1 Bea Yesu abala na emumu ɛ bato, ko na batingami ba nde boo: 2 «Bato ba edjebeli ɛ mibeko na Bafalusai badii na elomu ɛ otingodja bato mibeko ma Mose. 3 Bea, basumani ko kɔɔni midjɔ misusu mabalaka bo na nu, endolo pɛpɛ oikoanani misala ma bobo, tina ɛ boo tebaise bileho bikalehe bo ta mosala. 4 Bakanange mina ma mandi enɛnɛ, ko bakamibakee ta malokuloku ma bato bakina; endolo ibo mɛɛnɛ tebapale noko omibinga na mosapi. 5 Misala misusu mikakɔe bo bakamikɔe oko bɛngɛ bato babaenɛ. Bea, banɛngɛdja bikenge ba mikanda imakoma bo Makomi ko bakamikadee ta mbanda na ta mabɔ na ta sɔngɔ ndjai dja mikoto ma bobo. 6 Bakapale oda ta bisika ba ekumu ta tɛkɛ ko ta bigboto ba boso ta ndako dja miɔngɔɔnɔ dja Bayuda; 7 bakapale boo bato babaiseake ta bisika ba masaka ko bababeake "Molehi". 8 Endolo ino, pɛpɛ opalani boo bato baobeeni "Molehi", tina ɛ odini na Molehi oko omɔti ko ino basusu odini moda momɔti. 9 Pɛpɛ obeani noko moto omɔti haa ta ngondo "Tata", tina ɛ odini na Sangwanu oko omɔti, ona odii o diko. 10 Pɛpɛ opalani boo bato baobeeni "Molehi", tina ɛ odini na Molehi oko omɔti, Klisto. 11 Moto ɔ tina ta ndanda ɛ boono adalea mosali ɔ boono. 12 Moto ɔ osaihwedja bamotitedjalea, endolo moto ɔ osatitedja bamoihwedjalea.»

13 Ndjokwa ɛ boono bato ba edjebeli ɛ mibeko na Bafalusai, bato ba owɛi bobe! Ɔdipakani edipako bɛngɛ boo bato bakina badae pɛpɛ oingea ta Okumu ba diko; ino mɛɛnɛ oingeetebini ta bu endolo ɔsiakani bato ibadii na posa ɛ oingea boo badae pɛpɛ oingea.

[14 Ndjokwa ɛ boono, bato ba edjebeli ɛ mibeko na Bafalusai, bato ba owɛi bobe! Okakatoeni leka la bali ibagwedja baami, oko ta ehole ena okaongɔɔneni miɔngɔɔnɔ miyai tina ɛ osaenɛmɛdja odii bato. Ta tina ena osambedjamabini na opipo!]

15 Ndjokwa ndani tina ɛ boono, bato ba edjebeli ɛ mibeko na Bafalusai, bato ba owɛi bobe! Okadaleni ta ngondo esusu na ta mabeke imanɔi na onɛnɛ tina ɛ odiha mopagano noko omɔti ona oboani oongɔɔnɔ Ndjambe ɔ boono, ko ta ehole emodihi no omoimedjaini moto ɔ ipelu mbala ibae onɔ ino.

16 «Ndjokwa ndani tina ɛ boono, balɔndi ba miso mago! Okabaleni boo: "Nga moto omɔti akalena seleka na kombe ɛ tepelo, editi na modjɔ; endolo nga moto omɔti akalena seleka na kombe ɛ ɔɔlɔ ɛ tepelo, aboani boo akokedjae seleka ɛ nde." 17 Bindanga ko bato ba miso mago! Eka enɔi kito nda: ɔɔlɔ kaoko tepelo ena ekasɛnɔdjae ɔɔlɔ? 18 Okabaleni koko boo: "Nga moto omɔti akalena seleka na kinda ɛ mbeka, editi na modjɔ, endolo nga moto omɔti akalena seleka na epeeli edii diko la kinda ɛ mbeka, aboani asume seleka ɛ nde." 19 Odini bato ba miso mago! Enɔi na kito, epeeli kaoko kinda ɛ mbeka ekasɛnɔdjae epeeli? 20 Tina ɛ boo moto ona okalene seleka na kombe ɛ kinda ɛ mbeka ayeleni na kombe ɛ leka losusu lodii diko la kinda ɛ mbeka; 21 moto ooleni seleka na kombe ɛ tepelo ayeleni na kombe ɛ Ndjambe ona odii ta tei ɛ yu. 22 Moto oleni seleka ta kombe ɛ busa ayeleni ta kombe ɛ ngbɛndɛ ɛ Okumu ba Ndjambe ko ta kombe ɛ ona okayedae.»

