1 Jezu ê atrawaya nə̂ ye morofo amanə bishi ə zâ awlra kə əndje ndə kə grɔ aafrɔ ayirə̂ də arəka nɔ̂, ndə kə ma ndə kə pa azü ə̂në aərə tshekotə̂ əndje ndɨ̂ gâ ye kɔ, ə gamba tə̂ əndje nɔ̂ gâ mandânə. 2 Əɨrɨ azü-awla nə morofo amanə bishi kə səye: angbʉlî əzü nə kə də̂ Shemɔ, ə̂në əndje e ətshə ə pa Piarə kɔ, gâ ndə aye nə də Andre; də Zake, ɨrɨ Zebede, gâ ndə aye nə də Zââ; 3 Flipə gâ ndə Bartalami; Toma gâ ndə Matiɔ ə̂në tshə sə tə aworɔ ngendja lapɔ kɔ; Zake, ɨrɨ Alfe, gâ ndə Tade; 4 Shemɔ ə̂në tshə sə̂ kə mbrə awlra ndə kə pa əgɔ nə̂ ye wutu lə kanga kɔ, gâ ndə Judasə Isəkariɔtə ə̂në tshə ka Jezu je kɔ.

5 Əndje morofo amanə bishi nə ə̂në Jezu wlâ əndje kɔ kə sə̂. Tshə zâ ama kə əndje ə pa: «E nä nä lə aəgɔ nə̂ azü ə̂në əndje sə sə tə Ajuwufu ne kɔ ne. E lï lï gâ lə ə̈bə̈ gala ashɔ Samari ne. 6 Bale, e nä na ye gâ ndə azü əgɔ Isərayalə ə̂në əndje sə mata andalimi ə̂në əndje yû gâ ye kɔ. 7 E nä na ye ə mʉ̈ əpʉ ə pa: "Əgɔngerə nə̂ tshelafɔ sə trö!" 8 E grɔ̈ rəka tə̂ azü, e shë akuzu, e mä ndə kə pa akwa alayïbroma sə mvo, e grɔ̈ aafrɔ ayirə̂ tə̂ azü. E sɔ̂tə̂ nə yera ambanə, e kö kə azü yera ambanə. 9 E kö kö lɔrə wala ngendja wala ngbengewle ngendja gâ lə ngbede nə̂ e ne. 10 E kö kö ngbede mbrə ana nə ne, e kö kö ləba bishi ne, e kö kö tama wala tshɔngblɔ ne. Mbrə ə̂në əyïkosəra lï ndə kə pa tshə sɔtə̂ rəgo ama ye.

11 «Alɔ ə̂në e li gâ lə ə̈bə̈ gala wala aya əgɔ, e yü ətshe kədə ə̈bə̈ əzü ə̂në tshə lï ndə kə wəra e tə ə̂rɔ̂nə sə je, e sə̈ kpə ndə ye kôto ʉrrr ka ə ro. 12 Alɔ ə̂në e sə kə li gâ lə ə̈bə̈ anda, e pä: "Blatshe sə̈ də e." 13 Kədə azü tshelə anda nə kə wəra e tə ə̂rɔ̂nə, blatshe nə̂ e nə sə̈ gâ pâ əndje. Bale, kədə azü nə kə wəra e wəra tə ə̂rɔ̂nə ne, blatshe nə̂ e nə dö tə̂ ye kə e. 14 Alɔ ə̂në azü nə wəra e wəra tə ə̂rɔ̂nə ne, ə dji əpʉ nə̂ e dji ne, e wütu lə anda nə wala lə gala nə ə grɔ̈ ashɔ ə̈nü e gâ tʉ. 15 Djatra əpʉ, mə pa kə e: tə̂ alɔ kə wa ngbanga nə̂ Ndjapä, ngbanga nə̂ azü gala səkɔ sə kə ro pâ ənə̂ azü agala Sɔdɔmə də Gɔmɔrə.»

