Ige Tanasaret manahiy lō Tigsas
1 Tigsas mukēg mahē nen, tō nivan lokse litiy vōnō nonon n̄a Nasaret, ba ige nonon mavan tatag kē. 2 Ba Lōqōn̄ M̄ōkheg, Tigsas meqtēg vatvatne n̄a lelo ēm̄ tatay. Ba mahē a ige sil moyon̄teg vel hohole del nonon en, kēy mamamakē aē a nēkēkēn, tō kēy vap so, "!Ēy! ?Wō kē melep nahaphap del gōh lōme ave? ?Tō kē melep nololmeyen gōh qeleave? ?Qeleave tō kē mak naphah nen? 3 Gēn nēglal kē. Ikē net bowoswos ēm̄, tita nonon Mere. Ēthēn wa Jemes, Jōsēp, Judas ba Simon. Ba ige yatētētan tog tiwag tō mi gēn agōh." Ba kēy et malaklak te veg kē, kēy et buste kē.
4 Tō Tigsas mavap van hiy kēy so, "Ba net lēgēlgēg non Ḡod en, ige sil telepnō tegha tēdēmap kē. Ba ige telepnō nonon tiwag mi tiy ige nonon, kēy tit dēmap vēhte kē." 5 Tō Tigsas et ak hōn te naphah lepnō anen, ba kē matan̄ ēwē namnen apwon yatkel gom, tō kēy mēwē lokse. 6 Ba Tigsas mamamakē aē a nēkēkēn veg ige sil telepnō nonon et dēmtig te kē.
Tigsas mēvētleg lō ige hal nonon son̄wul nanm̄e vōyō, so kēy toytoy
Tō Tigsas mavan kēlkēl, kē mavan heylō me lepnō geh me nen, tō nivatvatne ige sil.