1 Tō Tigsas mavap van hiy ige sil so, "Hēyhēywē, nok vap van hiy kimi so yatkel et den kimi tigtō gōh, kēy tit mat vēhte gaydēn̄ a kēy et namyeyen non Ḡod nivan me mi namaymay."

2 Lēkle qōn̄ levete, Tigsas melep Pita, Jemes ba Jon, kēy mēvēykal n̄a wotō liwo vitwag, kēytēl mahgeytel madam Tigsas. Tō kēytēl etvan qelekē, nataqn̄ēn Tigsas me leh tō metegha. 3 Namalmal nonon maqagqag a maqagqag lēs qele natwēh tayay, tateh haphap lemyam naqagqag qeleanen, ba nēbēybēy a nēbēybēy lēs. 4 Tō itēlge nonon met yoge vōyō mavan me hiy kē, Elisa ba Mosis, kōyō kaka tiwag mi Tigsas. 5 Tō Pita mavap van hiy Tigsas so, "!Vatgo! Nitiy wē yeh a kamtēl me agōh. Itōk so kamtēl tēy natvēlgapye woy vētēl, nōnōm vitwag, non Mosis vitwag, ba nonon Elisa vitwag." 6 Pita mavap qelegōh en veg kē et ēglal te so kē nihole qeleave, veg kēytēl memtēgteg qēt.

7 Tō namlēg nivan me nen, tō nitaq melmel goy kēy. Ba nohohole mavan me den namlēg en so, "Igōhkē Intik a no natam yeh kē. Atmi yon̄teg galsi kē."

8 Itēlge nonon et me qelekē, Mosis ba Elisa, kōyō tateh, ba Tigsas mahgen mitig lap. 9 Mahē kēy hēwhēw tēqēl me den wotō nen, Tigsas nivap van hiy kēytēl so, "Kēmtēl nitog vavasemlō vel haphap a kēmtēl met tō hag wotō en gaydēn̄ a Ēntēn Net nihatig lok den namatmat."

10 Tō itēlge nonon gōh mak tatag nahap a Tigsas mavap tō van hiy kēytēl en. Ba kēytēl et yon̄teg vēglal te nohohole nan a Tigsas mavap a so, Ḡod tak hatig lokse kē den namatmat. Tō kēytēl vēy hohole aē so, "?Wō nēdēmdēm ne hohole nonon gōh qeleave?"

11 Itēlge nonon gōh mēvēhge Tigsas so, "Bahap tō ige vatvatgo Bele mavap so net lēgēlgēg Elisa tavan lok me am̄ag den Kraēs?"

12 Tō Tigsas mavap so, "!Hēywē! Net lēgēlgēg Elisa tavan lok me am̄ag so niak tenenen vel haphap del. ?Bahap tō, Nabaebol mavap so Ēntēn Net tō yon̄memeh ba haphap a nam̄adeg, wa kēy tak hiy kē a nehet? 13 Ba nok vap van hiy kimi nēhēyhēywē, Elisa nan mal van me. Ba nisil mak hiy kē a nehet, qele navavap non Ḡod mavap tō aē en."

14 Mahē Tigsas tiwag mi itēlge nonon m̄olm̄ōl lokse me hiy yatkel et nonon, kēy met nisil liwo haywilig goy tō ige non Tigsas. Veg yatkel vatvatgo Bele vēyvavaleh tiwag mi kēy. 15 Mahē ige sil met Tigsas nivanvan me nen, tō kēy m̄alyow veg kē. Kēy gitgityak me tō tan̄ lemnen ēgēn. 16 Ba Tigsas mēvēhge van hiy kēy so, "?Kimi vēy vavaleh tō nen bahap?"

17 Net vitwag den kēy mavap so, "!Vatgo! No mavantēy me intik hiy nēk so ak wē kē veg nuvu het mēhēw kē, tō kē et hohole te. 18 Yatkel mahē a nuvu het niqal maymay kē en, kē nisisgoy n̄a lēvētan, ba nosog nikakalō me den naplan wa nigaygayyēy nēlwon. Tō nataqn̄ēn nit gotgomiy. Ba no mēvēhge ige hal nōnōm so kēy vōy yak nuvu het gōh den kē, ba kēy akak lēlēge."

19 Tō Tigsas mavap van hiy kēy so, "Kimi togtō qiyig kē nēdēmtig nonmi et maymay te. ?Wō no totog tiwag mi kimi gaydēn̄ an̄ēh? ?Nok so biyin̄ se kimi vag vēh? Atmi lep me nēnētm̄ey en."

20 Tō kēy lep kē me hiy Tigsas ēgēn. Mahē a nuvu het met Tigsas nen, kē mak nēnētm̄ey nan nataqn̄ēn me yeyey a me yeyey, tō kē nisisgoy hōw lēvētan. Tō kē nitatatwul kēlkēl wa nosog nikakalō me den naplan. 21 Ba Tigsas mēvēhge van hiy imam nonon so, "?Wō nēte vēvēh vatag a kē niakak qelegōh?"

Imam nonon mavap so, "Nage gōh maqal tō kē a kē nusu lapgetō. 22 Nuvu het gōh mal akak etgal kē vagm̄adeg so niak sisgoy nēnētm̄ey nan lep wa lēbē, so niwuh mat kē. So nēk wo tak vēh nahap qiyig vitwag, ba nēk magaysēn kemem, wa biyin̄ kemem."

23 Tigsas mavap van hiy imam nonon so, "Ḡod tak vēh vel haphap, so nēk wo nēdēmtig."

24 Tō vag tiwag woy, imam non nēnētm̄ey en mohole mi neten̄ten̄ so, "Welan, no nēdēmtig. Ba nēk biyin̄ no, veg nēdēmtig mino nusu."