16 «E wü-a! Mə wla e mata andalimi lə takpa tə̂ atshɔndjɔ. Ala e në mata aəkrɔ, e mä awlra ma ne mata agbakuduba. 17 E gbɔ̈ ndə akwa e mbrə azü, mbrə ə̂në əndje sə kə na də e gâ ətshi aangbɔ ngbanga nə̂ Ajuwufu, əndje sə kə da e lə aanda aangbɔ nə̂ əndje. 18 Əndje sə kə gbətɔ e ə na də e gâ ətshi əgbro azü əgɔ də alayïngerə, mbrə əmə, ndə kə pa e pa əpʉ nə̂ əmə kə əndje də azü ə̂në əndje sə̂ sə̂ tə Ajuwufu ne kɔ. 19 Bale, alɔ ə̂në əndje na də e gâ ətshi alayïngbanga, e lï tshelə e lï gâ pâ äwä ə̂në e sə kə pa əpʉ də nə kɔ wala e pa atâ ne. Kʉ tə̂ alɔ nə səkɔ, aəpʉ ə̂në e sə kə pa nə kɔ, Ndjapä sə kə yisə̂ nə kə e. 20 Mbrə ə̂në ə də̂ e də̂ kə pa əpʉ nə ne, Âgbɔ̂ Yîrə̂ nə̂ Abä e kə za əpʉ nə gâ lə ama e ndə kə pa e pa nə.

21 «Əzü sə kə ka aye nə ndə kə pa əndje wo ətshə. Abä əgblə sə kə ka əgblə nə̂ ye, aneshe sə kə afɔ də awlra tə̂ alabä əndje də alayï əndje ə ka əndje ndə kə pa azü wo əndje. 22 Tshelə azü nɔ̂ sə kə wəra tə̂ əndje tə̂ e mbrə əmə. Bale, əzü ə̂në tshə gbɔgbɔ tə̂ ye lə aərə səkɔ ʉrrr ndjɔ gâ tə̂ amanə, Ndjapä sə kə she ətshə lə kuzu. 23 Alɔ ə̂në azü ma awlra gâ tə̂ e lə ə̈bə̈ gala, e kpe gâ lə ə̈bə̈ ata gala nə. Djatra əpʉ, mə pa kə e: e sə sə kə na na ye lə agala əgɔ Isərayalə nɔ̂ ne â Əgblə nə̂ Əzü sə kə yi kumu ye.

24 «Ə̈bə̈ awomanda ərə ro pâ awoyisə̂ ərə kə ətshə ro ne, wala əyïkosəra ro pâ âgbɔ̂ əzü nə̂ ye ro ne. 25 Awomanda ərə lï ndə kə sə mata awoyisə̂ ərə kə ətshə â əyïkosəra lï ndə kə sə mata âgbɔ̂ əzü nə̂ ye. Ə̂në azü ê əyïnga anda ə pa Beləzebulə kɔ, əndje sə kə e azü tshelə anda nə̂ ye nə atâ a!»

26 «E mä awa əndje mä ne! Mbrə ə̂në ərə nɔ̂ ə̂në ə zâ tə̂ ye wû, ə sə kə wutu gâ tə̂ ə̂ngbʉ̂tshe, ərə nɔ̂ ə̂në ə sə lə kəwû, azü nɔ̂ sə kə wusə̂ nə. 27 Əpʉ ə̂në mə pa kə e lə əbutshe kɔ, e pa ndəma nə də ə̈kü alɔ. Əpʉ ə̂në əndje pâ gâ lə ətu e lə wâyâ kɔ, e mʉ əpʉ nə gashu tə̂ kumu anda. 28 E mä mä awa azü ə̂në əndje wo amba akwa əzü kɔ ə lï lï ndə kə wo yîrə̂ ye ne kɔ ne. Bale, e kpë də̂ rawa Ndjapä ə̂në tshə lï ndə kə wo yîrə̂ əzü də əndu ye nɔ̂ lə əwo ə̂në ə rɨ rɨ tə̂ ərə ne kɔ. 29 Əndje ka alayandjera ka bishi ə̂lê mea bale ne a? Bale, kədə Abä e kə yində nə yi ne, ə̈bə̈ nə bale sə sə kə tshu nə ne. 30 Sukumu e ndje, Ndjapä dɨ̂ nɔ̂ gâ ye. 31 E mä awa mä ne, e rô ə̂kpû alayandjera ngbatshe gâ ye.

