1 Ena ɔdaka Yesu aimane ta lopango la tepelo, batingami ba nde babatama mbuti na nde bɛngɛ bamoinedjae moda mapika bo tepelo. 2 Endolo Yesu abala na bu boo: «Oenini mii misusu? Nabalaka na nu sooti boo: pɛpɛ noko mondeke momɔti modikalea mobaki diko la mondeke mokina. Losusu lobedjamalea.»

3 Ena ɔdaka Yesu adii ta ngomba ɛ mele ma olive, batingami babatama mbuti na nde ko bamohɔdja boo: «Lotɔndɔɔ ehole ndani ekɔɔmɔbi midjɔ mia? Ko embete ndani einedjabi odoa ba wɛ na suka ɛ ngondo.» 4 Yesu abasɔmbɛdja boo: «Tomadingani boo moto omɔti adae pɛpɛ ookoseani. 5 Tina ɛ boo bato bike badoabi na kombe ɛ mbai ko babalabi boo: "Mbai nadii Masia!" Ko bakoseabi bato bike. 6 Ookabini gala dja bila na ngilimo dja bila; endolo pɛpɛ osatungeani: tina ɛ midjɔ mia miboani boo makɔɔme, endolo edaetebi suka ɛ ngondo. 7 Ekomi emɔti eonɛdjalea ekomi ekina, okumu bomɔti bonɛdjalea okumu bokina; ndja idabi pipo ko mokpɔtɔ mokumanabi mɔɔngɔ na mɔɔngɔ. 8 Midjɔ mia misusu midabi oko elengɛɛ mbangi ɛ epeko ɛ ibota la mwali. 9 Bea, baokababini bɛngɛ ɔokeni saya ko baowabini. Bikomi bisusu biokeabini swɛ tina ɛ kombe ɛ mbai. 10 Ta maswi mia, bato bike badumbabi edhimeli ɛ bobo; bakababi ko bainabi baminabu. 11 Batɛli bike ba epulu badoabi ko bakoseabi bato bike. 12 Ta tina ɛ boo obe bonɛngɛbi oko onɛngɛ, epaeli ɛ bato bike etitabi. 13 Endolo moto oikabi molema mbunoko suka ahelabi. 14 Mwako Mopele ma Okumu ba Ndjambe motɔndɔmɔbi ta ngondo esusu; edabi tati tina ɛ bikomi bisusu. Ngɔngɔ djia suka edaobi.»

15 «Ehole eenɛbi no ona okabee bo "Mbeedji ɔ manene" ona ɔbala motɛli Danyɛlɛ; ona odedjamabi ta esika esɛnɔke. Yɛɛ boo molangi asipoe opele modjɔ mua! 16 Ta ehole ena, bia ibadabi ta Yuda batie ta ngomba; 17 yɛɛ boo ona odabi o sokolu adae pɛpɛ osɔmbɔ atomba eka ta ndako; 18 ko yɛɛ boo ona odabi ta gue atasɔmbɔ atomba esendja ɛ nde. 19 Ndjokwa ndani, ta maswi mia, tina ɛ bali iba meemi ko ibadabi banungea baana! 20 Ongɔɔnɔni bɛngɛ boo midjɔ mia madae pɛpɛ okɔɔmɔ ta ehole ɛ piɔ epipo, kaoko ta iswi la sabata! 21 Tina ɛ boo, ta ehole ena, monɔngɔ modabi mopipo onɔ imakɔɔmɔ donga ibange la ngondo mbunoko hadɛdi, ko mokina ma moda mua modaetebi*. 22 Ko nga ɔkɔkɔ daa Kumu pɛpɛ okuhedja maswi mia, pɛpɛ noko moto omɔti ɔkɔkɔ hela. Endolo ta tina ɛ bato ibahɔɔ yo akuhedja maswi mia. 23 Bea nga moto akabala na nu boo: "Hokeani! Klisto adii haa" "kaoko adii boo" pɛpɛ omodhimeani. 24 Tina ɛ boo ba masiya ba epulu na batɛli ba epulu badoabi; bakɔbi bimbete ba okamoa mindumba na mindumba tina ɛ okosea, ehole ekina, noko bato ibahɔɔ Ndjambe. 25 Hokamedjani! Naotɔndɔini boso bɛngɛ boo oangataneni.»

