1 «Pɛpɛ osambedjani, bɛngɛ boo basaka osambedjani koko ino. 2 Tina ɛ boo baosambedjaleani oko moda masambedjaka no bato bakina; ko baoɛdjɛleani oko na mwɛngi imaɛdjɛkɛ no bato bakina. 3 Tina ndani ohokeaka oko mondjani imodii ta diiso la mwangwao, ko otaenɛkɛ yaale ɛ ibaya ena edii ta diiso la wɛ? 4 Moda ndani ohɔni obala na mwangwao boo: "kina nadongedjae mondjani imodii ta diiso la wɛ", ena bea odii na yaale ɛ ibaya ta diiso la wɛ? 5 Moto ɔ owɛi bobe, dongedja boso mɛɛnɛ yaale ɛ ibaya eedii ta diiso la wɛ, bea oenɛlea opele moda ma odongedja mondjani ta diiso la mwangwao.»

6 «Pɛpɛ opaani leka losɛnɔke odii mvwa, asaka sɔmbɔ aotwani; ko pɛpɛ odumbani leka la boono la motsuia monɛnɛ boso ba ngulu, basaka lominakaka.»

7 «Hɔdjani, ko baopaleani; hombani, ko odihaleani; bomani edipako, ko baodipualeani. 8 Tina ɛ boo, moto na moto ɔhɔdjaka akaosɛ, ona ɔhombaka akadihe ko moto ona ɔbomaka edipako bakamodipoe. 9 Moto ndani ta ndanda ɛ boono opalea mondeke odii mwana ɔ nde nga akamosɛngɛ ipa? 10 Kaoko ndani ona opalea mwana ɔ nde ndjɔ nga akamosɛngɛ moswi? 11 Nga ino bato babe okadjeba opaani bana ba boono leka lopele, na onɔ Sangwanu ona odii odiko, apɛtelea leka lopele odii bia ibamohɔdjaka lo?»

12 «Midjɔ misusu mikapale no boo bato bakina baokɔmɛɛni, kɔɔni moda mua tina ɛ bobo: tina ɛ boo edii bileho bisusu bikalehe Mobeko na Batɛli.»

13 «Ingeani na ndjia ɛ edipako eekɛkɛ! Tina ɛ boo edipako na ndjia eekakɛɛ ta ogwa edii enɛnɛ ko bato bike bakaingee ena. 14 Endolo edipako ko ndjia eekakɛɛ ta mohelo edii ekɛkɛ ko edii oko bato bakɛkɛ ibakayeenɛ.»

15 «Tomangataanani na batɛli ba epulu. Bakadoe odii no balwali bisendja ba bhata, endolo otei badii swa. 16 Obadjebaleani na mikɔ ma bobo. Tebatswɛ mbuma dja vino ta mole ma ndjubɛ kaoko otswa mbuma dja figi ta mole ma ndjubɛ. 17 Mole mopele mokabote oko mbuma ipele endolo mole mobe mokabote oko mbuma mbe. 18 Mole mopele temobote mbuma mbe, endolo mole mobe motabota mbuma ipele. 19 Mole mosusu imokadae pɛpɛ obota mbuma ipele bakamokeke, ko bakamodumbe ta mosa. 20 Na bea, odjebaleani batɛli ba epulu na mikɔ ma bobo.»

21 «Editi otoko bato basusu ibakabale na mbai boo: "Kumu, Kumu", ibaingeabi ta Okumu ba diko, endolo oko bia ibakakɔe opala ba Tata ona odii odiko. 22 Ta iswi la esambi, bato bike babalabi na mbai boo: "Kumu, Kumu, edii ta kombe ɛ wɛ latɛlɛkɛ; edii ta kombe ɛ wɛ labenganaka miembo mibe; ko edii ta kombe ɛ wɛ lakɔkɔ midjɔ minɛnɛ ma okamoa?" 23 Bea nabalabi na bu boo: "Nataodjebakani noko osinɛɛ, sasuani na mbai ino bato babe!"»

24 «Bea, moto na moto ooki bibaeli ibahulake mbai abala ko abisumi akoani na moto ɔ owɛi ona ɔpika ndako ɛ nde diko la mondeke. 25 Ehole ɛkwa mbua, pela ɛlinda, lungu ɛboma ndako ena, endolo ɛibukea tina ɛ boo miboko ma yu mabakama diko la mondeke. 26 Endolo moto na moto ooki midjɔ mahulake mbai abala ko amisumiti akoani na endanga ona ɔpika ndako ɛ nde diko la djɛlo. 27 Mbua akwa, pela ɛlinda, lungu ɛboma ndako ena ko ndako ɛbukeana: obeha ba yu badaka na osusu.»

28 Ehole ebɛtɛ Yesu obala bibaeli bii, bato basusu bakamoa obuke na moda ma nde ma oleha; 29 tina ɛ boo aidaka elengɛɛ bato ba edjebeli ɛ mibeko, endolo abalehaka na kpati.