1 E grɔ̈ äwä kə yi tə̂. E sə̈ ndje də əgo aâkrâ nə̂ Âgbɔ̂ Yîrə̂ nə, bale e mä də̂ əgo âkrâ kə pa ndəma Ndjapä. 2 Mbrə ə̂në, əzü ə̂në tshə sə kə pa əpʉ də aama aəgɔ kpî kpî kpî kɔ, tshə pa əpʉ nə pa kə azü ne, bale tshə sə kə pa əpʉ nə kə Ndjapä. Əzü bale sə sə kə dji tshelə əpʉ nə ə̂në tshə pa kɔ ne, bale tə̂ äwä Âgbɔ̂ Yîrə̂, tshə sə kə wutu də aəpʉ ə̂në ə daka pə lə kəwû nə kɔ. 3 Bale, əzü ə̂në tshə sə kə pa ndəma Ndjapä kɔ, tshə pa əpʉ nə kə azü ndə kə pa tshə gbɔgbɔ əndje ə gbɔgbɔ lɔsu əndje ə zɨtɨ lɔsu əndje. 4 Əzü ə̂në tshə sə kə pa əpʉ də aama aəgɔ kpî kpî kpî kɔ, tshə gbɔgbɔ tə̂ ye də ə̂tə̂ ye. Bale, əzü ə̂në tshə sə kə pa ndəma Ndjapä kɔ, tshə pa əpʉ nə ndə kə pa tshə gbɔgbɔ Laglizə.

5 Mə yində nə ə pa, e-e nɔ̂, e pa əpʉ də aama aəgɔ, bale mə yində nə kwatə̂mə ro pâ nə ə pa e pa ndəma Ndjapä. Əzü ə̂në tshə sə kə pa ndəma Ndjapä kɔ, tshə rô əzü ə̂në tshə sə kə pa əpʉ də aama aəgɔ kɔ, kədə awopa aama aəgɔ nə kə pa tshelə ndəma əpʉ nə pa ka azü dji tshelə nə ə gbɔgbɔ Laglizə nə ne. 6 Alaye, kpəsəye, kədə mə na gâ tə̂ e â pa əpʉ də aama aəgɔ kə e â pa pa ə̈bə̈ əpʉ ə̂në Ndjapä yîsə̂ nə kə əmə kɔ ne wala ə̈bə̈ əpʉ kə wusə̂ ərə ne, wala ə̈bə̈ ndəma Ndjapä ne, wala ə̈bə̈ əpʉ kə yisə̂ ərə kə e ne, mə sə kə ma ə̂rɔ̂ nə kə e atâ a?

7 Kədə aərə kə dɔ ətshi ndə nə, mata ängɔ̈ wala sandji, kə kɨ kɨ də äwänə ne, əzü sə kə wusə̂ ətshi ə̂në ə kɨ lə ängɔ̈ nə wala lə sandji nə kɔ kpro atâ a? 8 Bale, kədə tɔtɔliɔ kə kɨ kɨ də äwänə ne, əde kə sə kə gamba tə̂ ye mbrə kə tɔ kowɔ? 9 Äwä bale ndje, kədə e pa aəpʉ də ə̈bə̈ ama əgɔ ə̂në azü dji tshelə aəpʉ nə dji ne kɔ, azü nə ə wusə̂ əpʉ nə ə̂në e pa kɔ atâ a? E sə kə pa əpʉ nə kʉ gâ lə əyi â pa kɔ. 10 Dongo aama aəgɔ ngba ngbatshe pâ ashɔ, â âdâ əpʉ də ama əgɔ bale bale sə je. 11 Rəkɔ, kədə mə dji tshelə ə̈bə̈ əpʉ dji də ə̈bə̈ ama əgɔ ne, mə sə tə tshângâ tə̂ əzü nə ə̂në tshə pa ama əgɔ nə kɔ â əzü nə sə ndje tə tshângâ tə̂ əmə. 12 Äwä bale, e-e ndje, ə̂në e ma əgo aâkrâ nə̂ Âgbɔ̂ Yîrə̂ nə kɔ, bale e prä äwä nə ə sɔ̈tə̂ də̂ aənə̂ sə̂ ə̂në ə gbɔgbɔ Laglizə kɔ.