26 «Bea nga bakabala na nu boo: "Hokeani, adii ta esobe", pɛpɛ okɛɛni oho. Kaoko nga bakabala na nu boo: "Hokeani, abolami haa!", pɛpɛ omodhimeani. 27 Tina ɛ boo, Mwana ɔ moto adoabi elengɛɛ mokaikai imokangɛngɛ dɔngɔ ikaimane diso la busa mbunoko dongo ikatite lo. 28 Esika esusu esambi ndjemba, mbulu ibakayake ndjemba bakaputuane ena.»

29 «Ehole enɔbi maswi mia ma monɔngɔ, diso la busa imeabi modidi, songe apɛtebi ohuu ba nde, ndjɔtɔ bakwabi donga odiko ko ngulu dja diko ikumanabi*. 30 Bea, embete ɛ Mwana ɔ moto eenɛmɛbi ta busa; bikomi bisusu ba ngondo bisayeanabi ko baenɛbi odoa ba Mwana ɔ moto diko la matutɛ ma diko na ngulu ko na ekumu enɛnɛ. 31 Na kilingo enɛnɛ ɛ kɛlɛlɔ, alomabi babwɛndi ba nde ta makono masusu ma ngondo: baputoanedjabi bato ibahɔɔ yo.»

32 «Yɛɛ boo indjɛ la mole ma figi laoleheni: Nga bitape ba mu bikaembɛ ko bibangi oimanedja kasa, okadjebeni boo ehole ɛ moi mopipo ebatami. 33 Moda momɔti na nu, ehole eenɛbi no midjɔ mia misusu, odjebabini boo Mwana ɔ moto aimei mbuti ta bidipako. 34 Nabalaka na nu sooti boo: bato ba yangola hee banɔetelea mbunoko midjɔ mia misusu mikakɔɔmɔ. 35 Busa na kpɔtɔ lonɔbi, endolo ebaeli dja mbai inɔetebi.»

36 «Tina ɛ modjɔ moeni iswi kaoko ehole, pɛpɛ moto okadjebe, ɛdae babwɛndi ba diko kaoko Mwana; oko Tata yo buki moto okalodjebe. 37 Moda makɔɔmɔ ta maswi ma Noa, moda mua momɔti mokɔɔmɔbi ta odoa ba Mwana ɔ moto. 38 Tina ɛ boo, boso pela ɛlinde, bato bayaaka ko bamwaaka, baosɔnɔkɔ ko baosɔdjaka baana ba bobo bali, mbunoko iswi laingea Noa ta masua; 39 baidjebaka noko modjɔ momɔti diko la mua imapalaka makɔɔme, mbunoko pela enɛnɛ ɛdoa ko ebadindedja ibo basusu. Edabi oko bea ta odoa ba Mwana ɔ moto. 40 Bea, baami babae badabi ta gue: omɔti atombamabi ko okina adikabi. 41 Bali babae badabi bainda mbuma: omɔti atombamabi ko okina adikabi. 42 Bea, sɛndjɛlɛni tina ɛ boo otadjebakani iswi ilidoabi Kumu ɔ boono. 43 Sipoani modjɔ mu opele: nga moswa ndako adjeba ehole ndani edoalea moibi na bulu, eke asɛndjɛlɛ ko aimokina boo aingee ta ndako ɛ nde. 44 Ta tina ena, ino koko, salingoani, tina ɛ boo Mwana ɔ moto adoalea ta ehole edii no pɛpɛ olɛdja.»

45 «Bea odii mosali ɔ odjoo ko ɔ owɛi nda? Edii ona ɔbala moswa nde boo: naopi mosala muu, yakedja basali bakina ta ehole eboani. 46 Sepi odii mosali ona, nga ta ihule la moswa nde ko amotanei asala mosala mua. 47 Nabalaka na nu, sooti boo: moswa nde amopalea mandi ma obanyea odiheli ba nde bosusu. 48 Endolo nga mosali ona akada mosali ɔ pɛpɛ owɛi, ko asabalei boo: "Moswa mbai atahula pɛpɛlɛ", 49 ko abangi oboma bamina nde ba mosala, oyaka na omwa esika emɔti na bato ba ilangoa la mana. 50 Bea, moswa nde ahulalea ta iswi idii mosali pɛpɛ omolɛndɛ ko ta ehole edii yo pɛpɛ odjeba; 51 abenganalea mosali ona ko amopalea etumbu epipo esika emɔti na bato ba owɛi bobe, oho okayee bo na okapkɛkɛnɛ bo mino.»