1 Ehole ebɛtɛ Yesu obala na batingami ba nde doomi na babae, adonga ena, akɛɛ aleha ko ananganedja Mwako Mopele ta mabonga ma bobo.

2 Yoani Mobatisi adaka ta bolɔkɔ, aoka gala ɛ midjɔ misusu imakɔkɔ Klisto. Bea aloma batingami ba nde 3 ahɔdja Yesu boo: «Odii Masia hoo ɔboanaka odoa kaoko laombe okina?» 4 Yesu abasɔmbɛdja boo: «Kɛɛni atɔndɔe Yoani midjɔ imieni no ko imioki no: 5 bato ibagwa miiso baeni, bitumbɛ badali, bato ba mabha baheli, bato ibagwa matoyi baoki, bago bapusoi ko Mwako Mopele motɔndɔmi odii bakwali. 6 Sepi odii moto oodabi pɛpɛ odumba edhimeli ɛ nde diko la mbai.»

7 Ehole ɛyana batingami ba Yoani, Yesu abanda obala diko la Yoani odii bato boo: «Modjɔ mokɛki no aindja ta esobe nda? Mososongo imakumanaka na epoipoi ngise susu? 8 Bea eka ekɛki no aindja nda? Moto ona olwali bisendja bipele? Endolo bato ibakalwae bisendja bipele bakadae ta ndako dja bakumu. 9 Ekɛki no aindja ta esobe yee? Motɛli? Sooti, nabalaka na nu, anɔi noko motɛli. 10 Tina ɛ boo Yoani adii moto obala bo ta Makomi boo: "Nalomabi molomami boso ba wɛ bɛngɛ boo aobɔngedjae ndjia." 11 Nabali na nu sooti boo: ta ndanda ɛ bato ibabotama na mwali, pɛpɛ omɔti onɔi Yoani Mobatisi na onɛnɛ; tina ɛ boo, moto odii mokɛkɛ ta Okumu ba busa anɔi Yoani Mobatisi na onɛnɛ. 12 Donga ehole ɛdaka Yoani mobatisi aleha mbunoko hadɛdi, oingea ta Okumu ba busa edii modjɔ ma ingbangba ko edii oko bato ibaonaka ta edhimeli bahɔni oingea oho. 13 Na bea batɛli basusu na Mobeko batɛlɛ mbunoko Yoani. 14 Ko nga okahɔnɔni odhima bea, djebani boo Yoani adii Elia ona ɔboanaka boo adoe. 15 Yɛɛ boo, ona odii na matoi ma ooka aoke!»

16 «Ona ndani oboani na mbai okoanedja bato ba ehole hee? Bakoani na bana bakɛkɛ ibadii ta esika ɛ masaka ma bato bike ko badii ogama odii bakina boo: 17 "Lobomeini piololo endolo obuitini ko loembeakini biembo ba kɔndɔ endolo oyeitini!" 18 Tina ɛ boo, Yoani adoa, aiya, aimwa ko babalaka boo: "adii na mwembo mobe ta tei ɛ nde!" 19 Mwana ɔ moto adoa, ayaka, amwa endolo babala boo: "Adii na mohweo ko adii momwɛli ɔ mana, mopalani ɔ baputedjeli ba puti na bato ba masumu!" Endolo owɛi ba Ndjambe bodii oenɛmɛ sooti ta misala ma nde.»

20 Bea Yesu apɛlɛ mabonga imakɔɔ yo midjɔ ma okamoa mike, tina ɛ boo bato ba mu baisɔmbɔtɔnɔ. Abala boo: 21 «Ndjokwa tina ɛ wɛ, Koladjini! Ndjokwa tina ɛ wɛ, Betesaida! Tina ɛ boo nga midjɔ ma okamoa imakɔɔmɔ odii no makɔɔmɔ ta Tula na Sidona, eke basɔmbɔtɔnɔ milema ehele ko balwa ngɔtɔ na osasua mihulu. 22 Na bea, nabalaka na nu boo, ta iswi la esambi etumbu ɛ boono edabi epipo onɔ etumbu ɛ Tula na Sidona. 23 Ko wɛ, Kapalanauma, olɛdjaka boo oihwedjamabi mbunoko odiko? Pɛpɛ. Otitedjamabi mbunoko ngando ɛ bago. Tina ɛ boo midjɔ ma okamoa imakɔɔmɔ ta tei ɛ wɛ makɔɔmɔ ta Sɔdɔmɔ eke Sɔdɔmɔ adii oko busabu. 24 Ta tina ena, nabalaka na nu boo, ta busa ba esambi, etumbu ɛ wɛ edabi epipo onɔ etumbu ɛ Sɔdɔmɔ.»

25 Ta ehole ena, Yesu agama boo: O Tata, Kumu ɔ busa na kpɔtɔ, naosakoi tina ɛ boo oenɛmɛdjai odii bato ibakɛkɛkɛ midjɔ imabombea wɛ bato ba owɛi ko na bato ba ɛdjebeli. 26 Bea, Tata, ɔpala boo ɛdae bea.

27 Tata apani leka losusu. Moto atadjeba Mwana dongedja oko Tata, ko pɛpɛ moto ɔdjebaka Tata dongedja oko Mwana ko na ona osepi na Mwana omoenɛmɛdja.

28 «Doani odii mbai ino bato basusu baembi na mina ma mandi ko naopaleani iheme. 29 Tombani mosɔngɔ ma mbai, molwani ko ikoani na mbai tina ɛ boo nadii moto ɔ molema ma bwɛli ko ma osatitedja, bea miembo ma boono midihalea iheme. 30 Sooti, mosɔngɔ ma mbai moditi na djɔɔlɔ ta olwa ko mandi ma mbai madii na ohahanu.»