1 Oko ta ehole ena, batingami babatama mbuti na Yesu ko bamohɔdja boo: «Moto ɔnɔi na tina ta Okumu ba busa nda?» 2 Yesu abea mwana omɔti mokɛkɛ, amoemea ta ndanda ɛ bobo 3 ko abala boo: nabalaka na nu, sooti boo: omiti sɔmbɔtɔnɔni ko nga omiti imeani elɛngɛɛ bana bakɛkɛ, oingeetebini ta Okumu ba busa. 4 Ta tina ena moto mosusu osatitedjalea elɛngɛɛ mwana mokɛkɛ hoo adabi moto ɔnɔi na tina ta Okumu ba busa. 5 Ko moto mosusu oosi ta kombe ɛ mbai mwana mokɛkɛ elɛngɛɛ hoo, aɔsi mbai mɛɛnɛ.

6 «Endolo nga moto omɔti akakwedja ta isumu omɔti ta ndanda ɛ bana bakɛkɛ ibadhimeeni, enɔi opele ta tina ɛ nde bamonange mondeke monɛnɛ ta dɔli ko bamomae ta madiba ma mbɛngɛ ma ibeke inɛnɛ. 7 Ndjokwa ndani tina ɛ ngondo elɔkɛɛ boo midjɔ imikwedjai bato ta masumu midii mike! Midjɔ mia miboani oko madae, endolo ndjokwa ndani tina ɛ moto okamidodjae na ndjia ɛ nde! 8 Nga ekada tina ɛ ebɔ kaoko eko ɛ wɛ ekaokola ta isumu, yelena ko yedumba ohali na wɛ; tina ɛ boo enɔi opele oingea ta mohelo na ebɔ emɔti kaoko na eko emɔti ta esika ɛ boo odae na mabɔ mabae kaoko na mako mabae ko ɔdumbame ta mosa ma kɔbili. 9 Ko nga ekada diso la wɛ likaokole ta isumu, lidongedja ko lidumba ohali na wɛ; tina ɛ enɔi opele tina ɛ wɛ oingea ta mohelo na diso imɔti ta esika ɛ boo ɔdae na miso mabae ko odumbame ta mosa ma gena.»

10 «Tomangataanani boo otatsiolani omɔti ɔ bana bii bakɛkɛ; tina ɛ boo nabalaka na nu sooti, babwɛndi ba bobo odiko bakaenɛ bihole bisusu mbanda ɛ Tata ɔ mbai ona odii odiko.» [11 Tina ɛ boo Mwana ɔ Moto adoa asikoa bato ibabunga ndjia.]

12 «Olɛdjakano enao? Nga moto omɔti akada na bhata mokama ko omɔti ɔ bobo abungi, akinetelea bhata tuku ibua na ibua diko la ngomba bɛngɛ boo akɛɛ ahomba omɔti ona obungi? 13 Ko, nga akamoenɛ, nabali na nu sooti adalea na sepi enɛnɛ tina ɛ bhata ona onɔ bhata tuku ibua na ibua iba pɛpɛ obunga. 14 Edii moda momɔti, Tata ɔ boono ona odii odiko atapalaka boo omɔti ta tei ɛ bana bii abunge.»

15 «Nga mwangwao akaokɔmɛɛ obe, kɛɛ amoinedjae obe ba nde ino babae. Nga akaokea, omosɔmbɛdjai ta ndjia epele. 16 Endolo amitiokea, tomba moto okina kaoko bato babae engbanga na wɛ, tina ɛ boo, moda mabalaka Makomi, "sooti ɛ modjɔ mosusu ekadhimame oko na tati ɛ bato babae kaoko basato*." 17 Endolo akalona obaokea, djebedja Ekelesia; ko akalona ookea Ekelesia, motombani elɛngɛɛ mopangano kaoko moputedjɛli ɔ puti.»

18 «Nabalaka na nu, sooti boo: misusu minangaleano haa ta kpɔtɔ minangamalea koko ta busa; misusu miloloalea no haa ta kpɔtɔ miloloamalea ta busa.»

19 «Nabalaka koko na nu boo nga ekada bato babae ta ndanda ɛ boono, haa ta kpɔtɔ, baokani tina ɛ osɛnge eka ndani, Tata odii odiko abapalea yo. 20 Tina ɛ boo esika eputoani bato babae kaoko basato ta kombe ɛ mbai, nadii ena ta ndanda ɛ bobo.»

21 Bea Piɛlɛ abatama mbuti na Yesu ko amohɔdja boo: «Kumu, mbala djeka nahɔni oyɛɛ mwaninga ehole ekɔmɛini yo obe? Mbunoko mbala saambo?» 22 Yesu amosɔmbɛdja boo: «Nabaliti na wɛ mbunoko mbala saambo, endolo tuku saambo mbala saambo. 23 Edii tina ena, Okumu ba diko: bokoani na kumu omɔti ona ɔpalaka abɔngɛdjae na basali ba nde midjɔ ma falanga. 24 Ehole ebandi yo oindja midjɔ mia, badoa na mosali omɔti ona odaka na nyongo ɛ nde ɛ falanga dja bibende koto doomi. 25 Elɛngɛɛ otaka yo eka ɛ oputa; kumu ɔ nde aloma boo bamotɛke, engbanga na mwali ɔ nde, na bana ba nde ko na leka la nde losusu bɛngɛ boo apute nyongo ɛ nde. 26 Endolo mosali ona akwa magunda boso ba nde ko abala boo: "Kumu ikeani molema ko naputalea nyongo ɛ wɛ esusu!" 27 Kumu amookea ndjokwa: amoyɛɛ na nyongo ɛ nde ko amokina akɛɛ. 28 Ena oimana yo, asaka na minande mosali ona ɔbeka odii yo falanga dja bibende mokama momɔti. Amopea, amohinyia ta moholi ko abala na nde boo: "Puta nyongo ɛ mbai!" 29 Minande akwa magunda ta mako ma nde ko amongɔɔnɔ boo: "Ikiani molema, naputalea nyongo ɛ wɛ!" 30 Endolo yo alona; akɛɛ amomaa ta ndako ɛ bɔlɔkɔ mbunoko ehole abɛtɛlea yo oputa nyongo ɛ nde. 31 Ehole ɛenɛ baminde ba mosala moda manɔɔ modjɔ mua, baoka ndjokwa enɛnɛ ko bakɛɛ atɔndɔ midjɔ misusu odii kumu ɔ bobo. 32 Bea kumu abea mosali ona ko abala na nde boo: "Mosali mobe! Mbai naoyɛɛ nyongo ɛ wɛ esusu ɛdaka na wɛ odii mbai tina ɛ boo ongɔɔnɔni. 33 Okɔkiti okea minawɛ ndjokwa moda maokea mbai wɛ." 34 Ko kumu ɔ nde alemoa ko amokaba ta mabɔ ma basindjili ba bolɔkɔ mbunoko ehole eputalea yo nyongo esusu.»

35 Ko Yesu abakea: «Edii oko moda mua Tata odii odiko aokɔbini nga moto na moto ta ndanda ɛ boono amiti yɛɛ mwanango na molema ma nde mosusu.»