1 Ngɔngɔ dja sabata, na hindihindi ɛ busa ba eyenga, Malia ɔ Magadala na Malia okina bakɛɛ aindja mobombo. 2 Ambuku, mokpɔtɔ makumana; obwɛndi ɔ Kumu atita donga ta busa, ahilingoanedja mondeke ma mobombo ko adaa diko la mu. 3 Adaka angɛngɛ elengɛɛ mokaikai ko bisendja ba nde badaka bipu elengɛɛ monyɛngɛ. 4 Basindjili bangongoma na bɔɔ ko baimea elɛngɛɛ bato bago. 5 Endolo obwɛndi abala na bali boo: «Pɛpɛ obangani. Nadjebi boo ɔhombakani Yesu, ona ɔbakama ta ekulusu. 6 Aditi haa, apusoi ta ndanda ɛ bago moda imabala yo. Doa aindjeni esika edaki mokuku ma nde mosambi. 7 Kɛɛni pɛpɛlɛ adjebedja batingami ba nde boo: "Apusoi ta ndanda ɛ bago ko asuaki boso aombani ta Galilai; omoenɛleani oho." Hokeani modjɔ modaki na mbai boo naotɔndɔeni.» 8 Badonga pɛpɛlɛ ta mobombo, balumake na bɔɔ ko na sepi enɛnɛ, bapeta tina ɛ okɛ atɔndɔɔ gala odii batingami ba Yesu. 9 Ambuku, Yesu akɛɛ asaka na bu ko abala na bu boo: «Ndese ɛ boono!» Babatama na nde, babinga mako ma nde ko bakwa magunda boso ba nde. 10 Yesu abala na bu boo: «Pɛpɛ obangani oko. Kɛɛ atɔndɔeni banainga boo banɔe ta Galilai: Edii oho esika eenɛleani bo.»

11 Ehole ɛdaka bo badala na ndjia, basindjili bakina bakɛɛ ta ibonga atɔndɔɔ bakumu ba banganga ba Ndjambe midjɔ misusu imakɔɔmɔ. 12 Bakumu ba banganga ba Ndjambe baputoana na basuku ba ngando: ngɔngɔ dja odhimeana, bapa falanga djike odii basindjili 13 ko babala na bu boo: «Tɔndɔni boo batingami ba moto ona badoi aiba mokuku ma nde na bulu, ehole edakiso lohwɛli. 14 Ko nga gupunɛle akadjeba, lomogɔmbɛdjalea ko lokɔlea na ngulu boo ɔdaeni pɛpɛ otungeama.» 15 Basindjili batomba falanga ko bakɔɔ oko moda mabaloma bo. Isolo dia lanangana ta tei ɛ Bayuda ko ikabalame mbunoko busabu.

16 Batingami doomi na omɔti bakɛɛ ta Galilai, ta ngomba ena ɛbatɔndɔ Yesu boo asake na bu. 17 Ehole ɛmoenɛ bo, bakwa magunda boso ba nde; endolo bakina ta ndanda ɛ bobo, badaka na kitɛ. 18 Yesu abatama na bu ko abala boo: «Kpati esusu epami na mbai odiko ko ta kpɔtɔ. 19 Bea kɛɛni ta bikomi bisusu ko baimedjani batingami; bainani ta kombe ɛ Tata, ɛ Mwana na ɛ Mwembo Mosɛnɔke, 20 ko balehani basume midjɔ misusu maolomani mbai. Djebani opele boo: nadii engbanga na nu maswi masusu mbunoko suka ɛ ngondo.»