1 Ehole ɛbɛtɛ Yesu obala midjɔ mia, adonga ta Galilai ko akɛɛ ta ekenge ɛ mokpɔtɔ ma Yuda ta dɔngɔ la dua la Yolodani. 2 Bimumu ba bato bamokimana oho, ko abaheledja. 3 Bafalusai babatama mbuti na nde bɛngɛ bamomeke. Bamohɔdja boo: «Mobeko ma booso mapaka enɔli odii moomi boo adongedjae mwali ɔ nde tina ɛ modjɔ momɔti bea?» 4 Yesu asɔmbɛdja boo: «Tolangeni ta Makomi? "Ta ibange, Moyoli abayoa moomi na mwali", 5 ko abala boo: tina ena, moomi akinabi nango na sango akataanabi na mwali ɔ nde, ko ibo babae baimeabi muni momɔti. 6 Bea, baditi koko bato babae endolo baimei moto omɔti. Yɛɛ boo moto adae pɛpɛ obɔtɔdja eka ɛputoanedja Ndjambe.» 7 Endolo Bafalusai bamohɔdja boo: «Bea tina ndani Mose aloma boo moomi apɛ mwali ɔ nde mokanda ma oowa moki ehole emodongedjai yo?» 8 Yesu abasɔmbɛdja boo: «Mose aopani enɔli ɛ odongedja bali ba boono ta meki tina ɛ milema ma boono mipipo. Endolo ta ibange, ɛidaka bea. 9 Nabalaka na nu boo: nga moomi akadongedja mwali ɔ nde ta moki, dongedja oko akakwa ta bɔɔli, ko aosi mwali okina, akɔi bɔɔli.»

10 Batingami babala na nde boo: «Nga moomi akaboana odaa bea boso ba mwali ɔ nde, enɔi opele moomi adae pɛpɛ oosɔ mwali.» 11 Yesu abasɔmbɛdja boo: «Baami basusu batahɔnɔ odhima bileho moda muu, oko bii ibapama makoki tina ɛ bu. 12 Tina idii itikoanake idjika sie baami boo bataosɔ bali: baami bakina donga sɔpɔ dja bangwabu batahɔnɔ oosɔ bali, bakina babadongedja mbuma dja baami; baami bakina balona oosɔ bali tina ɛ Okumu ba diko. Yɛɛ boo moto ona odii na makoki ma odhima eleho hee aye dhime!»

13 Bato badoa na bana bakɛkɛ odii Yesu bɛngɛ ababakee mabɔ ko aɔngɔɔne tina ɛ bobo, endolo batingami bagamea bato ibadoa na bana bia. 14 Bea Yesu abala boo: «Kinani bana bakɛkɛ badoe odii mbai ko pɛpɛ obasiani tina ɛ boo Okumu ba diko bodii tina ɛ bato ibadii elɛngɛɛ ibo.» 15 Ababakea mabɔ ko adonga ena.

16 Mwenga moomi omɔti abatama mbuti na Yesu ko amohɔdja boo: «Molehi, modjɔ mopele ndani mohɔni mbai okɔ bɛngɛ nadihe mohelo ma kɔbili?» 17 Yesu abala na de boo: «Tina ɛ hɔdjakani na wɛ diko la modjɔ mopele nda? Oko moto omɔti adii mopele. Nga okapala ɔingee ta mohelo, suma mibeko.» 18 Mwenga moomi ona ahɔdja koko boo: «Mibeko mia nda?» Yesu amosɔmbɛdja boo: «Pɛpɛ oowa moto; pɛpɛ okɔ bɔɔli, pɛpɛ oiba, pɛpɛ opa tati ɛ epulu; 19 suma sangwao na ngwao; pala minɔ elengɛɛ okasapale wɛ mɛɛnɛ.» 20 Mwenga moomi abala na nde boo: «Nakasume mibeko mia misusu. Eboani mbai okɔ koko yee?» 21 Yesu amosɔmbɛdja boo: «Nga okapala ɔdae moto ona ɔkoka, kɛɛ atɛkɛ leka la wɛ ko pa bakwali falanga idjidihalea wɛ, bea odalea modiheli o diko; ngɔngɔ djia doa ko kimanani.» 22 Endolo ehole ɛoka mwenga moomi modjɔ mua, akɛɛ na ndjokwa, tina ɛ boo adaka na odiheli bonɛnɛ.

23 Bea Yesu abala na batingami ba nde boo: «Nabalaka na nu sooti boo: edii opipo tina ɛ modiheli oingea ta Okumu ba diko. 24 Nabalaka na nu koko boo: edii opɛtɛpɛtɛ tina ɛ kamela onɔ ta iposi la tonga, endolo edii opipo mɛɛnɛ tina ɛ modiheli oingea ta Okumu ba diko.» 25 Ehole ɛoka batingami Yesu abala modjɔ mua, bakamoa obuke ko bahɔdjana boo: «Bea ona ohelabi nda?» 26 Yesu abahokea ko abala na bu boo: «Modjɔ mua motakɔɔmɔ na bato, endolo odii Ndjambe misusu midii okɔɔmɔ.» 27 Piɛlɛ atomba ebaeli ko abala na Yesu boo: «Iso lakina losusu, bɛngɛ boo laokimane. Odabi mo tina ɛ booso enao?» 28 Yesu abala na bu boo: «Nabalaka na nu, sooti: ehole eimeabi midjɔ misusu ma yanie ko Mwana ɔ moto akadabi ta ngbɛndɛ ɛ nde ɛ ekumu, ino doomi na babae ibakimanani, odabini ta ngbɛndɛ tina ɛ osambedja mabota doomi na mabae ma Isalɛlɛ. 29 Ko bato basusu ibakina ndako dja bobo, banaangwabu baami, kaoko bangɛnɛ bali, sangwabu, kaoko ngwabu, bana ba bobo kaoko gue dja bobo badihabi onɔ mbala mokama engbanga na mohelo ma kɔbili. 30 Endolo bike ibadii hadɛdi bato ba boso badabi bato ba ngɔngɔ ko bike ibadii hadɛdi bato ba ngɔngɔ badabi bato ba boso.»