1 Ehole ɛya busa, bakumu basusu ba banganga ba Ndjambe na basuku ba Bayuda baputoana bɛngɛ baonge mwango ma oowa Yesu. 2 Bamonanga mbɔti, bamotomba ko bamokaba ta mabɔ ma kumu Pilato.

3 Yudasi ona ɔtɛkɛ Yesu, aoka gala boo bamolenei etumbu. Aoka saya enɛnɛ ta molema ko akɛɛ asɔmbɛdja falanga dja bibende tuku isato odii bakumu ba banganga ba Ndjambe na basuku ba Bayuda. 4 Abala na bu boo: «Nakɔi isumu, tina ɛ boo nakabi moto ona ootaki obe ta ogwa!» Endolo ibo bamosɔmbɛdja boo: «Modjɔ mua moloeniti iso! Moeni wɛ mɛɛnɛ!» 5 Yudasi adumba falanga ta Tepelo ko adonga ena; bea akɛɛ asakoma. 6 Bakumu ba banganga ba Ndjambe batuta falanga djia ko babala boo: «Mobeko ma booso motapaka enɔli boo laise falanga djii ta odiheli ba Tepelo, tina ɛ boo idii falanga dja makia*.» 7 Ngɔngɔ dja odhimeana, basomba na dju gue ɛ mosali ɔ poke tina ɛ okunda bakɛndɛli. 8 Ta tina ena mbunoko busabu bakabee gue ena «gue ɛ makia*.» 9 Bea bibaeli ibabala motɛli Yelemia bakokedjama: «Batomba falanga dja bibende tuku isato motswuia imalena bato ba Isalɛlɛ tina ɛ nde 10 ko basomba na dju gue ɛ mosali ɔ poke, moda imalomani Kumu*.»

11 Yesu asambi boso ba gupunɛlɛ. Gupunɛlɛ amohɔdja boo: «Odii kumu ɔ Bayuda?» Yesu amosɔmbɛdja boo: «Wɛ moto obali.» 12 Ngɔngɔ djia, ehole ɛmopunda bakumu ba banganga ba Ndjambe na basuku ba Bayuda, aisɔmbɛdja noko eka emɔti. 13 Bea Pilato abala na nde boo: «Otaokaka midjɔ mia misusu mabalaka bo tina ɛ wɛ?» 14 Endolo Yesu aisɔmbɛdja noko ebaeli emɔti, ko gupunɛlɛ akamoa obuke mɛɛnɛ.

15 Eengi tɛkɛ ɛ Pasika, gupunɛlɛ adaka na modjebeano ma otingoa moto omɔti ta bɔlɔkɔ ona ɔhɔkɔ bato. 16 Ehole ena, moto ɔ bɔlɔkɔ omɔti adaka ena ona ɔdjebamaka obuke ɔ kombe ɛ Balabasi. 17 Bea Pilato ahɔdja emumu ɛ bato boo: «Ɔpalaka no boo naotingoeni nda: Balabasi kaoko Yesu okabee bo Masia?» 18 Pilato adjeba opele boo, bakaba Yesu ta mabɔ ma nde ta tina ɛ ikua. 19 Ena ɔdaka Pilato ta tibinalo, mwali ɔ nde amolomea mosise boo: «Pɛpɛ oingea ta midjɔ ma moto ona ɔ odjoo, tina ɛ boo, bulu ba busabu naeni saya mɛɛnɛ ta ndjɔti diko la nde.»

