1 Ngɔngɔ dja obala bea, Yesu angangodja miso o diko ko aongɔɔnɔ boo: Tata, ehole eimei. Enɛmɛdja ekumu ɛ Mwana ɔ wɛ, bɛngɛ boo Mwana aenɛmɛdjae koko ekumu ɛ wɛ. 2 Ɔmopa kpati diko la bato basusu, bɛngɛ boo apɛ mohelo ma kɔbili odii bia ibamopa wɛ. 3 Na bea, mohelo ma kɔbili modii boo baodjebe, wɛ ona odii oko wɛ mbuki Ndjambe ɔ sooti, ko badjebe Yesu Klisto ona ɔloma wɛ. 4 Naenɛmɛdja ekumu ɛ wɛ ta ngondo; nakokedjai mosala imapani wɛ boo nasale. 5 Ko hadɛdi, Tata, pani ekumu ena ɛdaka na mbai mbuti na wɛ boso boo ngondo ɛyoame. 6 Naenɛmɛdja kombe ɛ wɛ odii bato ibatomba wɛ ta ngondo bɛngɛ ɔbapɛni. Badaka bato ba wɛ, ko ɔbapani, ko basuma ebaeli ɛ wɛ. 7 Hadɛdi badjebi boo midjɔ misusu mapani wɛ madonga odii wɛ, 8 tina ɛ boo nabapi bibaeli ibapani wɛ, ko babiosi. Badjebi boo nadonga sooti mɛɛnɛ odii wɛ ko badhimi boo wɛ ɔlomani.

9 Naongɔɔnɔkɔ tina ɛ bobo. Nitaongɔɔnɔkɔ tina ɛ ngondo, endolo tina ɛ bii ibapani wɛ, tina ɛ boo badii bato ba wɛ. 10 Bato basusu ba mbai badii ba wɛ, ko bato basusu ba wɛ badii ba mbai ko ekumu ɛ mbai ɛenɛmɛ ta tei ɛ bobo. 11 Pɛpɛ ekoka nadɛtelea ta ngondo, endolo ibo badii ta ngondo; mbai nadoi odii wɛ. Tata mosɛnɔke, babanea ta kombe ɛ wɛ, kombe ena ɛpani wɛ bɛngɛ boo badae omɔti elengɛɛ mbai nɔsɔ wɛ odiso omɔti. 12 Ehole ɛdaka mbai na bu, nababanyea na kpati ɛ kombe ɛ wɛ, kombe ena ɛpani wɛ. Nababanyea ko omɔti ɔ bobo aibunga, dongedja oko ona ɔboanaka osabungedja, bɛngɛ boo Ikomi lakokedjame. 13 Ko hadɛdi nadoi odii wɛ. Nabalaka bea ta ehole hee edii mbai oko ta ngondo bɛngɛ boo badihe ta ndanda ɛ bobo mɛɛnɛ sepi ɛ mbai, sepi na osusu. 14 Mbai nabapi ebaeli ɛ wɛ, ko ngondo ebaokei swɛ, tina ɛ boo baditi bato ba ngondo, elengɛɛ mbai odii mbai pɛpɛ odaa moto ɔ ngondo. 15 Nitaongɔɔnɔkɔ boo ɔbadongedjae ta ngondo, endolo obabanie odii Satana. 16 Baditi bato ba ngondo, elengɛɛ mbai naditi moto ɔ ngondo. 17 Kɔɔ boo badae bato ba wɛ na osusu na ndjia ɛ sooti; ebaeli ɛ wɛ edii sooti. 18 Nabalomi ta ngondo oko elengɛɛ ɔlomani wɛ ta ngondo. 19 Nasakabi na osusu odii wɛ tina ɛ bobo, bɛngɛ ibo babudjeame koko ndjia ɛ sooti.

20 «Nitaongɔɔnɔkɔ etoko ta tina ɛ bobo, endolo koko ta tina ɛ bia ibadimeabini na ndjia ɛ bileho ba bobo. 21 Naongɔɔnɔkɔ bɛngɛ boo ibo basusu badae omɔti. Tata, badae omɔti moda modii mbai nɔsɔ wɛ omɔti. Badae omɔti bɛngɛ ngondo ɛdhime boo ɔlomani. 22 Nabapi ekumu ɛpani wɛ, bɛngɛ badae omɔti elengɛɛ odii mbai omɔti nɔsɔ wɛ. 23 Nahelaka ta tei ɛ bobo, wɛ ɔhelaka ta tei ɛ mbai; na ndjia ena badalea omɔti na osusu, bɛngɛ ngondo ɛdjebe boo ɔlomani ko boo okabapale elengɛɛ okapaleni wɛ. 24 Tata, ɔbapani, ko napalaka boo nadae na bu esika ena edii mbai, bɛngɛ boo baenɛ ekumu ɛ mbai, ekumu ɛpani wɛ, tina ɛ boo ɔpalani boso ba oyoa ngondo. 25 Tata ɔ odjoo, bato ba ngondo baiodjeba, endolo mbai naodjeba ko bato bii badjeba boo ɔlomani. 26 Naabadjebedja kombe ɛ wɛ ko nayedjebedjabi koko odii bo, bɛngɛ boo epaeli ekapaleni wɛ ɛdae odii bo ko boo mbai mɛɛnɛ nadae ta tei ɛ bobo.»