1 Pedro 4

2 Tumbulya nambi’yambi', maisa gagaigile go tama pano padunia, gapalikwa galongoyelwe kati mwapala Nnu’ngu', kwenda kwa maminyikio ga kimundu lili. 3 Mwanjaa, masu’ba ginu gagapite gali’ngani kwo panga makowe gabapanga bandu bangali kuntanga Nnu’ngu'. Mwaatami kwo panga upege, kwipenda mwabene, lobya, kalamu yo milamuno, nywa muno na ata kwikilikitya inyago. 4 Nambi’yambi', bandu bangali kuntanga Nnu’ngu' bendasangala kwa kitumbu so kotoka panga nabo kiselele palu' pabapanga malau go pi’ti’li’ki’ya, kwa nyo bendakuntukana. 5 Lakini baapalikwa kwiyi’mya nnu’ngi' ya Nnu’ngu', ywembe atami wiso kwaukumu bandu boti, bau’mi na babawile. 6 Mwanjaa, kwa kitumbu so ata abo babawile baalilwe Abali Inannoga, pamope no panga baaukumilwe muyi’ga kati mwabaukumilwa bandu bi’ngi', baatama muloo kati Nnu’ngu' ywatama muloo.

Ywakota wiso upo ya Nnu’ngu'

7 Kuundi’la wa ili’be yoti wegelile. Kwa nyo mupalikwa tama kwo li’ngi’lya no keleka li’nga muwese saalya.