20 Bakumu ba banganga ba Ndjambe na basuku balongoa emumu ɛ bato boo bahɔdjae Pilato atingoe Balabasi ta bɔlɔkɔ ko aowoe Yesu. 21 Gupunɛlɛ abahɔdja koko boo: «Ta ndanda ɛ ibo babae ɔpalaka no naotingoeni nda?» - Bamosɔmbɛdja boo: «Balabasi!» 22 Pilato abahɔdja boo: «Ɔkɔkɔ mbai na Yesu ona okabee bo Klisto enao?» Bato basusu basɔmbedja boo: «Abakame ta ekulusu!» - 23 Pilato ahɔdja koko boo: «Obe bokɔi yo nda?» Endolo bagama na ngulu oonɔ boo: «Abakame ta ekulusu!» 24 Ehole ɛenɛ Pilato boo atahɔnɔ okɔ eka emɔti, endolo wusuwusu ɛnɛngɛkɛ oko onɛngɛ, atomba madiba, asasosa mabɔ boso ba emumu ko abala boo: «Naditi na mandi ta ogwa ba moto hoo! Edii modjɔ ma boono!» 25 Bato basusu basɔmbɛdja boo: «Yɛɛ boo makia ma nde mabakame diko la booso na diko la baana ba booso!» 26 Pilato abatingoa Balabasi; ko ngɔngɔ dja obomedja Yesu pimbo, amopa ta mabɔ ma bobo bɛngɛ bamobake ta ekulusu.

27 Bea bakɛɛ na Yesu ta ndako ɛ gupunɛlɛ ko basoda bike bamohika. 28 Bamoihwa bisendja ba nde ko bamolwɛdja mokoto mokpetu. 29 Bayoa egbala ɛ ndjubɛ bamobakea yo ta molo, ko bamopedja kusu ta ebɔ ɛ bami. Ngɔngɔ bakwaa magunda boso ba nde ko bamosɛkɛ ena babala boo: «Bwanda, kumu ɔ Bayuda!» 30 Bamotɔkɔ masɔi ko batomba kusu ena bamoboma ta molo. 31 Bea ngɔngɔ dja omosɛkɛ, bamoihwa mokoto, bamolwɛdja bisendja ba nde ko bakɛɛ na nde bɛngɛ bamobake ta ekulusu.

32 Ehole ɛimana bo ta ibonga, basaka na moto omɔti ɔ Silɛne, ɔ beaka bo Simo; basoda bamopea na ngulu bɛngɛ atombe ekulusu ɛ Yesu. 33 Ehole ɛimea bo ta esika ɛbeaka bo Gologota, ɛtingodjaka boo «esika ɛ mokua ma engbongolo ɛ molo». 34 Bapa Yesu mana ma ngai; endolo ehole ɛmalɛlɛ yo, alona omamwa. 35 Ngɔngɔ dja omobaka ta ekulusu, basakaanea bisendja ba nde na oboma djeke. 36 Ko badaa ena bɛngɛ bamosɛndjɛle. 37 Diko la molo ma Yesu, babaka ma yaale ɔ ibaya ɔkoma bo tina ɛ etumbu ɛ nde: «Moto hoo adii Yesu, kumu ɔ Bayuda.» 38 Baowoli ba bato babae babakama engbanga na Yesu, omɔti ta ebɔ ɛ nde ɛ baami ko okina ta ebɔ ɛ nde ɛ bali.

39 Binɔ na ndjia badaka bamosinga ena bakumana melo; 40 babalaka boo: «Wɛ ona ɔbalaka boo obukalea Tepelo ko ɔyepikalea koko na maswi masato, saheledja wɛ mɛɛnɛ, nga okadaa Mwana ɔ Ndjambe, donga ta ekulusu!» 41 Bakumu ba banganga ba Ndjambe, bato ba edjebeli ɛ mobeko na basuku badaka koko basɛkɛ Yesu ko babalaka boo: 42 «Aheledjaka bato bakina, endolo yo mɛɛnɛ atahɔnɔkɔ osaheledja! Adii kumu ɔ Isalɛlɛ? Yɛɛ boo atite hadɛdi ta ekulusu ko lomodhimealea. 43 Aisaka molema odii Ndjambe, yɛɛ boo Ndjambe amotingoe hadɛdi nga akamopala, tina ɛ abala boo: "Nadii Mwana ɔ Ndjambe."» 44 Baowoli ba bato ibabaka bo engbanga na Yesu ta ekulusu badaka koko bamosinga moda momɔti.

