1 Me atgiy Tigsas mavan tēqēl lokse yow sili bē liwo Kalili, tō kē nivatvatne ige sil. Ba veg woqse sil liwo meh mavan me hiy kē en, tō kē me yem yow lōbō-ōt vitwag, tō kē nihaghiy hōw lelo bō-ōt nan. Ba ige sil mataq soloteg me aslil. 2 Tō Tigsas mavatvatne kēy woqse haphap a lavap tēngeg. Kē mavap so, 3 "Atmi yon̄teg galsi. Net vitwag mavan so nivah niwit lētqē nonon.* 4 Kē meswuy soloteg nōswō wit n̄a lētqē nonon. Tō yatkelgi misisgoy metehal ba ige men van me tō gen qēt. 5 Ba yatkel wit misisgoy lamahē a nevet aē antan, tō kēy memtow togotgo veg nēvētan alge nusu. 6 Ba mahē a nalo nihey maymay meh en, tō nisqo meyen̄ qēt kēy veg nōgōygōyyēn et yow qōqō te. 7 Ba nōswō wit yatkelgi misisgoy lum̄un wolkokon̄ay tō kēy memtow, ba nowolkokon̄ay nan metquy goy kēy tō kēy et ō te nēway. 8 Ba yatkelgi misisgoy lēvētan mey nēwē, tō kēy memtow galsi, tō milililwo, tō mō nēway, yatkelgi nēway son̄wul tēl, yatkelgi son̄wul levete, wa yatkelgi m̄eldēl."

9 Tō Tigsas mavap wo, "Nēdēln̄ami wo aē, ba atmi yon̄teg galgalsi."

10 Mahē a Tigsas nahag mahgen, yatkel et moyon̄teg tō nohohole nonon tiwag mi ige son̄wul nanm̄e vōyō mavan me, mēvēhge kē so niōwtam̄ow nēdēmdēm nevap tēngeg a kē mavap tō. 11 Tō Tigsas mavap van hiy kēy so, "Nok hole m̄ōleg van hiy kimi, nohohole lōn̄veg mey a Ḡod namyanag goy ige sil nonon. Ba ige mey a kēy notog aslil en, no tohohole van hiy kēy mi navap tēngeg vēlēs, 12 tō so,

‘Kēy et, et, et, ba tit et vēglal vēhte,

tō kēy yon̄teg, yon̄teg, yon̄teg, ba tit yon̄teg vēglal vēhte.

So kēy wo moyon̄teg vēglal en,

tō kēy teleh vēh nēdēmdēm nonoy,

tō Ḡod tēdēmveteg nubug nonoy.’ " ✝

13 Tō Tigsas mavap van hiy kēy wo, "?Qeleave? ?Kimi et ēglal qete navap tēngeg gōh? ?Sowo qelenen, tō kimi tēglal qeleave yatkel vap tēngeg? 14 Net a mavah nōswō wit en, ikē qeleso net a nivasemlō nohohole non Ḡod. 15 Yatkel et qele nōswō wit a misisgoy lemtehal. Mahē a kēy moyon̄teg bah Noyoy Ēwē nen en, tō Satan nivan me tō nilepyak nohohole nen den kēy.

16 "Yatkel et qele niwit a misisgoy lēvētan a nevet aē antan. Mahē a kēy moyon̄teg Noyoy Ēwē en, tō kēy mēdēmtig mi namlaklak liwo. 17 Ba nohohole nen et hayveg galsi te van lēdēmdēm nonoy, tō nohohole et tog misin te. Mahē kēy tog lememeh si ige hohole hethet hiy kēy boyoy ēwē gōh, tō kēy ukēg veteg nowmat.

18 "Yatkel et qele nōswō wit a misisgoy lum̄un wolkokon̄ay. Ige gōh, kēy yon̄teg Noyoy Ēwē, 19 ba kēy dēmdēm vēlēs bēh nonoy telemyam. Kēy nemyōs so m̄eye haphap, wa kēy nemyōs yatkel haphap tegtegha se. Ba vel haphap geh gōh, titigoy Noyoy Ēwē gōh, tō tateh ēway geh lēh nonoy.

20 "Ba ige yatkelgi, ikēy qele nōswō wit a misisgoy lēvētan ēwē. Kēy moyon̄teg galsi noyoy, tō kēy melep galsi lēh nonoy wa tō kēy mō nēway, yatkelgi son̄wul tēl, yatkelgi son̄wul levete ba yatkelgi m̄eldēl."