13 Âdârə ə̂në, əzü ə̂në tshə sə kə pa əpʉ də aama aəgɔ kɔ, tshə yü Ndjapä ndə kə pa tshə sɔtə̂ âkrâ ndə kə pa tshelə ndəma əpʉ nə azü dji. 14 Mbrə ə̂në, kədə mə sə kə pa əpʉ kə Ndjapä də aama aəgɔ, yîrə̂ əmə sə kə yu Ndjapä, bale kə wusə̂ ərə nə̂ əmə sə sə kə mbrə ə̈bə̈ ərə bale ne. 15 Rəkɔ, mə sə kə mbrə atâ a? Mə sə kə yu Ndjapä də yîrə̂ əmə nɔ̂. Bale, mə sə ndje kə yu Ndjapä nə də kə wusə̂ ərə nə̂ əmə nə. Mə sə kə wli ətshi də yîrə̂ əmə nə, bale mə sə ndje kə wli ətshi də kə wusə̂ ərə nə̂ əmə nə. 16 Mbrə ə̂në kədə bə sə kə za mərshe kə Ndjapä kʉ də yîrə̂ zə, əzü ə̂në tshə sə gâ tʉ lə takpa tə̂ aamba aawodji əpʉ kɔ, tshə sə kə yində əpʉ nə ə pa «Asərəmə» gâ pâ əpʉ kə za mərshe nə̂ zə nə atâ a? Mbrə ə̂në tshə dji tshelə əpʉ nə ə̂në bə pa kɔ dji ne kɔ. 17 Djatra əpʉ, bə sə kə pa ə̂rɔ̂ əpʉ, ə sə kə za mərshe kə Ndjapä, bale əpʉ səkɔ sə sə kə gbɔgbɔ bəngâ zə nə ne.

18 Mə za mərshe kə Ndjapä mbrə ə̂në mə sə kə pa əpʉ də aama aəgɔ ə rô e nɔ̂ gâ ye, 19 bale lə aangbɔ lə Laglizə, mə yi ənə̂ əmə ndə kə pa mə pa aəpʉ mindû ə̂në azü dji tshelə nə ndə kə pa mə yisə̂ ərə kə ə̂dû azü nə, ə rô ndə kə pa mə pa aəpʉ sake morofo (10 000) də aama aəgɔ.

20 Alaye, e mbrə̈ mbrə̈ tə̂ e tə aneshe tə̂ äwä kə tegbɔ kumu e gâ pâ əpʉ ne. Bale, tə̂ äwä kə mbrə əmbrʉ ərə, e sə̈ tə aaya aneshe â tə̂ äwä kə tegbɔ kumu e gâ pâ əpʉ, e sə̈ tə aâgbɔ̂ azü. 21 Əndje tâ gâ lə âgbɔ̂ əpʉ ə pa Əyïlingû pâ:

«Tə̂ äwä azü lə ə̈bə̈ ama əgɔ kpî,

lə ama atshângâ

də̂ mə sə kə pa əpʉ kə azü səye

â əndje sə sə kə dji əmə rə ne.»*

22 Rəkɔ, kə pa aama aəgɔ kpî kpî kpî nə sə tə ə̈bə̈ ərə ə̂në Ndjapä sə kə yisə̂ nə gashu mbrə azü ə̂në əndje za lɔsu əndje za kə Ndjapä ne kɔ, bale ə sə sə mbrə azü nə̂ Ndjapä nə ne. Bale, kə pa ndəma Ndjapä sə tə ə̈bə̈ ərə ə̂në Ndjapä sə kə yisə̂ nə gashu mbrə azü nə̂ Ndjapä nə, ə də̂ mbrə azü ə̂në əndje za lɔsu əndje za kə Ndjapä nə kɔ ne.

23 Rəkɔ, kədə azü Laglizə nɔ̂ kə ngbo tə̂ əndje gâ tə̂ nə â azü nə nɔ̂ sə kə pa aama aəgɔ â kədə alabə̈ aamba azü kə na ndə kə dji əpʉ, wala azü ə̂në əndje wusə̂ Ndjapä wu ne kɔ kə na, əndje sə sə kə pa nə ə pa ângwâ sə lə kumu e ne a? 24 Bale, kədə azü nə nɔ̂ sə kə pa ndəma Ndjapä â ə̈bə̈ əzü ə̂në tshə wusə̂ Ndjapä wu ne kɔ kə na, wala ə̈bə̈ amba əzü na ndə kə dji əpʉ, əzü nə sə kə wusə̂ nyaka nə̂ ye, mbrə aəpʉ nə nɔ̂ ə̂në tshə sə kə dji nə kɔ ə wusə̂ nə ə pa ngbanga sə lə kumu əne mbrə aəpʉ sə̂ nɔ̂ kɔ. 25 Aəpʉ ə̂në ə sə mâ tə̂ lɔsu ye lə angbanə kɔ sə kə wutu gashu. Bale, tshə sə kə te gâ tʉ ə za kumu ye su ashɔ ə vrɔ Ndjapä ə pa də ama ye gashu ə pa: «Ndjapä sə ngâ lə takpa tə̂ e!»

