yɔhanani i sɔɔkɛ Urushalima. Ai nyaba sɔɔnɛ i nwari shɔ ruu tɔ̃vɨntɔ a jakomɔɔ waanɛ gbeteyi a Samariya yɛ.

26 Uɓeyelapa Ɗajashonɛlapa geli Filibu nɛ,<<Yunɛ a rinɔɔ a ka nakɨn a sɔɔ nyaba gbete au shɛ a Urushlima yɛnɛ Gaza yɛ.>>(Nyabam shɔ shovi tɔkɨn awuni leezin niɓa.) 27 Kɛɗɔn Filibu yulaparɛ a yɛrɛ, a knɔɔ a zɛ yupɛ̃ni wɔɔ shɔ gbete shɛ a ɗɔ gbete shɔ ɓaanɛ Itopiya, u si shɔ tɔ̃vɨn pɛ̃niba ukɔ sãri Su Kpati Itopiya saa rɛ, jaam yɛ Urushalima ɗɔɔ Ɗalapa bassinɛ, 28 U si ɗɔ wɛrɛ sɔɔnɛ ɔ̃tɛ au gbɛntɛn, a ɓeli laabeenɛ Ishaya nyarɛ u ɗɔɔ ɓalinɛ. 29 Kɛɗɔn Ɗa Suru geli Filibu nɛ,<<Kpaa binɛ a ɗɔɔ gbɛntɛn a shi maani awuni.>> 30 Filibu yurɛ a yɛu ɗɔbiirɛ, ntarɛ kɛ ɓali laabeenɛ janyagadi Ishayanɛ. A hɨunɛ, <<A zɛ vigbete a ɓalim tɛttɔ ya?>> 31 Jaau risinya nɛ, <<n yɛn zɛ kɛpikoviya?>> Sete shɔwɔɔ tasin u ɗɔɔ tɛttɔ, a ɓaa Filibu nyarɛ nɛu arɛ u ɔ̃ yɛm a gbẽnteng a ukɔni. 32 Ɗa nyaruubi gbete jaau si ɗɔ ɓalinɛ si shɔm:

<<U si naa mɛrɛ̃ gbete shɔ yɛkɛ ɗɔyeenɛyɛ,

naa jamɛrɛ̃ au nwanya ɓayɛ aɗagbete shɔ kpariu u shɛnti binɛ,

A ji sharuu wɔɔ ɓa.

33 Shɔ tasiu raarɛ, a shɔ zãriu tɔ̃vɨn ãnɛ nɔni.

Shɔwɔɔ yɛ zɛnɔɔ ɓa u shavi aru ɓɛuruyini ɓa,

Aruviya shɔ tuu Surutɛ a kootipini.>>

34 Yupɛ̃niu hɨ Filibu nɛ,<<Gelin pɛ, janyagadim sha ruumpɛ a pi yuu piya? Au yuu ya ko a shɔwɔɔ yuu ya?>> 35 Kɛɗɔn Filibu ɓeliu nya a gaapɛ a Ɗa nyaruubii shɔ laabeemkɔ; a geliu ruu tɔ̃vɨn aru Yesɔ yuu. 36 I ɗɔɔ yɛnɛ a nyaba, i arɛ a ɗɔ gbete mii si ɗɔnyɛ, a jaau shanɛ,<<Nkɔ mii yɛm. Ivi yɛ zãrin Batizima pɛlinɛ viya?>> 37 Kɛɗɔn Filibu geliu nɛ, <<Shɔ yɛ pɛlaa batizima tɔ, naa akɛ ã sisɨn nɛ a Yesɔ biini sisɨn gbete.>>A jaau risiunya nɛ, <<N ã sisɨntɛ nɛ Yesɔ Kirisi kɔ ɔ̃rɛ Ɗa jaa.>> 38 Yupɛ̃niu ãsinyarɛ nɛ shɔu shiri gbɛntɛu pɛ, a Filibu a Yupɛ̃niuni i nɔɔ tipirɛ yɛnɛ ɗɔɔ miiu, kɛɗɔn Filibu pɛliu Batizima rɛ. 39 Naa i shɛtɛ a yɛti miini, Ɗa Suru tuu Filibu rɛ. Yupɛ̃niu ji zɛ Filibu toti ɓa, ama yɛ ɗekɨn ɓɛjo a raanɛni u ɗɔɔ yɛti puruni fɛ̃ɛm. 40 Ama Filibu kpaau yuu kɛ a Azotu; a yɛ ɗekɨn anɛ Kaisariya, u ɗɔ gbeteu nwari shɔ ruu tɔ̃vɨn ko-pi komoo shɔpiya.