1 Rəkɔ, alaye əmə, azü nə̂ Ndjapä, ə̂në tshə ê e ndə aərə tshelafɔ kɔ, e wü kʉtə̂ Jezu, ə̂në Ndjapä wlâ ətshə tə âgbɔ̂ awotokrɔ lə əpʉ lɔsu ə̂në əzə̂ mʉ əpʉ nə kɔ. 2 Jezu nə mbrə̂ kosəra də äwänə lə ala Ndjapä nə ə̂në tshə zâ kosəra nə kə ətshə kɔ, mata ə̂në, leme-e, Mayïzə mbrə̂ kosəra nɔ̂ də äwänə lə anda Ndjapä kɔ.*3.2 Wu Kumu 12.7. 3 Mbrə ə̂në Jezu nə lï ndə kə pa azü mbe ətshə ə ro kə mbe Mayïzə nə, mata ə̂në azü sə kə lʉ awombrə anda ə ro də̂ anda nə kɔ. 4 Anda nɔ̂, ə̈bə̈ əzü kə mbrə̂ kɔ, bale ətshə ə̂në tshə mbrə̂ aərə nɔ̂ kɔ kə də̂ Ndjapä. 5 Ənə̂ Mayïzə nə, tshə mbrə̂ kosəra nɔ̂ də äwänə lə anda Ndjapä, tə əyïkosəra ndə kə pa tshə pa əpʉ ərə ə̂në Ndjapä ə pa ndə nə je kɔ. 6 Ənə̂ Kristə nə, tshə mbrə̂ kosəra nɔ̂ də äwänə tə Ɨrɨ Ndjapä nə gâ pâ anda Ndjapä nə nɔ̂, â anda nə̂ ye nə kə də̂ əzə̂, kədə a za lɔsu əzə̂ nɔ̂ kə ətshə â za lɔsu əzə̂ gâ pâ ye, ə̂në a da əkro əzə̂ tə̂ ye kɔ, ʉrrr ndjɔ gâ tə̂ ama nə*3.6 Ʉrrr ndjɔ gâ tə̂ ama nə: Əpʉ səye sə sə lə alabə̈ aangbrɔ afraka Ndjapä də ama grakə ne..

7 Ndje, a lï ndə kə tegbɔ kumu əzə̂ gâ pâ əpʉ ə̂në Âgbɔ̂ Yîrə̂ pâ kɔ ə pa:

«Kpəsəye, kədə e dji tshema Ndjapä,

8 e gbɔ̈ gbɔ̈ lɔsu e ne,

mata ə̂në alätä e mbrə̂ leme-e kɔ,

alɔ ə̂në əndje wə̂ra tə̂ əndje tə̂ əpʉ ama Ndjapä nə,

tə̂ alɔ ə̂në əndje trâ Ndjapä nə mâ lə ngbûndû kɔ.»

9 Bale, Ndjapä pâ:

«Mâ lə ngbûndû nə je, alätä e nə trâ əmə

ndə kə wu nə

â əndje wû aərə ə̂në mə mbrə̂ gâ ye kɔ lə ə̂ngû zazü bishi.

10 Âdârə ə̂në mə mbrə̂ əkɔ tə̂ əndje â pâ:

"Lɔsu əndje sə kə djingli äwä alɔnɔ̂.

Əndje wûsə̂ äwä ə̂në mə yîsə̂ nə kə əndje kɔ wû ne."

11 Rəkɔ, mə drâ ama əmə də əkɔ gâ ye ə pâ:

"Əndje sə sə kə li ngâ gâ ə̂sə̂ wutə əmə ne."»*3.7-11 Wu Ətsh 95.7-11.

12 Alaye, e gbɔ̈ ndə ə̂tə̂ e ndə kə pa ə̈bə̈ əzü bale lə takpa tə̂ e sə sə də əmbrʉ lɔsu ne, ə̂në ə wəra tə̂ ye tə̂ əpʉ kɔ ndə kə pa tshə do tshepa ye gbo Ndjapä ə̂në tshə sə tə sorô kɔ ne. 13 Bale, e mʉ̈ əpʉ kə angâ e lə takpa tə̂ e alɔnɔ̂, mata ə̂në əndje daka pə kə pa nə ə pa «kpəsəye» kɔ, kanika ə̈bə̈ əzü bale lə takpa tə̂ e gbɔ lɔsu ye gbɔ tə̂ äwä nyaka ə̂në ə frɔ azü kɔ ne. 14 Mbrə ə̂në a də a-Kristə nə sə lə kosəra bale, kədə a daka pə kə za lɔsu əzə̂ nə nɔ̂, ə̂në a zâ pə tə̂ ama nə kə ətshə gâ ye kɔ, ʉrrr ndjɔ gâ tə̂ budu nə.

15 Ə̂në Fraka nə̂ Ndjapä nə sə pə kə pa nə ə pa:

«Kpəsəye, kədə e dji tshema Ndjapä,

e gbɔ̈ gbɔ̈ lɔsu e ne,

mata ə̂në alätä e mbrə̂ leme-e kɔ,

alɔ ə̂në əndje wə̂ra tə̂ əndje tə̂ əpʉ ama Ndjapä nə kɔ.»*3.15 Wu Ətsh 95.7-8.

16 Azü nə ə̂në əndje âfɔ də əpʉ gâ tə̂ Ndjapä nə, mandânə ə̂në əndje djî tshema ye kɔ kə də̂ aəde? Ə də̂ azü nə nɔ̂ ə̂në Mayïzə nə kô əndje ə wûtu də əndje lə əgɔ Ejipətə kɔ də̂ ne a? 17 Â aəde də̂ Ndjapä nə mbrə̂ əkɔ nə gâ tə̂ əndje lə ə̂ngû zazü bishi nə kɔ? Ə də̂ azü nə ə̂në əndje mbrə̂ nyaka â aəko əndje yɔ̂ gâ tʉ lə ngbûndû kɔ də̂ ne a? 18 Â aəde də̂ tshə drâ ama kə əndje â pâ əndje li li gâ ə̂sə̂ wutə nə ne kɔ? Ə də̂ azü nə ə̂në əndje djî djî əpʉ ama ye nə kɔ də̂ ne a?*3.16-18 Wu Kumu 14.1-35; Ətsh 95.11. 19 Rə də̂ a wu ndje ə pa azü nə lî lî ndə kə pa əndje li gâ ə̂sə̂ wutə Ndjapä nə ne mbrə kə gbɔ lɔsu əndje nə.