32 «Âdârə ə̂në, əzü ə̂në tshə pa lə ala azü ə pa əne sə tə əzü nə̂ əmə, əmə ndje, mə sə kə pa lə ala Abä əmə ə̂në tshə sə mâ lafɔ kɔ ə pa tshə sə tə əzü nə̂ əmə. 33 Bale, əzü ə̂në tshə wəra tə̂ ye tə̂ əmə lə ala azü, mə sə ndje kə vʉsə̂ əpʉ nə̂ ye lə ala Abä əmə ə̂në tshə sə mâ lafɔ kɔ.»

34 «E pä pä də mə nâ ndə kə pa blatshe sə lə takpa tə̂ azü pâ ashɔ səye ne. Mə nâ nâ də blatshe ne, bale, mə nâ də ə̈ngrʉ̈ kamba gâ lə takpa tə̂ azü. 35 Mbrə ə̂në, mə nâ ndə kə pa tshelə takpa tə̂ əgblə koshe də abä nə sɔ, tshelə takpa tə̂ əgblə yashe də əyï nə sɔ, tshelə takpa tə̂ əgblə yashe də yinʉ nə sɔ. 36 Azü tshelə anda nə̂ əzü sə kə sə tə alayïkowɔ nə̂ ye.»

37 «Əzü ə̂në tshə yində abä nə wala əyï nə ə rô əmə, tshə lï lï ndə kə sə tə trawaya nə̂ əmə ne. Əzü ə̂në tshə yində əgblə nə̂ ye tə koshe wala tə yashe ə rô əmə, tshə lï lï ndə kə sə tə trawaya nə̂ əmə ne. 38 Əzü ə̂në tshə za masheyɔ nə̂ ye za gâ pâ əgʉ ye ne ə za äwä əmə za ne, tshə lï lï ndə kə sə tə trawaya nə̂ əmə ne. 39 Əzü ə̂në tshə yində kə bata əwu ye, tshə sə kə tshu nə. Bale, əzü ə̂në tshə yində kə tshu nə mbrə əmə, tshə sə kə sə tə sorô.»

40 «Əzü nɔ̂ ə̂në tshə wəra e tə ə̂rɔ̂nə, tshə wəra əmə tə ə̂rɔ̂nə. Əzü ə̂në tshə wəra əmə tə ə̂rɔ̂nə, tshə wəra ətshə ə̂në tshə wlâ əmə kɔ. 41 Əzü ə̂në tshə wəra awopandəma Ndjapä tə ə̂rɔ̂nə mbrə ə̂në tshə sə tə awopandəma Ndjapä kɔ, tshə sə kə sɔtə̂ âkrâ nə̂ awopandəma Ndjapä. Əzü ə̂në tshə wəra ə̂rɔ̂ əzü tə ə̂rɔ̂nə mbrə ə̂në tshə sə tə ə̂rɔ̂ əzü kɔ, tshə sə kə sɔtə̂ âkrâ nə̂ ə̂rɔ̂ əzü. 42 Əzü nɔ̂ ə̂në tshə sə kə to kʉtə̂ zɨtɨ ə̂ngû gâ lə aya kopo kə ə̈bə̈ aya əzü səye bale, mbrə ə̂në tshə sə tə trawaya nə̂ əmə kɔ, djatra əpʉ, mə pa kə e: âkrâ sə sə kə tshɔ ətshə mandânə ne.»