45 Donga ehole ɛ midi, mbunoko ehole ɛ basato ɛ mɔkɔmɔkɔ modidi makwa ta ngondo esusu. 46 Mbuti na ehole ɛ basato ɛ mɔkɔmɔkɔ, Yesu agama na moholi mopipo boo: «Eli, Eli, lema sabakatani?» Ɛbalaka boo: «Ndjambe ɔ mbai, Ndjambe ɔ mbai, osundolini tina nda?» 47 Bato bakina ibadaka ena bamooka ko bagama boo: «Abeaka Elia!» 48 Ambuku omɔti ɔ bobo apeta atomba imbusu, alidubea ta vino ɛ ngai; alihangea ta sɔngɔ ɛ mokɛɛlɛ, ko alihwedja odii Yesu boo alimwɛ. 49 Endolo bakina bato babala boo: «Omba, lahokee kaoko Elia adoalea amoheledja!»

50 Endolo Yesu agama koko na ngulu ko agwa. 51 Oko ta ehole ena, lido ɛ Tepelo ɛolea biale bibae donga odiko mbunoko onase. Mokpɔtɔ makumana, ndeke inɛnɛnɛ djanangoa, 52 mibombo masadipoa ko mikuku ma basɛnɔke bike ibagwa mapusoa. 53 Baimana ta mibombo ko, ngɔngɔ dja opusoama ba Yesu, baingea ta Yelusalɛmɛ, ibonga isɛnɔke, ko baenɛmɛ na bato bike. 54 Kumu ɔ basoda ɔ Loma engbanga na basoda ibadaka babanyea Yesu ehole ɛenɛ bo moda imakumana mokpɔtɔ na midjɔ misusu imanɔɔ; badaa na bɔɔ bonɛnɛ ko babala boo: «Moto hoo adaki sooti Mwana ɔ Ndjambe!» 55 Bali bike badaka ena ko badaka bahokea ohali: bakimana Yesu donga Galilai bɛngɛ bamokɔmɛdjae. 56 Ta ndanda ɛ bobo, ɛdaka Malia ɔ ngando ɛ Magadala, Malia nɛngɛ Djake nɔbɔ Yosepu, na nɛngɛ baana bami ba Djebedai.

57 Ehole ɛimea mɔkɔmɔkɔ, modiheli omɔti ɔ ngando ɛ Alimate aimea. Kombe ɛ nde Yosepu ona ɔdaka koko motingami ɔ Yesu. 58 Akɛɛ odii Pilato ko asɛngɛ mokuku ma Yesu. Bea Pilato apa enɔli boo bamopɛ yo. 59 Yosepu atomba mokuku ma Yesu, ayedinga na dhala ɛ soa ɛ tɛtɛli 60 ko ayesambea ta mobombo ma yanie imatɔdja yo ta mondeke monɛnɛ tina ɛ nde. Bea ahilingoanedja mondeke monɛnɛ tina ɛ odipa eingeli ɛ mobombo ko ayana. 61 Malia moto ɔ ngando ɛ Magadala na Malia okina badaka ena, bayɛli mobombo.

62 Ngɔngɔ dja iswi imɔti, iswi ilakimana obɔngɛdjama ba sabata, bakumu ba banganga ba Ndjambe na Bafalusai bakɛɛ odii Pilato 63 ko babala na nde boo: «Kumu, lalɛdjaka midjɔ mabala moto ona ɔ epulu, ehole ɛdaka yo ta mohelo, abala boo: "Ngɔngɔ dja maswi masato, apusoalea." 64 Bea, pa enɔli boo basɛndjɛlɛ mobombo mbunoko iswi la basato, bɛngɛ boo batingami ba nde basakaa doa aiba mokuku ma nde ko babale na bato boo: "apusoi ta ndanda ɛ bago." Epulu ena ɛ suka edalea ebe onɔɔ epulu ɛ boso.» 65 Pilato abala na bu boo: «Tombani basindjili ko kɛɛ asɛndjɛlɛni mobombo moda mapalaka no.» 66 Bea bakɛɛ ko bakɔɔ midjɔ imaboanaka boo mobombo mabanyeame opele, badipa eingeli ɛ mobombo na mondeke ko badikaka basindjili.