Mateus 4

Djablo trâ lɔsu Jezu lə ngbûndû

1 Bale, Âgbɔ̂ Yîrə̂ nâ də Jezu mâ lə ngbûndû ndə kə pa djablo tra lɔsu ye. 2 Mandânə ə̂në tshə rû tshelə ye tə̂ rəgo pəle ora lə aəlo zazü bishi kɔ, əgo mî ətshə. 3 Djablo, awofrɔ azü nâ trö də ətshə ə pâ kə ətshə ə pa: «Kədə bə sə tə Ɨrɨ Ndjapä, zä ama kə abadja səye ndə kə pa əndje do tə̂ əndje tə rəgo.» 4 Jezu kîrə əpʉ ə pa: «Əpʉ Ndjapä pâ: "Ə də̂ kʉ mbrə rəgo də̂ əzü ə sə tə sorô ne, bale, əzü sə tə sorô tə̂ äwä aəpʉ ama Ndjapä nɔ̂."»*4.4 Wu Əpʉ 8.3.

5 Mandânə, djablo nə nâ də Jezu mâ Jeruzalamə, gala ə̂në ə sə kpî mbrə Ndjapä kɔ, ə zâ ətshə tɔ mâ tə̂ kumu Anda Ndjapä, 6 ə pâ kə ətshə ə pa: «Kədə bə sə tə Ɨrɨ Ndjapä, äfɔ kotəye ə të mâ tə̂ ashɔ-e, mbrə ə̂në Fraka nə̂ Ndjapä pâ:

"Ndjapä sə kə za ama kə atrawaya nə̂ ye də əpʉ zə,

əndje sə kə za əbə gâ lə kəna əndje

kanika bə za ə̈nü zə za da badja ne."»*4.6 Wu Ətsh 91.11-12.

7 Jezu pâ kə ətshə ə pa: «Fraka nə̂ Ndjapä pâ ndje ə pa: "Trä lɔsu Əyïlingû tə Ndjapä nə̂ zə trä ne."»*4.7 Wu Əpʉ 6.16.

8 Djablo kwatə̂ye ə ô də ətshə mâ tə̂ kumu ə̈bə̈ ə̈ngrʉ̈ kaga, ə yîsə̂ aəgɔ tshepashɔ nɔ̂ də aərə tshelə nə kə ətshə 9 ə pâ kə ətshə ə pa: «Kədə bə gbəte gâ tshekudu əmə â vrɔ əmə, mə sə kə ko aərə sə̂ nɔ̂ kə əbə.» 10 Jezu pâ kə ətshə ə pa: «Gï tə̂ zə gashe tə̂ əmə, Sataa*4.10 Sataa sə tə djatra əɨrɨ djablo. Wu lə Bakale.! Mbrə ə̂në Fraka nə̂ Ndjapä pâ: "Vrɔ̈ Əyïlingû tə Ndjapä nə̂ zə ə mbrə̈ kʉ kə ətshə bale."»*4.10 Wu Əpʉ 6.13. 11 Bale, djablo kâtə̂ Jezu nə â atrawaya nə̂ Ndjapä nâ gâ ngotə̂ ye ə mâ kə ətshə.