26 Alaye, rəkɔ a sə kə mbrə atâ a? Alɔ ə̂në e ngbo tə̂ e gâ tə̂ nə, əzü bale bale lə takpa tə̂ e lï ndə kə pa tshə wli ətshi wala tshə yisə̂ ərə kə angâ nə wala tshə wutu də ə̈bə̈ əpʉ ə̂në Ndjapä yîsə̂ nə kə ətshə kɔ gashu, wala tshə pa aama aəgɔ, wala tshə pa tshelə ndəma əpʉ aama aəgɔ nə: e mbrə̈ aərə nə nɔ̂ ndə kə pa aangbɔ nə̂ e nə gbɔgbɔ tə̂ ye. 27 Kədə alabə̈ azü kə yində kə pa əpʉ də aama aəgɔ nə, azü bishi wala kʉ lə vəta nə lî gâ ye ndə kə pa aama aəgɔ nə â ə̈bə̈ nə mandâ ngâ nə, â ə̈bə̈ nə mandâ ngâ nə. Bale, ə̈bə̈ əzü sə ndje je ndə kə pa tshə pa tshelə ndəma əpʉ aama aəgɔ nə gâ ye kane. 28 Kədə ə̈bə̈ əzü bale sə sə je ndə kə pa tshə pa tshelə ndəma əpʉ nə ne, azü nə katə̂ kə pa əpʉ lə Laglizə nə gâ ye, əzü pa əpʉ kʉ mbrə ətshə də ə̂tə̂ ye ə pa əpʉ kə Ndjapä. 29 Ənə̂ aawopandəma Ndjapä, azü bishi wala vəta pa əpʉ, ə̂dû azü nə pra tshelə əpʉ nə. 30 Bale, kədə ə̈bə̈ əzü lə aangbɔ nə kə sə də ə̈bə̈ əpʉ ə̂në Ndjapä yîsə̂ nə kə ətshə ndə kə pa nə, angbʉlî əzü nə katə̂ ənə̂ ye əpʉ nə gâ ye. 31 Mbrə ə̂në e-e nɔ̂, e lï ndə kə pa ndəma Ndjapä, əzü mandâ ngâ nə, ndə kə pa azü nɔ̂ wusə̂ ərə ə ru tə̂ əndje. 32 Yîrə̂ aawopandəma Ndjapä sə kə dji əpʉ ama aawopandəma Ndjapä nə. 33 Mbrə ə̂në, Ndjapä sə sə tə Ndjapä kə mbrə ərə djingli djingli ne, bale tshə sə tə Ndjapä kə mbrə blatshe.

Mata ə̂në əndje mbrə lə Alaglizə nɔ̂ kɔ, 34 ayashe ä ä ama əndje lə aaangbɔ ne, əndje zâ äwä zâ kə əndje ndə kə pa əndje pa əpʉ lə aangbɔ nə ne. Bale, əndje djï əpʉ ama azü mata ə̂në âgbɔ̂ əpʉ pa ndje ndə nə kɔ. 35 Kədə əndje yində kə wusə̂ ərə gâ pâ ə̈bə̈ əpʉ, əndje yü aläkɔ̈ əndje mâ lə manda. Mbrə ə̂në ə sə sə də äwänə ndə kə pa yashe pa əpʉ lə aangbɔ ne.

36 Əpʉ Ndjapä nə tô mâ ndə e â wûtu kɔ a? Wala kʉtə̂ e də̂ ə wûtu gâ ndə e kɔ a? 37 Kədə ə̈bə̈ əzü kə wu tə̂ ye tə awopandəma Ndjapä, wala tshə wu ənə̂ ye ə pa Âgbɔ̂ Yîrə̂ sə kə mbrə kosəra lə əne, tshə wusə̂ nə ə pa əpʉ sə̂ ə̂në mə sə kə ta gâ lə fraka kə e kɔ sə tə əpʉ ə̂në Âgbɔ̂ Əyïngerə zâ ama də nə gâ ye kɔ. 38 Bale kədə ə̈bə̈ əzü kə wusə̂ nə wu ne, Ndjapä wusə̂ ye wu ndje ne.

39 Rəkɔ, alaye, e mä də̂ əgo kə pa ndəma Ndjapä, bale e shë shëra azü ndə kə pa aama aəgɔ kpî kpî kpî ne. 40 Bale, e mbrə aərə nɔ̂ mvo ndje kpə tə̂ äwänə.