25 Mahē Tigsas met nisil nivanvan me hiy kē en, kē mohole maymay van hiy nuvu het nan so, "Vu het ne qoywon wa ne lōt. !Nok vap van hiy nēk! !Nēk kalō den nēnētm̄ey agōh! Ba nēk nitog vanvan lok me hiy kē."

26 Tō nuvu het en mōltaw, wa mak nēnētm̄ey nan mamat higap. Wa nataqn̄ēn me yeyey a me yeyey, tō nuvu het nan nikalō den kē. Ba kēy met van en, qeleso nēnētm̄ey nan mamat, tō nisil mavap so, "Kē mal mat." 27 Ba Tigsas mētēy namnen wa niyap hatig kē, tō nitig ketket ēgēn.

28 Mahē Tigsas mahayveg lelo ēm̄ tiwag mi ige nonon, kēy vap van hiy kē so, "?Bahap tō kemem tit vōylō vēhte nuvu het gōh?"

29 Tigsas mavap so, "Natatay vēlēs tōvōyyak vēh nuvu het qeleanen."

30 Tigsas tiwag mi ige tin̄qoy nonon mukēg mahē nen, wa mavan heylō me Kalili. Ba Tigsas et muste so nisil niēglal mahē a kē aē en, 31 veg kē nemyōs so nivatvatne ige tin̄qoy nonon. Tō Tigsas mavap so, "Yatkel et ten̄yeg Ēntēn Net. Tō kēy tuwuh mat kē. Ba Ḡod qoyo ak ēh lokse kē lēkle qōn̄ vētēl."

32 Ba ige nonon et ēglal galsi te nēdēmdēm ne hohole non Tigsas, ba kēy memtēgteg so vēhge kē aē.

33 Tigsas tiwag mi ige nonon mavan me Kapaniam nen, tō kalbat hay lēm̄ vitwag. Tō Tigsas mēvēhge van hiy kēy so, "?Wō Kimi vēy vavaleh bahap a gēn vanvan me metehal en?"

34 Ba ige nonon et vulu goy te kē, veg kēy vanvan lemtehal en, kēy vēy vavaleh so ihē den kēy tilwo goy kēy.

35 Tigsas nihaghiy hōw en, tō niōlōl me ige tin̄qoy son̄wul nanm̄e vōyō. Tō kē mavap van hiy kēy so, "Net wo nemyōs so nilwo goy yatkel et en, kē nim̄ōk tēqēl kē mahgen n̄a antan. Tō kē nivan me net mugumgu nonoy."

36 Tō Tigsas melep me nēnētm̄ey vitwag, ba mēvētgiy kē a lēvētnay. Tō Tigsas moyveg goy nēnētm̄ey nan, ba mavap van hiy kēy so, 37 "Net a nilep vasgēt nēnētm̄ey qelegōh lehek en, kē nilep vasgēt no. Ba net a nilep vasgēt no en, kē et ak te hiy no, ba hiy Imam Ḡod a kē mēvētleg tō no me."

38 Tō Jon mavap van hiy Tigsas so, "!Vatgo! Kemem met net vitwag nivōyvōylō nuvu het den yatkel et a lehe. Ba kemem magatgoy kē, veg ikē et lēvēwti nongēn te."

39 Ba Tigsas mavap van hiy kēy so, "Kimi nitog gatgatgoy net qelenen, veg net qelenen niak naphah lehek en, kē tit hole hethet ēgē vēhte lehek. 40 Net a et tavale te mi gēn en, ikē tiwag mi gēn. 41 Nok vap hēyhēywē van hiy kimi, net a nilep van nivinlah bē hiy kimi so in en veg kimi ige non Kraēs, Ḡod telep van hiy kē nayseyse aē."

42 Tigsas mavap so, "Nēnētm̄ey a nēdēmtig no, ba net vitwag niak sisgoy kē legengenyeg en, Ḡod telep van hiy kē nēvēvēg liwo aē. Nitiy wē yeh so lēg nevet liwo lēnlon, ba til veteg kē n̄a lelam. 43 So namnē wo mak nēk misisgoy legengenyeg, nitiy wē yeh so nēk helm̄ēt. Itōk ēwē hiy nēk so namne wo vitwag ēwē ba nēk tavan lēh lap, veteg den namne wo vōyō ba nēk tavan amnō, a lelo ep mey a tit bah vēhte. 44 Mahē nan nōl tētēhiy nataqn̄ēy, ba nōl nan tit mat vēhte; wa nep nan tit mat vēhte.

45 "So nayn̄ē wo mak nēk misisgoy legengenyeg, itōk so nēk tot m̄ēt. Itōk ēwē hiy nēk so nayn̄ē wo vitwag ēwē ba nēk tavan lēh lap, veteg den nayn̄ē wo vōyō ba nēk tavan amnō. 46 Mahē nan nōl tētēhiy nataqn̄ēy, ba nōl nan tit mat vēhte; wa nep nan tit mat vēhte.

47 "Sowo namte wo mak nēk misisgoy legengenyeg, itōk so nēk lepyak. Itōk ēwē hiy nēk so namte wo vitwag ēwē ba nēk tavan lemyeyen talge non Ḡod, veteg den namte wo vōyō ba nēk tavan amnō. 48 Mahē nan nōl tētēhiy nataqn̄ēy, ba nōl nan tit mat vēhte; wa nep nan tit mat vēhte.

49 "Ḡod qoyo ak wenwen ige del mi nep qeleso net nitēymat negengen mi nanaw so niolol aē. 50 Nanaw nitiy wē yeh so m̄ōk legengen. Ba nanaw nan wo nemlele en, kē tit gon lok vēhte. Atmi ak neh nonmi nivan me qeleso nanaw, tō atmi qultiwag galsi mi natm̄at."