1 «Angatanani tina ɛ okokedja odjoo ba boono boso ba bato bɛngɛ baoenɛni; emiti da bea otakaleani iputi ilaobombeani Sangwanu ona odii odiko. 2 Ehole ekapɛ wɛ epeeli ɛ ndjokwa, pɛpɛ oboma mondulɛ boso ba wɛ, moda mokakɔɛ bato ba owɛi bobe ta ndako dja miongɔɔnɔ dja Bayuda na ta matilinga ma ndjia bɛngɛ bato babakumedjae. Nabalaka na nu sooti, badihi iputi la bobo ehele. 3 Endolo ehole ɛkabeaka wɛ bakwali, kɔɔ boo ebɔ ɛ wɛ ɛ bali etadjeba modjɔ mokɔi ebɔ ɛ wɛ ɛ baami. 4 Bɛngɛ boo epeeli ɛ wɛ ɛ ndjokwa edae modjɔ ma mbombi, bea Sangwao okaenɛ midjɔ imakɔkɔ wɛ ta mbombi, aopalea iputi.»

5 «Ehole ɛongɔɔnɔkɔ no, pɛpɛ odani elɛngɛ bato ba owɛi bobe: bakapale oongɔɔnɔ baemi diko ta ndako dja miongɔɔnɔ dja Bayuda ko ta maatano ma ndjia bɛngɛ boo bato ba baenɛ. Nabalaka na nu, sooti boo: badihi iputi la bobo ehele. 6 Endolo wɛ, ehole oɔngɔɔnɔkɔ wɛ, ingea ta ekenge ɛ ndako, dipa edipako ko oɔngɔɔnɔ Sangwao ona odii ta esika ena ɛ mbombi, bea Sangwao ona ookaɛnɛ midjɔ imikakɔɔme ta mbombi, aoputalea.»

7 Ehole eongɔɔnɔkɔ no, pɛpɛ obalakakani obuke moda mokakɔe bapagano: bakalɛdjae boo Ndjambe oasɔlea miongɔɔnɔ ma bobo nga bakabala obuke. 8 Pɛpɛ okɔɔni elɛngɛ ibo, tina ɛ boo, Sangwanu akadjebe posa dja boono boso ba omosɛngɛ. 9 Hokeani moda moboani no oɔngɔɔnɔ:

Sangwasu ona odii odiko,

yɛɛ kombe ɛ wɛ ɛdae ɛsɛnɔke,

10 yɛɛ Okumu ba wɛ badoe;

yɛɛ opala ba wɛ bakɔɔme ta ngondo elɛngɛ okakɔɔme bo ta busa.

11 Lopa mia ma booso ma engi busa.

12 Loyɛɛ mabunga ma booso,

moda mokayɛɛ so bato ibakalokɔmɛɛ mabunga.

13 Pɛpɛ olokina boo lakwae ta lomeko,

endolo lotingoa ta obe.

[Ɛlɔkɛɛ boo okumu, ngulu na ekumu lodii la wɛ tina ɛ kɔbili. Oko bea.]

14 «Tina ɛ boo, nga okayɛɛni baminanu mabe maokɔmɛɛni bo, Sangwanu odii odiko aoyɛɛbini koko. 15 Endolo nga omiti yɛɛni baminanu, Sangwanu aoyɛɛtebini mabe ma boono.»

16 «Ehole esabekeino, pɛpɛ osubuani moda mokakɔe bato ba owɛi bobe: bakasubue bɛngɛ bato baenɛ boo basabekei. Nabali na nu, sooti boo: badihi ibondo la bobo ehele. 17 Endolo wɛ, ehole esabekeaka wɛ, sasosa boso ko sasua malasi ta molo, 18 bɛngɛ bato badae pɛpɛ odjeba boo osabekei. Dongedja oko Sangwao, ona okadae pɛpɛ oenɛmɛ, bea, yo ona okaenɛ midjɔ mikakɔɔme ta mbombi, aoputalia.»

19 «Pɛpɛ oboleani odiheli haa ta kpɔtɔ, tina ɛ boo bohɔni obeha na sɛ, na mbalanga ko baibi bahɔni obuka ndako bɛngɛ baboibe. 20 Endolo boleani odiheli ba boono ta busa, oho sɛ na mbalanga tebabedjae ko baibi batahɔnɔ oboiba. 21 Tina ɛ boo esika edii odiheli ba wɛ molema ma wɛ modii oho.»

22 «Miiso madii ohuu ba mokuku: miiso ma wɛ makadaa mapele, mokuku ma wɛ mosusu modalea ta ohuu; 23 endolo nga miiso ma wɛ makapeka, mokuku ma wɛ mosusu modii ta modidi. Bea nga ohuu ibodii ta tei ɛ wɛ bokaimea modidi, modidi mua modalea mopipo mɛɛnɛ!»

24 «Moto omɔti atahɔnɔ osalea bakumu babae: tina ɛ boo alonalea omɔti ko apalalea okina; kaoko akatanalea na omɔti ko alonalea okina. Ohɔnitini osalea Ndjambe na falanga engbanga emɔti.»

25 «Ta tina ena, nabalaka na nu boo: pɛpɛ osatungeani tina ɛ mohelo ma boono na osahɔdja boo: Eyakalea so nde kaoko emwalea so nde? Kaoko tina ɛ mikuku ma boono na osahɔdja boo: elwalea so nde? Enao, mohelo monɔiti mia ma oyaka na tina ko mokuku monɔiti bisendja na tina, editi bea? 26 Hokeani mbulu badiko: tebaone ko tebabuke mbuma, tebabolee mbuma ta bibombelo, endolo Sangwanu odii odiko akabayakedjae! Bea, ino obanɔitini na tina? 27 Moto ndani ta ndanda ɛ bono ohɔni obakea noko iswi imɔti ta mohelo ma nde na ndjia ɛosatungea?»

28 «Ko tina ndani okasatungeeni diko la bisendja ba olwa? Hokeani fulɛlɛ dja gue: moda mokakandoe djo: tedjisale ko tedjisatongee bisendja. 29 Endolo, nabalaka na nu sooti boo, noko Sɔlɔmɔ, ta ekumu ɛ nde esusu, ailwa bisendja ba omwenga onɔ fulɛlɛ emɔti ta ndanda ɛ dju. 30 Nga Ndjambe akalwɛdja busabu ndjani dja gue bea ko idjidumbamalea puma ta mosa: aolwɛdjaeteleani ino na onɔ? Bato ba edhimeli ekɛkɛ! 31 Bea pɛpɛ osatungeani na obala boo: "eyakalea so nde? Emwalea so nde? Elwalea so nde?" 32 Edii bapagano bato bakahombe midjɔ mia misusu. Endolo Sangwanu odii odiko adjebaka opele mɛɛnɛ boo odini na otaka ba leka lua losusu. 33 Hombani boso mɛɛnɛ Okumu ba Ndjambe na odjoo ba bu ko yo aopaleani leka lua losusu. 34 Pɛpɛ osatungeani tina ɛ puma sɛɛnɛ: tina ɛ boo busa ba puma sɛɛnɛ bosatungealea tina ɛ bu mɛɛnɛ. Engi iswi idii na monɔngɔ ma lu.»