1 Mahē a Tigsas tiwag mi ige nonon vanvan sisqet me Jerusalem en, ba kēy mavan lōme Luwutwut Ne Olif. Ba kēy tigtig mahē nen ba etet tēqēl hōw lepnō susu vōyō, napnō nan Betfas ba Betani. 2 Tō Tigsas mavap van hiy yoge vōyō nonon so, "Atmōyō van tēqēl yow lepnō nōk, ba kōmyō tetsas nodon̄kē lōmgep vitwag a net et hag qete apwon, ba kēy nēyēt maymay kē. Atmōyō tuw yak nagayga den kē, ba van tēy me hiy no. 3 So net wo mēvēhge kōmyō so, ‘?Kōmyō melep nodon̄kē gōh bahap?’ ba kōmyō vap van hiy net nan so, ‘Welan so niak namgumgu namun aē. Ba kē qoyo vētleg lok me.’ "

4 Tō kōyō van me, tō vansas nodon̄kē lōmgep nen tigtō metehal, a kēy nēyēt maymay kē sisqet namte-ēm̄ ne ēm̄ vitwag. Mahē kōyō tuwtuwyak nagayga den nodon̄kē nen, 5 ba yatkel et a tig gehtō en, kēy vēhge van hiy kōyō so, "!Ēy! ?Bahap tō kōmyō mutuwyak van nagayga den nodon̄kē nen?"

6 Tō kōyō vap van hiy kēy nohohole a Tigsas mavap tō van hiy kōyō en, tō ige nan ukēg, tō kōyō van. 7 Kōyō mēdēn̄ lok me nen, tō lep van nodon̄kē nan hiy Tigsas. Tō kōyō vahyeg neleleh bomomyiy noyō apwo don̄kē nan, tō Tigsas nihag ketket hag apwon ēgēn.

8 Woqse sil mavan se me tō vahyeg se neleleh nonoy lemtehal a lengon Tigsas. Ba yatkel et me vey niwti qētēnge lōlhiy namtehal a nayoy aē, a kēy motot hēyēt. 9 Woqse sil mavan am̄ag lengon Tigsas. Ba woqse sil se madam tatag kē, kēy ōlōl so, "!Ōliwo Ḡod! !Hosana! Ḡod, nēk vawē net agōh, kē mavan me lahan Welan Ḡod. 10 !Ḡod nēk vawē namyanag gayaq mey a telep natno liwo non yatqōtqōnmem Devēt! !Hosana! !Gēn ōliwo Ḡod alge!"

11 Tigsas mēdēn̄ me Jerusalem en, tō nihayveg hay Litiy Ēm̄ Bolol non Ḡod. Kē met qēt bah nahaphap del hay lēm̄ en, tō Tigsas tiwag mi ige nonon son̄wul nanm̄e vōyō m̄ōl lok Betani, veg nalo mal van.

12 Taval meyen nan hag en, kēy hatig den Betani tō vanvan me hiy Jerusalem nen, ba namaygay mak Tigsas. 13 Tō Tigsas met nēqētēnge fik tigtō a yeh ba nayon a nemtōqtōq. Tō Tigsas nivan so niet tow so nēwan aē. Ba mahē a Tigsas mavan sisqet me, kē met hag en vēlēs yon geh, veg et wōl nan qete a so kē niō nēwan. 14 Tō Tigsas mohole van hiy nēqētēnge en so, "Net tit gen vēhte nēwe n̄ēh te." Ba ige nonon moyon̄teg nohohole a kē mavap en.

15 Mahē a kēy mēdēn̄ me Jerusalem en, Tigsas nivan me Nitiy Ēm̄ Bolol non Ḡod. Tō kē niqtēg vōylōlō ige a kēy veleplet wa n̄eyen̄yeg nahaphap hay lelo geay Ēm̄ non Ḡod en. Tigsas matam vēli netebol non ige leleh sēm, tiwag mi natno haghag non ige a kēy n̄eyen̄yeg noqon. 16 Ba Tigsas et ukēg te so net nivantēy nahaphap namun lō me lelo geay Ne Ēm̄ non Ḡod so nin̄yeg. 17 Tō Tigsas mavatne kēy so, "Atmi et. Mayap tō aē Lōbōk Yon̄ non Ḡod a mavap so, ‘Nēm̄ mino, ige sil tavap so nēm̄ tatay non ige vel vōnō del lemyam.’✝ Ba kimi mak tō kē mavan me ‘natno taqtaqbat non ige et belbel.’✝ "

