Mere Tamakdala met Tigsas
9 Mahē Tigsas mēh lokse den namatmat Lasante a lemtap qōtō en, kē maklō kē am̄ag hiy Mere Tamakdala. Mere gōh a Tigsas mōvōylō tō nuvu het liviyō den kē en. 10 Mere met bah Tigsas en, tō kē nivan niet ige nonon Tigsas ēgēn, ba kēy nahag lolwon wa ten̄ geh tō nen. Tō Mere ta Makdala nivasem van hiy kēy noyoy gōh ēgēn. 11 Kēy moyon̄teg noyoy nen a so Tigsas mahatig lok den namatmat, wa Mere mal etsas Tigsas, ba kēy et dēmtig te nohohole nonon.
Yoge yowyowveg nonon met Tigsas
12 Me atgiy en, Tigsas maklō kē van hiy yoge vōyō nonon mahē kōyō mavan me den lepnō liwo vitwag, tō kōyō vanvan tatag namtehal. 13 Tō kōyō m̄ōl lok me, tō vasemlō noyoy gōh van hiy ige nonon Tigsas yatkelgi, ba kēy et dēmtig te kōyō.
Tigsas maklō kē van hiy ige hal nonon son̄wul nanm̄e vitwag
14 Me atgiy lokse, Tigsas makalō me hiy ige nonon son̄wul nanm̄e vitwag, mahē a kēy gengen. Tō Tigsas nihole maymay van hiy kēy veg kēy et dēmtig te ige mey a met tō kē, a so kē mahatig lokse den namatmat. Kē mavap so nēqtēy namaymay veg kēy et dēmtig te. 15 Tō Tigsas mavap van hiy ige nonon so, "Kimi van vel vōnō del lemyam ba vasemlō noyoy ēwē van hiy nisil del lemyam. 16 Ihēte a nēdēmtig noyoy ēwē gōh tō nilep navasugyon̄ en, Ḡod tavaēh kē. Ba ihēte a et dēmtig te en, Ḡod tēvēvēg kē, wa tit vaēh vēhte kē. 17 Tō nēvēglal qelegōh totog tiwag mi ige mēy a nēdēmtig: Kēy tōvōyyak nuvu het lehek. Kēy tohohole mi nagatgat gayaq. 18 Kēy tētēy nam̄at mey a nin̄itn̄it mat net, ba kēy tit mat vēhte aē. So kēy wo min nage mey nehet, kēy tit yon̄teg vēhte nehet aē. Wa tō kēy tōm̄ōk namney apwon ige gom, tō kēy tēwē lokse."
19 Sōwlē, mahē Welan Tigsas mohole bah hiy kēy en, tō Ḡod nilep kal kē hag lōtōk ēgēn. Tō Tigsas nihaghiy hōw lemtō non Ḡod.
20 Tō me atgiy, ige nonon mavan vel vōnō del, tō toytoy noyoy ēwē. Tō Welan memgumgu tiwag mi kēy, wa mak nohohole nonoy mitig maymay qēt mi woqse vahah, so nivasemlō so hohole nonoy en hēyhēywē. Amen.