1 Ehole ɛenɛ Yesu emumu ɛ bato, aihwea ta ngomba ko adaa. Batingami ba nde babatama mbuti na nde 2 ko abanga obaleha boo:

3 «Sepi odii bia ibasaenɛkɛ bakwali ta mwembo,

tina ɛ boo Okumu ba busa bodii ba bobo!

4 Sepi odii bia ibayeaka,

tina boo Ndjambe abapingedjabi!

5 Sepi odii bato ba bwɛli,

tina ɛ boo basangoabi mokpɔtɔ!

6 Sepi odii bato ibadii na ndja ko ibadii na posa ɛ odjoo

tina ɛ boo bagolabi!

7 Sepi odii bato bakaoke bato bakina ndjokwa,

tina ɛ boo baokeamabi ndjokwa!

8 Sepi odii bia ibadii na milema misɛnɔke,

tina ɛ boo baenɛbi Ndjambe!

9 Sepi odii bia ibakapɛ ogoo,

tina ɛ boo babeamabi bana ba Ndjambe!

10 Sepi odii bia ibanyɔkolɔkɔ bo tina ɛ odjoo,

tina ɛ boo Okumu ba Ndjambe bodii ba bobo!

11 Sepi ɛ boono ehole ɛosingakani bo ko ɛonyɔkɔlɔkɔni bo, ehole ɛokoseakani bo midjɔ mindumba na mindumba diko la mbai. 12 Sepani ko daani na monanga, tina ɛ boo odabini na iputi inɛnɛ ta busa; tina ɛ boo edii oko moda mua momɔti imanyɔkɔlɔ bo batɛli ibadaka boso ba boono.»

13 «Ino odini mokwa ma ngondo. Endolo mokwa mokasia ngɛngɛ, moda ndani bahɔni koko osɔmbɛdja ngɛngɛ ɛ mu? Modɛtelea koko na tina; bamodumbalea osokolu, ko bato bamominakakalea.»

14 «Ino odini ihuu la ngondo. Ibonga ilipikami diko la ngomba lihɔniti obombama. 15 Tebayodjae moinda tina ɛ omoisa nase dja poke. Endolo, bakamobakee diko la mesa tina opaa ohuu odii bato bia ibadii ta tei ɛ ndako. 16 Yɛɛ ihuu la boono langɛngɛ boso ba bato basusu, bɛngɛ boo baenɛ misala mipele ma boono ko basakoe Sangwanu ona odii ta busa.»

17 «Pɛpɛ olɛdjani boo nadoa adongedja Mobeko kaoko batɛli; naidoa tina ɛ odongedja; endolo tina ɛ okokedja. 18 Nabalaka na nu sooti boo: boso boo diko na kpɔtɔ ladimoe, pɛpɛ ikomi noko imɔti ilinɔi na okɛkɛ ihɔni odonga ta tei ɛ Mobeko, mbunoko okokedjama ba midjɔ misusu. 19 Bea, moto ona odongedjabi mobeko momɔti imonɔi na okɛkɛ, ko olehabi bato bakina bakoe moda mua, bamotombabi moto onɔi na okɛkɛ ta Okumu ba diko. Endolo moto osumabi ko olehabi Mibeko mii odii bato bakina, adabi moto monɛnɛ ta Okumu ba diko. 20 Nabalaka na nu sooti boo: nga odjoo ba boono bomiti nɔɔ buu ba bato ba edjebeli ɛ mibeko na Bafalusai, oingetebini ta Okumu ba diko.»

21 «Ɔokani babala na bataatasu boo: "pɛpɛ oowa moto; moto mosusu oowoi moto okina aboani na esambi boso ba badjudji." 22 Na bea, mbai nabali na nu boo: moto mosusu ookei mwanango kɛlɛ aboani na esambi boso ba djudji; ona obali na mwanango boo: "endanga" aboani na esambi ta ibolea inɛnɛ; ona obali na mwanango boo: "elole" aboani odumbama ta mosa ma gena. 23 Okakɛɛ apa epeeli boso ba kinda ɛ mbeka ko olɛdjai boo odii na modjɔ na mwangwao, 24 kina epeeli ɛ wɛ boso ba kinda ɛ mbeka, ko kɛɛ boso ahomba ogoo na mwangwao; ngɔngɔ djia sɔmbɔ ko kɛɛ apɛ epeeli ɛ wɛ odii Ndjambe.»