18 Mahē a ige m̄agoy ige pris tiwag mi ige vatvatgo Bele moyon̄teg noyoy bege gōh en, tō kēy qētēg sok namtehal so wuh mat kē aē. Ba kēy mētēgteg kē, veg mahē kē nivatvatne en, ige sil mamamakē aē veg bohohole nonon. 19 Tō lemyēpyep nen, Tigsas tiwag mi ige nonon hatig tō van lokse den nataon nen.

20 Talōw nan hag nen, kēy mahatig a lemtap qōtō, kēy vanvan me metehal nen wah, kēy et van qelekē nēqētēnge fik a kē mivipdeg tō en mal seygol dēn̄ a lōgōygōyyēn. 21 Pita mēdēm lok nohohole non Tigsas, tō kē mavap so, "Vatgo, nēk et. Nēqētēnge a nēk mivipdeg tō anoy en mal seygol."

22 Tō Tigsas mavap van hiy kēy so, "Atmi dēmtig Ḡod. 23 Nok vap van hiy kimi nēhēyhēywē. So net vitwag wo nēdēmtig maymay Ḡod en, tō kē nivap van hiy natō liwo gōh so, ‘Nēk hatig, ba yow n̄a lenaw,’ tō Ḡod toyon̄teg kē. Sowo nēdēmtig nonon et vōvōyō te, ba kē nēdēmtig so nohohole a kē mavap en, tak tig, tō Ḡod tak tatag qele a net nan mavap en. 24 So kimi wo matatay hiy Ḡod bahapte, ba dēmtig so Ḡod mal lep van hiy kimi, tō Ḡod telep van hiy kimi. 25 Kimi wo moboel net vitwag, tiy wē yeh so kimi dēmveteg nēmgōn am̄ag den kimi tig kal hag ba tatay. Tō Ḡod Imam nonmi hag alge en qoyo dēmveteg nimgumi. 26 So kimi wo et dēmveteg te nēmgōn ige tegha en, Imam nonmi hag alge en tit dēmveteg vēhte nimgumi."

27 Tigsas tiwag mi ige nonon mavan lokse me Jerusalem. Mahē Tigsas nivanvan sisqet me Nitiy Ēm̄ Bolol non Ḡod nen, ba ige m̄agoy olol tiwag mi ige vatvatgo Bele wa ige lililwo goy ige Tisrael van me tō et Tigsas. 28 Ige gōh mēvēhge van hiy Tigsas so, "?Nēk ak tō namgumgu namu nen ihē me lep van? ?Ihē mukēg nēk aē so nēk ak namgumgu geh nen?"

29 Tō Tigsas meplu goy kēy so, "Itōk, nok vēhge se nēvēvēhiy vitwag van hiy kimi. Kimi wo meplu goy nēvēvēhiy namuk gōh en, tō no tavasemlō van hiy kimi so ihē mōm̄ōk no so nok ak namgumgu gōh. 30 Atmi vasemlō tow me hiy no. ?Wō Jon mavavasugyon̄ ige et en, Ḡod mavap van hiy kē so niak, si net mavap van hiy kē?"

31 Tō kēy vēy hohole veg bēvēvēhiy namun Tigsas ēgēn. Kēy vap so, "?Ba gēn tavap qeleave? So gēn wo mavap so Ḡod mavap van hiy kē so niak qelenen, tō kē tavap so, ‘O-oh. ?Ba qeleave tō kimi et dēmtig te Jon?’ 32 Ba gēn tit vap vēhte so, ‘Net mavayēg kē aē.’ " Kēy vap qelenen veg kēy mal dēmtig vatag so Jon, ikē net lēgēlgēg non Ḡod.

33 Tō kēy meplu goy Tigsas so, "Kemem et ēglal te."

Tō Tigsas mavap so, "Ba ino se, no tit vasemlō vēhte van hiy kimi, so ihē mōm̄ōk no so nok ak namgumgu gōh."