21 Tigsas mavap lokse so, "Net wō niti nuqul, kē tit ququygoy vēhte mi natbey si so nim̄ōk latawle qe. !Tateh! Kē tōm̄ōk nuqul nan letno qul tō nuqul nan tihin̄yeg lō vēh. 22 Tō qelese anen, nēdēmdēm mey nōlōn̄veg en, kē nōlōn̄veg ēwē tō so tavasemlō me atgiy. Namanig ne haphap mey a nabat en, kē takalō me lemtam̄e. 23 Nēdēln̄ami wo aē, ba atmi yon̄teg galgalsi."

24 Tō Tigsas mavap lokse van hiy kēy so, "Nohohole a kimi yon̄yon̄teg tō gōh en, kimi so dēmdēm m̄ōleg van aē. Nahap te nēk mal togyak vatag en, ba Ḡod totog ketket malig se hag van hiy nēk. So kimi wo mēdēmdēm galsi van aē en, Ḡod telep van hiy kimi nololmeyen mey a neketket malig se hag. 25 Net mey a kē mal lep vatag nēdēmdēm ne hohole mino en, kē tēglal malig se van. Ba net mey a kē et lep hōn te nēdēmdēm ne hohole mino en, Ḡod telep yak lok den kē nusu lolmeyen mey a kē tog tēy tō en."

26 Tō Tigsas mavap so, "Vētmahē a Ḡod so nimyanag goy ige sil nonon en, ikē qelegēn. Dēm tow van hiy net vitwag a nivavah nōswō wit lētqē nonon. 27 Mahē niqōn̄ en kē nimtiy wa tō mahē nimyen en kē nimatyak. Kē nivanvan kēlkēl ba nōswō wit motow tō en. Tō kē et ēglal te a so nahap mak tō kē memtow wa milwo. 28 Ba nēvētan mahgen mak tō nōswō wit memtow en, tō kē mak nayon, me atgiy kē nitaw natawhēn bah en, tō kē niō nēwan. 29 Tō mahē a nēwan nimta, net nan nivan tō nihe wa nitotqe m̄ōl me lepnō."

30 Tigsas mavap navap tēngeg vitwag se so, "?Wō lahan mahē a Ḡod so nimyanag goy ige sil nonon aē ōk, tō gēn tavap m̄ōleg vēh namtehal nan qeleave? 31,32 Ikē qeleso nōswō bak a nitiy su yeh den vel sōwō tētēnge del lemyam kē. Mahē a kē misisgoy, tō memtow, wa tō milwo veteg nēqētēnge del, nēwtēwtēn nilililwo yeh, tō ige men tagaleg vēh ninignig nonoy van lēwtēwtēn a mahē melmel."

33 Tigsas mavatvatne ige sil lavap tēngeg a nam̄adeg haytēyēh van a kēy toyon̄teg m̄ōleg vēh. 34 Vel hohole nonon, kē et hole m̄ōleg te van hiy kēy, ba kē mohohole van hiy kēy lavap tēngeg vēlēs. Ba me atgiy, mahē ige nonon mahgey tiwag mi kē, tō kē mavasemlō nēdēmdēm del ne vap tēngeg m̄adeg nen van hiy kēy.

35 Lōqōn̄ nen, lemyēpyep nan, Tigsas mavap van hiy ige nonon so, "Gēn van n̄a tekel bē liwo." 36 Bastō kēy melep nōbō-ōt a Tigsas hagtō aē en, tō kēy hatig tō van veteg ige sil nen. Ba yatkel et madam tatag kēy lōbō-ōt tegtegha nonoy. 37 Kēy hōhō yow nen wah, nelen̄ liwo nihatig, miyip maymay me nen, tō mak nēbē liwo nen melkos a melkos. Tō nēbē niqtēg hayhayveg hay lelo bō-ōt nen, yipteg so nōbō-ōt niyoy. 38 Ba Tigsas entō lekye bō-ōt en nemtiy. Kē mēqēthēlēn̄ mi nēqēthēlēn̄. Tō ige nonon ōlōl matyak kē, tō kēy vap van hiy kē so, "!Vatgo, et van nen! !Sisqet gēn mat, ba nēk et su dēmdēm hōn te aē!"

39 Tō Tigsas nihatig hag tō nigatgoy nelen̄ wo, "!Tog yoyon̄!" Wa tō kē magatgoy se nēbē wo, "!Hal yoyon̄!" Tō nelen̄ nitay, wa vel haphap del nitog yoyon̄ qēt, tō mahē nivan hōw tō nitay lawlaw. 40 Tō Tigsas mavap van hiy ige tin̄qoy nonon so, "?Bahap tō kimi mētēgteg? ?Kimi et dēmtig qete?"

41 Ba ikēy del memtēgteg qēt, tō kēy vēy hohole lok hiy kēy mahgey wo, "!Yēhē! ?Wō nahan et gōh? Nelen̄ wa nēbē, kōyō del moyon̄teg kē."