1 Tigsas mavan den Nitiy Ēm̄ Bolol non Ḡod en, tō nitin̄qoy vitwag nonon mavap van hiy kē so, "Vatgo, nēk et. Nevet del ne Ēm̄ non Ḡod gōh nilililwo geh, ba nēm̄ nan mēwēwē geh bah."

2 Tō Tigsas meplu goy kē wo, "?Nēk etet hiy nēm̄ lililwo gōh? Vel ēm̄ geh nen tatamyuy qēt, nevet del geh nen, n̄a lēvētan. Tateh vet nihag letnon, kēy tisisisgoy qēt tiwag mi nēm̄ del."

3 Me atgiy, Tigsas mahag n̄a wotō, nahan Wutwut Ne Olif, tō etet tēqēl hōw Lēm̄ non Ḡod. Tō Pita, Jemes, Jon, wa Andrō, kēy van me hiy Tigsas, kēy bul tēvēlēm tiwag mi kē. 4 Tō kēy vēhge van hiy Tigsas wo, "?Wō nahaphap geh gōh tavan me n̄ēh? ?Ba kemem tet vēglal nēvēglal nan qeleave mahē aso nōqōn̄ nan nivan me?"

5 Tō Tigsas meplu goy kēy so, "Atmi etetgoy galsi kimi, veg net tiple galgal kimi. 6 Veg woqse et tavan me lehek, tō tavap so, ‘Ino gōh Kraēs.’ Ige gōh tagalgal woqse et. 7 Ba mahē kimi wo moyon̄teg noyoy ne vagal, wa nohohole soloteg bepgal so nivan me en, kimi nitog mētēgteg. Nahaphap geh nen tavan me am̄ag, ba et nolsēn qete. 8 Yatkel vōnō totogtog tavale, wa yatkel lelqelqevōnō tepgal mi ige lelqelqevōnō tegha. Niyiy tiyiy yatkel vōnō lemyam. Wa namay tak ige sil. Vel haphap geh gōh, kēy tavan me am̄ag, ba meygōh naqtēqtēg ne memeh mey a tavan me. Nēvēglal geh gōh qeleso nalqōvēn vitwag mey a niyon̄yon̄ memeh so nilep ēntēn.

9 "Atmi etetgoy galsi kimi. Ige sil tētēy kimi, wa kēy tētēy nōyōstiwag liwo so vēvēg kimi. Wa kēy telm̄eh kimi hay lēm̄ tatay non ige Tisrael. Wa kēy tohohole maymay hiy kimi so tig van lengon ige lililwo non kapman, wa lengon ige qēt mayanag. Veg kimi ige mino, ba kimi vasemlō noyoy mino van hiy kēy. 10 Ba kimi toytoy Noyoy Ēwē am̄ag hiy ige sil walēg namyam, tō nage gōh qoyo van me.

11 "Ba kēy tētēy kimi, ba kimi nitog dēmdēm van aē, so kimi tohole qeleave lōyōstiwag. Ḡod telep van nohohole a so kimi so hole. Kimi tit hole vēhte mahgemi. Ba Nuvu Yon̄ qoyo hole heylō kimi. 12 Net tukēg vēh tiy ēthēn van lemney so kēy wuh mat kē. Imam tukēg vēh yantēntēn so kēy wuh mat kēy. Tō ige nētnētm̄ey tetvale goy imam wa tita nonoy, wa kēy tukēg kōyō so kēy wuh mat kōyō. 13 Ba ige sil tepsipteg kimi wa tetvale goy kimi, veg kimi madam tatag no. Ba Ḡod tavaēh ihēte a kē nidēmtig tasga no gaydēn̄ a babah ne qōn̄."

14 (Ige a kēy vatah nōbōk gōh, kēy dēmdēm galsi bevel hohole a Tigsas mavap tō.) Tigsas mavap so, "Daniel mohohole nahaphap het a tak hethet Nitiy Ēm̄ Bolol non Ḡod. Ba kimi tet nage nan titig n̄a Lēm̄ non Ḡod. Mahē kimi et nage gōh en, kimi a togtō Judea en, atmi gityak n̄a wotō geh gēn ba taqbat. 15 So net wo et hag te lelo ēm̄ nonon en, kē tit hayveg lok vēhte lēm̄ nonon, so nilep nahaphap nonon. 16 So net wo lētqē nonon en, kē tit m̄ōl lok vēhte lēm̄ so nivēl namalmal nonon. 17 Ba nemgaysēn yeh veg ige lōqōvēn a notog mi natqay, wa ige a titi lapgetō nisis van hiy ige yantēntēy, kēy toyon̄teg a nehet yeh lamahē anen. 18 Ba atmi tatay veg nahaphap het gōh tit qal vēhte kimi lamahē a nayay nililip nivan me."