25 «Nga okadaa na modjɔ na moto omɔti, kɔɔ pɛpɛlɛ boo ɔokane nɔnɔ nde ehole edii no na ndjia. Ta bɔɔ ba boo moto odii na wɛ na ikambo asaka okaba ta mabɔ ma djudji, djudji asaka onɔdja ta mabɔ ma pɔlisi ko pɔlisi asaka omaa ta bɔlɔkɔ. 26 Nabali na wɛ sooti boo: oimanetelea ena oko okaputa nyongo ɛ wɛ esusu.»

27 «Ɔokaani babala boo: "pɛpɛ okɔ bɔɔli." 28 Endolo, mbai nabali na nu boo: moomi mosusu oohokei mwali na malɛi ma omomungoa akɔi bɔɔli nɔbɔ nde ta molema. 29 Nga diiso la wɛ la ebɔ ɛ baami likaotɛdja ibaku, lidongedja ko lidumba ohali na wɛ: enɔi na opele tina ɛ wɛ obungedja enama ɛ wɛ ɛ emɔti na boo ɔdumbame mokuku ma wɛ mosusu ta ipelu. 30 Nga ebɔ ɛ wɛ ɛ baami ekaotɛdja ibaku yelena ko yedumba ohali na wɛ; enɔi na opele tina ɛ wɛ obungedja enama ɛ mokuku emɔti ta esika ɛ boo mokuku ma wɛ mosusu madumbame ta ipelu.»

31 «Ɔokaani babala koko boo: "yɛɛ moomi ona oodongedjai mwali ɔ nde amopɛ mokanda ma oowa moki." 32 Endolo, mbai nabali na nu boo: moomi mosusu odongedjai mwali ɔ nde ta moki, dongedja oko mwali ona akakwaa na bɔɔli, amodipoi ndjia ɛ ndukeli; ko moomi ona oobali mwali ona ɔdongedja bo ta moki akɔi bɔɔli.»

33 «Ɔokaani koko babala na bataatasu boo: "Pɛpɛ olena seleka ɛ epulu, endolo kokedja mbuno idjapa wɛ na olena seleka boso ba Kumu." 34 Endolo, mbai nabalaka na nu boo pɛpɛ olena selake: edae na kombe ɛ busa, tina ɛ boo edii gbɛndɛ ɛ Ndjambe; 35 kaoko na kombe ɛ ngondo tina ɛ boo edii ebakeli ɛ Ndjambe ɛ mako; kaoko na kombe ɛ Yelusalɛmɛ tina ɛ boo edii ibonga la Kumu monɛnɛ. 36 Pɛpɛ olena seleka na ndjia ɛ molo ma wɛ, tina ɛ boo otahɔnɔ oimedja moswee ma wɛ momɔti mopu kaoko mohindo. 37 Balani boo: "edii bea" nga ekada bea, "pɛpɛ" nga ekadaa pɛpɛ. Midjɔ misusu imikabakee bo mikadonge odii Mokosi.»

38 «Ɔokaani babala boo: "Diiso tina ɛ diiso ko diino tina ɛ diino." 39 Endolo, mbai nabalaka na nu boo pɛpɛ obukanedja obe na moto ookɔi obe. Nga moto akaoboma mbata ta mobanga ma ebɔ ɛ baami, molɛkɛɛ koko mobanga ma ebɔ ɛ bali. 40 Nga moto akapala aopunde tina ɛ otomba esendja ɛ wɛ, mokinea koko mokoto ma wɛ. 41 Nga moto akaoloma na ngulu boo ɔdale kilomɛtɛlɛ emɔti, dala engbanga na nde kilomɛtɛlɛ ibae. 42 Paa odii ona osɛngɛkɛ eka; pɛpɛ olona obekedja moto ɔpalaka abeke odii wɛ.»

43 «Ɔokani babala boo: "Pala mwangwao ko lona moloni ɔ wɛ." 44 Endolo, mbai nabalalaka na nu boo: Palani baloni ba boono ko ongɔɔnɔni tina ɛ bia ibakaonyɔkɔleni. 45 Bea, odabini bana ba Sangwanu ona odii odiko. Tina ɛ boo akaimanedjae diiso la busa tina ɛ bato bapele na bato babe, ko akadumbe mbua tina ɛ bato ba odjoo na ibataki odjoo. 46 Nga okapalani otoko bato ibakaopaleni, iputi idihalea no nda? Noko baputedjeli ba puti bakakɔe bea! 47 Nga okaisiani oko banaangwanu, modjɔ ma okamoa makɔkɔ no nda? Noko bapagano bakakɔe koko bea! 48 Odabini bato ibakoki moda modii Sangwanu ona odii odiko mokokake.»