1 «Tina ɛ boo hokea, moda modii Okumu ba diko: edabi elengɛɛ moswa gue ɛ vino ona ɔimana sɔɔ mɛɛnɛ bɛngɛ atombe basali tina ɛ osala ta gue ɛ nde. 2 Adhimeana na bu boo moto na moto adihake iputi la falanga emɔti ɛ ebende tina ɛ mosala ma iswi imɔti, ko abaloma ta gue ɛ nde ɛ vino. 3 Aimana koko ta ehole ɛ ibua ɛ sɔɔ ko aenɛ bato bakina baemi ta djaando pɛpɛ mosala ma osala. 4 Abala na bu boo: "Ino koko kɛɛni asala ta gue ɛ mbai ɛ vino ko naopaleani iputi la odjoo ilikoki." 5 Bea bakɛɛ oho. Moswa gue aimana koko ta ehole ɛ midi, ko ta ehole ɛ basato ngɔngɔ dja midi ko akɔɔ oko moda momɔti. 6 Aimana, ta ehole ɛ batano ɛ mɔkɔmɔkɔ, aenɛ koko bato baemi ta esika ena ɛ masaka. Abala na bu boo: "Tina eemi no bea busa bosusu pɛpɛ osala noko mosala momɔti nda?" 7 Bamosɔmbɛdja boo: "Tina ɛ boo moto alotombiti ta mosala." Bea abala na bu boo: "Ekadaa bea, ino koko, kɛɛ asaleni ta gue ɛ mbai ɛ vino."

8 Ehole ɛimea mɔkɔmɔkɔ, moswa gue ɛ vino abala na modaledjeli ɔ misala ma gue boo: "Bea basala basusu ko baputa. Banga na bato ibatombi mbai ngɔngɔ ko sukedja na bato ibatombi mbai boso." 9 Bia ibabanga mosala ta ehole ɛ batano ɛ mɔkɔmɔkɔ badoa ko badiha omɔti na omɔti falanga ɛ ebende emɔti. 10 Ehole ɛimea polo ɛ bato ibatomba bo ta mosala boso, balɛdjaka boo badihalea falanga djike onɔ; endolo babapa koko omɔti na omɔti falanga ɛ ebende emɔti. 11 Ehole ɛyetomba bo, bahɔlɔkɔnɔ na moswa gue 12 ko babala boo: "Bato ibatombi wɛ ngɔngɔ basali etoko ehole emɔti ko obaputi moda momɔti na iso ibasali mosala mopipo busa bosusu ta diso la busa ipipo!" 13 Endolo moswa gue asɔmbɛdja omɔti ɔ bobo boo: "Mopalani ɔ mbai, naokɔiti obe. Lookanakiti boo ɔsale mosala tina ɛ iputi la falanga emɔti ɛ ebende? 14 Tomba iputi la wɛ ko kɛɛ. Napalea moto ɔ ngɔngɔ iputi moda momɔti na dii liopi mbai. 15 Naditi na enɔli ɛ okɔ na falanga dja mbai misusu mipalaka mbai? Olemoi na mbai tina ɛ boo nadii moto mopele?" 16 Bea, Yesu abakea boo, bato ba ngɔngɔ badabi bato ba boso ko bato ba boso badabi bato ba ngɔngɔ.»

17 Yesu adaka akɛɛ ta Yelusalɛmɛ. Akola batingami ba nde doomi na babae oyɛɛlɛ ko abala na bu, ena badale boo: 18 «Hokamedjanini, oho Mwana ɔ moto akabamalea ta mabɔ ma bakumu ba banganga ba Ndjambe na bato ba edjebeli ɛ mibeko. Bamolenealea etumbu ɛ ogwa 19 ko bamokabalea ta mabɔ ma bapagano, bɛngɛ boo bamotae, bamobome pimbo ko bamobake ta ekulusu. Ko iswi la basato, apusoalea.»

20 Bea mwali ɔ Djebedai adoa odii Yesu engbanga na bana ba nde baami babae; akwa magunda boso ba nde tina ɛ omosɛngɛ modjɔ momɔti. 21 Yesu amohɔdja boo: «Ɛpalaka wɛ?» Amosɔmbedja boo: «Bunedjani boo bana ba mbai babae baami badae ta tei Okumu ba wɛ omɔti ta dɔngɔ la ebɔ ɛ wɛ ɛ baami ko okina ta dɔngɔ la ebɔ ɛ wɛ ɛ bali.» - 22 Yesu abasɔmbɛdja boo: «Otadjebakani modjɔ imasɛngɛkɛ no. Ohɔnini omwa kɔbɔ ɛ monɔngɔ eemwalea mbai?» - Bamosɔmbɛdja boo: «Lohɔni oyemwa.» 23 Yesu abala na bu boo: «Sooti, omwaleani kɔbɔ eemwalea mbai. Endolo modjɔ ma oda ta dɔngɔ la ebɔ ɛ mbai ɛ baami kaoko ta dɔngɔ ɛ mbai ɛ bali; mbai natahɔnɔ opa enɔli; bisika bia bipamabi odii bato ibabɔngɛdja Tata tina ɛ bu.»

24 Ehole ɛoka batingami bia bakina doomi midjɔ mia, baisepa na banangwabu babae. 25 Bea Yesu ababea ibo basusu ko abala na bu boo: «Odjebakani boo bakumu ba bikomi bakakondjɛ bato ko bakulaka ba bikomi bakanɔngɛdjae bato ibadii nase dja ekumu ɛ bobo. 26 Eboaniti boo ɛdae bea ta ndanda ɛ boono. Endolo moto mosusu ɔpalaka adae moto ɔ tina ta ndanda ɛ boono adae mosali ɔ boono, 27 ko nga omɔti ɔ boono akapala oda moto ɔ boso, adae mobuli ɔ boono: 28 Tina ɛ boo Mwana ɔ moto aidoa bɛngɛ bamosalee, endolo adoa asalea bato, na opa mohelo ma nde elɛngɛɛ isiko la bato bike.»

29 Ehole ɛdonga Yesu na batingami ba nde ta Yeliko, emumu ɛ bato ɛmokimana. 30 Bato bagwa miso babae badaka badii ta mokpɛngɔ ma ndjia baoka Yesu anɔe; bagama boo: «Kumu, Mwana ɔ Davidi, lookea ndjokwa!» 31 Bato babagamea bɛngɛ badipe minɔkɔ, endolo bagama koko na ngulu boo: «Kumu, Mwana ɔ Davidi, lookea ndjokwa!» 32 Yesu aemaa, ababea ko abala na bu boo: «Ɛpalaka no nakɔe ta tina ɛ boono yee?» 33 Bamosɔmbɛdja boo: «Kumu, kɔɔ boo laenɛ.» 34 Yesu abaokea ndjokwa abinga miso ma bobo; ambuku, baenɛ ko bamokimana.