João 11

Ogwa ba Ladjalo

1 Ta Betania ɛdaka na moto omɔti Ladjalo ona ɔdaka na epeko, adaka na bangɛnɛ ba nde Malia na Malata. 2 Malia adaka mwali ona osopa malasi ta bigbota ba Kumu ko abihakoa na swee dja nde, ko ɛdaka mwanango Ladjalo moto ɔdaka na epeko. – 3 Bangɛnɛ babae ba Ladjalo baloma moto abala na Yesu boo: «Kumu, moto ona okapale wɛ apekaka.» 4 Ehole ɛosɔ Yesu mosise mua, abala boo: «Epeko ɛ Ladjalo emowoetelea; edii oko tina ɛ oenɛmedja ekumu ɛ Ndjambe, ko bɛngɛ Mwana ɔ Ndjambe akumedjame na yu.» 5 Yesu apalaka Malata na mwanango Malia, na Ladjalo koko. 6 Noko ena ɔoka yo boo Ladjalo apekaka, anɛngɛdja koko maswi mabae ta esika; ɛdaka yo, 7 ngɔngɔ djia, abala na batingami ba nde boo: «Lasɔmbeni ta Yuda.» 8 Batingami bamosɔmbɛdja boo: «Molehi, enɔi ma ehole mokɛkɛ Bayuda bahɔmbaki baowoe na ndeke ko ɔpalaka ɔsɔmbe koko oho?» 9 Yesu abasɔmbɛdja boo: «Busa boditi na bihole doomi na bibae? Ekadaa boo moto adali na busa, atataa mabaku tina ɛ boo adii oenɛ ohuu ba ngondo hee. 10 Endolo moto akadala na bulu, adii otaa mabaku, tina ɛ boo ohuu boditi ta tei ɛ nde.» 11 Ngɔngɔ dja obala bea, Yesu abakia boo: «Mopalani ɔ boso Ladjalo ahwɛli hiɔ, endolo nakɛi amongɔdja.» 12 Batingami babala na nde boo: «Kumu, ekadaa boo ahwɛli hiɔ, ahelalea.» 13 Ena bea Yesu abalaka tina ɛ ogwa, endolo batingami balɛdjaka boo ɛdaka hiɔ dja modjebeano. 14 Na bea Yesu abala na bu ohuu boo: «Ladjalo agwi. 15 Nadii na sepi tina ɛ boo odakitini oho, tina ɛ boo modjɔ mua mopingedjalea edhimeli ɛ boono. Endolo lakɛɛni mbuti na nde.» 16 Bea Toma –, ɔbeaka bo Ipasa – abala na batingami bakina boo: «Lakɛɛni oho, iso koko, tina ɛ ogwa engbanga iso na nde!»

Yesu adii ipuso na mohelo

17 Ɔimea yo, Yesu aoka boo Ladjalo apuseama ehele ta ikila maswi manei. 18 Betania ɛdaka mbuti na Yelusalɛmɛ mbuti na kilomɛtɛlɛ isato, 19 Bayuda bike badoa odii Malata nɔbɔ Malia tina ɛ obapingedja milema ta ogwa ba mwangwabu moomi. 20 Ehole ɛoka Malata boo Yesu aimeake, akɛɛ asaka na nde; endolo Malia adikaa adii ta ndako. 21 Malata abala na Yesu boo: «Kumu, okɔki wɛ daa haa, eke mwaninga agwiti. 22 Endolo noko hadɛdi, nadjebi boo Ndjambe aopalea eka esusu emohɔdjalea wɛ.» 23 Yesu abala na nde boo: «Mwangwao apusoalea.» 24 Malata amosɔmbɛdja boo: «Nadjebaka boo apusoamabi ta iswi la suka ehole ɛ opusoama ba bago.» 25 Yesu abala na nde boo: «Mbai nadii ipuso na mohelo. Moto ona odimeakani ahelabi, noko ekadaa boo agwi; 26 ona ɔhelaka ko ɔdhimeakani agwɛtebi noko osinɛɛ. Ɔdhimaka bea?» – 27 Maata asɔmbɛdja boo: «Edii bea, Kumu, nadhimi odii Masia, Mwana ɔ Ndjambe, ona ɔboanaka odoa ta ngondo.»

Yesu ayei

28 Ngɔngɔ dja Maata obala bea, akɛɛ abea ngɛnɛ o nde Malia ko abala na nde na popoli boo: «Molehi aimei aobeaka.» 29 Ehole ɛoka Malia bea, aema ko akɛɛ pɛpɛlɛ odii Yesu. 30 Ena bea Yesu aipetaka ingea ta ngando, endolo adaka oko ta esika ena esaka yo nɔbɔ Malata. 31 Bayuda ibadaka ta ndako engbanga na Malia tina ɛ omopingedja molema ɔenɛ bo boo aema pɛpɛlɛ, bamokimana. Balɛdjaka boo akɛi ta ikila tina ɛ oyea. 32 Ɔimea Malia ta esika ɛdaka Yesu; ɔmoenɛ yo, asadumba ta mako ma nde ko abala na nde boo: «Kumu, okɔki wɛ daa haa, eke mwaninga agwiti.» 33 Yesu ɔenɛ yo boo Malia ayeaka, engbanga na Bayuda ibadua na nde. Aoka ndjokwa enɛnɛ ko saya ta molema, 34 ko abahɔdja boo: «Omopuseino hɔ?» Bamosɔmbɛdja boo: «Kumu, dua aindje.» 35 Yesu ayea. 36 Na bea Bayuda babala boo: «Hokeani, moda mamopalaka yo!» 37 Endolo bakina ta ndanda ɛ bobo babalaka boo: «Yo moto ɔɔheledja miso ma moto ɔɔgwa miso, moda ndani ahɔniti osia boo Ladjalo atagwa?»

Ladjalo asɔmbi ta mohelo

38 Yesu, aoka koko ndjokwa enɛnɛ ta molema, akɛɛ ta ikila. Ɛdaka ikila la mondeke iladipamaka na mondeke ta eingeli ɛ lu. 39 Yesu abala na bu boo: «Dongedjani mondeke.» Malata, ngɛnɛ ɛ mowei, abala na nde boo: «Kumu, akɔi so, ekoki maswi manei donga okundami yo.» 40 Endolo Yesu amosɔmbɛdja boo: «Nabalakiti na wɛ? Okadhima, oenɛlea ekumu ɛ Ndjambe.» 41 Na bea badongedja mondeke. Yesu akaloa miso o diko ko abala boo: «Tata, naosakoi tina ɛ boo ookini. 42 Nadjebi boo okaokeni bihole bisusu, endolo nabalaka bea tina ɛ bato bii bahikini, bɛngɛ badhime boo ɔlomani.» 43 Ngɔngɔ dja obala bea, agama na ngulu boo: «Ladjalo, imana!» 44 Mowei aimana, mabɔ na mako madingamake na biale ba bisendja ko mbanda ehuamake na esendja. Bea Yesu abala boo: «Mololoani ko mokinani akɛɛ.»