23 «Ndjokwa ndani na nu, bato ba edjebeli ɛ mibeko na Bafalusai, bato ba owɛi bobe! Okapɛni odii Ndjambe ibondo la doomi la ndunduumba, la musikade na baa leka bakɛkɛkɛ ba soo epele, endolo okaenɛni midjɔ iminɔi kito ta ndanda ɛ mobeko ngasa, elɛngɛɛ odjoo, ookea bato ndjokwa na edhimeli: ena edii midjɔ miboani no okɔ ko na pɛpɛ obosa opa ibondo la doomi. 24 Balɔndi ba miso mago! Okakɔngɔleni mongi akakwea ta mana ma boono, endolo okameeni kamela!»

25 «Ndjokwa ndani tina ɛ boono, bato ba edjebeli ɛ mobeko na Bafalusai, bato ba owɛi bobe! Okasoseni sokolu ɛ kɔbɔ na ɛ saani, endolo otei ilumi na leka la iba na posa ibe dja boono. 26 Mofalusai ɔ miso mago! Sosa boso kɔbɔ na saani otei bea sokolu esɛnɔlea.»

27 «Ndjokwa ndani tina ɛ boono, bato ba edjebeli ɛ mobeko na Bafalusai, bato ba owɛi bobe! Okoanini na ikila ilasinga bo langi epu likaenɛme opele osokolu endolo laluma na kua dja bato bago na bipɔlu. 28 Moda momɔti na nu, osokolu okaenɛmeni elɛngɛɛ bato ba odjoo ta miso ma bato, endolo otei olumini na epulu na obe.»

29 «Ndjokwa ndani tina ɛ boono, bato ba edjebeli ɛ mobeko na Bafalusai, bato ba owɛi bobe! Okatongeni makila mapele tina ɛ batɛli, ko okasɔnɛni mibombo ma bato ba odjoo, 30 ko okabaleni boo: "Ɔkɔkɔso hela ta ehole ɛ bataata su, laikɔkɔ putoana na bu ta tina ɛ otangedja makia ma batɛli." 31 Bea, na bibaeli ba boono mɛɛnɛ okadhimeni boo odini batitani ba bato ibaowa batɛli. 32 Na bea, landoani, na mosala mabanga bataata nu ma oowa batɛli. 33 Ino ndjɔ, ibota la mabate! Moda mohɔni no olɛdja boo otiabini etumbu ɛ ipelu nda? 34 Hokamedjani opele: mbai naolomealeani batɛli, bato ba owɛi na bato ba edjebeli ɛ mobeko ba sooti. Oowaleani bakina, obakaleani bakina ta ekulusu, obomaleani bakina pimbo ta ndako dja boono dja miongɔɔnɔ ko obanyɔkɔlɔleani ta ibonga imɔti na imɔti, 35 bɛngɛ boo, makia ma bato basusu ba odjoo, imasopa bo ta kpɔtɔ, masopee ta melo ma boono, donga makia ma Abele moto odjoo mbunoko makia ma Djakalia, mwana moomi ɔ Balasi, ɔɔwa no pakasa ɛ esika esɛnɔke na kinda ɛ mbeka. 36 Nabalaka na nu, sooti boo: ino bato ba yangola hee odihaleani etumbu tina ɛ midjɔ mia misusu.»

37 Yelusalɛmɛ, Yelusalɛmɛ, ona ookaowoe batɛli ko ookaowoe bato ibakamolomee Ndjambe na ndeke! Mbala djeka djapalaka mbai naoputoanedjae na bana ba wɛ moda mokaputoanedjae kɔkɔ mwali bana ba nde nase dja mapapulapu, endolo ɔlona! 38 Hadɛdi, ndako ɛ boono edalea esundolamake. 39 Tina ɛ boo, nabalaka na nu: donga busabu, owetelea enɛnini koko mbunoko okabalaleani boo: «Yɛɛ adjongoame, ona odoi ta kombe ɛ Kumu!»