19 "Veg lamahē nen nahaphap het nan tavan me, ba net etet qete nage qelenen me am̄ag, meqtēg yak me a Ḡod mitin̄ namyam gaydēn̄ me qiyig agōh. Bastō tateh haphap het liwo se qelenen nivan lokse me an̄ēhte. 20 Ba Ḡod mal dēmvasig bah, so nilep tēqēl me mahē a so nōqōn̄ ne haphap het nivan me aē. Tateh tō en, togtō tateh et niēh. Ba veg kē melep tēqēl namahē nan, tō so nivaēh nisil a kē mal etyak vatag kēy so ige nonon. 21 Lamahē nen, net tavap van hiy kimi so, ‘Net gōh, ikē Kraēs.’ Si net tegha tavap van hiy kimi so, ‘Net nōk, ikē Kraēs.’ Ba atmi nitog dēmdēmtig kēy van. 22 Woqse Kraēs galgal, wa woqse et lēgēlgēg galgal kēy tavan me, tak naphah wa tak nahaphap mey a nisil tamamakē aē so kēy tak vēh. Kēy tak qele gōh so akak etgal so gal ige a Ḡod mal etyak vatag kēy so ige nonon. 23 Nok vasemlō vel haphap gōh van hiy kimi am̄ag, tō kimi so etgoy galgalsi kimi."

24 "Mahē nahaphap het gōh nibah en, nalo nivan me nimlēglēg wa nōwōl tit hin̄yeg vēhte. 25 Nivit del hag alge en, tisisisgoy qēt, wa Ḡod tak vel haphap hag alge en kēy tiyiyeg qēt.✝ 26 Tō mahē nen nisil qoyo et Ēntēn Net nihēw me tiwag mi namlēg, mi naman liwo, wa mi nēlēn̄as liwo. 27 Tō kē qoyo vētleg ige in̄sel nonon walēg namyam. Tō ige in̄sel tēvēl me ige sil vel vōnō del walēg namyam, a Ḡod mal etyak vatag kēy."

28 "Nētētēnge a nayay, kē nivatne kimi qelegēn, mahē nayon nihēwhēw qēt tō so niqtēg taw natawhēn en, tō kimi ēglal so mahē ne ōm̄ōm̄ tēqē nonmi ēgēn. 29 Nage nan qelegēn, mahē kimi et vel haphap gōh nivan me en, tō kimi ēglal so Ēntēn Net sisqet nivan me, ba kē nitig sisqet vatag namte-ēm̄. 30 Hēyhēywē, nok vap van hiy kimi so ige mey n̄ēh togtōkē, kēy tit mat qēt vēhte, gaydēn̄ a nage gōh nivan me. 31 Ḡod tak qelen̄ alge wa antan, ba nohohole mino tit qelen̄ vēhte.

32 "Tateh et niēglal so Ēntēn Net so nivan lok me lelo vēvēh wa lahan qōn̄. Ēntēn Net wa ige in̄sel hag alge en, kēy et ēglal te nōqōn̄ nan. Imam Ḡod mahgen nēglal nōqōn̄ nan. 33 Atmi etgoy galsi kimi, ba tēytēymat vaga, veg kimi et ēglal te so kē tavan me n̄ēh. 34 Kimi so tēymat, qeleso net vitwag nitatal n̄a lepnō tegha. Am̄ag den kē niukēg veteg nēm̄ nonon en, kē mōm̄ōk vel haphap nonon van hiy ige yowyowveg nonon, tō ikēy del en namgumgu namuy aē. Ba kē mavap van hiy net betetgoy mete-ēm̄ en so, ‘Nēk etetgoy galgalsi.’ 35 Tō qeleanen, kimi so etgoy galgalsi kimi, veg kimi et ēglal te so welan ne ēm̄ tavan lok me n̄ēh. Kē wun tavan lok me lemyēpyep, lētnētnēqōn̄, mahē nututu nikokyet, siso nalo nihalyak. 36 Sowo nethap, kē tavan lok ēgē me hiy kimi, tō kē nietvan a kimi nemtimtiy taq qēt. 37 Ba nohohole a nok vap vētday tō van hiy kimi gōh en, nok vap se van hiy nisil del, ‘!Atmi etetgoy!’ "